بيجو 301 ولا ستب واي؟

[EgyKnight2015]

السلام عليكم يا شباب...انا كنت عايز اخد رأيكم هل اجيب بيجو 301 هاي لاين 2016 ولا رينو ستب واي 2016...انا عارف ان ديه فئة وديه فئة وفيه فرق في الوسع وكده بس انا سؤالي اكتر على الاعتمادية والمشاكل والاعطال والاداء...ولكم جزيل الشكر

[Mahony]

انا اعرف البيجو و مستخدمها صار لي ٤ سنوات ، بكره ان شاء الله ح استلم البيجو ٣٠١ اعلى فئه .
ان من محبي هذه السيارة الأوربية و لسبب مهم جدا ، سعرها معقول و فيها كل اللي احتاجه ، و عربيّات يعتمد عليها .
قيادتها أفضل بكتير من الياباني و الكوري و ثباتها في الطريق أفضل .
حاولت ادخل على المواقع الأجنبية عشان اجيب لك معلومات عن الرينو ستب واي مش ملاقي اسم العربية ( يمكن في مصر اسمها ستب واي ) .
بالنسبة لتصنيف الشركات الفرنسية
١- بيجو ٢ - الرينو ٣- الستروين .

بالنسبة للاستخدام بكل صراحة السيارات الأوربي عايزه واحد يكون سواقته هادئه ، الياباني و الكوري يستحملوا البهدلة و السواقة العفشه شويه ، اعادة البيع الياباني و الكوري يتفوق بمراحل عن الأوربي .

شوف لي اسم الستب واي ، و انا ممكن اشوف المنتديات الأجنبية و أقول لحضرتك عنها .

[Moe86]

اسمها سانديرو step way
حضرتك اركب السانديرو و اركب 301, هتلاقى فرق شاسع فى الخامات و التصميم, لازم تشوف بنفسك
دة غير فرق اداء الموتور و استهلاك البنزين, الستيب واى استهلاكها غبى

[sonah4ever]

متابع انا بفاضل بين السيارتين
بس سمعت ان قطع غيار البيجو غالية قوى و مستهلكة لتيل الفرامل و الطنابير و فى واحد غيروا له فلتر الهواء و فلتر البنزين و البوجيهات فى صيانة ال 10 الاف كيلو

[Dr.Shimaa M]

السلام عليكم يا شباب...انا كنت عايز اخد رأيكم هل اجيب بيجو 301 هاي لاين 2016 ولا رينو ستب واي 2016...انا عارف ان ديه فئة وديه فئة وفيه فرق في الوسع وكده بس انا سؤالي اكتر على الاعتمادية والمشاكل والاعطال والاداء...ولكم جزيل الشكر

هناك فرق شاسع بين الفئتين
فـ رينو ستيب واي فئه اقل من بيجو 301 فلا يصح المقارنه بينهم
ولكن ,,

لامتلاكي السياره بيجو 301 ,, اقدر افيد حضرتك في بعض النقاط

العربيه اعتماديه من الدرجه الاولي
امكانيات عاليه
عربيه واسعه جدا و مريحه
اعطالها قليله جداا ومفيش اي مشاكل بتحصل تذكر غير النتشه فقط و مش مع كل الناس
ادائها عالي جدا
و في ميزه وفرة مراكز الصيانه المعتمده من بيجو في اغلب الاماكن
فعلا العربيه ممتازة وثابته جدا علي الطريق و اثبتت جدارتها

واي استفسار انا في الخدمه

[Dr.Shimaa M]

متابع انا بفاضل بين السيارتين
بس سمعت ان قطع غيار البيجو غالية قوى و مستهلكة لتيل الفرامل و الطنابير و فى واحد غيروا له فلتر الهواء و فلتر البنزين و البوجيهات فى صيانة ال 10 الاف كيلو

انا مالكه لبيجو 301 من سنتين ونصف و بقول لحضرتك العربيه ممتازة

قطع الغيار رخيصه ومتوفرة بسهوله مقارنه بالعربيات التانيه ال في نفس الفئه

تيل الفرامل متصنع من مواد صديقه للبيئه عشان كدا بيخلص بسرعه بس لقينا حل للموضوع دا تيل الفاليو
وعلي فكرة تيل ال 301 الاصلي بيعد اكتر من 10 الاف كل واحد علي حسب طريقه سواقته و رجله علي الفرامل ازاي و في ناس وصل معايا ل 20 الف و 30 الف عادي

الطنابير محدش غيرها قبل 30 الف خالص غير ملاك قليلين جدا وكانت 20 الف

البوجيهات زي ما هي مغيرتهاش اهو وانا بقالي بيها سنتين ونص و اغلب الملاك كدا