Peguet 207

[Ahmad Shawky]

انا ناوى ان شاء الله اشترى البيجو 207 يا جماعه ولقيت الحقيقه مواضيع كتير فى المنتدى بتتكلم عنها بس مشتته شويه يريت لو نقدر نجمع كل الى اتقال عنها من مميزات وعيوب هنا صراحه انا حابب الهاتش باج اوى وطبعا لمه جيت قارنتها ب البولو او السيات الجديده او حتى البونتو جراند لقيتت انها تكسب يريت لو انا غلطان حد يصلحلى معلوماتى وهل هيه فعلا عربيه كويسه وايه هيه العيوب بتاعتها لو فيها وايه المميزات الى تخلينى اقبل على شرائها ان شاء الله ويريت لو حد عارف ايه احسن مكان اقدر اشتريها منو وبكام

وهل فى فرق قوى بين ال 1.4 وال 1.6 سى سى

مستنى ردودكم جميعا

-------------------
إ م -6

تم تغيير لون الخط كي يكون واضح القراءة للجميع
بواسطة المشرف الفرعي

[Mahmoud_405]

السلام عليكم اولا انا عمري ماركبت 207 بس عندي 405 وركبت ال 307 بتاعت ابن خالي وال 406 .
البيجو عربيه جمياه جدا واحسن من الياباني والكوري بمراحل
موتور بيعيش ( اكيد ال 1600 اقوي من ال 1400 )
ثبات
شكل حلو جدا
عفشه ناعمه( البيجو مشهورع بالعفشه بتاعتها)
قطع غيار غالي جدا وتوكيل حرامي بس بيفهموا في العربيات بتاعتهم وبيعرفوا اذاي يصالحوها ونادرا ترجعلم بنفس العيب

توكل علي الله وهاتها بس اعمل حسابك انك تامن عليها علشان الخبطه فيها بتعوريه جامده

[Ahmad Shawky]

شكرا لردك الجميل وان شاء الله عمل استخاره بس انا عاوز حد جريب ال 207 ويقولى رأيو الشخصى فيها وايه عيوباها


فى انتظار باقى ردود الاعضاء

[Ahmad Shawky]

معقول مفيش حد فى المنتدى عندو او جرب ال207

[Nour_Peugeot]

بص يا باشا المختصر المفيد انا نت معا الميكانيكي بتاع و واحد جبله 207 يبص عليها يجربها مكنش فيها حاجه

و الاعرفه ان بيجو عديلت فيها كل العيوب الكانت ظهرت في ال 307

من حيث الثبات بيقولي علي 160 كان بياخد غرز و هي عادي خالص ولا اكنك اخدت غرزه

امال بقي لو جيب عفشه رياضي العربيه هتبقي عامه ازاي


ثانيا انت لو هتجيب اتوماتيك متجيبش 1400 لو مانيوال مش هتفرق بس لو طالي يعني خاليك في ال 1400


لو بتحب الجري و كده هات ال 1600

نخش بقي علي الشكل

مش تكلم عليه عشان هو ازاواق و انا شايف ان مفيش عربيه بيجو نزلت شكلها وحش

و قطع الغيار يا جماعه مش غاليه زي ما كل الناس بتقول عادي والله انت بس هتدفع كتير اول سنه في التوكيل عشان الضمان لو حصل حاجه لاقدر الله

و علي فكره قطع الغيار معمره جدا جدا

و اضيفلك حاجه في ماركه قطع غيار اسمها فاليو تعتبر هي كمان الاصلي بتاع البيجو و تعتبر بنصف السعر بس غالي الكلام ده علي جمب دلوقتي

الوسع والله لو العربيه اصغر من كده برده هقول وسعها احسن من عربيات سيدان كتير

التجهيزات محدش يقدر يتكلمعلي تجهيزات البيجو عشان التكنولجيا الفيها عاليه جدا جدا

و متخفش من قطع الغيار مش غاليه اوووي مثلا تيل الفرامل الامامي بيعمله في حدود 300 : 400 جينه يعني حوالي زياده 50 جنيه عن العربيات التانيه


و ربنا ان شاء الله يكفيك شر وسوسه الشيطان


و دور علي كلامي تاني و دور عن كماليات العربيه و هتعرف انها صفقه رابحه ان شاء الله

[Ahmad Shawky]

متشكر اوى يا نور مش عارف اشكرك ازاى على المعلومات القيمه دى انا مقتنع بيها جدا لانها فى الاول والاخر بيجو بس كل الى عاوزو حد يكون جربها ويقولى من واقع ترجبه فعليا لل 207 دى حاجه الحاجه التانيه موضوع تمنها الى الناس بتقول عليه غلاى على امكانيتها وحجمها انا اخر حاجه سمعتها انها بقت ب 118 الى مانيوال ال 1400 اكيد كده غاليا جدا
يريت لو حد جربها او اشتراها او يعرف سعرها دلؤاتى يقولى عليه

وكل سنه وانتو بخير ديما وربنا يوفقنا للى فيه الخير
----------
إ م -6

[Ahmad Shawky]

يريت يا نور لو تسألى صحبك الى جابها او تدينى ايميلو اكلمو على الماسنجر علشان اعرف منو العربيه عامله معاه ايه دلؤاتى

[Nour_Peugeot]

هي مش بتاعت صحبي ده الميكانيكي بتاعي جربها بس

و انا امبارح في جرنان اخبار اليوم شايف سعرها 122 ال 1600 ال sport

فتعتبر صفقه رابحه

و لو عيز لو يبقي حوار علي العربيه دي البتنجاني تحفه


بس انا عيز لفه ههههههههه

[Ahmad Shawky]

انته تأمر بس انا عاوز اجيب 1400 لان بيقولو ب 108 او ارخص وكمان علشان البنزين اليومين دول بيغلى مش متحمله

لو عندك صوره للعربيه دى فى اى مكان ابعتلى الموقع

[SaLM!Na]

عايز صورة للعربية بس

يا سلام ده انت تأمر ده انت دخلت في وكر البيجو

عندك يا سيدي موقع بيجو

https://www.peugeot.com

و ممكن بقى تعمل على الياهو او جوجل search حتلاقي كل الصور

و في كمان موقع www.netcarshow.com ده حلو اوي برضة

و يلا عايزين نسمع اخبار كويسة و تنضم لعصابة البيجو قريب ان شاء الله

[ssafwat]

هي عربية حلوة الصراجة سلسة جداً في السواقة وسحبها حلو وبعدين موفرة في البنزين والفرامل استجابتها سريعة جداً

هو مينفعش نقارنها بالـ 307 عشان في اختلافات كتير من ناحية المحرك والفرامل

هي بس من رأي انها عربية صغيرة حبة طبعاً كلنا عارفين في البيجو ان اول رقم على الشمال مؤشر لحجم العربية بالتالي ممكن نقارن الـ 207 بالـ 206 وفي الحالة دي مفيش وجه للمقارنة الـ 207 احلى واحسن بكتير

اما بالسنبة للثبات ف ده شيء مفيهوش مجال للنقد في العربيات البيجو كلها

اما بالنسبة لموانيوال ولا اوتوماتيك ف ده تفضيل شخصي صعب التدخل او النصيحة فيه انت واللي يريحك

[Ahmad Shawky]

شكرا يا صفوت على ردك عليا ويريت لو تقولى انته جربتها بجد وله ده كلام ناس عليها هل هيه موفقه تقصد ال 1400 وله ال 1600
يريت لو حد يعرف سعر ال 1400 ايه

[Ahmad Shawky]

شكرا يا سلمينا على المواقع الحلوه فيها فعلا صوره حلوه للعربيه ادعيلى بس الاقى ال1400 رخصيه شويه عن كده

[Nour_Peugeot]

بص يا باشا استهلاك البنزين بالنسبه لل 1400 داخل البلد 6.8 لتر في ال 100 داخل المدينه
و 5.1 لتر في ال 100 كيلو في الطريق السريع


و ال 1600 الاستهلاك داخل المدينه 7.4 لتر في ال 100 كيلو
و في الطريق السريع بتعمل 5.7 لتر في ال 100 كيلو


بس نصيحه اخويه لو عيز تجيب ال 1400 متجيبش اتوماتيك خالص عشان سحبه ضعيف جدا

و ان شاء الله ربنا يبركلك فيها لو جبتها

و لو عيز اي حاجه تانيه انا تحت امرك
و دي نمرتي 0122687675

[amr mokhtar]

بص يا باشا استهلاك البنزين بالنسبه لل 1400 داخل البلد 6.8 لتر في ال 100 داخل المدينه
و 5.1 لتر في ال 100 كيلو في الطريق السريع


و ال 1600 الاستهلاك داخل المدينه 7.4 لتر في ال 100 كيلو
و في الطريق السريع بتعمل 5.7 لتر في ال 100 كيلو


بس نصيحه اخويه لو عيز تجيب ال 1400 متجيبش اتوماتيك خالص عشان سحبه ضعيف جدا

و ان شاء الله ربنا يبركلك فيها لو جبتها

و لو عيز اي حاجه تانيه انا تحت امرك
و دي نمرتي 0122687675

ما شاء الله إستهلاكها فى البنزين ممتاز
1400 مش فارق كتير عن 206 ال 1100 سى سى

على فكرة الأوتوماتيك موجود فقط فى 1600