مشكلة فى رشاشات بيجو 206

[mahmoud mosall]

بسم الله
عندى مشكلة فى العربية بيجو 206 موديل 2001 والعربية 1200cc .
العربية بقالها حوالى اربع او خمس شهور وهى " متلته " ومفيش حد عارف ليه علما بانى قمت بتغيير طقم الرشاشات بالمسترة كامل من حوالى سنة .
اولا وضعتها على الجهاز وظهر لى اكواد الالرمات دى (( p0300 -- p0352 -- p0170 ))
ثانيا . اللى فهموهولى ان فيه مشكلة فى موبينة الرشاش الثانى مما جعلنى اشترى طقم رشاشات بالمسترة كامل للمرة الثانية
ثالثا قمت بتركيب طقم الرشاشات الجديد " استراد " ولكن الموضوع فشل اكتر لان العربية فصل منها رشاش ثانى وبقت ماشية باثنين رشاش فقط .
رابعا بعد الفك والتربيط والكشف وعمل ريست للالرمات فضلت العربية زى ما هى
خامسا بعد مشاورات ومداولات من الصنايعية اجمعوا بانه جوان وش السلندر
سادسا قمت بتغيير جوان وش السلندر مع انى مغيره من حوالى 8 شهور + جلب صبابات + تنعيم بالمخرطة .
النتيجة ان العربية زى ماهى
سابعا بعد مشاورات ومداولات الصنايعية اجمعوا بان الموضوع كهرباء بالكمبيوتر الخاص بالعربية .
ثامنا الاجماع الاخير بان سلوك الرشاشين الثانى والثالث فيهم مشكلة او الكمبيوتر هو اللى فيه مشكلة ...
اسف للاطالة وارجو الافادة من اصحاب الخبرة ...

[م أحمد]

بسم الله
ثامنا الاجماع الاخير بان سلوك الرشاشين الثانى والثالث فيهم مشكلة او الكمبيوتر هو اللى فيه مشكلة ...
اسف للاطالة وارجو الافادة من اصحاب الخبرة ...

و أكد كمان بالاضافة للنقطة دى على علبة الفيوزات

[م/أحمد عبد الفتاح]

العطل بتاع p0170 ده من الاعطال السخيفة فى العربيات الاوروبى بالذات وده معناه ان نسبة الوقود الى الهواء زادت عن الحد المسموح بيه فى كمبيوتر العربية (١٤،٧:١) نحاول نوصل لسببه الاول :
- حاتنضف ال maf sensor وتكشف على الفيشة بتاعته وتنضفها بمنظف الكترونيات او فيديو بدون زيت ( فيه نوع كويس ورخيص اسمه اكاى ولونه ازرق بلاش النبيتى لان فيه زيت ) .
- حاتكشف على خراطيم الفاكيوم ( خراطيم رفيعة سودا حوالين البوابة ومانيفولد الهوا ) يكون خرطوم ملغى او مقطوع او مخلوع او مشروخ او مسدود.
- لو كل اللى فات تمام يبقى تكشف على فيشة حساس الاكسجين ( الشاكمان وتنضفها )
- هل العربية بتاكل زيت ( تتابع مقاس الزيت) لانها لو بتاكل زيت حاتبوظ حساس الاكسجين .
شوف الحاجات دى الاول وبعدين قولنا النتيجة علشان نكمل حاجات تانية .

[م/أحمد عبد الفتاح]

كمان فيه حاجه تانية انت بتقول قالولك فيه مشكلة فى بوبينة الرشاش وغيرت طقم الرشاشات !!!! ايه علاقة الرشاش بمشكلة فى البوبينة ؟؟؟؟؟ البوبينة اشارتها وكهربتها بتروح للبوجيه مش للرشاش - الرشاش بياخد اشارته من الكمبيوتر مباشرة .

[mahmoud mosall]

للاسف الميكانيكى ماسبش حاجه الا وعملها ونظف جميع الحساسات وغسلها والرشاشات والفيوزات وتم تنظيف البوابة والتشييك على جميع الخراطيم .
اما بالنسبة هل العربية بتاكل زيت ( تتابع مقاس الزيت) لانها لو بتاكل زيت حاتبوظ حساس الاكسجين
العربية مبتاكلش زيت ولكن بتحرق بنزين كتير وحرارة العربية علطول رافعة لحد 98 .
اشكركم جميعا لاهتمامكم بالموضوع
ولكن للاسف لسه العربية مركونة ومبتميش خالص لانها على اثنين رشاش بس

[mahmoud mosall]

كمان فيه حاجه تانية انت بتقول قالولك فيه مشكلة فى بوبينة الرشاش وغيرت طقم الرشاشات !!!! ايه علاقة الرشاش بمشكلة فى البوبينة ؟؟؟؟؟ البوبينة اشارتها وكهربتها بتروح للبوجيه مش للرشاش - الرشاش بياخد اشارته من الكمبيوتر مباشرة .

م / احمد
ده كان الالرم اللى طلع على الجهاز

[م/أحمد عبد الفتاح]

م / احمد
ده كان الالرم اللى طلع على الجهاز

لأ ياباشا الكود اللى طلعلك خاص بدايرة البوبينة ومافيش حاجه إسمها بوبينة الرشاش البوبينة دى بتدى كهربا للبوجيه والكود اللى طلع على الجهاز اللى هو p0352 ده بتاع بوبينة رقم ٢ وخاص بالدايرة بتاعتها - وده ممكن تكون البوبينة بايظة او سلكها بايظ ولما الكمبيوتر بيلاقى البوبينة فيها مشكلة ساعات بيقطع الكهربا عن الرشاش رقم ٢ .
الميكانيكى اخدك فى سكة تانية خاصة بالرشاشات والموضوع ثبت لك بالتجربة ان حضرتك غيرت الرشاشات ومحصلش اى تقدم .
إللى حضرتك عملته إنك غيرت مسطرة الرشاشات بالرشاشات فى حين إن كان لازم تغير مسطرة المباين ( البوبينات ) أو تفكها تكشف عليها يمكن يكون كاوتشة من اللى داخلين على البوجيهات مهربة او الفيشة العمومية بتاعة المباين اللى من فوق بايظة او مهربة .
إحتمال إن الكمبيوتر بايظ ده وارد فى كل الاعطال والاكواد - بس الاول نشوف كل حاجه تانية عدا الكمبيوتر علشان ممكن تغيره والمباين تكون بايظة ويبقى كأنك معملتش حاجه.
ممكن يكون الموتور بتاعك ليه ٢ بوبينة بس بيدوا الأربع بوجيهات لو كان كده بوبينة واحدة لما تضرب تقطع الكهربا عن بوجيهين وبتبدأ دايماً باسطوانة واحدة وبعدين تقطع التانية برضه بعدها بفترة قليلة - وبالتالى ده الإحتمال الكبير اللى بيحصل معاك - بس اتأكد المسطرة بتاعة المباين بتاعتك بوبينتين ولا اربع بوبينات
عموماً حاشوفلك صور لمسطرة المباين وانزلها هنا علشان تشوف المباين بتاعتك أنهى نوع - او لو تبص فى العربية ولوتقدر تصور المسطرة وتنزلها هنا يكون أحسن.

[mahmoud mosall]

م / احمد
اشكر حضرتك كثيرا لردك ومتابعاتك معى
حضرتك اكيد ان شاء الله صح "" بوبينة الرشاش البوبينة دى بتدى كهربا للبوجيه والكود اللى طلع على الجهاز اللى هو p0352 ده بتاع بوبينة رقم ٢ وخاص بالدايرة بتاعتها - وده ممكن تكون البوبينة بايظة او سلكها بايظ ولما الكمبيوتر بيلاقى البوبينة فيها مشكلة ساعات بيقطع الكهربا عن الرشاش رقم ٢ .""
العربية فعلا محتاجه حد كهربائى يبص عليها ويشوف الموضوع بتاع دايرة الكهرباء اللى رايحة للرشاشين ""2&3"" هما دول اللى بيفصلو
وبعد كده نشوف موضوع الكمبيوتر بتاع العربية ...
شكرا لحضرتك ولمتابعتك معايا ...

[mahmoud mosall]

اما بخصوص "" الميكانيكى اخدك فى سكة تانية خاصة بالرشاشات والموضوع ثبت لك بالتجربة ان حضرتك غيرت الرشاشات ومحصلش اى تقدم .
إللى حضرتك عملته إنك غيرت مسطرة الرشاشات بالرشاشات فى حين إن كان لازم تغير مسطرة المباين ( البوبينات ) أو تفكها تكشف عليها يمكن يكون كاوتشة من اللى داخلين على البوجيهات مهربة او الفيشة العمومية بتاعة المباين اللى من فوق بايظة او مهربة .
إحتمال إن الكمبيوتر بايظ ده وارد فى كل الاعطال والاكواد - بس الاول نشوف كل حاجه تانية عدا الكمبيوتر ""
الميكانيكى اشتغل بما يرضى الله وعمل كل حاجه فى العربية وفك كل حاجه وبص عليها لحد ما توصل لموضوع ان السلوك ممكن تكون فاصلة فعلا
بس دى غلطتى انا انى رحت حطتها على الجهاز واللى فهمته من الراجل روحت قلته للميكانيكى وان على قدى بردو فدى غلطتى انا وتحملتها للنهاية من وقت لمصاريف ومش عارف اتحرك من غير عربية .

[م أحمد]

روح لميكانيكى عنده قطع غيار يركب لك بوبينة استيراد و يجرب بيها

[mahmoud mosall]

م / احمد
دلوقتى العربية عند كهربائي بقللها يومين
شيك على الضفيرة وعلى الفيش لقاها تمام
فك الكارته ووداها عند واحد يكشف عليها
جارى المتابعة

[م/أحمد عبد الفتاح]

الاحتمال الكبير اللى عندك ان مسطرة المباين بايظة وغالبا اللى عندك ٢ بوبينة لأنى عرفت ان البوجيهات ١ و٤ بياخدوا من بوبينة والبوجيهات ٢ و ٣ بياخدوا من البوبينة التانية واللى قاطع عندك الاسطوانة ٢ و٣ فكده الاحتمال بتاع البوبينة عالى جدا

[mahmoud mosall]

الحمد لله بفضل ونعمة من الله العربية اتصلحت تمام
روحت بيها الحرفيين وخلصتها هناك
المشكلة كانت فى البستم والصباب بتوع الهواء كانوا فتحين علطول والراجل عملها وبقت تمام
شكرا للأستاذ أحمد ولكل واحد شاركنى فى الموضوع
اخر حاجه انا هبيع العربية علشان مش سالكة فى السويس وهتتعبنى تانى .