اللي عايز يقتني الاسد بيجو 508

[د.عماد صلاح]

مر عام كامل علي اقتناء البيجو 508 .....صراحه قرار الشراء كان صعب بسبب سمعه العربيات الفرنساوي ودي كمان تربو ...بس الصراحه او ماتشوف ال508 قلبك بيدق ...واول ماتقعد جواها بتنبهر من الراحه والشياكه واول ما تدوس بنزين قلبك بيتدخل ويسهل اتخاذ القرار .
انا هتكلم في الجزء الاول من الموضوع عن خبرتي انا مع السياره وبعدين عن مجمل خبرات ناس كتير اعرفهم بحكم مشاركتي في جروب السياره النشط جدا علي الفايس بوك
عيوب السياره ....مكن الزجاج هو العيب الرئيسي باظ عندي 3 مرات و صلحتهم بيبوظ في الصيف مع ارتفاع الحراره ..لكن الحمد الله تم تغيير ال4 مكنات بمكن معدل من بيجو بدون اي مقابل ضمن حمله لتغيبر المكن لم يتم دفع جنيه واحد للتغير وخرجت العربيه مغسوله ونضيفه بدون حتي فلوس للتركيب ..العيب ده انتهي
اعلي من 160 يبدا صوت الهواء يبان
السماعات متوسطه الجوده
ماكن التخزين قليله خاصه للموبايل او اي اكواب
زاويه دوران السياره كبيره شويه
بلوتوث الموبايل احيانا بيعلق ويرجع بعد دقيقه

المميزات...اداء الموتور مع الفتيس يحتاج الي مجلدات لشرح مدي جماله وسلاسته والتسارع من اي سرعه سهل جدا وبمجرد انك تدوس دوسه قويه علي البنزين انسي ان حد يحصلك
الكراسي مريحه جدا ووضعيه القياده ممتعه تقريبا هتعوز تنزل كل يوم
الامان ثم الامان ثم الامان .....وسائل الامان من اهم مميزات السياره وكامله في اقل فئه بها من abs , ebd, asr , tcs ,و ست وسائد هوائيه ,esp
ثبات رائع وقدره علي المناوره بلاخوف حتي 180 كيلو
تكييف ممتاز وادؤه رائع جدا خاصه في السفر
السياره تعمل ب 92 بلا اي مشاكل ولا خنقه ولا صوت كركره ولاضعف في السحب ولو حطيت 95 حتحس انك راكب طياره فعلا

نصائح ..الصيانه من اهم بنود الحفاظ علي هذه السياره خاصه تغيير الزيت وده الفرق بينها وبين الكوري والياباني ...اللي ممكن تطنشه شويه ومفيش مشكله لكن هنا مفيش الكلام ده لازم الاهتمام
التعامل مع التربو لازم يكون بالعقل يعني ماينفعش الضغط المتواصل علي السياره لازم تريح التربو كل شويه بانك تمشي علي سرعه هاديه ولما تقرب من الوصول لمشوارك امشي ببطء علي اربي ام تحت 2 عشان تبرد التربو ولما توصل انتظر دقيقه قبل اغلاق الموتور
علي 80 الف كيلو غير زيت الفتيس وكولر الفتيس عشان تحافظ عليه بحالته
اشترك علي جروب السياره علي الفايس بوك لانهم اسره متعاونه وممتازه وراقيه جدا هيفيدوك في اي سؤال

في الجزء ده هتكلم عن العيوب الشائعه في العربيه وحلولها من واقع معايشتي لجروب السياره
مكن الزجاج ...وده اتكلمنا عنه
بطاريه السياره ....ولو في الضمان بتتغير مجانا
مقاومه المروحه ...ودي في حمله لتغييرها مجانا لنوع لايبوظ سريعا
طرمبه الضغط العالي ..غالبا بتحتاج تتغير بعد 80 الي 100 الف كيلو
غطاء وش التاكيهات ..غالبا بيحتاج يتغير علي 100 الف وبيجو عدلت فيه ليكون معمر اكتر من 100 الف كيلو

اخيرا.....في راي الشخصي ان ال508 من اجمل واقوي السيارت في هذه الفئه ...السياره تعمل من 2012 وعدد كبير من السيارات تجاوز 100 الف كيلو و انتشرت قطع غيارها فعلا ممكن تجيبها من خارج التوكيل بسهوله ودي مميزات لاتوجد في الفئات المنافسه

[عﻻء سالمان]

تاخد خيرها ويكفيك ربى شرها آمين

[tasaka]

علي 80 الف كيلو غير زيت الفتيس وكولر الفتيس عشان تحافظ عليه بحالته

for how much ?

thnx for a useful review

[د.عماد صلاح]

الكولر و الزيت بالضريبه والمصنعيه في التوكيل ب 6 الالاف

[tamer_ali2666]

العيوب الى انت كاتبها كأنها عادية تسقط اي عربية في اي دولة تحترم المستهلك مكن الازاز ومقاومة الطرمبة ومروحة التبريد وغطا التاكيهات ده مش عيوب بسيطة وماينفعش تظهر في سيارة حديثة وصاحبها يصلح فيها حتى لو ببلاش وهو راكب زيرو - السيارات الياباني الحاجات ده مابتظهرش لحد 500 الف كيلو اذا صاحبها محافظ عليها وفي ناس بتصين التويوتات على مليون كم بدون مايصلحوا فيها الحاجات ده

[د.عماد صلاح]

التيوتا ممكن تكون احسن في الاعتماديه بس اقل في الخامات والامان والثبات ومتعه القياده و سعر مبالغ فيه ..مفيش عربيه كامله

[juba8]

يعنى ايه زاويه دوران السياره؟؟؟؟؟؟

[م أحمد]

يعنى ايه زاويه دوران السياره؟؟؟؟؟؟

زاوية الدوران لما تكسر الدركسيون للآخر يمين او شمال و تمشى بالعربية و تشوف العربية بتاخد دائرة صغيرة و لا كبيرة فى الدوران

بمناسبة الاعتمادية ...لسا كنت راكب عربية يابانى اعتمادية و السواق خد غرزة على سرعة 80 كم/ساعة تقريبا و حسينا بالعربية بتميل بصورة خطيرة...شخط من كل الركاب فى الولد اللى سايق...قلت له دى اكتر عربية (بشكل عام لجميع ماركات السيارات على الاطلاق) تتقلب ...حوادث لناس معرفة و عربية ادام عينى مباشرة تتقلب و حكاوى من اكتر من واحد.... و انا نازل قال لى اللى ممكن تتقلب زى دى (بيشاور على واحدة تانية امامنا ) بس دى انا مجنطها !!!...يعنى مش معترض خالص ان دى عربية بتتقلب.... و لا زلت اذكر ايام العاصفة الهوائية الشديدة اللى ضربت مصر السنة الماضية و انا بتفرج على العربية الاعتمادية ماشية زى السلحفاة بين العربيات علشان تصميمها مخليها زى الشراع!!! تاخد موجات الهوا على مركز ثقل العربية.... بتتلكك يعنى علشان تتقلب..

ممكن فى الحالة دى اتنازل عن الاعتمادية و اجيب عربية صينى مشابهة ما بخلوش ب 20 سم زيادة فى عرض الشاسيه علشان راحة الركاب و أخذ بأسباب الأمان ليهم

[tasaka]

ياريت نعرف اسمها .. و التحذير واجب فى شيئ اساسى زى كده ( عربيه بتتقلب بسهوله )

شكرا

[م أحمد]

و هى فى غير السوزوكى الفان ؟! و من غير غرز و لا حاجة ...التيار الهوائى لعربية نقل جنبها بيأثر على إتزانها