بخصوص فيتيس الميجان الاوتوماتيك

[ramykimo]

من شهر اشتريت ميجان 2001 اتوماتيك و عملتلها صيانة ال 120 الف كاملة و غيرت زيت الفيتيس فى فرنش موتورز..فى نفس اليوم لمبة الفيتيس نورت و دى حسب ال handbook معناها اتن فى مشكلة فى الفيتيس ولازم اراجع مع التوكيل بطلت العربية و دورتها اختفت و مظهرتش تانى و نقلات الفيتيس عادية جدا.. ركنت العربية 25 يوم و امبارح لاحظت تنقيط ميه و نتشخة خفيفة جدا بين النقلات الاول و التانى رفعتها فى بنزينة ولاحظت بقايا زيت بس واضح انه قديم و تنقيط الميه مستمر .. خدتها و طلعت على الميكانيكيون العرب و حليت مشكلة الميه.. نيجى للفيتيس المهندس اللى هناك قالى ان قربة الفيتيس عايزة تتغير و و انه هوا اللى بيسرب زيت و وان فيه مشاكل فى ال oilseal اللى فيه و محتاجة تتغير .. سألته متاكد اللى ايوه و هتاكد اكتر لما افك..قلتله طب فك قاللى مش هفك الا لما تكون قطع الغيار جاهزة و دى هتجيلوا من التوكيل بعد اسبوع و الموضوع ده هيتكلف 4000 جنيه .. انا مقتنعتش و طالما فيها التاخير ده يبقى اروح التوكيل احسن .. ملحوظة ( الكابل الى واصل من عصاية الفيتيس للكبوت فيه مشكلة او قطع دى حاجة قديمة فى العربية بس المالك القديم كان مصلح العيب دى عند ميكانيكى كويس و ماشى بيها كدة و مافيش مشكلة)... المهم النهاردة روحت توكيل العبور.. و قلت اكشف و كانى معرفش حاجة.... طلبت كشف عن تسريب زيت و مراجعة زيت الفيتيس و كشف عن تنتيشة فى الفيتيس.. النتيجة كالتالى
لا يوجد تسريب زيت
التنتيشة دى بسبب ان الكابل عايز يتغير و الكابل مش هيتغير لوحده لازم بالعصاية كاملة و ده تمنة 3000 جنيه و برضو ال selector بتاع الفيتيس عايز يتغير دى حاجة فى الالكترونيات بتاع العربية و تمنه 400 جنيه
سألته طب ينفع امشى بيها كده؟؟؟ مهندس التوكيل قالى ينفع لان ده عيب مش داخل جوه ميكانيكة العربيه و بعدين انت ماشى بيها كده من فترة او لو مش عايز تدغع كل ده ممكن تصلحها عند (عصام بشتر) دا ميكانيكى بتاع رينو فى الحرفين بالمناسبة حد يسمع عنه؟؟

ملحوظة العربية سحبها كويس جدا و من 6 شهور مغيرة السلونويد فالف و فى 2006 عملت عمرة فيتيس كامله دا حسب ال History بتاعها من التوكيل نفسه


ياريت تقولولى رايكم ايه احسن حل اعمله مع العربية دى؟؟ و اسف على الاطالة

[chato_eg]

عصام بشطر مش ورشة
ده صاحب أحد كبار إن لم يكن أكبر محل للقطع الاستيراد للفرنساوى ( بيجو - رينو - سيتروين )...و هو شخصيا راجل مهندس و بيفهم

يبدو إن فى التوكيل قال لك لو مش عايز تدفع الثمن الباهظ للحاجة جديدة..فممكن تجيبها استيراد من عند عصام بشطر و إللى بدوره هيبعتك عند واحدة من ورش الفرنساوى فى الحرفيين زى محمد الشرقاوى أو طايع أو غيرهم

[ramykimo]

شكرا على التوضيح .. و هوا فعلا ادانى الحل ده لان تغير عصاية الفيتيس مكلف جدا.. الى انا مش مقنع بيه لحد دلوقتى ان ممكن اغير العصاية كلها و ميكنش هوا ده سبب النتشة!!!! انت ايه رايك؟؟

[chato_eg]

للأسف مش هأقدر أفتى فى فتيس الميجان i

[ramykimo]

شكراااا ..ياريت بقى اعضاء المنتدى يتفضلوا بالرد

[Ahmed Selim]

محمد عادل أمين هو الوحيد اللى معاه ميجان 1

أبعتله على الخاص أو أستنى يدخل الموضوع

و على فكرة..........ممكن تروح لعصام بشطر فى الحرفيين و تسأله على العيب من غير ما تقوله قالولك أيه فى التوكيل و تشوف هيقولك أيه

[ramykimo]

انا فعلا روحت لعصام بشتر بس هوا تاجر قطع غيار مش ميكانيكى و الحمد لله لقيت عندة كذا عصاية ... سعرها 300 جنيه و للحظ كان موجود الميكانيكى اللى اسمه طايع ف اتكلمت معاه و حكته الدنيا فيها ايه .. هو برضو مش مقتنع ان سبب النتشة عيب العصاية و بيتكلم فى ان الفيتيس يفضل انه يتغير بالكامل ... بصراحة انا بفكر امشى بيها كدا طالما كدا كده الحل هيكون تغيير الفيتيس يبقى خلينى معاه لحد لما ينتهى خالص او المشكلة تكون اكبر من النتشة ساعتها يبقى مكمكن اغيره... ملحوظة تمن الفيتيس 3000 جنيه

انت ايه رايك؟؟

[Ahmed Selim]

لأ تروح لواحد تانى و تالت كمان عشان تتأكد ؟؟

طيب أنت محاولتش تتفق مع بشطر على أتفاق.....أنك تركب العصاية زى ما التوكيل قال و لو مطلعش العيب منها تغير الفتيس من عنده ؟
بس تبقى مستقر على راي بخصوص الفتيس.....هل هتغيره لو العيب فيه ولا لأ.

[ramykimo]

انا معنديش مشكلة انى اركب العصاية هيا مش غالية بس اصلا العيب مش منها... لكن عندى مشكلة فى تمن الفتيس و بقول طالما كده كده هغيرة يبقى استنى شوية و اشو ف لو الوضع فضل زى ماهو مش هغير لو فى مشاكل اكبر ظهرت ساعتها هغير و اضطر ادفع .. الفكرة ان العربية سحبها معقول جدا و ماشية على الوضع ده بقالها كتيير. على العموم انا هعدى على فرنش موتورزو اشوف رايهم

[ramykimo]

مافيش حد ناوى يشارك برأيه تانى؟

[pioneerahmed]

بص يا باشا انا من كام يوم كدة حصلتلى مشكلة عكس بتاعتك كنت راجع من اسكندرية و ماشى 180 لقيت لمبة الفتيس نورت و كتبتلى رسالة تشيك جير بوكس فوقفت و بطلت و دورت على طول راحت الرسالة و مظهرتش تانى قلت اروح فرنش موتورز الى فى احمد عصمت و قلت اطمن فحطهالى على الجهاز و قالى تمام مفيش حاجة و عامة انا لغيتلك الرسالة دى خالص انا قلت هما ادرى منى و دفعت زى الباشا و مشيت و بعدها بربع ساعة بدوس بنزين لقيت ال ار بى ام مش بيعلى ولا العربية بتسحب خالص ابطل و ادور تشتغل دقيتين و تقف تانى فكلمت المهندس و قلتلة قالى لا تعالى بكرة ممكن يكون الفتيس باظ فكلمت واحد تانى صاحبى معاة ميجان قالى لا روح لواحد اسمة مصطفى خليل فى صقر قريش عشان فرنش موتورز هيلبسك فتيس كامل فقلت اروح و بردة عشان كان الوقت اتاخر و فرنش قفلوا فرحت و قالى لا دول البهوات هناك لغولك سوفت وير الفتيس كلو من ال ecu و عملهولى فى دقيقة بخمسين جنية و خلاص بقت زى الفل
انا بس حبيت اقولك متسقش اوى فى فرنش موتورز و بردو الراجل مصطفى خليل دة شكلة كدة و الله اعلم احسن منهم

[ramykimo]

ملحوظة انا بتكلم على ميجان 2001 مش ميجان الجديدة