مشكلة فى رينو كليو

[jaguar_20]

ارجو المساعدة فى كيفية تخطى و اصلاع تلك العيوب الاتية من زوى الخبرات السابقة فى [لكليو
مع العلم ان السيارة رينو كليو موديل 2003

بشم ريحة بنزين قوية جدا فى الصالون بعد التفويل والبنزين بيخلص هواااااا
المية بتقل بصورة دورية مع العلم انى رحت لمركز صيانة وعمل تشك على دورة المية ومفيهاش مشكلة
ترس الكيلو متر اللى فى الفتيس بايظ ولازم افك الفتيس علشان يتغير

[ramy_gamal]

بالنسبه ل ريحه البنزين اكيد هتكوون من صاموله التانك وبتكون تحت الكنبه يمين ....حضرتك ارفع الكنبه هتلاقى غطاء شيله براحه عشان الاسلاك لو لقيت حولين الصاموله بنزين يبقى اكيد عايزة تتغير...
بالنسبه ل الميه اتاكد ان مفيش اى تسريب تحت العربيه

[rafe3_dent]

انا عندي نفس المشكلة المياه بتخلص بسرعة من العربية
مش عارف فيه ايه !!

غيرت القربة كانت مخرومة ومفيش فايدة
ومفيش تسريب تحت العربية
حتى الريداتير الميكانيكي فكه واتأكد ان مفهوش تسريب ونضفه كويس

ومازالت المشكلة قاااائمة ولازم ازود المياه اول بأول

[ramy_gamal]

انا كمان عندى مشكله الميه بقالها يومين بتقل كتير ولسه هاروح ل الميكانيكى بتاعى واقلقم وصلت ل حاجه جديدة ولا لأ
بس المشكله دى ظهرت بعد ما كنت بشد مع واحد صاحبى بس شد جامد ... هل فى علاقه بينهم
انا اتاكدت ان الميه فى القربه نضيفه يعنى مدخلش عليها زيت والعكس اتاكدت من الزيت

[jaguar_20]

اولا شكرا على الرد للاخوة
بس عندى تعقيب انا فعلا بشوف المية وبلاحظ التسريب انا مش شايف اى تسريب خالص
وكمان روحت لميكانيكى قالى غير غطا القربة وغير مسمار فايز الهوا
وغيرتهم
والمشكلة هى هى
مش عارف فين
اما بانسبة للريح البنزيين لقيت الصامولة مرشحة هجيب صامولة تانية وجوان وهشوف الدنيا هتوصلنى لفين

[macgiver30]

ايه يا جماعة مجبش كليو وللا ايه
اخلينى فالكورى وللا حاجة
وللا الكليو مية مية وللا ايه الدنيا

[ramy_gamal]

ايه يا جماعة مجبش كليو وللا ايه
اخلينى فالكورى وللا حاجة
وللا الكليو مية مية وللا ايه الدنيا

والله العربيه معايا زى الفل بس موضوع الميه دة اللى جديد يارب الاقى حل اكيد
وبالنسبه ل قطع الغيار متوفرة وموش غاليه وعلى فكرة عربيه كويسه وبتاعت شغل جامد

[macgiver30]

عمتا ربنا يسهل كده وتتحل وتكون بسيطة
ومحتاج مساعدتكم تساعدونى
قدامى اختيارت كتير
ابيزا2000
سى3
ويرا
سيفيا
ريو
لانوس
405

هل الكليو مقتصدة برضة فموضوع المصاريف
وللا بتزعل ولف بقى ودوور ورووح وتعاالا
وشكرا جزيييلا

[ramy_gamal]

النهاردة رحت ل الميكانيكى وعمل كل المفروض يتعمل كشف على الكوع اللى تحت فلتر الهواء وبص على الطلمبه وبص على الدواسات وملاقاش فى ميه و بص على القربه والغطاء بتاع الفبريكه محكم كويس واتاكد ان مفيش هواء وبرضه المشكله موجودة بعد ماسبته لفيت كتير وكان عندى مشاوير كتير اول ما روحت بصيت على القربه لاقتها نقصت شويه !!!!!!
ياريت اللى يوصل ل حل يقولنا وانا كمان ناوى بعد يومين تلاته اروحله تانى و لو وصلت ل حاجه جديدة هبلغكم

[ramy_gamal]

طبعا طول الايام اللى فاتت الميه كانت بتنقص المهم النهاردة بصيت على الزيت لقيت مقاس الزيت عالى !!!!!!!!!!!!! بس اللون هو هو بقيت مش عارف هل الميه دخلت على الزيت ولا لأ المهم زودت ميه ومشيت وكنت ناوى بعد الشغل اروح ل الميكانيكى مشيت حوالى 7 دقائق لقيت العربيه بقيت تنتش وتقطع وهى ماشيه ( اول مرة ) كلمت الميكانيكى وحكتله وقالى لو الزيت لونه متغير يبقى لازم نفك وش السلندر ويروح ل المخرطه ويتملى ويتعمل زي روديه بسيط !!!! طبعا انا اتجنيت بقيت اقوله العربيه ماشيه 73 الف بس واعمل نص عمرة ليه دا انا بحافظ على العربيه وسواقتى هاديه جدا قلى ملوش علاقه الميه اللى عندنا مش كويسه وهى اللى عملت كدة نسيت اقولكم ان الموضوع دة هياخد يومين شغل مش عارف اعمل ايه وكمان وان طالع من الشغل العربيه بقت بتقطع اكتر

[medohai510]

السلام عليكم،،،
طمني أول بأول وصلت الي أية والله يوفقك وتطلع بسيطة

[ramy_gamal]

وعليكم السلام ...
روحت ل الميكانيكى امبارح الصبح واتاكد من موضوع الميه وملقاش الميه دخلت على الزيت بس كان الكويل التالت والرابع بايظين غيرت الطقم والتقطيع راح بس مشكله الميه اعتقد زى ماهى

[Ahmed Selim]

وعليكم السلام ...
روحت ل الميكانيكى امبارح الصبح واتاكد من موضوع الميه وملقاش الميه دخلت على الزيت بس كان الكويل التالت والرابع بايظين غيرت الطقم والتقطيع راح بس مشكله الميه اعتقد زى ماهى

يا باشا ما تسأل العقيد خالد على ميكانيكى رينو فى أسكندرية......ممكن يدلك على واحد يشوفلك القصة دى.

أو تروح التوكيل تشوف سبب المشكلة أيه و لما يقولولك على السبب أقولهم هعملها وقت تانى لأنى مش عامل حسابى فى الفلوس و روح أعملها برة ( بس مش عارف ممكن ياخدوا فلوس على الكشف ولا لأ )

[ramy_gamal]

يا باشا ما تسأل العقيد خالد على ميكانيكى رينو فى أسكندرية......ممكن يدلك على واحد يشوفلك القصة دى.

أو تروح التوكيل تشوف سبب المشكلة أيه و لما يقولولك على السبب أقولهم هعملها وقت تانى لأنى مش عامل حسابى فى الفلوس و روح أعملها برة ( بس مش عارف ممكن ياخدوا فلوس على الكشف ولا لأ )

الف شكر يا احمد باشا انا بتعامل مع واحد كويس وكان شغال فى التوكيل وكان العقيد خالد قالى على واحد تانى بس لسه مرحتلوش وكمان ممكن اخطف يوم واروح ل التوكيل احسن بردة

[ramy_gamal]

تقريبا يا جماعه النهارد وصلت ل المشكله ....انا بقالى مدة مزودتش الميه ومشيت النهاردة فى زحمه وانا راجع من الشغل المهم المؤشر طلع حته زيادة عن مكانه وقفت مرة واحدة وفتحت الكابوت وبصيت تحت العربيه لقيت فى نقط ميه بسيطه من جانب العربيه اليمين كلمت الميكانيكى قلى مادام الميه من الجنب اليمين تبقى طلمبه الميه بس قلى لو بتنقط بسيط ممكن تغيرها بعد شويه بس مش عارف استنى ولا اتوكل على الله واغير دلوقتى هى عندة عامله 350 جنيه فرنساوى لو حد عندة فكرة عن السعر ياريت يدلنى