عايز اشترى كليو .. ايه رأيكوا

[emadkamel]

نفسى اعرف تقييمكم للعربيه ... انا عايز واحده مستعمله بس عايز اعرف كل العيوب والمزايا من ناحيه الأمان، الأداء، توفير البنزين،الكماليات، تكاليف الصيانه وقطع الغيار، ...

وعايز اعرف ايه احسن موديل او سعه اجيبها ... وشكراً

[MoToRiZeR]

انا معايا ال 2007 و ممتازة حتي الان

ثبات و عزل صوت .. الصالون مش واسع اوي و لكن القعدة مريحة
التابلوه بحب الاضاءة بتاعته بالليل

السحب جيد جدا .. التكييف لا يؤثر علي ادائها تماما .. التوكيل كويس و مش بيشددوا في موضوع تركيب الكماليات .. يعني لو العربية ناقصها حاجة ممكن تركبها برة عادي .. انا ركبتلها انذار برة و التوكيل قاللي عادي بعكس السيريون اضطريت اشتريه من التوكيل بالغالي مع انه نفس الانذار

في رأيي عربية جيدة جدا .. و لكن اعتقد الموديلات القديمة بتختلف فا احسن انك تسأل عالموديل اللي ناوي تجيبه

[limo]

بالنسبه لاستهلاك البنزين انا شايف انه جيد جدا بتعمل 400 كم فى 30 لتر سواقه داخل المدينه ورياضيه
الامان عندك اير باج للسواق واسمع ان فيه موديلات فيها فرامل abs انا معايا موديل 2003 مفيهاش
العربيه ادائها جيد جدا حتى الان سواقنها جميله جدا
بالنسبه لقطع الغيار والصيانه غاليه شويه بس فى رنج اليابانى وبعض الكورى الحديث
اكثر موديل فى الكليو ماشى فى الشارع هو 2002 و 2003 و 2004 هوه 1200 cc وده اكثر موديل ليه قطع غيار جديد فى السوق بس استيراد بيبقى صعب شويه للنسبه للماتور والفتيس لان الكليو بره مصر 1400 مش 1200
الموديلات ا2005 و 2006 1400 سى سى 16 صباب راى ان وده فى راى انه احلى موديل فيها بس لاسف اغليه قطع غياره الغير مشتركه مع الشكل 2002 و 2003 و 2004 مش متوفره بسهوله ولاكن استراد تلاقى
مودبل 2007 و 2008 1400 8 صباب مش عارف ليه يالرغم من العربيه ده حلوه جدا بس مش منتشره فى الشارع كتير
عندك موديل 2001 و 2002 1400 16 صباب ,واسمع انه فرنساوى بالكامل وقطع غياره الغير مشتركه مع 2003 بتكون نادره شويه
عايز اقولك كلمه اخيره الرينو فى مش جايبه وراء غير كلام الاشعات وده الى مخلى اعاده بيعه صعبه وتقيله

[kh_talaat]

أنا كنت ناوي أشتريها من حوالي سنة وكانت موديل 2004 بس الحقيقة خفت من حاجتين

الأول : قطع غيارها الغالية
الثاني : إنها تقيلة في إعادة البيع

لكن غير كدة العربية حلوة وتستاهل وسعرها معقول جدأً ، يعني لو العيبين دول مش مهمين بالنسبة ليك إتكل على الله

[m10_10]

العدبيه ممتازه في كله وانا جتلي فتره وكنت ناوي عليها بس اللي رجعني فكلامي قطع الغيار الغاليه...

انما كعربية واداء تعتبر جيدة جيدا

[MoToRiZeR]

حضرتك مدام بتشتري زيرو يبقي مش هتبيع قبل 5 سنين عالاقل .. يعني سعر اعادة البيع مش هيكون بأهمية سعر اعادة بيع سيارة مستعملة

[Chicco]

عربية كويسة جدا في حدود سعرها توكل على الله

[أبو عبدالله]

انا اوافقكم علي بعض النقاط لصالح الكليو ولكن انا راى لها نقاط مؤثرة جدا في الشراء وهيا
1- العربيه ناشفه من تحت
2- سواقتها على الطرق الطويله متعبه جدا لأن قاعدتها وحشه خصوصا السواق والكنبه الخلفيه صعبه جدا جدا جدا وده لصالح الشنطه فهيا كبيره جدا ولكن فتحتها ضيقه لأدرجة اني كنت بدخل سخان فيها 50 لتر مرضاش يدخل وحطيته في شنطتى انا الهاتشباك . غريبه مش كده
3- اسعار الصيانه وقطع الغيار عاليه قوي قوي بالنسبة لثمن العربيه
وخصوصا ان قطع الغيار عمرها الافتراضي ضعيف او قليل بالنسبة للياباني

[Chicco]

سواقتها على الطرق الطويله متعبه جدا لأن قاعدتها وحشه خصوصا السواق والكنبه الخلفيه صعبه جدا جدا جدا وده لصالح الشنطه فهيا كبيره جدا ولكن فتحتها ضيقه لأدرجة اني كنت بدخل سخان فيها 50 لتر مرضاش يدخل وحطيته في شنطتى انا الهاتشباك . غريبه مش كده

الكنبة اللي ورا ضيقة فعلا و ده اللي مخلي الشنطة كبيرة جدا بالنسبة لحجم العربية .... لكن سواقة العربية بالذات في السفر مريحة جدا
طبيعي يا باشا إن فتحة الهاتشباك تبقى أكبر من السيدان هي ديه الميزة :)

[limo]

انا اوافقكم علي بعض النقاط لصالح الكليو ولكن انا راى لها نقاط مؤثرة جدا في الشراء وهيا
1- العربيه ناشفه من تحت
2- سواقتها على الطرق الطويله متعبه جدا لأن قاعدتها وحشه خصوصا السواق والكنبه الخلفيه صعبه جدا جدا جدا وده لصالح الشنطه فهيا كبيره جدا ولكن فتحتها ضيقه لأدرجة اني كنت بدخل سخان فيها 50 لتر مرضاش يدخل وحطيته في شنطتى انا الهاتشباك . غريبه مش كده
3- اسعار الصيانه وقطع الغيار عاليه قوي قوي بالنسبة لثمن العربيه
وخصوصا ان قطع الغيار عمرها الافتراضي ضعيف او قليل بالنسبة للياباني

1 العفشه ناشفه فى المطبات فعلا وده ميزه وعيب فى نفس الوقت ميزه ان العفشه كده عمرها الافترادى اطول وثبات اعلى فى الطريق عيب فى الاحساس بالمطبات وفواصل الكبارى والشوارع المكسره

2-بالعكس انا اكتر حاجه عجبانى فى العربيه ده ان كراسيها عاليه سواء الكراسى الاماميه او الكنبه بس طبعا كريسها مش مريحه اوى زى الكورولا لاكن احسن من الانوس وعربيات تانيه

3- اما موضوع الشنطه ده راجع ان الرف الخلفى كبير فى مقابل باب الشنطه صغير وده مشكله موجوده فى الكورولا والياريس بس طبعا هيه حاجه مش لطيفه انهم يضغروا باب الشنطه

4- اسعار قطع الغيار فعلا غايه شويه وده لو بتقارنها بالانوس لاكن لو بتقارنها بالكورى الحديث هتلاقى ان قطع غيارها ارخص وعلى فكره قطع غيارها معمره
سعر التيل الامامى للكليو صناعه فرنساوى 222 جنيه فى التوكيل وبيعد حوالى 23 الف كم سواقه عنيفه وداخل المدينه فى حين ان الانسر سعر التيل الاصلى بتاعها حوالى 350 وبيعيش حوالى 20 الف كم مع نفس الظروف

فى النهايه احب ان اقول ان الكليو قد تكون مناسبه لشخص ومش مناسبه لشخص تانى
فعند الاخيار يجب ان تنظر فى مزايا السياره بالكامل وتنظر ايضا الى العيوب الكامل بدون محاباه وتشوف هل المزايا هى فعلا التى تريدها ولا تستطيع الاستغناء عنها ام انت تريدها وتستطيع التغاضى عنها ونفس الشيئ بالنسبه للعيوب
من وجه نظرى المزايا: ان العربيه ناعمه جدا -محرك فرنساوى الصنع طويل العمر - خامات التقفيل معقوله - معدل امان جيد (وجود اير باج للساق وبعض السيارات مزروده بفرامل مانعه للانزلاق ) توكيل محترم جدا جدا هدفه الاول ارضاء العميل -استهلاك بنزين رائع
العيوب: ثقيله فى اعاده البيع -قطع غيار مرتفعه نسبيا عن مثيلاتها فى السوق -عفشه ناشفه -صيانه يجب ان تتم فى التوكيل -العربيه معقده بعض الشيئ فى الميكانيكا -سعر اعاده بيع منخفض - صاج ضعيف نسبيا -الكنبه الخلفيه ضيقه شويه
فى النهايه القرار الاخير لك بس انا راى انك لو تعرف تزود وتجيب ياريس او لانسر يبقى انت كده مسكت العصايا من النصف

[emadkamel]

متشكر جدا لكل الاخوه المشاركين ولسه منتظر المزيد من خبراتكم مع العربيه

[fiatmomo]

عريبة جميلة جدا ومعمرة جدا جدا جدا .... وموتورها ممتاز

لكن مساحة الكنبة عليها ملييييييييييييييياااار علامة استفهام

الكنبة ماتنفعش نهائى لحد اطول من 177 سم ... اصغر صالون خلفى قعدت فية فى عربية سيدان