بيجو 407 ديزل

[hany_c_v]

السلام عليكم و رحمة الله و بركاته

ازيكم يا اسود بيجو ؟؟؟؟

بصراحه انا جربت البيجو فى السعوديه و ادمنتها خلاص

العربيه ليها طابع خاص ..... انا معايا بيجو 307 و عاوز اشترى عربيه جديده موديل 2009

ايه رايكم فى بيجو 407 ديزل ؟؟؟

1600 سى سى و كمان معدل استهلاك الديزل اقل بكتير من البنزين

يعنى 60 ليتر ديزل يمشوك بالعربيه دى 1300 كيلو ..... ولا فى الاحلام طبعاا فى البنزين

بس انا خايف اشتريها و لما اجى انزل مصر ملاقيش قطع غيار و احد يعرف يعملها صيانه.

تنصحونى اشتريها ولا اشترى نوع بيجو تانى ؟؟؟؟

و ايه هوه اكتر موديل بيجو حديث منتشر فى مصر

و شكرا جزيلا

[kareem_Ashmawy]

اهلا بيك معانا فى عصابة البيجو
بص يافندم هو اكتر موديل حديث منتشر هنا فى مصر هى ال307
بالنسبة لل407
لو هى هى نفش مواصفاتها فى السعودية هى اللى فى مصر
فقطع غيارها هتبقى فى التوكيل متوفرة انما بره التوكيل مش عارف بس دى سهلة ممكن أسألك عليها
فى حاجة بقى أهم
مشكلة ال407 هنا انها بتخسر جامد اما تيجى تبيع
يعنى انا فاكر كانت اول ما نزلت الديزل كانت ب 200 الف تقريبا و بعدين رخصت ل 193
و فى الاوقات دى لقيتها معروضة فى الوسيط مستعملة ب 150 الف !!!!
.
.
دى مشكلة البيجو الحديث هنا
محتاج صيانة عند ناس متخصصين مش اى ميكانيكى عادى
و صيانة دورية و قطع غياره غالية بالمقارنة باليابانى و الكورى
فده اللى بيخلى مفيش طلب عليه و بالتالى اسعار المستعمل بتاعته بتيقى واقعة

[Nour_Peugeot]

اهلا وسهلا بيك عاشق جديد للبيجو

و بالنسبه لل 407 الديزل

اساسا كده كده الوكيل مبينزلش مصر غير الديزل

فقطع غيارها متوفره في التوكيل

و هي بالكتير اوووي سنه او سنتين و قطع غيارها هتبقي منتشره بره التوكيل

بس الصنايعيه مش كلهم هيبقو فهمين فيها اووي عشان ديزل

و ممكن برده تشوف ال 308 كويسه جدا و قطع غيارها هتنتشر بسرعه ان شاء الله

شوف الانسب ليك و اختارها

بس انا لو مكانك بامانه هجيب ال 407

كفايه عزم الديزل بتاعها 240 نيوتن عزم رهيب

و ربنا يكرمك ان شاء الله

[hany_c_v]

شكرا للردود يا احلى اسود :)

و فى انتظار اى وجهة نظر اخرى .......... انا لسه متردد 308 بنزين ولا 407 ديزل ؟؟؟؟؟؟؟؟؟؟

[Nour_Peugeot]

احب اضيف حاجه بسيطه كده بعد اذنك

جمارك ال 407 اقل من جمارك ال 308 الان بسبب اختلاف الموديل

و ثانيا

سعر لتر السولار في مصر 1.10 جنيه

اما البنزين اقل حاجه في ال 308 ال بنزين ال 92

ب 1.85 جنيه

و ربنا يكرمك ان شاء الله

[AshrafMetwally]

أحب بس أضيف حاجة صغيرة علي الكلام الهايل الي أتقال دة

ال407 الديزل عربية تحفة بكل المقاييس

بس المشكلة مش في العربية المشكلة فيالديزل الي عندنا في البلد

المشكلة أن البنزينات بتكون قديمة و تنكات الجاز مصدية دة بيخلي الجاز يتخلط بمية و طبعا بيعمل مشاكل كتيرة في الطرنبة و الرشاشات

دة طبعا غير الي بيغشو الجاز

لو أنت ضامن أنك حتوفر للعربية دي جاز نضيف يبقي أتكل علي الله و هاتها

لكن بقي لو لأ أنت عارف خاليك في أي حاجة بنزين و خلاص

[amr mokhtar]

انا إتفرجت قبل كده عليها فى التوكيل
حاجة ما شاء الله رائعة وواسعة جدآ و شكلها قوى

بس انا مش عايز أكون متفائل اوى تجاه العربية دى فى مصر
انا عندى إستفسار ... هل حد جرب السولار اللى فى مصر فى عربية حديثة و حساسة زى البيجو؟
انا معرفش مدى جودة السولار فى مصر خصوصآ ان معظم اللى بيستعمله النقل و الميكروباصات

الحاجة التانية و هى توافر قطع الغيار فى التوكيل
الحقيقة انا لا أعتقد ان هيكون ليها قطع غيار فى التوكيل خصوصآ فى الفترة الأخيرة
انا معايا 206 موديل 2001 يعنى المفروض كل مسمار يكون موجود فى التوكيل
انا لسه سائل دلوقتى حالآ عن علبة جكمان خلفية و كان الرد "مش موجودة" مع العلم انى سألت عليها من حوالى شهرين و كان الرد برضه مش موجودة

فبالتالى انا أشك فى توافر قطع غيار ال 407 فى التوكيل و طبعآ مش هتلاقيها بره

لكن العربية بشكل عام أقل ما يقال عليها ممتازة و خصوصآ ان مواتير البيجو الديزل مشهورة فى اوروبا و تعتبر من أفضل مواتير الديزل

[hany_c_v]

شكرا لكل من قال رايه ........ و خلى النقاش مفتوح ياترى بيجو ديزل ولا بنزين :)