أريد أراء ماليــكى الميـــجان فقط فى شــراء ميــجان 2007

[م/محمد صلاح]

انوى باذن الله شراء سياره رينو ميجان 2007 خلال الايام القليله الاتيه باذن الله
لكن ياجماعه كل لما اتشد للعربيه دى حد يكلمنى عنها ويقولى كلام يخلينى ارجع افكر تانى وانا دلوقتى مشتت جدا لانى بصراحه بحب العربيه دى ونفسى اشتريها محتاج اقتنع انها مافيهاش مشاكل لان دول 130000 جنيه ياجماعه مش هزار
ارجوكم افيدونى ضرورى وبسرعه وياريت اللى يرد يبقى من مالكى الميجان بس لان كل اللى بيعيب قى العربيه دى بيبقى عمره ماحط رجله فيها وبيبقى كلام سمعه من فلان اللى بدوره سمعه من علان

ارجو الافاده

[وائل عطية]

اسمحلي أنا أُشارك في هذا الموضوع علماً بأنني لست من مالكي هذه التحفة، ولكن لي احتكاك كبير مع سيارات العملاق الفرنسي رينو، فأنا قد ترجمت لشركة رينو الفرنسية الكثير جداً من " أدلة الاستخدام والتشغيل " لمعظم موديلاتها، وكم عانيت كثيراً في استيعاب هذا الكم الهائل من التكنولوجيا ومن إحكام الصناعة ومن تعرضهم لكل صغيرة وكبيرة في السيارة ،
أستطيع أن أُجزم لك أن هذه السيارة مصنوعة بدقة وإحكام شديدين، بما يتوافق مع احدث مستجدات التقنيات الحديثة في صناعة السيارات .
مايؤخذ عليها هنا هو ارتفاع سعر قطع غيارها، وعدم دراية الفنيين خارج التوكيل بخباياها وإن كنت أعتقد أن هذا ليس عيباً لأنك لن تدفع هذا المبلغ ثم تذهب لميكانيكي عادي لإصلاحها فالطبيعي أن توجهك سوف يكون إلى توكيل صيانتها.
معلوماتي النظرية من واقع ترجمتي لها أنها فوق الممتازة، أما الخبرة العملية فلن أستطيع الإفتاء بشأنها وإنما يُسأل عن ذلك من استخدمها، وتذكر أن لكل منا متطلبات من سيارته فحدد متطلباتك التي تسعى لنيلها في سيارتك إن شاء الله واسأل عنها.

[د.محمود صلاح]

توكل على الله واعمل لها بوليصة تامين شامل ولن تندم على شرائها قطع الغيار غلاية فعلا لكن اصلية ومعمرة اسعار الصيانات غالية لكن بيغيرولك اشياء مثل زيوت وسيور وبوجيهات ولن تدفعها الا كل فين وفين
تكاليف تشغيل السيارة على حساباتى هى 450 جنيه شهريا شاملة البوليصة والبنزين والصيانة

[م/محمد صلاح]

ياجماعه انا مستنى ردكم وشكرا يا وائل انت ومحمود على اهتمامكم البالغ

[أبو عبدالله]

أحب ان اشارك معك وانا لست من مالكيها ولست من محاربيها ولكن كلمة صغيرة الا وهيا
ان حضرتك هتدفع 130 الف جنيه في عربيه بقالها كام سنة وخلاص الموديل المفروض على وشك انه يتغير وده اكيد

الفلوس والمبلغ المدفوع بصراحه كبير جدا على عربيه بقالها كام سنة وده اخر الموديل خلاص

فأنصحك انك تعيد تفكير وتستخير المولى عزوجل

عندك عربيات جديدة في السوق ولسه اول الموديل

عندك السيفيك الجديدة عندك اللانسر الجديدة عندك الكورولا الجديدة
عندك الأسترا والمازدا 3

يعني انا انصحك انك تشوف عربيه جديدة موديل جديد علشان الميجان لما ينزل الشكل الجديد أكيد هتنزل في السعر كتير

فانا لست رافض ولكن أفضل

[م/محمد صلاح]

شكرا على النصيحه يابو عبد الله

[د.محمود صلاح]

اعتقد ان 2008 نفس شكل 2007 مع بعض التغيرات البسيطة والله اعلم

[Ahmed Hassan]

احسن حد ممكن تسأله هوه SHARKY

[Abo_Lina]

الجيل الجديد من ميجان سيظهر في صيف 2009

رائي توكل على الله ..و يمكن الاطلاع على المزيد من المعلومات عن السيارة و اراء من يمتلكها فيها بالرجوع الى ال Topics القديمة هنا.

[Sharky]

يا باشا توكل على الله و هات العربية
من الأخر العربية دى معايا من 4/2005 و بصراحة عربية حكاية و مافيهاش غلطة
كل يوم بيزيد إقتناعى بيها
العربية دى فيها كل اللى إنت عايزه من أوبشنز و شكل رائع لا أرى سيارة حتى الأن تنافسه
من الأخر لا تصدق أى إشاعات بتتقال على العربية دى
العربية زى الفل و مافيهاش مشاكل نهائى لا فى الكهرباء و لا غيره و لو عايز تتأكد إسال فقط مالكى السيارة
العربية دى لو سوقتها صدقنى مش حتفكر تغيرها نهائى لإن فيها كل اللى ممكن تفكر فيه و بسعر يعتبر منافس جدا و سوقتها فعلا ممتعة لا يحس بيها إلا مالكيها فقط

العيب الوحيد غلو قطع الغيار و أسعار الصيانة و ممكن تلاقى الأسعار فى اللينك دا

http://www.nilemotors.net/Forum/viewtopic.php?t=2899

لكن فى نفس الوقت أسعارها مقاربة جدا من الكرولا و اللانسر و متنساش إنك دخلت فى فئة سيارات أسعار قطع الغيار بيتاعتها غالية

توكل على الله و إن شاء الله مش حتندم و عايزين نسمع خبر إنضمامك لمالكى رينو قريب جدا :D
على الفكرة توكيل رينو من أحسن التوكيلات فى مصر و دى يشهادة كل من إتعاملوا معاه

[Sharky]

الجيل الجديد من ميجان سيظهر في صيف 2009

رائي توكل على الله ..و يمكن الاطلاع على المزيد من المعلومات عن السيارة و اراء من يمتلكها فيها بالرجوع الى ال Topics القديمة هنا.

دى حقيقة فعلا لسه ناقص سنتين كمان على الشكل الجديد

[م/محمد صلاح]

شكرا يا جماعه على الردود وعلى اهتمامكم
بجد افدتونى وشكرا للجميع

[ironmsalah]

انا معايا واحدة من 8 /2004 ( أول دفعة ) وفعلا دى عربية ممتازة وفيها كل اللى انت عايزه من أوبشنز ومن فخامة ومن تكنولوجيا ومش بفكر أغيرها بعد 4 سنوات تقريبا وعلى فكرة قطع غيارها متوفرة ومش غالية يعنى زى ما الناس بتبالغ

[Amr_Moh]

20007 be 130000!!!!!
hia zeroo??? we ba2ia men 2007

[chato_eg]

شوف....مش أى حد ممكن يرضى يركب الميجان...لازم تكون داخلة دماغك و معجب بيها لإن ليها طابع متميز شوية قد لا يلقى إعجاب بعض الناس (مسألة أذواق). هى فعلا فيها تكنولجيا متقدمة و يصعب إصلاحها خارج التوكيل انما انا لا اعتقد انك بعد ما تدفع المبلغ ده كله ممكن تخلى ميكانيكى يرزع فيها بشاكوشه ذو الألحان العذبة أو يجرب فيها مهاراته. التوكيل حافظ العربية، كل يوم عندهم منها و بقى لها سنين فى السوق و بايعة كويس. و من خلال تعاملى معاهم هما فعلا توكيل محترم. لكن أحب ألفت انتباهك لمسألة سعر إعادة البيع.....مقارنة بعربيات تانية هى سعر إعادة بيعها أقل نظرا لقلة انتشارها النسبية و تكنولوجيتها المتقدمة فيصعب الاستغناء عن التوكيل. إذا كنت عايز حاجة تتباع بسهولة و تحافظ على سعرها اكتر فعليك بأشياء مثل الكورولا و اللانسر...كل الناس راكباها و عارفاها لكنها ركوبة مختلفة و كفاية ان الميجان اول عربية تحصد 5 نجوم فى اختبارات السلامة الاوروبية...أنا فاكر ساغت الاعلان عن الموضوع ده جابوها فى برنامج و خبطوها فى عربية تانية فى برنامج توب جير فى البىبى سى. انا مش هاطول امتر من كده علشان الناس ما تزهقش منى :) و ربنا يوفق للاختيار المناسب. و إذا محتاج تسأل عن حاجة فيها فالناس هنا كلهم ذوق و شديدى الاهتمام و الالمام بالرينو و خصوصا الميجان