إختبار قيادة للفلوانس من عاشق الميجان...التقرير الوافى الكافى...

[Hany Saad]

وحوش الرينو....الحمد لله قدرت النهاردة بالصدفة البحتة أرتب test drive لفلوانس فئة الهاى لاين غدا باكر بإذن الله...

طبعا من دلوقتى عمال أعد الثوانى علشان ميعاد غدا....أنا كان نفسى أحكم على العربية دى من خلال تجربة قيادة و مقارنتها بالميجان ii من حيث الثبات, العفشة ، نعومة الموتور، الطلعة الأولى، فرق التكييف ، قطر الدوران ، الأبعاد و و و خلافه..... خصوصا بعد التقارير الرائعة عنها......

أنا عملت فيها بحث شامل فى الكماليات و ما تم إضافته و حذفه عن الميجان....لكن لأول مرة هجربها على الطريق و إنتظرونى غدا بإذن الله مع تقرير مفصل مفتت عن كل صغيرة و كبيرة فى العربية.....حتى نلتقى غدا بإذن الله.......

[nour_nrc]

هو ده الكلام

[smartchoice]

فى أنتظار تقريرك
و يا ريت تقولى عملت التيست درايف فى التوكيل و لا فين
علان انا كمان ناوى اعمله
بالتوفيق

[Mohd_Adel_Amin]

في انتظار التقرير على أحر من الجمر ..

[ecybrarian]

+1 100 100

[Hany Saad]

وحوش الرينو....أحلى صباح....لسه راجع حالا من test drive للجميلة الرشيقة فلوانس و إليكم التفاصيل مع إنطباعاتى كشخص عاشق للميجان و بقالى 5 سنين تقريبا بسوقها

-العربية الفلوانس اللى سوقتها كانت هاى لاين لون فضى يعنى كان فيها زيادة عن الفئة ال140000
-4 إيرباج زيادة
-parking sensor
-فتحة سقف
-كشافات زينون
-فرش جلد كامل

طبعا لاحظوا إنى بحكم بعين ركيب ميجان و ليس بعين شارى عادى.

-أول ملاحظة هتاخد بالك منها هى نعومة الseat belts الفائقة اللى فعلا لم أقابلها إلا مؤخرا فى مرسيدس e فى أوروبا.
يا جماعة مقارنة بالميجان حزام الأمان ناعم بدرجة ملحوظة جدا و إنت بتسحبه أو بترجعه.
-إحساس العربية من جوه يختلف تماما عن الميجان...لتوضيح الصورة أكتر...الميجان تقدر تشبهه ببيت فرنسى فى حى راقى و البيت من جوه أشيك ما يكون مليان تابلوهات سينيه و تحف رائعة و كل حته فيه مستغلة إلى أقصى درجة و لكنه ليس واسع كشيمة البيوت الفرنسية...و لكن فى الفلوانس و كأنك فى فيلا دورين دور يوجد به السائق و الراكب الأمامى و الدور الأخر به الركاب الخلفيين...يوجد 10 سم فرق طول و 10 سم فرق عرض لصالح الفلوانس عن الميجان و لكن تأثيرهم واضح بالفعل فى صالون العربية...طبعا يوجد بها رحابة محسوسة جدا......و تحس إن الزراير و الكماليات واخدة راحتها كده....
الموضوع ده طبعا له تأثير على أبعاد العربية الكلية....و فى رأى الشخصى تميل الفلوانس أكثر إلى الfamily cars من فئة الأربعينات و إنت طالع على عكس الميجان اللى كان فيه شريحه كبيرة من محبيها و ملاكها من فئة الأسر الحديثة الصغيرة من الفئة العمرية 27 سنة و إنت طالع و ذلك لشكلها و طابعها الرياضى .

-تانى إنطباع لى كان عن النعومة الغير طبيعية للدركسيون....يا جماعة إذا كانت الميجان ناعمة جدا كباور كهرباء دعونى أقول لكم إن الفلوانس تقريبا 30% أنعم كمان من الميجان فى تحريك الدركسيون على السرعات المنخفضة... فعلا برافو فلوانس.

-الشىء برده الواجب ذكره إن كرسى الفلوانس (طبعا يمكن علشان دى كانت الهاى لاين) و لكن كان فيه lumbar support و ده فارق جدا جدا بالنسبة للناس اللى ناوية تستخدم العربية للسفر و المسافات الطويلة علشان قوسة الظهر و عدم تحريك الجسم لساعات طويلة....كراسى الفلوانس مريحة جدا... برده برافو فلوانس......

-مكان الفلاشر بتاع الإنتظار أحسن بكتير عن الميجان لأنك شايفة بعينك على عكس الميجان اللى لازم تعتمد على التحسيس لأنك فى لحظات الخطر مش ممكن تسيب الموقف و تبس تحت علشان تدور على مكان الزرار....برده برافو فلوانس و بالمثل زر السنتر لوك و لكنه على الأقل بالنسبة لى ليس بأهمية زر الإنتظار......

-مع إنى من من يطلق عليهم electronic geeks و مع ذلك وجدت إن ريموت كنترول الكاسيت مش سلس فى التعامل معاه فى المرات الأولى لو إنت مش مركز فيه كويس...طبعا مش بتكلم على تعلية الصوت و لكن لعمل search و تظبيط الصوت و خلافه...أكيد بعد فترة الموضوع هيبقى أسهل و لكن للuser العادى أعتقد ممكن يبقى مش من الsoftware اللى يتقال عليه user friendly
-الصوت فى الفلوانس كان نقى و تحس إنه معالجdigitally وال terrible فيه كان واضح جدا جدا لكن كان ينقصه بعض الbase علشان يعطى المتعة الحقيقية....للأسف مكنش عندى الوقت الكافى لتظبيط هذه النقطة و أنا سايق على الصحراوى فى الشبورة......و لكن ممكن بعد تظبيط الbase من الsettings ممكن الأمور تبقى رائعة.
-نيجى بقى للنقط المهمة جدا....أنا مش عارف بصراحة العربية اللى معايا كانت عاملة كام ألف كيلو و لكن دعونى أقول بمنتهى الصراحة إن طلعة الفلوانس أقوى بكتير من الميجان...على الأقل الأول فى الفلوانس له تأثير ملحوظ....لاحظ أنا متعود على سواقة الفرنسى فكنت بدوس مش علشان أعلى الrpm و لكن علشان العربية تحس بيا...و فعلا الطلعة الأولى مقارنة بالميجان أقوى و ملحوظة...يمكن علشان العربية اللى معايا كانت مثلا على نمط الsport مش عارف و لكن مكنش عندى أى إحساس بأى lag.
-الموتور من النوع الصاحى الحامى يعنى you have to rev it up علشان تتمتع بيه و هو جاهز لكده و عايز كده...حرارتة أحمى من الميجان و عايزك دايما تقرص عليه علشان يقول كل اللى عنده....مش قرص شباب و لكن علشان راكب الفلوانس اللى فى الفئة العمرية اللى زى ما قولنا أربعين و إنت طالع يرجع تانى يحس بأيام الشقاوة و الشد و لكن الشد الموزون.....و يتناغم معه الفتيس فى harmony واضح كما إنها تميل سريعا للkick down.

-النتشة اللى كل راكبى الميجان عارفينها فى الفتيس إحساسها أقل بكتير و لكنها موجوده لو ركزت أو لو عايز تجيبها و لكن فى المجمل مش محسوسة....و يمكن تقليلها لحدها الأدنى بإضافة بنزين 95....
-الملاحظ أيضا إن الengine break الرهيب اللى كلنا عارفينه فى الميجان غير محسوس فى الفلوانس بنفس الدرجة....
-العفشة فى الميجان أنعم عن الفلوانس....طبعا أنا مجربتش مطبات و حفر على سرعات واطيه و لكن جربت مطبات و تموجات على سرعات عالية...إمتصاص الميجان ليهم أحسن...
-الثبات رائع جدا و لكنه لا يفرق أبدا عن ثبات الميجان الخرافى و ده لغاية سرعة 100 مش عارف بعد كده إيه الأخبار و لكن بالنسبة لى شخصيا أنا لا أستعمل سرعات أكثر من 100 فبالتالى طول الفلوانس و عرضها الأزيد لم يضيفوا بالنسبة لثباتها الكثير مقارنة بالميجان.....
-العزل فى الفلوانس أقل من الميجان و ده ملحوظ....الفلوانس عزلها رائع جدا و لكنه أقل من عزل الميجان اللى هو فوق الممتاز طبعا ده و الشبابيك مقفولة.
-يسمع صوت إحتكاك العجل مع الطريق داخل كابينة الفلوانس و ده شىء معجبنيش و غير موجود نهائيا فى الميجان و ده برده و الشبابيك كلها مقفولة.....

-التكييف أكثر من رائع من جميع النواحى و يتفوق على الميجان hands down.
-وجود شاشة المعلومات على الجانب الأيمن و ليس فى الوسط مكنش تعديل موفق لأنها بقت محتاجة تركيز أكتر.
-وضعية القيادة مريحه جدا و الرؤية الأمامية واضحة جدا برافو فلوانس....
-طبعا يجب أن تعتمد على المرايات الجانبية و حفظك لأبعاد العربية فى الركن و خلافه و ليس الزجاج الخلفى بأى حال من الأحوال....

*بعض المعلومات الهامه عن الفلوانس:
-يوجد بها 3 وحدات كنترول (كمبيوتر تحكم) و ليس واحد كما هو الحال فى الميجان...تكنولوجيا هى متقدمة أكثر....
-يجب الإتصال بالإنترنت لإصلاح أعطال الإلكترونيات بها على عكس الميجان.
-فى حالة تسجيل أى fault على كمبيوتر الأعطال سوف تمتنع السيارة عن الدوران حتى الذهاب إلى التوكيل لعمل reset له و لاينفع معه إزالة كابل البطارية.... على عكس الميجان اللى كانوا بيكتشفوا أثناء الفحص إنه فيه fault مسجل و لكنه لا يؤثر على دوران العربية من عدمه...

أخيرا رأى إن الفلوانس عربية رائعة بكل المقاييس...طبعا الشكل ده مسألة أذواق شخصية و لكن العربية تقريبا منعدمة أعطال التصنيع واسعة من جوه ثابتة جدا مجموعة كماليات كويسة جدا ألوان كويسة توكيل ممتاز و ضمان 3 سنوات أو 100000كيلو تكييف خرافى شنطة 530 لتر واسعة جدا فى الخلف...من أحسن الfamily cars لسنة 2010 و لكن يبقى التحدى is it the right upgrade for your megane...??!!

[ahmedbasto]

thanks

[Rsarabia]

شكرا على التقرير الممتاز و انا سقت الاتنين و لسه عند رأيى ان ميجان ii مش هتكرر تانى و فلتة من فلتات رينو وسابقة لعصرها بكتييييير و رأيى انها احسن من الفلونس

[kamalsalem]

انا لحد النهاردة لما بشوف ميجان في الشارع قلبي بيرفرف مع اني راكب زيرو

الفلوانس رحت توكيل المحكمة شفتها وركبتها وركبت بعدها الميجان... برضه مبسوط اكتر في الميجان... وبعدين لما سمعت السعر جالي انهيار عصبي ومشيت من قدامهم عشان مغلطش في حد

[osamasindbad1]

الملاحظ أيضا إن الengine break الرهيب اللى كلنا عارفينه فى الميجان غير محسوس فى الفلوانس بنفس الدرجة

ممكن افهم طنت تقصد ايه بال engine break واسف لو كان سؤال غبي بس انا لسه جديد مع ميجان ولسه باتعرف عليها رغم انها معايا من 3 شهور

[Hany Saad]

الملاحظ أيضا إن الengine break الرهيب اللى كلنا عارفينه فى الميجان غير محسوس فى الفلوانس بنفس الدرجة

ممكن افهم طنت تقصد ايه بال engine break واسف لو كان سؤال غبي بس انا لسه جديد مع ميجان ولسه باتعرف عليها رغم انها معايا من 3 شهور

من ضمن خصائص الأمان الكتيرة الموجودة فى الميجان هى خاصية الengine break مع الفرامل....يعنى لو حضرتك كنت بتجرى على التالت مثلا و روحت مرة واحدة دايس فرامل بتلاقى على طول العربية راحت مسقطة نقله لتحت و تجيب على التانى فى حالتنا دى و الrpm طبعا يعلى و ده علشان يلم معاك العربية أكتر غير إنه بيديك تحكم كامل و عزم شديد للعربية فى هذا الموقف....المشكلة لو الموقف ده إنتهى سريعا يعنى كانت تهدية عابرة...بتضطر إنك تخف رجلك من على البنزين علشان تفهم العربية إن الموقف خلص خلاص و تبتدى تنقل للغيار الأعلى....طبعا الموضوع بياخد بضع ثوانى لكن لو كنت عايز تجرى تانى على الغيار الأعلى بدون الحرق على الrpm بيبقى الموضوع رخم حبتين....

[bukla]

الف شكر على التقرير المميز اللى ما يصدرش الا من واحد فاهم و ركيب عربيات احساسة عالى جدا
اللى خلانى اقول كده تميز و تكامل التقرير بالرغم من ان ال test drive مش من السهل تخرج منة بكل الانطباعات دى و اللى بتنطبق تماما على العربية و انا اقدر احكم على دة بصفتى مستعمل العربية لمد 7 شهور و مسافة 12000 كيلو اقدر اقول ان كل كلمة قولتها عن الفلوينس صحيحة 100\100
بعض الملحوظات
1- فية جملة فى تقريرك (و فى رأى الشخصى تميل الفلوانس أكثر إلى الfamily cars من فئة الأربعينات و إنت طالع ) رأى مميز و فى محلة تماما لأنة نفس الاحساس اللى جالى و انا بتفرج على العربية قبل ما اشتريها و بالتالى حسيت ان العربية متناسبة تماما مع سنى و احتياجاتى
2- lumbar support موجود عندى فى ثانى فئة اتوماتيك و فعلا مش قادر اقولك فى السفر بيريح ظهرى قد اية
3- انا بستعمل بنزين 95 و ما بحسش بنقلة الفتيس نهائيآ الا طبعا فى حالة القرص او الشد(على رأيك محاولة الرجوع للاحساس بأيام الشقاوة) ساعتها بحس بنقلة الفتيس

[Hany Saad]

الف شكر على التقرير المميز اللى ما يصدرش الا من واحد فاهم و ركيب عربيات احساسة عالى جدا
اللى خلانى اقول كده تميز و تكامل التقرير بالرغم من ان ال test drive مش من السهل تخرج منة بكل الانطباعات دى و اللى بتنطبق تماما على العربية و انا اقدر احكم على دة بصفتى مستعمل العربية لمد 7 شهور و مسافة 12000 كيلو اقدر اقول ان كل كلمة قولتها عن الفلوينس صحيحة 100\100
بعض الملحوظات
1- فية جملة فى تقريرك (و فى رأى الشخصى تميل الفلوانس أكثر إلى الfamily cars من فئة الأربعينات و إنت طالع ) رأى مميز و فى محلة تماما لأنة نفس الاحساس اللى جالى و انا بتفرج على العربية قبل ما اشتريها و بالتالى حسيت ان العربية متناسبة تماما مع سنى و احتياجاتى
2- lumbar support موجود عندى فى ثانى فئة اتوماتيك و فعلا مش قادر اقولك فى السفر بيريح ظهرى قد اية
3- انا بستعمل بنزين 95 و ما بحسش بنقلة الفتيس نهائيآ الا طبعا فى حالة القرص او الشد(على رأيك محاولة الرجوع للاحساس بأيام الشقاوة) ساعتها بحس بنقلة الفتيس

دى شهادة أنا أعتز بيها جدا جدا.....

[د.محمود صلاح]

بالنسبة لتساؤلك الأخير .. أنا مازلت أحب وأفضل الميجان 2 الشكل السابق للفلوانس بشدة , لا اعلم لماذا ولكن أحس انه أشيك واجمل وانشاره يساعد على سهولة وجود حلول خارج التوكيل

[PoweRPassioN]

تقريروأسلوب مميز وأحساس عالي
بالتوفيق..
وفي انتظار المزيد من التقارير الرائعه