ما مدى صحة هذه المقولة ( اللي معاه رينو ... ربنا يعينو)

[Abomar77]

السلام عليكم ياشباب ....

للأسف الفكرة ديه اللي الناس واخداها عن الرينو ....
انا كل لما اكلم حد واقوله انا بفكر أجيب رينو ....
يقول اوعى ديه قطع غيارها وصيانتها غاليه ....
واتضح ليا ان 90 % من الشعب المصري مقتنع بالكلام ده ....

فياريت من الناس اللي معاها الرينو يقولوا رأيهم بحيادية عشان الواحد محتار ....

[frhateg]

مثل غير مطابق للواقع ... هذه مقولة مصرية لا اعرف من قالها ... علي فكرة في كل بلد تلاقي مثل علي ماركة عربية ... انا كنت في السعودية و هناك يعشقوا التويوتا بجميع انواعها و كذلك الأمريكاني . و شوف المازدا هناك ملهاش سوق بالمرة و هناك مثل يقول المازدا فاسدة . بالرغم من كونها ياباني و عربيات محترمة .

[bukla]

انا اقولك لية
يمكن علشان الناس لملكانت بتتعامل مع العربية الرينو زى اى عربية يعنى يطنشوا على الصيانة الدورية فى مواعيدها و محاولة استعمال العربية اطول فترة ممكنة بدون الكشف عليها او متابعتها مع استخدام قطع غيار غير اصلية بسبب ان الاصلية اسعارها مبالغ فيها (مع العلم انها معمرة جدا) عند التوكيل بالاضافة الى الذهاب الى الميكانيكية بتوعنا اللى اغلبهم غير متعلم و يحب يفتى فى اللى يعرفوا ولا ميعرفوش
العربيات الرينو محتاجة ان الواحد يعاملها باحترام من ناحية مواعيد الصيانة بتاعتها بانتظام مع الوضع فى الاعتبار تغيير قطع الغيار فى مواعيدها يعنى مش لازم العربية تشتكى علشان تغير لها قطعة الغيار لكن للاسف احنا مكانش عندنا ثقافة التوكيل بالرغم ان احنا اللى بنقول ادى العيش لخبازة و لو اكل نصة
دة رايى الشخصى يحتمل الصواب او الخطأ

[amr.elsayed]

كلام غير منطقى ..... اومال العربيات الميجان اللى ماشية فى الشوارع دى
اصحابها اشتروها ازاى .. الموضوع كله ان العربيات الفرنسية صانعها بيستخدم
بعض من التكنولوجيا فى تحسين مستوى السيارة وكشف اعطالها قبل ان تحدث
والفكر دة لازم يكون مخالف للفكر المصرى العام اللى معظمنا بيخاف من التكنولوجيا وكل جديد
واللى تعرفوا احسن من اللى متعرفوش ههههههههههه
بص انا حقولك على حاجة انا بعتبر عربية زى الميجان دى عربية اعلى من الفئة بتاعتها
لكن بنفس السعر عشان كدة قطع غيارها اغلى شوية من نفس الفئة السعرية بتاعتها
لكن قطع غيارها فى نفس اسعار الفئة الاعلى او اقل شوية كمان
بمعنى اوضح .. ان الميجان لو بتتباع ب 170000 جنيه كانوا قالوا على قطع غيارها رخيصة بالنسبة للفئة بتاعتها
فى ناس كتيير حيقولوا عليا بهييس لكن دى الحقيقة ..محدش ركب الميجان ويقدر ينكرها
كفاية كلمة انك تبقى راكب عربية دخلت اختبارات السلامة الاوروبية ... لأ وتاخد خمس نجوم زيها زى احسن عربية فى جمهورية البتجان المقلية
ربنا يباركلنا جميعا فى رينوهاتنا وانا من ساعت ما اشتريت اللوجان وانا بقيت مغرم اكتر بالماركة الجميلة لسبب واحد (ان وانا راكب العربية بحس ان فى فكر متنفذ فى تصميم العربية ككل مش اى تجميع لقطع غيار وتصميم خارجى اى حاجة والسلام ..
لأ فى تفكير وفى حسابات محسوسة .. تحس ان اللى صانع العربية بيحاول يوصل لافضل احتياجات انت محتاجها فى العربية ) كل دة فى العربية الاقتصادية بتاعت الماركة اومال اختها الكبيرة بقى
ربنا يدينا طولت العمر يا وحوش ونكون مع بعض واحنا بتنتناقش عن الفلونس الجميلة

[Abomar77]

معلش يارجاله صدقوني انا عارف ان الرينو عربية محترمة بس انا بفكر اني اجيب الفلوانس ان شاء الله ....
لقيت كذا واحد بيقولي ليه كده ياعم انت هتسيب التويوتا وتروح للرينو وواحد قالي الجملة اللي في الموضوع ....
بجد حاجة تخنق وانا في رأي ان شاء الله الفكرة ديه هتتغير عن قريب لما الفلوانس تثبت كفائتها في السوق .....

[zkralla]

البينه على من ادعى
الى يقولك كده خليه يديك اسباب منطقيه مش كلام مرسل زى قطع الغيار غاليه
غاليه يعنى بكام وغاليه بالنسبه لأيه يعنى يبقى عارف اسعار قطع غيارها واسعار قطع غيار عربيه مماثله ويقارن بينهم

[chato_eg]

هاهاهاهاهاها
أخيرا الموضوع ده اتفتح
من زمان و أنا متوقع إن يجى يوم و يتفتح موضوع خاص يحمل عنوانه كلمات الجملة القميئة دى...بالرغم من إن المضمون سبق و قتل بحثا و نقاشا فى موضوعات أخرى

برضه علشان نكون واقعيين.....معظم ملاك رينو هنا عاشقين لسياراتهم و ليسوا مجرد راضيين عنها..فبالتالى لو عايز تسمع كلام حيادى يبقى مش هتسمعه هنا
لكن لا أتوقع إن فى جهة و لا مكان ممكن تسمع منه كلام حيادى
الأوقع....تقرأ المواضيع الكتير المثبتة و غيرها لتكوين فكرة عن الحقيقة...خصوصا إن هناك مواضيع بتناقش المشاكل إللى واجهت الناس مع الماركة عموما و الميجان ii على وجه الخصوص...

أما بالنسبة للمقولة القميئة فهتسمع كلام من نوعية " أبرز التفسيرات عن سبب تأليفها هى قلة الاعتمادية "...
بالرغم من إن مصطلح الاعتمادية نفسه مالهوش تعريف واضح....

رينو بتعمل عربيات بتقف فى نصف الطريق مثلا و لا متعودة إن مرتين فى الشهر ما تدورش الصبح و تروح الشغل مواصلات علشان تحسسك بأهميتها...!!!....

مرة تانية...خد وقتك فى قراءة المواضيع المليئة بخبرات واقعية لأناس بيعيشوا فى نفس ظروفك و امتلكوا السيارات دى لسنين و فى الآخر مالهومش مصلحة فى ذم أو مدح الماركة أو التوكيل....

و بالتوفيق

[bukla]

يا جماعة انا اظن ان انا رايى محايد لانى لم املك رينو من قبل و الان انا حاجز الفلوينس (لم استلمها بعد) ولكنى سمعت كتير من اصحاب الرينو سواء هنا فى المنتدى او من اصدقائى خارج المنتدى عن مدى عشقهم للعربية الرينو
بالاضافة الى انى انا ليا تجربة مع اللانوس على مدار ستة سنوات وانا بتعامل معها بكل احترام من ناحية الصيانة فى مواعيدها فى التوكيل و تغيير قطع الغيار زى ما الكاتالوج ما بيقول بغض النظر عن استهلاكها من عدمة لدرجة انى عمر ما خليت حد يفتح كبوت العربية برة التوكيل حتى لما حبيت اركب بعض الحاجات فى العربية زى فوانيس الشبورة او الساعة اللى فى التابلوة او حتى نور الاستوب اللى فى الرف الخلفى ركبتهم فى التوكيل
وعلشان كدة الحمد و الشكر لله عمر ما العربية ما خزلتنى فى اى يوم من ناحية اى نوع اعطال
فلو حطينا فى اعتبرنا انها لانوس(كورى تقفيل مصرى) يعنى كمان مش اعلى الكورى و توكيل لا يتميز بأى كفائة استثنائية بل هو عادى او اقل مقابل عربية اوروبى مع توكيل مميز
حسيبلكم انتوا الحكم و اعطاء النتيجة

[ramy_gamal]

اعتقد دى مقوله من زمان ايام الموديلات القديمه بس دلوقتى الوقت اختلف وتفكرنا اختلف والموديلات اختلفت .. يعنى انا كتير من اصحابى معاهم تويوتا ونيسان وبيفكرو يغيرو لميجان

[tamertamer]

بصراحة انا عصرت يعنى تلامست مع مشكلة الفرنساوى وجة لوجة
لية واحد صحبى مقرب جدا المهم ولدة بيعشق هذة السيرات فى سنة وحدة جاب
2c4
2 ميجان الهتش باك بنوراما حاجة جمدة جدا
1 بيكسو
1 307 استيشن
للاسف عمل حدثة تقريبا فى كل عربية ما عدا البيجو
بجد عربيات ضعيفة لدرجة صعبة جدا جدا ومعقدة جدا ولما رحنا التوكيل فى حجات مش موجودة واستنة والناس كانت هيجة على التوكيل ساعت لما انا رحت وكان فى خناقة جوة وقلبت بضحك بجد حاجة صعبة
عربية قطع غيرها غلية جدا 6 كمبيوتر فى الميجان لية كتير اوى
ولا البيكسو دية مشكلة حقيقية بجد فى عربيتين فضلو مركونين فترة لغايت لما جت الحاجة وبصراحة عمو ندم اشد الندم على الشراء
انا عصرت كل هذة الاشياء كان فى اوائل 2009 بجد عربيات مريحة جدا وجميلة جدا ورفهية جمدة جدا ونعومة وتكيف بس معقدة جدا
ومحدش يقولى انت مشفتش انت سمعت لا الكلام حصل قدامى وبصراحة العربية الميجان دية تموت من الضحك عربية اكسدمها الخلفى اعرض من العربية نفسها الواد صحبى داخل بيها المذرعة الكسدام مرداش يخش ومش فكر سعتها وقع وكانت حوسة غير انها ضعيفة البنيان لو حب حد بكتر ممكن يعمل معاك الدنيئة بجد الواد اتخرب بيتة بسببها لما عمل حدثة بيها كفاية انها مرمية تحت البيت لغايت دلوقتى هى والوبارو الانبريزا بجد مشكلة واقعية

وعلى فكرة انا معجب جدا بمجموعة الرينو لنهم بجد عملين مجهود رائع كفاية انهم بينفس مجموعة الاوبل ويعتبرو المجموعتين الانشط بلاء جدال فى المنتدة كا كل

[Hany Saad]

ringoo أنا أؤيد كلامك 100 فى الميه الميجان من أحسن العربيات و هى أعلى بكثير من فئتها و كما يقولون "best value for money".
سيارة غير طبيعية على الطريق ثبات و بنزين6.5 لتر كل 100 كيلو على الطوالى ركوبة و أوبشنز من جوة لا توصف + أمان عالى و تكنولوجيا متطورة فعلا مش عارف لو هغير هأركب إيه؟.
أنا فعلا عاشق الميجان.

[ahmadalsattar]

خلينا نتكلم على قطع الغيار فقط و لى فيها استفسار
قطع الغيار اللى خارج التوكيل المفروض انها مرتبطه بانتشار العربيه لو العربيه منتشره على الطرق تلاقى قطع الغيار بتاعتها منتشره بطريقه رائعه و خد امثله كتيير على كده و على فكره انا اقصد هنا قطعة الغيار الغير ميكانيكيه او المتهالكه مثلا لانه قطعة الغيار الميكانيكيه من المستحسن انك تركبها اصليه لكن انا اقصد بقا لو باظت منك مثلا سقاطه المسوجر بتاعت الباب .. مراية اتكسرت فدى تعتبر من الاكسسوارات العربيات الرينو مستحيل تلاقى تلك القطعه خارج التوكيل لكن الغريب انه حتى العربيه للى بدت تنتشر اللى هيا اللوجان برضه ما زال الاصدقاء هنا يعانون مثلا من وجود مراية الكهرباء و غيرهم من اصحاب الكليو زجاج امامى و قطعة التوربيد و انا سالت ناس كتيير على موضوع الرينو وكانت فعلا اجابتهم انه قطع غيارها نار حتى اللى مش خبير قوى
على فكره انا حاجز رينو لوجان و النقطه بتاعت قطع الغيار هيا العيب الوحيد اللى شايفه و ده عيب لا يمكن اغفاله لانه من مميرزات العربيه من الفئه دى انها تكون مصاريف تشغيلها بسيطه
لكن سؤالى هوه تجار قطع الغيار ليه مش مهتمين بقطع غيار الرينو ؟؟؟؟؟؟
هل لقلة الطلب عليها ام لارتفاع سعرها برضه ام للتوكيل علاقة بانه لا يمكن تداولها الا فى التوكيل ؟

[Hany Saad]

الزميل ahmadalsattar من قال إن مرايات الرينو مثلا غير متوافرة فى السوق .
أنا معى ميجان و من الإسكندرية و ليس القاهرة و يوجد لها مرايات بديلة فى السوق تيوانى ثمن المراية 400 جنيه كاملة (جسم كامل + كف) و هى فى التوكيل ثمنها 800 جنيه صناعه تركى و يوجد أيضا إستعمال أو خرج حوادث أو عربيات مكهنة من الخارج أصلى ثمنه فى حدود 500 جنيه و فى رأى هذا ليس بالكثير على سيارة مثل الميجان حيث أنه كم مرة سوف تغير مرايات فى عمر العربية؟
بالنسبة للوجان السيارة لم تكمل السنة فى الأسواق إنتظر حتى يكون عمر السيارة فى السوق سنتين أو أكثر و سوف يستورد كثير من التجار قطع غيارها و بأسعار و أنواع مختلفة نتيجة لإنتشار العربية و زيادة الطلب على قطع غيارها.

[bishoy02010]

هيا الفكرة اللى ماشين بيبها فى مصر اللى نعرفة احسن من اللى منعرفوش واى حد بيحب يقول اى حاجة محدش بيقول ميعرفش والى بيقول حاجة تلاقى 10 تانى يوم بيقولوا نفس الحاجة بس بعد ميتحور فى الكلام بزيادة وهكذا فهتلاقى اى كلام فى اى كلام بيتقال على اى حاجة

[Ahmed Selim]

بصراحة انا عصرت يعنى تلامست مع مشكلة الفرنساوى وجة لوجة
لية واحد صحبى مقرب جدا المهم ولدة بيعشق هذة السيرات فى سنة وحدة جاب
2c4
2 ميجان الهتش باك بنوراما حاجة جمدة جدا
1 بيكسو
1 307 استيشن
للاسف عمل حدثة تقريبا فى كل عربية ما عدا البيجو
بجد عربيات ضعيفة لدرجة صعبة جدا جدا ومعقدة جدا ولما رحنا التوكيل فى حجات مش موجودة واستنة والناس كانت هيجة على التوكيل ساعت لما انا رحت وكان فى خناقة جوة وقلبت بضحك بجد حاجة صعبة
عربية قطع غيرها غلية جدا 6 كمبيوتر فى الميجان لية كتير اوى
ولا البيكسو دية مشكلة حقيقية بجد فى عربيتين فضلو مركونين فترة لغايت لما جت الحاجة وبصراحة عمو ندم اشد الندم على الشراء
انا عصرت كل هذة الاشياء كان فى اوائل 2009 بجد عربيات مريحة جدا وجميلة جدا ورفهية جمدة جدا ونعومة وتكيف بس معقدة جدا
ومحدش يقولى انت مشفتش انت سمعت لا الكلام حصل قدامى وبصراحة العربية الميجان دية تموت من الضحك عربية اكسدمها الخلفى اعرض من العربية نفسها الواد صحبى داخل بيها المذرعة الكسدام مرداش يخش ومش فكر سعتها وقع وكانت حوسة غير انها ضعيفة البنيان لو حب حد بكتر ممكن يعمل معاك الدنيئة بجد الواد اتخرب بيتة بسببها لما عمل حدثة بيها كفاية انها مرمية تحت البيت لغايت دلوقتى هى والوبارو الانبريزا بجد مشكلة واقعية

وعلى فكرة انا معجب جدا بمجموعة الرينو لنهم بجد عملين مجهود رائع كفاية انهم بينفس مجموعة الاوبل ويعتبرو المجموعتين الانشط بلاء جدال فى المنتدة كا كل

أنا مكنتش ناوى أعلق فى الموضوع بصراحة لحد لما شوفت الرد بتاعك يا أستاذ تامر

ممكن حضرتك تبص على الصورتين دول و تقولى فين اللى ورا أعرض من قدام ؟؟؟؟؟




و بعدين بفرض أنها من ورا أعرض من قدام.......لو المرايات عدت من البوابة يبقى باقى العربية هتعدى......و لا أنا غلطان ؟

الأوقع أن اللى حصل فى الموقف ده أن صاحبك كسر الدركسيون سنة بعد لما وش العربية عدى....أو يكون فى أى حاجة فى البوابة زى مسمار مثلاً شبك فى الأكصدام.

طبعاً انا مش بكدبك بس بحاول أفسر معاك اللى حصل.

ثانياً بقى بما أنى فيكتراوى قديم
الفيكترا فيها ABS و أوتوماتيك......دول كده ليهم 2 كمبيوتر و كده كده أى عربية دلوقتى فيها كمبيوتر أو ما يطلق عليه ال ECU للموتور......يبقى كده عندك 3 " كمبيوتر " فى الفيكترا........و مننساش أن الفيكترا قديمة شوية......يعنى مفيهاش تكنولوجيا عالية بالنسبة لدلوقتى.......تعالى بقى بص على الفيكترا الجديدة و شوف فيها كام كمبيوتر........مش أقل من الميجان.

بالنسبة لصاحب الموضوع الأصلى.............المقولة دى أنا سمعتها من حوالى 5 سنين
و كنت بفكر ميجان ولا أوكتافيا A4 و ما زلت بحمد الله أنى أشتريت الميجان و مسمعتش كلام اللى قالى كده..........بس خلاص على رأى شعبولا.