شهادة حق

[engziada]

كنت قد أرسلت في موضوع قبل كده إني هاروح التوكيل علشان كام نقطة في اللوجان مع العلم إنها ماكملتش 2000 كيلومتر يعني مش ميعاد صيانة دورية و لا حاجة ...
المهم .. روحت إمبارح التوكيل اللي في العبور
بصراحة ناس ذوق ذوق ذوق
منتهى الإحترام .. من أول المهندس اللي بيستلم مني لحد بتاع الأمن الي باستلم منه العربية .
المهندس إستمع مني لكل نقطة بالتفصيل و طلع جرب معايا العربية علشان يشوف كل حاجه بنفسه
و بعدين قاللي إن في حاجات هتروح لجزء السمكرة و ميعاد إستلام العربية بعد ساعتين كحد أقصى و بالمرة هنعمل صيانة الألف !!
قلتله : بس أنا أعرف إن مافيش صيانة في الألف.
قاللي : هو مالوش لازمة يعني بدل مانجيب الناس لحد هنا مخصوص علشان يعملوه إحنا كده كده بنعمله في مع صيانة الخمستلاف .. بس مادام حضرتك جيت خلاص بالمرة.
قلتله : طيب وده بتعمله فيه إيه ؟
قاللي : Checkup كامل على العربية و الكمبيوتر.
قلتله : أوكي ماشي
إنتظرت هناك لمدة ساعتين بالظبط .. و بالثانية العربية إتغيرت حالتها على الشاشة علشان تبقى جاهزة للإستلام .
روحت إستلمت العربية و لاقيت معظم النقط فعلا إتصلحت و العربية إتغسلت و من غير ولا مليم و شكرا ...
بجد منتهى الإحترام و الدقة في المواعيد .

[Col. Eng. Khaled]

مبروك يا فندم و إن شاء الله تفضل مبسوط من العربية و راضي عن تعامل التوكيل

[shoka]

تمام ممكن توضح ايه الحاجات الى عملوها بالظبط

[zkralla]

الكلام ده اكد الى كنت سامعه ويخيلنى اتأكد اكتر ان رينا وفقنى فى قرار شراء اللوجان ومبروك يا باشا عليك العربية

[nomercy22]

الي الامام يالوجان

[besbescat]

ده كان عشمنا في التوكيل المحترم ولو سمحت قولي
شغل السمكرة كان إيه واتعمل ازاي والتكلفة أد إيه ؟ وشكرا

[melmegharbel]

هل توكيل رينو غالى فعلا ولا الأسعار معتدله؟

[Beam28]

[amr.elsayed]

الف مبروك على الصيانة وربنا يباركلك فى عربيتك

هل توكيل رينو غالى فعلا ولا الأسعار معتدله؟

اى توكيل فى الدنيا بيكون اغلى من برة التوكيل وكل عربية وفئتها
يعنى قطع غيار اللوجان بتكون اسعارها فى المعقول لانها اصلا سيارة اقتصادية
قطع غيار السيمبول حتبقى اغلى شوية من اللوجان
قطع غيار الميجان اغلى شوية نظرا للتكنولوجيا اللى فى العربية من حساسات وخلافه
لكن مش هى الارقام اللى تفجع مقارنتا بباقى التوكيلات
فى ميزة فى توكيل رينو وهو الضمان اللى بيتنفز بحزافيره وممكن يغيرو حاجة من نفسهم فى الضمان
انت ماكنتش تعرف انها لازم تتغير

[shoka]

صحيح متكلمتش معاهم فى موضوع الكاسيت mp3

[MoHaMed HaMeD]

مبروك يمان

طب دلوقتى انا انبارح بعد مازود العجل كما هو مكتوب ف القائم حسيت انك فى صوت تزيق ناحيه الجنب السائق معرف بقى من الباب من الكرسى من البلاستيك بس اول مره اسمعه

ثانيا مولت الصبح من توتال 92 وانا راجع بليل وقفت ف اشاره قافل الازاز حيبت انى صوت الماتور فيه زنه معرفش من ايه بطلت وشغلت تانى حسيت انى الماتور فيه زنه برده وانا ماشى وبغير صوت الماتور عالى بزنه معرفش بسبب ايه ياريت لو الوحش عارفين اسباب يؤولى

انا عامل 650 كيلو لغايه دلوقتى وشكرا

[ramy_gamal]

الزنه دى ممكن تكون من طلمبه البنزين اتاكد من الصوت من قدام ولا من تحت الكنبه

[MoHaMed HaMeD]

لا من ناحيه صوت الماتور

[engziada]

تمام ممكن توضح ايه الحاجات الى عملوها بالظبط

بص يامان ...
1- الكاسيت ماكنش بيفصل و يشتغل مع الكونتاكت - عملوه
2- الولاعة كانت فاصلة - عملوه
3- ظبطولي هواء الكاوتشات و ربطولي الطاسات بأفيز من غير ما أقول.
4- المهندس طمني على عضة المارش و قالي مافيش حل لهزة الفتيس.
5- في تكة بتطلع عندي من تحت العربية بعد ما أبطل العربية و أنزل بعد مشوار طويل - قاللي عليها إنها من علبة الشكمان علشان بتبقى سخنة و بتريح.
6- قاللي هنعمل صيانة الألف .. تقريبا بيشوفوا كمبيوتر العربية .
7- حاجتين كمان في السمكرة هاقلهم في اللي جاي.

ده كان عشمنا في التوكيل المحترم ولو سمحت قولي
شغل السمكرة كان إيه واتعمل ازاي والتكلفة أد إيه ؟ وشكرا

1- جلد الشنطة كان معوج و مش عاجبني بصراحة - فكوا الجلد خالص و عدلوا شفة الصاج اللي تحتيه و حطوا الجلد تاني .
2- الكرسي اللي جنب السواق كان بيعمل تكة في الملفات الشمال .. بسيطة بس مضايقاني - فكوا الكرسي وربطوه كويس .

مادفعتش ولا مليم

صحيح متكلمتش معاهم فى موضوع الكاسيت mp3

كلمت واحد من بتوع المبيعات هناك إسمه أ/ طارق تقريبا على موضوع الكاسيت الـ mp3 قاللي بصراحة الموضوع حظوظ و مادام إحنا بنقول في البروشور و المانيوال إن الكاسيت أوديو فقط يبقى مش من حق أي حد إنه يطالب بغير كده و قاللي زي موضوع الكاوتش بالظبط هاتلاقي عربيات فيها أنضف نوع في العالم اللي هو ميشلان و عربيات فيها بريدجيستون و عربيات فيها كورومران و بعدين عرف إن عربيتي فيها ميشلان قاللي إحمد ربنا و بعدين قلتله على إن إحنا بعتنا لرينو فرنسا قاللي ولا هتعملكوا حاجة لأن إحنا لو فتحنا باب تغيير الكاسيت الكل هييجي يغير الكاوتش كمان وده مش ممكن أبدا وهيبقى خسارة على الشركة.

مبروك يمان

طب دلوقتى انا انبارح بعد مازود العجل كما هو مكتوب ف القائم حسيت انك فى صوت تزيق ناحيه الجنب السائق معرف بقى من الباب من الكرسى من البلاستيك بس اول مره اسمعه

ثانيا مولت الصبح من توتال 92 وانا راجع بليل وقفت ف اشاره قافل الازاز حيبت انى صوت الماتور فيه زنه معرفش من ايه بطلت وشغلت تانى حسيت انى الماتور فيه زنه برده وانا ماشى وبغير صوت الماتور عالى بزنه معرفش بسبب ايه ياريت لو الوحش عارفين اسباب يؤولى

انا عامل 650 كيلو لغايه دلوقتى وشكرا

أولا بالنسبة لضغط العجل .. المهندس قاللي إني أظبطه على 30 أدام وورا.

بالنسبة للصوت .. أنا كان عندي برضه بس بعد ماعديت الألف قل جدا أي نعم هو لسه موجود بس أقل من الأول و المهندس النهاردة قالي إنه هيختفي بعد الـ 3000.

[MoHaMed HaMeD]

اصلى الزنه ده لسه سمعها النهارده اول مره فسالت عليها ويارب تختفى

ووانا رحعت تانى ظبط ضغط الكاوتشات وخليته 30 وراو وقدوم ومبقتش اسمع صوت التزيق ده