ميجان 2005 على السريع كل نص ساعة، هبده + لمبة سيرفيس + Check Gearbox

[Savorisky]

معايا ميجان 2005 عامله 105 الف كيلو، و انا مسافر القاهره من كام يوم كده حصلتلى المشكله دى:
فجأه وانا على سرعة 100 و بدون سبب هبده فى الجيربوكس + لمبة سيرفيس + Check Gearbox و تجيب تالت و مفيش اى نقل بعد كده، و لازم اركن و ابطل و ادور تانى و كله يبقى تمام و بعد نص ساعه يحصل نفس السيناريو تانى و تالت و رابع.

يا ترى ايه العيب ده يا وحوش الميجان؟ مع العلم ان بيحصل احيانا لما بفرمل عشان اقف ان العربية بتقف ولكن الجيربوكس مش بيجيب اول يعنى لما تشيل رجلك من على الفرامل تفضل واقفة و ماتتحركش لحد ما تدوس بنزين و فجأة تجيب الاول وتهبد جامد و تندفع بسرعة

ممكن حد يقولى اتصرف ازاى فى الموضوع ده؟.

[Ahmed Amin]

أنتا ليه خايف تروح التوكيل ؟؟
علي فكرة هيكون أضمن لك في حالتك دي بدل ما تروح بره وحد يعك لك في الجيربوكس لأن واضح أن المشكلة كبيرة

بالمناسبة عملت أيه في أستهلاك البنزين ؟
واضح أنك عندك مشاكل كتير مش واحدة بس.

[Savorisky]

اصل التوكيل بيبالغ جدا في الاسعار لكن ممكن حد يكون قابلته المشكله دي قبل كده و عارف العيب ده ايه فا حيبقى اروح للميكانيكي و اقله غيرلي كذا و خلاص.
و بالنسبة لموضوع البنزين ده انا غيرت البوجيهات و فلتر البنزين و فلتر الهواء و حاسس ان في تغير الحمدلله

[drsmsm]

لازم تتحط العربية على الجهاز
لانه ممكن يكون حساس سرعة أو مشكلة في الكونترول أو تهنيجه
أنا حصلتلي من كام شهر و كنت مستعجل فما استنتش و شيلت كابل البطارية و حطيته تانيو المشكلة اختفت بس ما انصحكش بكده لانك بكده مش حتعرف المشكلة كانت منين

[ahmedfouad]

غيرت زيت الفتيس قبل كدة ولا لسة زيت الفبريكة؟

[Ahmed Amin]

لازم تتحط العربية على الجهاز
لانه ممكن يكون حساس سرعة أو مشكلة في الكونترول أو تهنيجه
أنا حصلتلي من كام شهر و كنت مستعجل فما استنتش و شيلت كابل البطارية و حطيته تانيو المشكلة اختفت بس ما انصحكش بكده لانك بكده مش حتعرف المشكلة كانت منين

الحمدلله أنها أتحلت

وبالنسبة للفتيس زي ما سمسم قال هيا حاجة من أتنين يا زيت الفتيس وحش وعايز يتغير
يا أما الكنترول فيه مشكلة وفي الحالة دي يفضل تكشف عليها في التوكيل أو حد يكون مضمون بره.

[nodey]

شوف يا اخي السلام عليكم اولا المشكلة دي عندي في الكليو 2004 وسالت فيها كتتير وسألت التوكيل قال لازم نحط العربية علي الحهاز لكني ما سكتش دورت في منتديات اجنبية وطلع ان العيب ده منتشر في الرينو عموما والبيجو اللي راكب بيهم نفس الجير الاتوماتيك نوعه AL4 او DP0 والمشلكة دي اساسا ناتجة عن عدم عمل صمام علق مسارات الزيت لينقل الجير للسرعة الاعلي تجاوبا مع دوسة البنزين وده يحدث لو قرست علي العربية في بداية الدوترة ويظهر لك كلمة اتو او سيفر جير بوكس وهبده في الجير الهدبه معناه ان الجير بيقل السرعات ويثبت علي السرعة الثالثة بس الحل ان الجير يتفك عند واحد فاهم ويشيك علي السلو نايد فالف ده وبيتغير ثمنه مش غالي في مصر عامل 500 ج وربنا معاك وده ملف يشرح خطوات تغيير هذا الفالف لحل المشلكة
حمله من هنا وادي لي بالزرية الصالحة عاجلا غير آجل باذن الله

[Savorisky]

شكرا يا اجدع وأجمل شباب وخصوصا Nodey المعلومات دي قيمة جدا وأنا حاروح أشتري السلونيد فالف ده واغيره انشالله وحقولكم إيه اللي حصل
ربنا يرزقك بالذرية الصالحة يارب يا Nodey

[gefoo]

انا عندى نفس المشكله روحت الميكانيكيون العرب كشف عليها بالجهاز وقالولى حساس تبريد الفتيس الكلام ده لما بتسخن جامد وخصوصا مع التكييف بس لما تبرد يرجع يشتغل تانى انا لسه معملتش الحوار ده ياريت لو حد يفيدنا فى الموضوع

[triton]

كانت عندي و حلتها .... ده سولونويد فالف ... تمنه استيراد 200 جنيه و هتحتاج تغير زيت بحوالي 120 جنيه + المصنعيه

[Hegazio]

فالف الفتيــــــــــــــــس
بص .. لو قلقان من التوكيل يقل ادبه معاك .. روح فرنش موتورز بس الرحاب مش احمد عصمت .. لسه قلقان .. روح لمحمد الشرقاوي - رينو الحرفيين

[mouraddesk]

كانت عندي و حلتها .... ده سولونويد فالف ... تمنه استيراد 200 جنيه و هتحتاج تغير زيت بحوالي 120 جنيه + المصنعيه

كنت لسه هقول له كده لانى استفدت من الكلام بتاعك و بالمناسبة اديله كمان رقم الراجل بتاع الفتيس اللى فى الهرم

[Savorisky]

بس يا شباب انا من اسكندرية، و بتعامل مع ميكانيكى كويس و موثوق فيه، بس الى يعرف حد جامد هنا فى اسكندرية يقولى برده عشان يبقى الواحد عنده حلول بديلة

[Mohd_Adel_Amin]

السلونايد بيتغير في التوكيل في ضمان الفتيس , بس حسب ما اعلم ان ضمان الفتيس 100 الف كيلو , لو حضرتك بتعمل صياناتك عندهم ممكن تروح وتقنعهم انهم يغيروه في الضمان ..
انا غيرته في الصيانة الدورية تبع الضمان , مش بياخد وقت خالص , او ممكن تروح لحمدي في الحرفيين وتاخد معاك واحد جديد او استعمال وزيت فتيس ..

[M_samir]

فالف الفتيــــــــــــــــس
بص .. لو قلقان من التوكيل يقل ادبه معاك .. روح فرنش موتورز بس الرحاب مش احمد عصمت .. لسه قلقان .. روح لمحمد الشرقاوي - رينو الحرفيين

وليه اللى مش فى احمد عصمت