وحوش الميجان....غيرت قفل غطاء تنك البنزين بنفسى...

[Hany Saad]

الوحوش الكرام....كان عندى مشكلة بسيطة من مدة و هى إن قفل غطاء تنك البنزين كان مش شغال من فترة.....

بالصدفة كنت بغير السيور فى الصيانة و قلت أقلهم عليه....لقيت الموضوع فتح و نصب و الماكينة عامله 600 جنيه ده غير الضريبة و المصنعيات و خلافه فطبعا صرفت نظر.....

لكن بما إنى وحش من وحوش الرينو فضلت ورا الموضوع....طبعا سألت بعض العالمين ببواطن الأمور و لكن للأسف كانت الفتاوى كثيرة و كان هيبقى فيه خسائر لكن ربنا ستر.....للأسف القطعة غير متوافرة فى السوق أو على أقل تقدير غير منتشرة.

لحد ما جاتلى فكرة و روحت على بتوع الحوادث و التقطيع....و أخيرا وجدت حته زى الفل و لكن للأسف الراجل مكنش عارف بتتحل منين...روحت مشمر معاه و دخلنا جوه العربيه...فكره منى على فكره منه و أخيرا عرفنا اللوك بيتحل منين.....طبعا فاصلت معاه لغاية لما قتلته و أخدتها ب150 جنيه و قلتله على التجربة لو مش شغال هرجعه....الماركة كانت valeo

روحت و ركبته فى 5 دقايق بالضبط بعد تشحيمه بفازلين و الموضوع بقى 100%....

لو حد مهتم أنا ممكن أصور و أشرح فكرة فكه و تركيبه بالتفصيل.......

[ahmed88hassan]

طبعا يا باشا مهتم

و ياريت الصور عشان نعرف الجزء ده انهي بالظبط

و مبروك عليك

[hamata]

الله ينور يا هندسة

[MOUSTAFA_SAAD]

الله ينورعليك

[chato_eg]

الله ينور عليك

[tiger45]

الله ينور عليك
الجيش قالك اتصرف

[Hany Saad]

طبعا يا باشا مهتم

و ياريت الصور عشان نعرف الجزء ده انهي بالظبط

و مبروك عليك

الله ينور يا هندسة

الله ينورعليك

الله ينور عليك

الله ينور عليك
الجيش قالك اتصرف

الله ينور عليكم جميعا.....

طبعا موقع القطعة فوق الفخدة اليمين ورا....حضرتك تفتح الشنطة هتلاقى التنجيد الداخلى....تحله من ناحية الفخدة اليمين هتلاقى القطعة دى موجوة فوق الفخدة بالضبط (لاحظ الصورة)...

القطعة متوصلها كابل كهرباء و شغاله مع سنتر العربية....هى عبارة عن موتور مع مجموعة تروس و لسان....طبعا اللسان هو المسؤل عن الغلق....الموتور بيدور فى إتجاه معين فى الفتح و يشد اللسان معاه و بيدور فى الإتجاه المعاكس وقت الغلق و يزق اللسان للأمام....

يوجد دليل داخل التجويف خلف غطاء التنك بيطلع منه اللسان...طبعا كلكم ممكن تفتحوا باب غطاء التنك و تشغلوا السنتر هتلاقوا اللسان طلع ثم تفتحوا هتلاقوا اللسان إختفى....

كل المشكلة كانت كيفية حل هذه القطعة لأن مكنش فيه أى مسمار باين فيها....التوكيل حسسنى إنه هيحل العربية كلها علشان يطلعها و إن المصنعية مهولة....واحد خبير قالى الموضوع كليبسات و بتتحل من عند الدليل و طبعا فتوه....واحد من بتوع الإستيراد و الحوادث قالى ده مسمار نجمة و برده فتوى....لغاية لما لقيت واحد تانى عنده نفس الدماغ الإستكشافية بتاعتى....قالى أنا محلتوش قبل كده لكن تعالى نحاول.....

طريقة الفك:
1-تشيل فيشة الكهرباء بتاعته و ده عن طريق الضغط على لسان بلاستيك سوستة ثم الشد للخارج ...طبعا الكلام ده داخل الشنطة...
2-يوجد صامولة رابطة مجموعة القفل توصلها عن طريق وضع إيدك من تحت الرفرف فوق العجلة و ناحية تانك البنزين فى المنطقة بين باب التنك و الفخدة الخلفية يمين....طبعا المنطقة مظلمة جدا و لازم تبقى عارف إنه يوجد صامولة...مفتاح بلدى بتحل بيه الصاموله و هى مش رابطة جامد يعنى ممكن كمان بإيدك تيجى معاك......
3-على طول بتطلع معاك المجموعة و تحط المجموعة الجديدة و تمشى الخطوات بالعكس....طبعا متنساش الفازلين علشان المنطقة دى بتتعرض لأوساخ كتير.

[ecybrarian]

الله ينور

[Mohd_Adel_Amin]

الله ينور عليك , بس السؤال اللي محيرني ازاي عرفت اساسا انها مش شغالة .

[Hany Saad]

الله ينور

و عليك يا باشا......

[Hany Saad]

الله ينور عليك , بس السؤال اللي محيرني ازاي عرفت اساسا انها مش شغالة .

و عليك يا باشا.....

و أنا بمون بنزين....المفروض إنى أفتح السنتر علشان العامل يقدر يفتح غطاء التنك....لكن طبعاً لقيته بيفتحه بمنتهى السلاسة بدون أى تدخل منى.... روحت على طول مشيك عليها و لقيتها مش شغالة....أنا قلت فى حد من العمال إيده تقيلة و راح شادد جامد و قطمها....لكن أنا ببقى حريص جدا و أنا بمون لدرجة إنى بنزل أقف معاه علشان مينقطش بنزين على الرفرف الخلفى...فصعب يكون كسره بدون ما أخد بالى.....طبعا فى التوكيل طلع عندهم خلفية عن الموضوع و قالولى ده مش كسر دى الماكينة عايزه تغيير و الموضوع حصل عندهم قبل كده....لكن السعر كان داخل تقريبا فى باكو بالمصنعيات و الضرايب.....

[د.محمود صلاح]

أحسنت التصرف ..

شبه ماكينة السنتر جدا . بس للأسف هتفرق في الأبعاد ولذا كان سعرها غالي في التوكيل

[hossam_elwani]

هو ده الشغل التمام وفرت على نفسك كتير ........