محدش رد عليا: اشيل الخوازيق ولا مشيلهاش

[Ahmed A Rahman]

انا اسف اني حضطر احط المشاركة دي لوحدها عشان ميعاد صيانة 5000 للوجان بعد كام ساعة من الآن في مركز صيانة العبور

لمشكلة ان طبعا انتو عارفين ال128 كنت بعملها تحت بيتنا
اللانسر بروح الرواس بتاع الصيانة, بدخل مع العربية عادي واقف تحت العربية وهي مرفوعة واحط الزيت بايدي فيها (عشان نخلص يعني)

انما حتكون اول مرة ياخدوا مني العربية واستناها بره يا لهوي
دانا لما حد من اهلي بيكون رايح يعمل عملية بدخل معاهم في العمليات عشان دكتور ومحدش يقدر يقول لي لأ

تبقى عربيتي استناها بره؟؟؟

هل لازم اشيل كل الخوازيق من العربية
انا مش كنت واخد بالي من النقطة دي

اصل العربية متستغربوش فيها:
1. شنطة كبيرة فيها العدة كلها والمثلث و البخاخات والمنظفات والواكس وكابل قطر و كشاف طواريء ووصلة بطارية وملمع تابلوه وميا مساحات

2. كذا فوطة ميكرو فايبر جايبهم من كارفور

3. علب ادوية كحة وزور ومحدش يضحك عليا (دواء ذبحة صدرية عشان لو حصل لي حاجه وانا سايق او قابلت حد عنده ازمة قلبية)

4. كذا سي دي اصلي

5. كحول جيل لزوم التطهير

6. طقم لبس كامل (لزوم الطواريء) (آل يعني أنفع جيمس بوند صح؟؟؟)

7. شاحن موبايل وشاحن بيت في العربية (بيعمل ايه ؟ ماحنا قولنا قانون الطواريء قصدي حالات الطواريء)

8. مساحات للتابلوه ومساحات للهدوم ومساحات للأحذية (آسف)

9. علب مناديل متلبسه عرايس

10. عرايس الهانم الصغيرة

11. الكار سيت بتاع الهانم الصغيرة (400 جنيه)

12. العربية بتاعة الهانم الصغيرة (500 جنيه) (انا ناقص احط الهانم الصغيرة في العربية هههههههه)

13. فلوس كتير فضة في حامل الاكواب عشان الباراشوتات بتوع الشوارع (الا جمع سايس تبقى ايه؟ لو قلت سوايسه الل من السويس حيزعلوا ولو قلت الساسة ناس تانية حتزعل وزعلها وحش )

14. قفازات (حلوة قفازات دي )

15. دليل تليفونات مهم

16. كنت حنسى حاجه مهمة اوي: الغطا بتاع الاستاذ هاني محمد اللي عمله لنا مخصوص, دا لسه بشوكه لوجي ملبستوش ولا مرة (150 جنيه)

ايه بقى الحاجات اللي تفضل والحاجات اللي تتشال بسرعة عشان المعاد بعد كام ساعة

[M.Moustafa]

انا هقولك حل احسن.












ما تعملش صيانة.
ايه يا حبيبي ده كله انت فاضل تحط التواليت في العربية وممكن سرير احتياطي عشان لو حبيت تناملك شوية وانت ماشي وكام تربة حشيش لزوم المزاج وانت طبعا فاهمني وممكن كمان لزوم السفر تخلي معاك في الشنطة الزوجة الصينية عشان تقعد ترغي جنب ودنك وانت مسافر

[yoko]

للأسف دي الحاجة الوحيدة الي ينفع تتساب

16. كنت حنسى حاجه مهمة اوي: الغطا بتاع الاستاذ هاني محمد اللي عمله لنا مخصوص, دا لسه بشوكه لوجي ملبستوش ولا مرة (150 جنيه)

وطفايه الحريق ﻷن معظم التوكيلات بتثبتهم في الإستلام أما الباقي كله شيله

عشان خطري متدعيش عليا (والله حاسس بيك)

[Ahmed A Rahman]

انا هقولك حل احسن.

ما تعملش صيانة.
ايه يا حبيبي ده كله انت فاضل تحط التواليت في العربية وممكن سرير احتياطي عشان لو حبيت تناملك شوية وانت ماشي وكام تربة حشيش لزوم المزاج وانت طبعا فاهمني وممكن كمان لزوم السفر تخلي معاك في الشنطة الزوجة الصينية عشان تقعد ترغي جنب ودنك وانت مسافر

حبيب قلبي وحشتني كتير

طب حصدمك اكتر عشان فكرتني بحاجات ثانية

17. طفاية حريق

18. مصلية عشان الصلاة في معادها

19. من فترة كان معايا الحصيرة اللي كنا بنام عليها في الحج اللي فيها بالونه في اخرها تتنفخ تبقى مخدة , بس سيبتها في ال 128

20. الحشيش: يادي الحشيش, اعوذ بالله , الحاجه الوحيدة اللي لو طلعت لي لجنة وطلب رشوة بغلاسة استحالة اديله الحشيش, ياخدني مخالفة 3000 جنيه 10000 جنيه مش فارقة, بقى ابقى بعالج الناس منه وبعدين اوزعه
ممكن ادي فيتامين, فياجرا, فلوس اي حاجه انما ده عمري ما استخدمته

دا مش معناه اني بمشي بيه اصلا , يا لهوي ثاني دا مش معناه اني ماشي بفياجرا في العربية برضه انا بضرب مثل للي بتعمله الدكاتره بالحاجات اللي بتجيلها دعاية
ايه اللي انا بقوله ده ؟؟؟؟



سيبك من الهزار وقولي بجد عشان لو حطلع الحاجات دي كلها من العربية حتبقى ليلة زرقا
انت ساكن في الرحاب وعارف الزمهرير بتاع دلوقتي

[M.Moustafa]

1. شنطة كبيرة فيها العدة كلها والمثلث و البخاخات والمنظفات والواكس وكابل قطر و كشاف طواريء ووصلة بطارية وملمع تابلوه وميا مساحات
لو فعلا كلهم في شنطة طلعهم

2. كذا فوطة ميكرو فايبر جايبهم من كارفور
حطهم مع الشنطة اللي قبلهم

3. علب ادوية كحة وزور ومحدش يضحك عليا (دواء ذبحة صدرية عشان لو حصل لي حاجه وانا سايق او قابلت حد عنده ازمة قلبية)
حطها في جيبك

4. كذا سي دي اصلي
خدهم في ايدك وانت بتسلم العربية

5. كحول جيل لزوم التطهير

6. طقم لبس كامل (لزوم الطواريء) (آل يعني أنفع جيمس بوند صح؟؟؟)
طلعو يتغسل

7. شاحن موبايل وشاحن بيت في العربية (بيعمل ايه ؟ ماحنا قولنا قانون الطواريء قصدي حالات الطواريء)
سيبه

8. مساحات للتابلوه ومساحات للهدوم ومساحات للأحذية (آسف)
سيبهم
9. علب مناديل متلبسه عرايس
سيبهم
10. عرايس الهانم الصغيرة
حطهم في كيس وسيبهم

11. الكار سيت بتاع الهانم الصغيرة (400 جنيه)
حطه في 128

12. العربية بتاعة الهانم الصغيرة (500 جنيه) (انا ناقص احط الهانم الصغيرة في العربية هههههههه)
سيبه
13. فلوس كتير فضة في حامل الاكواب عشان الباراشوتات بتوع الشوارع (الا جمع سايس تبقى ايه؟ لو قلت سوايسه الل من السويس حيزعلوا ولو قلت الساسة ناس تانية حتزعل وزعلها وحش )
شيلهم

14. قفازات (حلوة قفازات دي )
شيلهم

15. دليل تليفونات مهم
في جيبك

16. كنت حنسى حاجه مهمة اوي: الغطا بتاع الاستاذ هاني محمد اللي عمله لنا مخصوص, دا لسه بشوكه لوجي ملبستوش ولا مرة (150 جنيه)
سيبه

ايه بقى الحاجات اللي تفضل والحاجات اللي تتشال بسرعة عشان المعاد بعد كام ساعة

[momo10000]

متشلش حاجة ومستحيل حاجة حتنقص ... علي مسئوليتي يا باشا ...

[Ahmed Selim]

التوكيل غير مسؤل عن أى أشياء مهمة داخل السيارة عند دخولها الصيانة

[أشرف العدوي]

محدش هيفكر ياخد الحاجات دي كلها
ده لو قعد ينقي ياخد ايه و يسيب ايه ممكن يقعد 3 ساعات

سيبهم بس ابقى عرف الي هتسلمه العربية ان فيها حاجات مهمة و انت عارفها
و كمان بيبقى في امانات في التوكيل مش عارف توكيل رينو فيه و لا لاء ممكن تسيب حاجتك المهمة فيه

[medo980]

الله يعينك على الى انت فيه وبالمناسبه جمع سايس سُياس

[mostafabakry]

ما شاء الله لا قوة الا بالله

حضرتك راكب عربية و لا شقة مفروشة هههههههه
دا مش ناقص غير تواليت و تبقي شقة مفروشة بجد

عموما حاول تطلع الحاجات الصغيرة اللي ممكن تكون ثمينة و ملفته
ما الحاجت الكبيرة ما اظنش انه فيه خوف عليها

الا صحيح هو ايه الحشيش اللي حضرتك بتقول عليه ( حشيش مخدر ولا حاجة تاني ) ؟؟

[ahmed2y]

يا باشا انت مش عندك عربية تانية فضى الحجات دى فيها ولما ترجع ابقى رجعها تانى وريح دماغك خالص

[bishoy02010]

متنساش تقولنا اللى حصل فى الصيانة بقى :)

[gebreel]

هههههههههههههههههههههه صباح الخير :)
طمنا عملت ايه يا دكتور في الصيانة و لحقت معادك ولا لأ؟

[د.محمود صلاح]

مرة اتسرقت منى سي ديهات وما اكتشفتش الا لما روحت محافظتى المنيا - جيلى توكيل سايمكس انترناشيونال-

[elshinawy80]

مع رينو مفيش اى حاجة هتنقص
و هما يسجلوا الحاجات اللى فى العربية