تشغيل خاصية إشارات الإنتظار مع الفرامل الفوجائية...كل يوم بحبك أكتر يا ميجى...!!

[Hany Saad]

وحوش الميجان ii أنا كل يوم بحب ميجى أكتر و أكتر....يا جماعة العربية دى اللى عملها و صممها هو رئيس قسم التصميم فى رينو و دى كانت أخر أعماله قبل ما يستقيل....العربية دى يا جماعة قصة.....و الراجل ده أبدع و ساب لوحة تخلده طول عمره.....

طبعا أنا عرفت من زميل فاضل لينا فى المنتدى إنى ممكن أعمل activation لخاصية تشغيل إشارات الإنتظار ( الفلاشر) مع الفرامل الفوجائية و النهارده روحت علشان أعملهم و طبعا فيه مهندسين معرفتى فى التوكيل قالولى كل الموديلات بداء من 2006 و إنت طالع الخاصية دى " شغالة " عندهم......يا وحوش الخاصية دى active فى جميع موديلات الميجان ii من 2006 و إنت طالع ....و لو كنت 2005 روح التوكيل يعملها activation.

الجديد يا رجالة و اللى مكنتش عارفة علشان كده كنت فاكرها مش شغالة إن الخاصية دى بتشتغل بعد سرعة حوالى 70 كم/ ساعة و ليس قبل ذلك...يعنى جربتها من الثبات و جريت و فرملت محصلش حاجة....جريت لغاية 50 كم و فرملت محصلش حاجة....جريت على الصحراوى لحد تقريبا 70 كم/ساعة و ضربت الفرامل المتينة بعد ما تأكدت إن مفيش حد ورايا و سمعت و شفت أحلى إشارات بتشتغل لوحدها علشان تنبه اللى جاى خلفى و أول ما دوست بنزين تانى راحت طافية لوحدها....فيه كده روعة....فيه كده أمان....فيه كده إهتمام بالتفاصيل.....العربية دى بتخاف على صاحبها أكتر من نفسه و بتبان فى المواقف الصعبة.....أنا بتكلم على موديل2006 يا رجالة مش 2011 ....فيه كده بجد؟؟؟...

أنا بحب و بحترم الميجان جدا جدا......مبروك يا وحوش عربيتنا الجميلة.....

[Eslam.Elrefaey]

فعلن حاجات بسيطة بس من الآخر

[zangry]

طب والله دى حاجة حلوة انا العربية بقالها معايا خمس سنين وكل يوم بكتشف فيها حاجة حلوة جديدة

[osamasindbad1]

كل موديلات 2006 اصل انا عندي 2006 بس phase 1 وفيه 2006 phase2 هي شغاله في كله ولا ايه

[Hany Saad]

كل موديلات 2006 اصل انا عندي 2006 بس phase 1 وفيه 2006 phase2 هي شغاله في كله ولا ايه

أنا كمان 2006 phase1 و شغاله 100 100 و مكنتش مصدق غير لما جربتها بنفسى....روعة.....

[ecybrarian]

+1 بصراحة يا مان، انت جامد جدا (-: آخز حاجة زي ما بيقولوا :-)..انت بحق صاحب اجمد موضوعات في قسم رينو سنة 2010..والمنافسة شديدة بينك وبين Elsarrawy كأنشط الوحوش وأكثر هم ايجابية في المشاركات

[Ahmed Selim]

أيه يا رجالة.......أنتوا أول مرة تعرفوا الخاصية دى ولا أيه ؟

على فكرة أنا معايا 2005 و شغالة معايا من غير ما اروح التوكيل علشان يشغلوها ولا حاجة.

[Hany Saad]

+1 بصراحة يا مان، انت جامد جدا (-: آخز حاجة زي ما بيقولوا :-)..انت بحق صاحب اجمد موضوعات في قسم رينو سنة 2010..والمنافسة شديدة بينك وبين elsarrawy كأنشط الوحوش وأكثر هم ايجابية في المشاركات

ده بس حضرتك من ذوقك.....أنتم اللى أجمد و أنشط وحوش و الواحد بيلاقى نفسه معاكم.....و لولا التجاوب السريع بتاعكم مكنش الواحد بقى ليه نفس يشارك.....أشكرك جدا.....

[Hany Saad]

أيه يا رجالة.......أنتوا أول مرة تعرفوا الخاصية دى ولا أيه ؟

على فكرة أنا معايا 2005 و شغالة معايا من غير ما اروح التوكيل علشان يشغلوها ولا حاجة.

أحمد بك....فينك من زمان.....كل سنة و حضرتك طيب و متحرمناش من مشاركاتك المثمرة....

أنا كنت فاكر إنها خاصية عايزة hardware مش software و خصوصا إنى إتعرضت قبل كده لموقف و فرملت جامد لغاية لما العربية وقفت و برده مشتغلتش و ده اللى أكد لى الموضوع إنها مش موجودة عندى....أول مرة أعرف إنها بتشتغل فقط مع السرعات العالية و كمان الحلاوة إنها بتطفى بعد لما الموقف يخلص....إيه الجمال ده......

[modygemy86]

في حاجه احلي بقي... لو الفرامل اعنف واعنف زي مثلا في حادثه بعد الشر لا قدر الله او علي 120 مثلا.. الفلاشر بينور ويطفي بسرعه اسرع من الطبيعي علشان يبين للقادم ان في حاله طوارئ... انا عرفت الموضوع دا من واحد زميلنا عمل حادثه بالميجان علي طريق سفر وكتب وعلق ان اكتر حاجه شدته في الموضوع ان الميجان كانت عماله تعمل فلاشر بسرعه.

بالمناسبه انا معنديش ميجان بس بحلم بيها العربيه دي .... ادعولي :)

[د.محمود صلاح]

عربية تستحق الإقتناء

[pharonicking]

خاصية جميلة جداااا

[M.Moustafa]

احمد يا عبد المقصود طبعا الخاصية دي ولا نحلم نشوفها في عربياتنا حاليا، الميجان فيها مزايا اكتر من كده كمان وهيا فعلا من احلى العربيات اللي الواحد اقتناها كانت معايا لمدة 4 سنين شقاء وكانت اصيلة والله

[Ahmed Selim]

أحمد بك....فينك من زمان.....كل سنة و حضرتك طيب و متحرمناش من مشاركاتك المثمرة....

أنا كنت فاكر إنها خاصية عايزة hardware مش software و خصوصا إنى إتعرضت قبل كده لموقف و فرملت جامد لغاية لما العربية وقفت و برده مشتغلتش و ده اللى أكد لى الموضوع إنها مش موجودة عندى....أول مرة أعرف إنها بتشتغل فقط مع السرعات العالية و كمان الحلاوة إنها بتطفى بعد لما الموقف يخلص....إيه الجمال ده......

يا باشا موجود تحت النظر

الموضوع ده حصل معايا زمان يمكن بعد سنة أو أقل من ساعة ما أشتريت الميجان....كنت راجع من الساحل بالليل و فاتح فى الشمال على 160 تقريباً و طلع واحد ابن حلال بعربية بى أم 500 من يو ترن و قطع الطريق بالعرض......و طبعاً مش عاوز أقولك على الفرامل كانت عاملة إزاى......ستر ربنا أن مكنش فى حد قريب منى جاى ورايا بسرعة.....و تخيل بقى لو نفس الموقف و أنت مكلبش بأيديك فى الدركسيون و عاوز تنبه اللى وراك أن فى موقف طارئ....هتعمل أيه!!!!!

احمد يا عبد المقصود طبعا الخاصية دي ولا نحلم نشوفها في عربياتنا حاليا، الميجان فيها مزايا اكتر من كده كمان وهيا فعلا من احلى العربيات اللي الواحد اقتناها كانت معايا لمدة 4 سنين شقاء وكانت اصيلة والله

يا باشا أنت أخرك تفتح الأزاز و أنت واقف برة العربية بالريموت و متعرفش تقفله بالريموت برضه................هو فيه ذكاء كده !!!!!!!!!!!!!!!!!!!!!!!!!!

[M.Moustafa]

بقولك صحيح يا عبد المقصود بعد اذن صاحب الموضوع اسالي عندك هل ممكن اركب نفقيشن على نفس الشاشة ولا لاء وبكام؟