قررت اغير الجنوط 16..يادي الدوخة

[ecybrarian]

انا قررت اغير الجتوط الاصلية 100*4..خلاص زهقت..الجنوط بقت مش نافعة..وأنا قررت اغيرهم وحسب نصيحة الوحوش القدماء مش هاركب جنوط ميجان تاني..وبالف لفة على الجنوط التايلاندي والاندونيسي..وإليكم ملخص اللفة..ولسة لم اشتري

جنوط عيسى عوض: عموما الـcollection عنده متنوعة وحلوة..عاجبني جنطين هناك قالي الطقم بيعمل 3200!!! هما بصراحة حلوين بس السعر عايز تفاوض..وأنا فاشل في موضوع التفاوض دا..الجنوط من غير رينجات بس هو عنده رينجات إذا لزم الأمر
اشرفكو (مدينة نصر، السواح، المطرية): ما شاء الله عنده اكتر جنوط تشوفها في محل في مصر..بس الخلاصة 4 جنوط هم إللي دخلوا دماغي..والسعر 2200..نفس موضوع الرينجات
محل مش فاكر اسمه في شارع علي امين (عمارات عثمان) مدينة نصر: الوحيد إللي لقيت عنده جنوط HRS انا مش عارف ايه الحلو في الماركة دي بس لاحظت إنها موجودة في عربيات كتير وفي ناس بترشحها لي..السعر 2500

الموضوع طلع دوخة فعلا..كفاية إنك تقعد تفكر انهي جنط شكله يرسم العربية افضل مع اعتبار لون وشكل العربية وشخصية العربية برضة..
=====

http://www.nilemotors.net/Nile/191892-a.html

http://www.nilemotors.net/Nile/191871-a.html

[Ahmedhussein007]

ربنا يوفقك فالاختيار اشرفكو اتعاملت معاه قبل كده خدت جنط 16 لنوبيرا وكان اندونيسى ب2000 بعد 2200 هو فعلا عنده تشكيله جامده تحير اى حد
بس ملحوظه اى جنط غير الاصلى بينشف العفشه وياثر عليها

[ecybrarian]

بس ملحوظه اى جنط غير الاصلى بينشف العفشه وياثر عليها

اي... بجد!!! حتى لو نفس المقاسات والوزن؟؟

[Hany Saad]

الوحش العزيز هشام مكى......

إحذر.....الجنط الجديد به سم قاتل......

أخوك لف نفس لفتك دى بس مش علشان الشكل لأ علشان المعلومات الفنية....

طبعا الأندونيسى كصناعة يعتبر الأفضل و لكن إحذر سيدى الفاضل......

كل هذه الجنوط عبارة عن شكل جيد و لكنها فنيا فى الضياع و هتكتشف ده فى نشوفية العفشة و عدم الإتزان على السرعات....

الكلام اللى جاى ده من بق واحد بتاع كاوتش إنما بثق فى شغله جدا.....الراجل قالى أى جنط غير الأصلى اللى نازل مع العربية سواء ميجان أو غيره من الصعب جدا جدا أظبطه إتزان (طبعا بيقصد إنه يظبطه صح)....و ده اللى خلانى أصرف نظر عن التجنيط إلا لو هتشترى مركات جنوط محترمة و دى سعرها هيبقى عالى شوية مثل الmomo مثلا...

غير كده بلاش تخاطر بنعومة العفشة و لا بإتزان ميجى الرهيب....

و بالتوفيق فى إختياراتك إن شاء الله.....

[Elsarrawy]

استاذ هشام
لو عاوز الصح وبصراحة بعد تفكير كتير جنوط الميجان افضل جنوط ليها (رغم شكوى بعض الناس منها)

لكن انا عندي وجهة نظر أخرى في الموضوع دا مبنية على خبرتي السابقة في الجنوط والحالية في الميجان

1- لو جنط الميجان الي عندك سبور وعامك مشاكل مع المطبات (بيطبق او يتشرخ وكده) يبقى اكشف على المساعدين هاتلاقيها هي السبب لأني لما ركبت المونروه امامي وخلفي بقى في فرق شاسع بجد حتى في المطبات الناشفة اوي الجنط الحمد لله مش بيحصله حاجه عكس الاول تماماً

2- لو جنوط عادية (حديد) وعاوز تغير هات جنوط الميجان استيراد (شكل الكوبرا) الي موجود في موديلات من اول 2007 دا افضل جنط من حيث الشكل من وجهة نظري

3- لو جنوط سبور وفيها مشاكل كتير وعاوز تغيرها يبقى الحل الثاني عن طريق انك تعمل بدل القديم الي عندك بالجديد (استيراد يعني) وبتدفع الفرق بس المهم انك تلاقيه

نيجي بقى للنقطة الثانية الي هي الكاوتش

لو هاتغير مقاس الجنط لازم تغير الكاوتش دي قاعدة معروفة

فضلت ادور كتير واسأل كتير جدا ولاقيت ان افضل حل للكاوتش الصح مع الميجان والي مايأثرش على العافشة ولا يحتاج جنوط اكبر من 16 الي هي موجدة اصلاً للميجان هما مقاسين من الآخر 205/55/16 او 225/50/16 والمقاس الثاني دا هو الخلاصة لو عاوز ثبات ممتاز دون تأثير على العفشة ودون تغيير حجم الجنط

والمقاس (2225/50/16) دا انا ان شاء الله ناوي اركبه ان شاء الله المرة الجاية (لما الكاوتش الي عندي يكمل العمر الافتراضي بتاعه) ويركب عادي على نفس مقاس الجنط الي عندي الي هو 16× 6.5 بوصة (بتاع الميجان اصلا)

[Elsarrawy]

والموقع دا هايساعدك جداً في اختيار مقاس الكاوتش المناسب

http://www.etyres.co.uk/tyre-size-calculator.htm

[ecybrarian]

Meggieboy و Elsarrawy..أنا شاكر ليكم جدا...بس هل في جنوط استيراد!!! أنا اعرف إن إللي بيستوردوا العربيات المتقطعة مابيجيبوش الجنوط..حد فيكم يعرف حد عنده جنوط استيراد!!!

[Elsarrawy]

لا طبعاً يا باشا الحرفين وصقر قريش فيهم كل حاجة حتى الشكمان الي كنت اسمع انه ممنوع استيراده بيجي عادي

العربيات بتيجي كاملة يادوب متقطعة نصفين وغالباً الزجاج الأمامي هو بس الي بيبقى ناقص علشان قريب من التقطيع

بس الصعوبة انك تلاقي شكل الكوبرا دا ويكون بالطبات بتاعته لكن باقي الأشكال موجودة عادي إلا لو كانت جنوط حديد مش سبور ودا لأن المستورد بيجيب اقل فئة زي ما انت عارف علشان التكلفة

(طبعاً مع ملاحظة ان معظم السيارات المستوردة بيبقى دركسيونها يمين مش شمال فا مش بينفع تاخد منها حاجات زي التابلوه وعلبة الدركسيون وغيرها)

[Ahmedhussein007]

اه يادكتور اى جنط مش اصلى ايا كان اندونيسى او تايلاندى العفشه معاه بتبقى ناشفه جدا جدا انا جربته قبل كده ممكن تشوف استيراد افضل

[abasse]

الوحش العزيز هشام مكى......

إحذر.....الجنط الجديد به سم قاتل......

أخوك لف نفس لفتك دى بس مش علشان الشكل لأ علشان المعلومات الفنية....

طبعا الأندونيسى كصناعة يعتبر الأفضل و لكن إحذر سيدى الفاضل......

كل هذه الجنوط عبارة عن شكل جيد و لكنها فنيا فى الضياع و هتكتشف ده فى نشوفية العفشة و عدم الإتزان على السرعات....

الكلام اللى جاى ده من بق واحد بتاع كاوتش إنما بثق فى شغله جدا.....الراجل قالى أى جنط غير الأصلى اللى نازل مع العربية سواء ميجان أو غيره من الصعب جدا جدا أظبطه إتزان (طبعا بيقصد إنه يظبطه صح)....و ده اللى خلانى أصرف نظر عن التجنيط إلا لو هتشترى مركات جنوط محترمة و دى سعرها هيبقى عالى شوية مثل الmomo مثلا...

غير كده بلاش تخاطر بنعومة العفشة و لا بإتزان ميجى الرهيب....

و بالتوفيق فى إختياراتك إن شاء الله.....

مع كامل أحترامى لكلام حضرتك بس أنا غيرت الجنوط الأصلى الى فى الميجان الأسبور جنط وحش مش لقى معاه حل كل شهر تقريبا أورح أستعدل واحد ومعملوش ليها حل حتى 2008 برضة طرية جدا وبتتعوج والناس كلها عارفة الشوارع بتاعتنا ياما تمشى لوحدك فى الشارع على سرعة 10 ياما العفشة متتكسر (أنا روحت أشرفكو الى فى المطرية وجبت الأندونيسى بصراحة مش أقدر أحدد العفشة انشف بعد التغيير ولا لا بس الثبات زى الأول مش كلام لحد 190 ( الى جبتها ) والزوايا زى الفل مافيش مشاكل
النصيحة يادكتور : لو تقدر ندفع فى الجنوط أكتر بقى أكيد تجيب momo
( فى محل معروف فى عمارت رامو تقربيا فى مدينة نصر أسمة أربكوم عنده ماركات كويسة وأسعار معقولة وفى فرع عند الأمن الصناعى تقربيا فى مصر الجديدة ) ربنا يوفق
أنا المقاس الى عندى 16-205-55

[chato_eg]

لو تسمحوا لى بمداخلة
مافيش أهم من راحة البال
الجنوط الحديد بتخلى الدركسيون أطرى و امتصاص الصدمات أفضل و أريح و مسألة فرق الثبات بين ال 15 و ال 16 مش عارف لإنى ما جربتش....لكن يعنى ممكن الواحد يأخد الملف على 130 بدل 140 لو قلقان...ده على اعتبار إن الواحد بيعملل الحركة دى مرة فى الإسبوع لو ربنا كرمه...
أنا من خلال الجنط ال 15 مرتاح تماما فى الركوب و فى المطبات و لف الدركسيون و كمان الملفات على سرعات عالية مش حاسس إنها مخيفة...و لو على الإدعاء بتاع الطاسات بتبوظ فهو باطل و عار تماما من الصحة..لسه محتفظ بالطاسات الأصلية سليمة و إن كان بها خدوش...بس دايما مركب الأفير من أبو 50 قرش....و كده كده أنا مش بأشوف العربية من بره قد ما بأقعد جوه...
يهمنى فى إيه شكل الجنط عليها مادام قعدتى مرتاحة و إيدى مرتاحة !!!!!