صدق أو لا تصدق .. رينو 5 موديل 2007 على الزيرو بـ 43 ألف جنيه

[egawady]

انا شفت معرض سيارات فى وسط البلد جنب دار القضاء العالى .. عنده رينو 5 على الزيرو ( تقفيل ايرانى ) 1300 سى سى تكييف وكاسيت وبسعر 43000 جنيه .


ايهاب الجوادى

[NaderNabil]

صور!!!
معلومات أكتر!!!
توكيل؟؟؟
مركز خدمة؟؟

[memo_hefnawy]

الرينو 5 من الموديلات الجميلة جدا و العملية جدا من رينو و يمكن ماكنش ليها حظ أوى فى مصر بس دى لو أخدها وكيل محترم و تسويق و خدمة ما بعد البيع كويسه (بإفتراض إن تقفيلها كويس) هاتبيع جامد خصوصا إن القديم منها لسه موجود فى مصر و قطع غياره متوفره و رخيصه هى آه مش منتشرة أوى لكن رخيصة و معمره و ليها زبونها إللى يفهمها و فوق ده لما بيتعملها tuning بيكون شكلها فى اللذيذ مقارنة بال 127 و ال 128 هى تتفوق عليهم بمراحل

[IAbdou]

دى صورة ليها بس مش عارف أزاى دى المفروض خلصت فى التمنينات

[وائل السويفي]

egawady باشا
شكرا على الخبر
بس ممكن حضرتك تقوللي هى 2 باب ولا اربعة

واللي يعرف هي حجمها ايه بالنسبة للـ 127

[Heshaam]

الرينو 5 الأصلية كانت أطول شوية من ال 127 وإن كانت ال 127 أعرض منها حاجة بسيطة

وهي زي ما أ. محمود قال فعلا عربية تحفة

أنا بتكلم عن الجيل التاني منها - موديلات 1985-1996

بخصوص الجديدة؛ مش عارف هل هتبقى نفس الأبعاد ولا هتختلف.

وعموما ممكن للمهتم يطلع على بعض المعلومات العامة عنها على: http://en.wikipedia.org/wiki/Renault_5

[وائل السويفي]

هشام باشا
انا متشكر جدا جدا على ردك السريع

انا ماكنتش اعرف العربية دي اصلا ودخلت على نفس الموقع اللي حضرتك كاتبه ولقيت نوعين نوع بابين ونوع اربع ابواب علشان كدا كنت بسأل

اصل بصراحة انا تعبت مع الــ 127 رغم اني بحب حجمها وفلقيت الخبر دا وكمان 1300 سي سي
علشان كدا كنت بسأل

[الريس]

انا معايا واحد ايراني على المركب سألته و قاللي انها اسمها
new pk
الموتور بتاع الكيا برايد1300
و هي زي اخر موديل فرنساوي في الرينو خمسة
و كان قبلها في pk لحد 2006
و قبل كده كان اسمها سايبا

هو بيقول انها عربية كويسة و سعرها هناك ما يوازي 24 الف جنيه عندنا .. فالشباب بيشتروها
دهكل اللي عرفته منه

[وائل السويفي]

حد يعرف يا جماعة مين اللي مستوردها او مين التوكيل

يعني هو هو توكيل رينو ولا علشان ايراني يفرق التوكيل

[Ahmed Selim]

ممكن تكلم 16202 خدمة عملاء رينو و تسأل مع أنى أعتقد أنها مش تبعهم

[Abu Aly]

ياه ... رينو سنك رجعت تانى ؟؟!! .. على فكرة كانت عربية ناجحه جدا فى زمنها .. و كانت عربية السيدات المفضله فى فرنسا .. بس انا فاكر من كام سنة شفت واحد عند الميكانيكى دايخ على قطع
غيارها .. المهم يظهر ايران زى تركيا داخلين جامد فى انتاج السيارات و احنا يا مولاى نايمين فى العسل ..لكن الغريبة ان ايران بتننتج موديلات بيجو و رينو قديمة قوى ..

[Heshaam]

بعد طلة سريعة على الانترنت؛ بإستخدام إسم الموديل اللي تفضل بيه أخونا الريس وله جزيل الشكر لأني حاولت أدور من غيره وفشلت.

المهم، اللي لقيته هما الموقعين دول:

http://en.wikipedia.org/wiki/P.K

http://www.parskhodro.ir/product/pk/pk.htm

الأول للأسف موجز جدا؛ والتاني بالفارسي (الناس ممكن تخمن:D)- بس أنا قلت أهه أحسن من مفيش :(؛ وإن شاء الله حد يقدر يوفر معلومات أكتر

إنطباعي إنها هي تعديل لشكل الجيل الأول - وده بناء على الصور اللي مش واضحة خالص اللي موجودة في أعلى صفحة الموقع التاني.

المهم يظهر ايران زى تركيا داخلين جامد فى انتاج السيارات و احنا يا مولاى نايمين فى العسل ..لكن الغريبة ان ايران بتننتج موديلات بيجو و رينو قديمة قوى ..

مش القديمة بس؛ دول بيجمعوا ميجان واللوجان وجين تو