ابعد عن رينو خالص هتتعبك قوى - الفتايين بيشجعوا واحنا معاهم

[zkralla]

قبل ما اشترى اللوجان بكام شهر سمعت عنها وبدأت اسأل الناس عن رينو لوجان أيه رأيكم فيها يا جماعة ولقيت اجابات متنوعة هذكر بعض منها :-

رينو أيه يا أخى ديه قطع غيارها غاليه جدا ومش موجوده ديه هتعذبك

ديه فيه عربيات كليوا مركونه بقالها كذا سنه عشان مش لاقين لها قطع غيار

فرنساوى بلاش اسمع الكلام أنا فاهم بقولك أيه

واحد قالى ديه عربية كلها فبر

واحد قالى ده مش فاكر أيه - باين وش السلندر - بيتباع ب 6000 جينه ومش موجود ( ده صاحبى وشغال فى معرض سيارات متخصص فى الاسبرنزا فقط يعنى المفروض أنه فاهم )


المهم وبعد ما الواحد قرب شويه من الرينو وعرف اسعار قطع الغيار وجوه التوكيل وبره التوكيل عرفت أن الناس ديه للأسف مش فاهمه حاجة بس للأسف برضه مبتقولش كده - مبتقولش أحنا ما نعرفش - لأ لازم يتكلموا ويقولوا رأيهم الى هو ممكن يكون كلمه سمعها من واحد من 25 سنه أو حديث سمعه فى مترو الانفاق من اتنين بيتكلموا مع بعض وكان واحد بيفتى طبعا على التانى يعنى بيبقى عمره ما ركب رينو ولا قعد ما حد راكب رينو ولا صاحب حد عنده رينو واكيد مش شغال فى توكيل رينو يبقى جاب معلوماته منين


طبعا الكلام ده مش موجه لاى حد فاهم وبتنقد بناء على معلومات لان هذا الشخص من حقه تماما أنه يقول رأيه حتى لو كان ضد رينو وحتى لو اختلف معايا
يعنى مش الفكرة أنه بيقول كلام سلبى عن رينو المشكله أنه بيقول كلام بدون علم وبيقول كلام هو مش عبارة عن رأى ده كلام مغلوط وبعيد عن الحقيقة المحسومة يعنى لما واحد مثلا يقولك فانوس اللوجان ب 2000 جنيه ده يبقى كلام غلط وامر محسوم مش رأى ممكن يتناقش المشكلة أن الى بيقول الكلام ده بيبقى مصمم عليه


لازم برضه اقول أن فيه ناس - ماشاء الله عليها - فاهمين وبينصحوا لوجه الله
وفيه ناس تانيه مش فاهمين وبيقولوا مانعرفش ودول يحترموا طبعا

أنا كلامى هنا على الفئة الى مش عارفنا وبتفتى - ربنا يهدى -

[factorialx]

أنا رحت أحجزها في معرض و كان فيه واحد صحبي بيتصل بالصدفه و كان جنب المنطقه قلتله تعالى أنا بحز عربية فلما جه قلتله أنا حجزت لوجان بص كده و بلم ووشه جاب ألوان و قال العربية دي وحشه جداا اللي بتعمله ده !!

و قريبي قالي دي بتتقلب لمجرد إنها عالية عن الأرض و قريبي التاني بلاش خليك في اللانوس دي قطع غيارها نار

[fido2010]

الفتايين بيفتو بس احنا مش معاهم

[ahmadalsattar]

على فكره انا حاجزها و اللى بسالنى بقول له حاجز فيرنا او لانوس بيقولولى عفارم عليك هوه ده القرار
عربيه منتشره
قطع غيار فى الاجزاخانات
كله بيعرف يشتغل فيها
اعادة البيع
............* اللى تعرفه احسن ..............*
تخيلو انى ما بقولش فعلا انى حاجزها لانه كل الناس بتقول الكلام اللى قايله اخونا ذكر الله اوعى تطس فى نافوخك ( صعيدى بقا)........*
بس ليا ملحوظه
ازاى الناس تغيير وجهة نظرها للسياره دى ؟؟؟
او لرينو عامة

[AirForces]

عندك حق يا استاذ ذكر الله فى كل كلامك وعلى هذا الأساس انا لما كنت بفكر اجيب عربية قعدت بتاع كذا شهر اقارن بين العربيات واتفرج واخد بالى فقط واشوف اراء الناس
وفى الأخر اقتنعت انه احسن حل انك تشوف تقارير للعربيات دى للناس اللى جربوا العربيات فعلا وتقارن بنفسك
وللأسف فى ناس كتير بتحاول تكرهك فى العربية لمجرد انك بتفكر تشترى ماركة غير اللى معاهم (لأنه شايف نفسه صح دايما ولا يمكن يغلط ويختار غلط وعلى اساسه فأنت لازم تختار زيه يا إما تبقا مش بتفهم)

لكن بجد فى ناس تانية هنا فى المنتدى محترمة جدا وعلى سبيل المثال فى ناس كتير من منتدى هيونداى بينصحوا ناس باللوجان بعد ما قارنوا بدون تحيز وفى ناس تانية متحيييييييزة ومنفسنة

اتمنى انه الناس تبطل تحيز شوية وتنصح مش لمجرد انه تشترى نفس الماركة لكن يا عن تجربة شخصية او تجربة حد معرفة

[د.محمود صلاح]

رينو مبغوض من الشعب المصري من زماااان

[Col. Eng. Khaled]

واحد قالى ده مش فاكر أيه - باين وش السلندر - بيتباع ب 6000 جينه ومش موجود ( ده صاحبى وشغال فى معرض سيارات متخصص فى الاسبرنزا فقط يعنى المفروض أنه فاهم )

في مثل بيقول : صاحب صاحبك على عيبه ............... (في حالة إنك لسه مصاحبه)

[hesham_tawfiq]

بس ليا ملحوظه
ازاى الناس تغيير وجهة نظرها للسياره دى ؟؟؟
او لرينو عامة

مش عاوزهم يغيروها
انا راكب عربيه مميزه وعاوزها تفضل كده
كده زى الفل

[أحمد كمال]

اصلا اللي بيقولوا دي كلها فبر (حتى على الميجان مثلا) ..... ناس مش فاهمة حاجة

ايه يعني لو كلها فبر؟ مين الاهم ؟ انا و لا العربية؟

يعني لو فيه حادثة يهمك مين؟ سلامتك انت و اهلك و لا شوية صاج؟

و بعدين هو يعني الحديد معدن نبيل و لا ثمين؟ يعني جوز الرفارف فيهم كام كيلو حديد مثلا عشان الناس تزعل انهم فبر؟ هو انا مثلا اما هابيع العربية هاسيح الحديد اللي فيها و ابيعه سبايك :) ؟

انا ياما خبطت عربيتي من قدام و ورا خبطات و الله تخوف ..... مرة سرحت و خيشت من قدام و مرة بالجنب و مرة باركن عمودي عالرصيف فوق الرصيف و بانتش العربية عشان تطلع الرصيف و رزعت في بوز طوب احمر بارز من الحيطة ! ... و في كل المرات ما جراش حاجة عشان الفبر مرن و بيروح و بييجي مع الخبطة ...... و مرة الرفرف الخلفي اتنطر من الاكصدام و رجعته مكانه بايدي و رجع زي ما كان و الله ! ........

[aelhossan]

نفس الكلام اللي قيل ليه

بلاش عشان قطع الغيار غاليه

وانا باذن الله مصمم برده اجيبها

[zkralla]

اصلا اللي بيقولوا دي كلها فبر (حتى على الميجان مثلا) ..... ناس مش فاهمة حاجة

ايه يعني لو كلها فبر؟ مين الاهم ؟ انا و لا العربية؟

يعني لو فيه حادثة يهمك مين؟ سلامتك انت و اهلك و لا شوية صاج؟

و بعدين هو يعني الحديد معدن نبيل و لا ثمين؟ يعني جوز الرفارف فيهم كام كيلو حديد مثلا عشان الناس تزعل انهم فبر؟ هو انا مثلا اما هابيع العربية هاسيح الحديد اللي فيها و ابيعه سبايك :) ؟

انا ياما خبطت عربيتي من قدام و ورا خبطات و الله تخوف ..... مرة سرحت و خيشت من قدام و مرة بالجنب و مرة باركن عمودي عالرصيف فوق الرصيف و بانتش العربية عشان تطلع الرصيف و رزعت في بوز طوب احمر بارز من الحيطة ! ... و في كل المرات ما جراش حاجة عشان الفبر مرن و بيروح و بييجي مع الخبطة ...... و مرة الرفرف الخلفي اتنطر من الاكصدام و رجعته مكانه بايدي و رجع زي ما كان و الله ! ........

الحاجة الى تغيظ أن سياق الكلام الى بيتقال بيبقى سياق كلام هجومى يعنى مش بيقولك ديه رفارف فبر عشان الامان ولما لا قدر الله يحصل حادثه ميقفلش على الابوب فلو الى سايق العربية اتصاب محدش يعرف يطلعه بسهوله لا
ده بيقولك عشان تعرف يعنى أنك هتشترى عربية بلاستيك فتغير رأيك فهو يحس أنه شخص مؤثر وقدر يخليك ترجع فى كلامك ويا سلام بقى لو شاف فى عنيك نظره انبهار لما سمعت الكلام ده لانك أول مرة تسمع المعلومة يبقى كده تمام

أنا والله ما بهاجم الناس ديه بقدر ما أنا متعاطف معاهم عشان أكيد كتير من الناس دول بيبقوا ناس عندهم احاسيس بأنهم مش مهمين أو مش مؤثرين وطبعا ده احساس مؤلم لاى حد يحس بيه
طبعا بنستثنى منهم الناس الى سمعوا الكلام ده من حد من اخوانا الفاتيين وصدقوه وبيقلهولك بحسن نيه عشان بيحسبوا أن كلام صحيح يعنى بيبقى نيتهم خير وعاوزين ينقذوا الواحد من الفخ الخطير الى هيوقع فيه بشراءه سيارة رينو

[bishoy02010]

انا بقى مش عارف الموضوع ده طبيعى ولا إيه انا مسألتش اى حد على العربية ولا قلت لحد ولا اخدت رأى اى حد

( كل اللى كنت بشوفة رأى الناس فى المنتدى حتى ولا ركبتها ولا سوقتها قبل مجيبها )

اللى فى دماغى بعملة حتى لو نص مصر بيقولوا متشتريهاش ديه وحشة وانا مقتنع بيها ولا بيفرق معايا ...

افتكر بس ان واحد صاحبى من بعيد شافنى بيها بيقلى مبروك جبت فرنساوى ليه كلها سنة وتفتح بقها قعدت اضحك بس كده وبالنسبة لأى حد اعرفة دلوقتى بعد مجبتها هتلاقيه بينصح اى حد هوة يعرفة عايز يشترى عربية فى الفئة ديه بيها لأنهم بقوا مبهورين بيها بسببى

[zkralla]

في مثل بيقول : صاحب صاحبك على عيبه ............... (في حالة إنك لسه مصاحبه) :c_laugh[1]:

والله يا جنرال أنا مش فاكر بالظيط كان بيتكلم على أنهى قطعة بالظبط بس أنا فاكر الدهشه الى جتلى لما سمعت الرقم وحسيت أن الكلام ده مستحيل يكون صحيح
بس هو شاب احسبه على خير وكان قصده خير أنه يبعدنى عن العربيات الزفت ديه الى اسمها رينو أنا متأكد أنه مكنش يقصد يفتى بس اكيد هو سمع الكلام ده من احد الفتايين وكان خايف عليا فنقلى الكلام
بس المشكله أنه المفروض أنه بيشتغل فى مجال السيارات فكان المفروض يبقى فاهم

[softyeg]

و الله ياجماعه السنه اللى فاتت ده كنت شغال فى السخنه فى مشروع شركه المهم و احنا راحين الشغل الصبح على طريق السخنه السويس و واحد مهندس زميلى عدى جنبى بالميجان بسرعه و كان فى عربيه زلط سن اللهو عامل زى الحصا و فجاه ظهر ان العربيه موقعه جزء كبير من الحموله بعد ملف كان هو قدامى بمسافه المهم هو اتخض منه قام دايس فرامل شوفته نور الاستوب بتاعه من ورا و العربيه عامت منه و دخلت فى جنب الطريق فى كوم رمل كبير العربيه اتقلبت قدامى المهم ركنت بسرعه و نزلت انا و اللى معايا جرينا عليه نخرجه من العربيه لاقينا كل الابواب بتفتح عادى و الشنطه مع ان العربيه مقلوبه على سقفها و لا السقف نزل عليه و اتطبق و خرجناه بسهوله و فتحنا الشنطه بسهوله و الراجل الحمد الله شويت خرابيش بسيطه بس اللى اسغربناه انا و هو و اللى معايا ان حادثه زى ديه و العربيه ابوابها بتفتح و بيتقفل عادى و الريموت شغال و الله يعنى الاكصدم و قع و كان هاين نعدل العربيه بس خوفنا نبهدلها و من سعتها غيرت نظرتى للميجان و بقيت ابصلها بصه تانيه

[M.Mosaad]

بصراحه في نسبة كبيرة اوي من المصريين و بصراحه اكتر في برضة نسبة في المنتدي بتسمع كلام و خلاص يعني لما بخش علي قسم المقارنات بشوف امور عجبببببببببببببببببب يعني بيبقي عربيات انا عارف اسعار قطع غيارها و الاقي ناس بتقول عليها دي غاليه ناااااااار او تجيبها ببقي هتجنن و عايز ارد رد ناشف شوية بس بتكسف اهاجم حد يعني توكيل رينو نشر اسعار قطع الغيار بتاعته و بناء علي كلام اخوة كتير في رينو توكيل اكتر من ممتاز و موديلاتهم شيك جداااااااااا و فخمة جدااااااااا و الاسعار عاديه ممكن تبقي غاليه شوية بس برضة بتعيش كتير و دي ميزة مش عيب

في ناس كتير لسة عايشيين زمن ال 128 و عايز يجيب فانوس العربيه ب 20 جنيه و لو لقي عربيه فانوسها ب 50 جنيه هيقول دي غاليه نار انا عربيتي سيريون ياباني و لما جيت اجيبها ناس كتير برقت و صرخت حسيت اني ارتكبت جريمه دي قطع غيارها نار دي مش عارف ايه و لما قارنت بينها و بين الهيونداي مثلا قارنت بين حاجتين اسعار و life time لقيت ان عليا المدي البعيد العربيه موفرة جداااااااااااااا

يعني انا عجباني الفلونس جداااااااااا و ناوي انشاء الله خلال السنه الجايه اجيب عربيه تانيه و حاطط الفلونس كأول اختيار لان العربيه فعلا عاجباني و حاسس ان التوكيل محترم و اكيد برضة ساعتها هسال عن قطع الغيار و اسعارها و اقارن مش هاخد كلام و خلاص و برضة مش هنقل كلام و خلاص

ياريت الفتايييييييييين يتقوا ربنا في المعلومات اللي بينقلوها من غير معرفه او تجربه لان " من قال الله اعلم فقد افتي " يعني يا اخ ياللي بتفتي لو قلت الله اعلم هتحسب فتوة و تاخد حسنات لكن لو نقلت معلومه غلط ربنا هيحاسبك عليها