يعني ايه تفتييييييح موتور ؟؟؟

[Eng.Geo]

بالنسبة للينك
انا قريته وتفحصته جدا جدا وكانت قافشة معايا فكرة القرص علي الموتور في التليين ولكن بعد ما قريت اللينك لقيت ان الكلام مقنع جدا
انا الحقيقة معود نفسي ان في احتمال الن اي حاجة من اللي بأعملها ممكن تبقي غلط ولازم اغيرها بحاول يكون عندي اكبر قدر من المرونة في التفكير والتنفيذ
يعني انا كنت مقتنع بما يقوله جميع التوكيلات والكتالوجات و و و
ولكن هذه الفكرة لقيتها اقرب الي الصح يبقي لازم التأقلم
بالنسبة لان الموقع مش مكان موثوق بيه فمن خلال التجربة وبعض الصور واسلوب التفكير الواضح فانا مش شايف انه محتاج اثبات

[bishoy02010]

الموضوع ممكن يرجع لتعودك على العربية و ظروف الطريق زى مقاومة الرياح لان دى اكتر حاجه بتفرق على السرعات العاليه دى

لو عايز الموضوع يبقى افضل شوف بتجمع سرعة 60 و 80 و 100 فى وقت اد ايه؟؟؟

التفتيح بيزود استهلاك البنزين؟؟ لو كده يبقى بصراحه ملوش اى لازمه انى اخد شوية تسارع زياده مش بحتاجهم الا نادرا و افضل ادفع بنزين على الفاضى بعد كده!!

المفروض التفتيح على كلام المواقع دى و على الاسس العلمية يقلل الاستهلاك لان الشنابر هتعمل احكام افضل نظرا لتطبيعها

لأ هوة عادتا ظروف الطريق كانت بالتقريب واحد وبازات فى الألنترا قبل المرة اللى اصور فيها ديه ب ديقتين كنت عامل نفس الكلام ده بس كان فيه فرق فى تانى مرة اللى فى الفيديو

مبحسبهاش كده قصدى مش بالأرقام عارف انا قصدى انك دوست البنزين نفسها بتكون مختلفا بتلمس البنزين بتلاقى موتور عربية عايزة تجرى مش زى قبل كده لكن بالأرقام تحديدا مبحسبهاش بس بيكون اسرع طبعا

انا مقرتش فى المواقع كتير قوى
بس انا واثق 100% انا استهلاك البنزين زاد فى كل العربيات اللى فوق واثق معرفش إزاى المفروض انه هيقل بصراحة

[best2010]

طيب ممكن اسأل :
1- هو الموتور مش المفروض انه بيتفتح من تلقاء نفسة مع الأستخدام العادى ولكن لفترة اطول من عملية التفتيح المفاجئة السابق شرحها ولا لازم نعمل عملية التفتيح دية كده
2- سمعت ان موضوع التفتيح ده بيبقى بعد العمرة للمواتير القديمة علشان تطبع ولكن مش فى مواتير الزيرو صناعة بلدها .. الكلام ده صح ولا غلط
4- سمعت ان الـ rpm لو وصل لـ 6 الموتور بيخف (بيبقى عزمه أقل ) .. صح ولا غلط
3- لو حبيت اعمل تفيح للموتور يلزمنى اعمل كام كيلو بطريقة الحرق الزيادة دية ..

ملحوظة: زمن الإجابة 15 دقيقة واللى ما يعرفش سؤال يسيب الورقة بيضاء وما يحاولش يجتهد لأن دية فلوس ناس .. مع تمنياتى بالنجاح والتفوق
جزيل الشكر

[kojyad]

واضح ان الامتحان طلع صعب ومحدش عرف يجاوب !!

ممكن نخلي الامتحان open book ؟

[kisho55555]

طيب ممكن اسأل :
1- هو الموتور مش المفروض انه بيتفتح من تلقاء نفسة مع الأستخدام العادى ولكن لفترة اطول من عملية التفتيح المفاجئة السابق شرحها ولا لازم نعمل عملية التفتيح دية كده

تمام .. ممكن التفتتيح يحصل معاك على المدى الطويل لو انت ببسافر كتير وعلى سرعات عاليه ... لكن لو انت من الناس اللى بتستخدم العربية جوه البلد كتير ومن هواه الجرى يبقى لازم تعملها بالطريقة السابق شرحها ..
2- سمعت ان موضوع التفتيح ده بيبقى بعد العمرة للمواتير القديمة علشان تطبع ولكن مش فى مواتير الزيرو صناعة بلدها .. الكلام ده صح ولا غلط
اى حاجة بدايتها سمعت او اتقال ... تبقى اشاعة.. لا اقصد الاهانة لكلام حضرتك ولكن لازم نفهم ونشوف التجربه ... ايه الفرق بين العمرة والموتور الجديد... لا شى ... فبالتالى التفتتييح ممكن يتعمل لكل العربيات الجديدة والقديمة ... بس شرط ان الموتور يكون عزمه كويس ...
4- سمعت ان الـ rpm لو وصل لـ 6 الموتور بيخف (بيبقى عزمه أقل ) .. صح ولا غلط..
بالنسبه للعربيات القديمة اللى بتكون كربيراتير بتكون غير محدودة وبالتالى فان علو عدد لفات الموتور ممكن يوصل ل 7 وده خطر وممكن يسبب تكسر فى البساتم و عمود الكرنك .. اما العربيات الجديده فبتكون انجكشن وبتكون محدوده ب ليمت معين واقصاه 6.5 وده مش خطر ... ولكن مع القرص الكتير والمتعدد يؤدى الى ان الموتور بيخف وبيكون عزمه اقل بس بيكون اخف ..
3- لو حبيت اعمل تفيح للموتور يلزمنى اعمل كام كيلو بطريقة الحرق الزيادة دية ..
بعد 1000 كيلو بتوع التليين .. بنعمل 1000 تانين لتفتيح الموتور ..


ملحوظة: زمن الإجابة 15 دقيقة واللى ما يعرفش سؤال يسيب الورقة بيضاء وما يحاولش يجتهد لأن دية فلوس ناس .. مع تمنياتى بالنجاح والتفوق
جزيل الشكر

[kisho55555]

واضح ان الامتحان طلع صعب ومحدش عرف يجاوب !!

ممكن نخلي الامتحان open book ؟

الامتحان مش سهل .. بس الواحد بيحاول يجاوب من وقت لاخر ..

[best2010]

جزيل الشكر يا استاذ kisho

[kisho55555]

جزيل الشكر يا استاذ kisho

لا شكرعلى واجب .. احنا كلنا اخوات

[sabdrabo]

موضوع جميل ومشاركات مفيدة قيمة
واريد ان اضيف ملاحظة واحدة
هناك مدرستين فى عالم السيارات أحدهما مع تفتيح الموتور والأخرى مع معاملة الموتور الجديد برفق
وكلا الطريقتين لهما مميزات وعيوب

[د.محمود صلاح]

ما هو الصطلح العلمي لتفتيح الموتور بالإنجليزي ؟

[sniperfox]

تفتيح الموتور هو استخراج اعلى قضره واقصا عزم ممكن من المحرك وده بيتم على الطرق السريعه زى الطريق الدولى وطريق السخنه وهو ان السواق بيجيب اخر صرعه ممكنه للعربيه ومع المسافه السرعه دى بتزيد نتيجه ل تاءك خفيف فى البستم و اتساع فتحت الانجيكشن ياعنى الانجيكشن بيضخ كميت بنزين اكتر ف الاحتراق الى جوا البستم بيزيد وبالتالى زيادت السرعه الا ازا كانت العربيه مغلقه من الكمبيوتر الداخلى وده مش عندك انتا خد العربيه على طريق السخنه رايح جاى مرتين مقفل الامبير وقارص وحتلقيها فتحت وانا متاكد من الكلام ده وعن تجربه فى عربيتى وعربيات اصحابى

[midoonesaid]

هاتكلم عن تجربتي الشخصية في عربيتي بتخليني اقول ان في حاجة اسمها افوق المتور مش عارف اذا كان دا مساوي في المعنى للتفتيح ولا لأ
يعني مثلا ابقى مسافر بالعربية مشوار 100 كيلو وماشي فيها على سرعة 120 الى 130 بحس بعدها ان العربية متعفرتة وعايزة تنط من على الارض وبعدها اما امشي مشاوير عادية بلاقي العربية بقت عادية لحد ماطلع بيها مشوار تاني وهكذا
على ما أعتقد ان تفتيح المتور معناها تليين العربية تلين صح في اول 1000 كيلو
اما بعد كده فدا انا شايف ان احنا بنفوق المتور
لو حد شايف حاجة غلط في كلامي ياريت يصلحها

[kisho55555]

هاتكلم عن تجربتي الشخصية في عربيتي بتخليني اقول ان في حاجة اسمها افوق المتور مش عارف اذا كان دا مساوي في المعنى للتفتيح ولا لأ
يعني مثلا ابقى مسافر بالعربية مشوار 100 كيلو وماشي فيها على سرعة 120 الى 130 بحس بعدها ان العربية متعفرتة وعايزة تنط من على الارض وبعدها اما امشي مشاوير عادية بلاقي العربية بقت عادية لحد ماطلع بيها مشوار تاني وهكذا
على ما أعتقد ان تفتيح المتور معناها تليين العربية تلين صح في اول 1000 كيلو
اما بعد كده فدا انا شايف ان احنا بنفوق المتور
لو حد شايف حاجة غلط في كلامي ياريت يصلحها

كلامك صح ... تفتييح الموتور يختلف عن تفويق الموتور ...

التفتييح احنا اتكلمنا عنه كتير ... اما التفويق ده بيقى نتيجة وصول الموتور لدرجة حرارة الاشتعال المثلى وايضا بيودى الى حدوث تنفيض علبه الشكمان اللى هى بتكون مجمعه كميه من الغازات ( اول اكسيد الكربون والكبريت ) ... وده بيودى الى ان العربية بتلاقيها بتجرى مع اول دوسه او حتى مع النقلات بدرى ....

اما بالنسبة للمشاوير العادية فالعربية بعد كدا بترجع لحالاتها الطبيعيه وتبرد خالص ...

كلامك صح... ود بردوا عن تجربه فى عربيتن عندى ...

[mfouad60]

تفتيح الموتور يعني انك توصله لسرعات عالية و ضغط عالي و تحس ان العربية صوتها بيعلي في سرعه معينه , مره في مره توصل للسرعه المعينه دي تحس ان صوت الموتور كان اهدى من الاول بس متعملش الموضوع ده ابدا الا بعد التليين مش اقل من 3000 كيلو كل العربيات الجديده بتكون سحبها مخنوق عشان لسه الموتور تحت التليين

[kisho55555]

تفتيح الموتور يعني انك توصله لسرعات عالية و ضغط عالي و تحس ان العربية صوتها بيعلي في سرعه معينه , مره في مره توصل للسرعه المعينه دي تحس ان صوت الموتور كان اهدى من الاول بس متعملش الموضوع ده ابدا الا بعد التليين مش اقل من 3000 كيلو كل العربيات الجديده بتكون سحبها مخنوق عشان لسه الموتور تحت التليين

كلام جميل ومظبوط .. بس 3000 كتير على التليين ... فى العربيات 1600 اللى بتشتغل فى مصر كفاية 1000 .. بالنسبة لل 3000 ده للعربيات الى موتورها كبير زى بتاعت الخليج ...