تقرير بسيط عن امتلاكي لـ بيجو 301

[Dr.Shimaa M]

السلام عليكم ورحمة الله وبركاته

بيجو ٣٠١ معايا من سنتين ونص ,, العربيه هايلاين ..


المشاكل الـ قابلتني خلال امتلاكي السياره الفترة دي :
مفيش اي مشكله قابلتني الحمد لله ,,
غير حاجه واحده بس وكانت النتشه ؛ و دي راحت بأني عملت update للسوفت وير في التوكيل.


تاني حاجه:
توكيل بيجو بقي في تحسن مستمر و ابو رواش و غمرة اتحسنوا جدا وبقو يخدمو العميل كويس،،
وفي حاله عدم رضاك عن الخدمه هناك في حلول اخري مساعده ،،
دا حليناه ازاي ؟
حليناه بمراكز الخدمه المعتمده ال مش بتخرج طبعا من الضمان ؛ و متواجده ف كل مكان ..
علي سبيل المثال:
اوتو سيرفس ف مدينه نصر و الوهدان ف اكتوبر و مرغم ونور الدين ف اسكندريه و مودرن سيرفس ف مصر الجديده و السعودي علي طريق اسماعيليه ..
و كلهم اثبتو مهارتهم في التعامل مع ٣٠١ الحمد لله يبقي كدا حلينا مشكله التوكيل تماما ..


انا بتم اختيار عربياتي علي عوامل معينه؛ و بعد بحث قوي ؛ و علي مجال واسع..
يعني انا عشان اجيب العربيه دي،،
لفيت علي كل المعارض و التوكيلات؛ دا بجانب حضوري معرض اوتوماك للسيارات سنويا ف عندي علم كبير الحمد لله بالسيارات و فئاتها و اسعارها و عيوبها و مميزاتها ..


**نيجي نتكلم عن العربيه ذات نفسها كدا بقي **


# عربيه ممتازه هقولكو ليه ؟؟!


١- عربيه الصالون بتاعها واسع جدا بدرجه ملحوظه ،، يعني الكنبه اللي ورا المكان قدامها فعلا واسع جدا و نفس الكلام قدام في مساحه كبيرة و كافيه جدا ..
حتي لو الكرسي الامامي راجع لورا في مساحه كبيرة فاضيه امام الكنبه .
٢- بتتميز برده بـ وسع الشنطه الكبير و سعتها ٥٠٦ لتر و بصراحه كبيره جدا .
٣- عربيه من انتاج بيجو و في نفس الوقت سعرها قليل جدا لانها عربيه اقتصاديه من الدرجه الاولي .
٤- من وجهة نظري و نظر ناس كتير احسن عربيه في فئتها من حيث الامكانيات و السعر و التصميم الخارجي ليها و خطوطها الانسيابيه.
٥- العربيه ناعمه الحمد لله.
٦- في مشكله بسيطه فيها ان صوت الموتور عالي شويه؛ ودا عامتا معايا مش مأثر.
٧- فراملها ما شاء الله ممتازه،، و العربيه فيها ABS مانع الانغلاق و بتقف معاك علطول و انقذتني من حوادث محققه الحمد لله بفضل ربنا .
٨- العربيه فيها سينسور بارك؛ و شاشه فيها صوره كارتونيه 3D للعربيه ال وراك؛ و مؤشرات علي الاكصدام الخلفي عندك من اليمين و الشمال و النص ف بتعرف انت مقرب من اني ناحيه بظبط .
٩- فيها بلوتوث و طبعا بتوصل موبايلك بالعربيه و بتتكلم عادي و رقم الطالب بيظهر علي الشاشه وفيه مايك ف العربيه.
١٠- دراع multi function تقدر تتحكم منو بالراديو و تحول القنوات و الصوت و كدا.
١١- الشاشه فيها شرح تفصيلي لبيانات استهلاك الوقود.
١٢- تيل الفرامل بيعد معاك من 10,000 لـ 20,000 وتغيرو بتيل التوكيل بـ حوالي 500 جنيه او تيل فاليو اسباني ب 210 و احلي من تيل التوكيل ،،
و عامتا تيل التوكيل معمول من مواد صديقه للبيئه.
١٤- المرايات ف الهايلاين التحكم فيها بالكهربا مش مانيوال .


و بكرر الفرامل ممتازه ما شاء الله و مفهاش اي مشكله الحمد لله دا الـ جه ف بالي دلوقتي
و العربيه فيها مميزات اكتر بكتير


و اي استفسار انا موجوده ..

[itمحمد سيد]

انا باكد علي كلام حضرتك بخصوص العربيه انا معايا البيزلاين و اكتر حاجه تعباني فيها هو تيل الفرامل اللي بيخلص بدري ياريت حضرتك توضيح للنوع الاسباني بيخلص علي كام تقريبا و مكان بيعه و اذا كان الموجود منه في السوق كله اصلي ولا فيه مغشوش

[Dr.Shimaa M]

انا باكد علي كلام حضرتك بخصوص العربيه انا معايا البيزلاين و اكتر حاجه تعباني فيها هو تيل الفرامل اللي بيخلص بدري ياريت حضرتك توضيح للنوع الاسباني بيخلص علي كام تقريبا و مكان بيعه و اذا كان الموجود منه في السوق كله اصلي ولا فيه مغشوش

تيل الفرامل البديل ليه الفاليو و دا صناعه اسباني بيكون ب 210-230 جنيه وفي ناس طبعا مغليه لحد 300 جنيه
في منه هندي دلوقتي بس ال انا مجرباه وملاك تانيين الاسباني وممتاز جدا عيبو بس انه بيصفر
و كله اصلي عادي بس فرق الصناعه و بيتباع في محل اسمه غزال ف شارع دمشق وفي التوفيقيه بس معرفش محل ايه تحديدا عنده

[tameem2010]

ممكن استفسار بخصوص التكييف بتاعها خاصة في الحر الشديد بتاعنا ده التكييف اخباره ايه ؟