عندى مشكلة فى عربيتى برجاء المساعدة

[elgafare]

السلام عليكم و رحمة الله
يا اخوانى انا معايا بيجو 406 موديل 2002 كرستالة مشكلتى انى اوى ما اشغل التكيف درجة حرارة السيارة ترتفع اكثر من 90 و تعلى اكثر لحد ما تعطينى انظار و اطفى التكيف تبدا تبرد حبة حبة الى ان توصل الى المعدل العادى ارجوا المساعدة

[monamize4]

مبدأيا كده ,, بص على المرواوح قبل و بعد تشغيل التكييف
هل المروحة بتنقل للسرعة التانية او المروحة التانية بتشتغل ? (او حسب نظام التبريد الاصلى لل 406 )

[pepo2011]

المفروض اول ماتشغل التكيف تشتغل المراوح سرعة تانية واضح ان دا مش بيحصل مع حضرتك بدليل لما بتطفي التكيف العربية بتبرد لاااااااازم واحد اخصائي بيجو يشوفها لو سمحت مش اي كهربائي عشام مايبوظش الكارتة ونظام التبريد لازم تتظبط عند كهربائي بيجو

[اياد علاء]

لازم كهربائى متخصص ومش اى حد لازم يكون اشتغل فى التوكيل او اتخرج من الكلية المناسبة

[TeMoON]

الموضوع دا كان معايا زمان فى 406 2001 وكان فى 206 2002 فا انت تروح لكهربائى بيجو يبصلك عليها او كهربائى شاطر

[elgafare]

اشكركم جدا جدا يا اخوانى افادكم الله

[adhamghaly]

قبل ما تعالج مشاكل الحرارة مع التكييف لازم أول حاجة لازم تعملها هي فحص عام على دورة التبريد:

1. روح نضف الردياتير من جوه لأنه ممكن يكون معبي صدا و بلاوي كتير.
2. طلع طرمبة المياه و شوفها كويسة ولا محتاجة تتغير.
3. إتأكد إن كل خراطيم المياه كويسة و مفيهاش شقوق.

بعد كده، لازم تعمل فحص على المروحة عشان تتأكد إذا كانت بتشتغل على السرعتين ولا لأ:

1. دور العربية و استنى الحرارة تعدي 80، و شوف السرعة الأولانية للمروحة شغالة كويس ولا لأ. لو شغالة إحفظ صوتها.
2. شغل التكييف و شوف السرعة التانية للمروحة اشتغلت ولا لأ. هاتعرف إنها اشتغلت لو لقيت صوت المروحة بقى أعلى.

لو المروحة مش شغالة على السرعة التانية ممكن تكون كتاوت المروحة fan relays مش شغالة. دي محتاجة كهربائي يبص لك عليها أو مركز خدمة كويس.

لو المروحة شغالة غلى السرعة التانية لكن برضه العربية بتسخن بعد الفحص العام اللي عملناه على دورة التبريد فوق، دا ممكن يكون معناه إن بلي المروحة بقى خشن و مش بتدور بسرعة كافية. ساعتها هاتحتاج تغير المروحة.

نصيحة أخيرة، ياريت تطلع حساسات الحرارة و تتأكد إنها نضيفة، و لو مش نضيفة ياريت تخلي الميكانيكي يصنفرها و يركبها تاني أو يغيرها لو المشكلة لسه موجودة.