احذروا مركز صيانة رينو الاقصر...به سم قاتل

[alfa_we]

تانى مركز صيانة الاقصر
والله حرام الى بيحصل دا الله يكون فى عونك
ويكون فى عون عملاء المركز والى انا منهم
بس هوا حضرتك جبت العربية دى استعمال ولا جديدة
عشان انا كنت بشوف عربية ميجان زيتى مركونة هناك على طول ولما سألتهم عنها قالولى دا صاحبها اشتراها وعطلت منه اول ما جابها

[mimohs]

السلام عليكم

يا اخى دا كان اول تعامل مع رينو وانا ماكنتش اعرف ان ممكن يكون فيه مركز خدمه كويس ومركز وحش(حضرتك ما تستغربش,بس هيا دى الحقيقه,لان لما الشركة تطلب منك ان تروح المركز دا,لم اتخيل ان الشركه تضحك عليا,ثانيا انا كنت فاكر ان الموضوع بسيط ويعنى ساعتين والموضوع يتحل,لان العربيه كانت ماشيه زى الفل من القاهره للاقصر)
انا اشتريت العربيه دى لمراتى,ودا كان بناء على كلام شريكى وهوا راجل محترم وعاشق للسيارات المحترمه,ومن كلامه على مدى احترام العربيه,لما قررنا نشترى عربيه وقع اختيارنا على رينو ميجان,وكانت نصيحة شريكى انى اشترى حاجه مستعمله بسبب نزول سعر اعادة البيع مما يؤدى لخسارة مبلغ كبير للشارى الاول
,ثانيا حضراتكم عارفين ان السيدات استعمالهم بسيط يعنى مش سفر,لذلك وقع اختيارنا على ميجان
فأخدتها موديل 2008 وهيا فعلا زيتى او فزدقى زى مابيقولوا,وعامله 41الف كيلو وبها فتحة سقف وكده.....
وكشفنا عليها فى التوكيل فى القاهره وطمنونا انها كويسه وموتورها كويس والقوائم تمام,وراشه اكصدامات بس,يعنى حالتها كويسه(العيب الوحيد الي لفتوا نظرى ليه,ان المالك الاول عمل اصلاح فى الضفيره بتاعتها خارج التوكيل,والميكانيكى الي عمله الكلام دا عاكك شويه,بس طمنونى ان الموضوع لا يقلق,وقالولى انها حتمشى كده ولما توصل لصيانة ال50الف كيلوا ممكن تصلح العيب دا الي مش حيأثر على كفائة السياره,ودا طبعا كلام خاطئ تماما لان العربيه فقدت النطق فى اول مشوار ليها ومس سوء حظى انها حصلت فى الاقصر,انا اعتقد انهم ضحكوا عليا فى الاقصر,وعلى فكره المهندس ياسر الي جاء الى الاقصر من القاهره لم يأتى مخصوص علشان عربيتى بس هوا كان جاى علشان فيه مشاكل فى اسوان والاقصر والغردقه,واعترف لى ان بتوع الاقصر تعبانين,ولكن حب الشركه فى التواجد فى الصعيد هوا الي خلاهم يوافقوا على هذا المركز.انا اقترحت عليه انهم بمنتهى البساطه يعطوهم كورس فى القاهره,ويعملولهم امتحان فيه نجاح وسقوط,لانهم اول ما حيحسوا ان الموضوع حيتشال منهم حيعملوا قرود علشان يحافظوا على الفرخه الي بتجبلهم دهب...

انا عربيتى خليجى فماليهاش ضمان للاسف(بس انا فعلا بنصح اى من الاخوه انه مايشتريش خليجى او مستعمل,لان الانجليز عندهم حكمه اثبتت صحتها(شراء المستعمل هوا شراء متاعب الاخريين)
اما بالنسبه لموضوع جهاذ حماية المستهلك,دا طبعا حل جميل ولاكن للاسف والله ماعندى ساعه حتى اقضيها مع اولادى,فعلا ما عنديش وقت,وانا مره جربت موضوع حماية المستهلك مع شركة كريازى للثلاجات,لانها كانت لسه فى الضمان وكانوا عايزيين مبلغ كبير وهذا لسوء الاستخدام,وكأن اولادى كانوا بيلعبوا فيها كوره,,سبحان الله)
ايوه اخى الفاضل هيا عربيتى الي كانت واقفه فى مركز صيانة رينو الاقصر,الله يخرب بيوتهم

المهم انا عايز اسأل عن سعر اعادة بيعها بعد المشاكل دى كلها,وهل فيه صاله ممكن نعرضها فيها,لانها الان فى القاهره,واشتغلت وطبعا بعد ما غيرت كل الي احتاجوه)فأرجوا النصيحه من الاخوه الافاضل!!
والسؤال الاخر هوا فعلا موديل 2008 الخليجى يشبه الموديل بتاع ال2005 الذى بيع فى مصر(طبعا ممكن يكون شؤال اي كلام,بس هوا دا الكلام الي قاله ليا الميكانيكى فى القاهره)
ولكم تحياتى

[د.محمود صلاح]

الميجان الخليجى أقل بكثير فى الكماليات من المصرى وواضح ان اللعب فى الضفيرة خرب حاجة معينة , ووجهة نظر شريكك صحيحة بشراء كسر زيرو بس شرط ان يكون مافيهاش اي عيب

[Sharky]

كده الامور وضحت

السيارة خليجى فبالتالى خارج الضمان

و كمان العيب طلع فى الميكانيكى اللى لعب فى ضفيرة السيارة و وواضح جدا انه بوظ حاجات معاه

قدر الله و ماشاء فعل اظن ان بيع السيارة بحالتها كده من غير إصلاح العيب حيبقى صعب و لو اتباعت حتسمع ارقام قلية جدا من عينة 50 أو 60 الف

[ecybrarian]

سعادتك ترفع العربية على ونش للقاهرة لمركز معتمد أو لورشة في صقر قريش..معلش هاتكلف نقل كتير شوية بس المهم العربية تتصلح إن شاء الله

[momo10000]

لو سمحت اتصل بيا .... انا بعتلك رقمي عالخاص .. ومشكلتك محلولة بأذن الله..... بس لازم تبعتلي العربية القاهرة...

[د.محمود صلاح]

الف شكر لعرض المعونة حضرتك تستاهل كل خير

[eng_mfahmy]

فى البدايه احب الفت انتباه الاساذ صاحب الميجان اللى عمال يشتم
انا مهندس فى توكيل الاقصر اللى عمال يشتم فيه
بس هو بكلامه ده بيرمى غلطه وغلط الميكانيكى بتاع القاهرة وكل الغلطات اللى حصلت على وكيل الاقصر
القصه من البداية :
1_العربيه دى فيها مشاكل كتيرة اهمها موضوع الضفيرة وطقم الدوارة
2_الكلام اللى قلته بنفسك ان اللى كشفلك على العربيه قلك انه كشف عليها فى توكيل القاهرة وانا قلتلك لو فى توكيل القاهرة قالولك انها تماام هات الورق بتاع التقرير وده بيحصل فى اى عربيه يتكشف عليها بالكامل وبيكون تقرير مفصل او شهادة جوده بردو بتوضح مشاكل العربيه وانا هاصلحهالك على حساب التوكيل ورديت عليا بعدها بيومين ان قريبك اللى كشف على العربيه طلع رفعها فى ورشه او بنزينه بدون علمك وانك اكتشفت الموضوع ده اما طلبت التقرير منه
3-قولتلك كل اللى فى العربيه ومحتاجاه وقلت انك هاتشترى الحاجه دى استيراد وجبت طقم الدوارة مرتين علشان اللى جبته فى الاول كانت فى مشاكل وده سبب تاخير العربيه فى الاصلاح مش ان الناس مش عارفه تصلح
4-من ضمن الحاجات اللى بلغناك بيها ان العربيه محتاجه ضفيرة موتور لان فيها فيش متكسرة ووصلات وكبارى وحاجات كتير وانت شفت الكلام ده بعينك وكان ردك حاول تلمهالى باقل تكلفه علشان انا قرفت من العربيه دى واضحك عليا فيها
5-عملنا كل المحاولات ودى فعلا كانت غلطتنا ان احنا اتعاطفنا معاك وحاولنا نخفف من عليك
6-اخر حاجه كانت ان المشكله اللى فى العربية الفيش ودى يتغيرلها ضفيرة وده كان كلام المهندس ياسر بردو وقلت هاتصرف حتى انت شوفت ان العربيه اما بتبطل ده بسبب الفيشه المكسورة اللى بتتهز واما بتتثبت العربية بتدور
وبعدين اخدت العربيه
انا ما اظنش ان توكيل الاقصر ضحك عليك فى اى حاجه بالعكس كل ده والتاخير كان منك المصنوعيات اللى ادفعت ماكنتش هاتدفع اقل من ضعفها لاى ميكانيكى فى الشارع مش فى توكيل
انت عارف الكلام ده كويس بس انا حبيت اوضح للناس اللى سخنت بدون ماتفهم القصه من الطرفين
وده على فكرة كلام مختصر مش بالتفصيل ولو الناس عرفت التفاصيل هيصعب عليها التوكيل من اللى حصل من صاحب العربيه بسبب ان احنا وقفنا معاه وزى ماقال حاولوا تلموها باقل تكلفه مش العكس

[Sharky]

لو كلامك صحيح

يبقى إحنا ظلمناكوا
و الغلط مش على العربية أو الوكيل لكن الغلط يرجع على صاحب العربية اللى إشترى سيارة من غير ما يكشف عليها فى التوكيل و طلع ملعوب فيها جامد و كمان ماقلش الحقيقة للأعضاء

[romeo_6887]

التوكيلات المصريه ....*