الحمد لله اشتريت بيجو 307 موديل 2007 هاتشباك طلب مشورة

[drshata]

الحمد لله اشتريت بيجو 307 موديل 2007 بس فتح السقف والتكييف مش شغالين فهل لهم علاقة ببعض وايه ممكن تكون المشكلة اللي اشتريت منه بيقول فيوز فلو صح اروح لمين يعمله
وايه الحاجات المهمة اللي لازم تتعمل في العربية انا ناوي اغير الزيت وكل الفلاتر فهل في حاجة تانية ممكن تتعمل وايه افضل زيت ممكن استعمله
وشكرا مقدما

[MuhamedNabil]

حضرتك غلط لما اشتريت العربية بالعيوب دى خصوصا التكييف لان ان الموضوع لو فيوز كان المالك خلصها فى 5 دقائق بدل محد يفاصل معاه باعتبار العيوب دى.

قدر الله و تتطلع بسيطة انشاء الله. ممكن تروح تكشف على الحجات دى فى التوكيل او مركز خدمه معتمد على حسب مكانك فين ممكن تروح الاقرب ليك.

فى مودرن سيرفيس ده فى النزهة طريق المطار و فى غمرة و فى واحد فى صقر قريش اسمه الدهشورى و ده يعتبر ارخصهم فى المصنعيات.

[م أحمد]

فى كهربائى عند مدرسة ال بى بى سى جنب الحرفيين اسمه الدكتور...ناس كتير بتشكر فيه

[drshata]

جزاكم الله خيرا علي الرد
بالنسبة لفتحة السقف المشكلة طلعت من الزرار اللي بيفتح طلع بيعلق اما موضوع التكييف ان شاء الله انزل الحرفيين
المشكلة ان الشرقية ما فيهاش حد بيفهم في البيجو فصاحبها ما كانش بينزل القاهرة والعربية كانت تقريبا واقفة ما بتتحركش

[drshata]

طيب المرايات كهربا ينفع نغيرها نخليها ضم
وايه افضل زيت للموتور

[محمد ابراهيم2]

ممكن تشوف محمود الاحمر عند موقف المنصورة راجل كويس في شغل التكييف انا جربته في عربيتي وعربية اخويا وبصراحه تمام

[drshata]

ممكن تشوف محمود الاحمر عند موقف المنصورة راجل كويس في شغل التكييف انا جربته في عربيتي وعربية اخويا وبصراحه تمام

فين بالضبط ولو فيه تليفون ابعته لي خاص

[Moe86]

افضل زيت متوفر بسهولة شيل هيلكس الترا (ال10000)

[pepo2011]

عندك محمد الكهربائي قدام البي بي سي معروف جدا
وجنبه ميكانيكي اسمه محمد برضو
وانشاء الله خير

[drshata]

الحمد لله التكييف اشتغل طلع المشكلة لوحة التكييف اللي جوة العربية غيرتها ب 250 جنيه وشغال زي الفل