Tweet
السلام عليكم
الموضوع ده أنا عملته إمبارح بس للأسف مصورتش الخطوات فى ساعتها......الصور الموجودة حالياً أعتقد أنها ستوفى بالغرض إن شاء الله........مع الإستعانة ببعض الصور من كتاب سلاح الوحوش 
السماعات الأمامية:
هتشد بالراحة مش جامد قوى علشان تفك الكلبسات اللى ماسكة الجريل
الجريل هيطلع معاك عادى......بس خللى بالك أن الجريل ماسك فى الباب بقطعة بلاستيك عاملة زى الشريط من ناحية مقبض الباب.....بعد لما تفك الكلبسات ممكن تشتغل من غير ما تشيل الجريل خالص أو ممكن تسحب الجريل ناحية مفصلة الباب علشان تشيل الشريط.
بعد فك الجريل بتلاقى السماعة متوصلة بفيشة......بتفك الفيشة بالضغط على الودان اللى فى جنبها مع الشد.....فيشة كهرباء عادية مفيش منها قلق.
بعد كده بتلاقى السماعة مربوطة بمسمارين صليبة على ما أذكر بتفكهم و بتركب السماعات الجديدة و تربط المسامير تانى و تركب الجريل بالضغط على أماكن الكلبسات........و لو كنت فكيت الشريط اللى ماسك الجريل بتدخله فى مكانه و بعد كده تركب الكلبسات.
كده غيرنا السماعات الأمامية.....و دى سهلة جداً مفيهاش لف و دوران.
السماعات الخلفية:
و دى هى اللى محتاجة مجهود و قلب جامد شوية لو أنت هتعملها بنفسك.
و دى أنت محتاج الأتى علشان تعرف تفكها.....طقم مفاتيح تروكس أو نجمة مقاسات مختلفة ( 15 و 20 و 25 على ما أذكر )
و مفتاح صواميل مقاس 10.....و طبعاً المفكات العادية.
أولاً هنقسم الباب مع بعض إلى 4 قطع علشان نسهل على بعض:-
1- مقبض الباب.........أو حرف A
2- مقبض الزجاج الكهربائى......... أو حرف B
3- اللى هو الجزء القماش أو الجلد من فرش الباب.....أو حرف C
4- اللى هو الجزء البلاستيك من فرش الباب .....أو حرف D
هتيجى على مقبض الباب و تبص جواه هتلاقى طبة مدورة......هتفكها بسن مفك عادة و هتلاقى تحتها مسمار تروكس أو نجمة مقاس 20 تفكه
بعد كده هتشد المقبض لبرة هيطلع معاك......بس هيكون ماسك فى كابل اللى بيفتح الباب هتفك الأتنين من بعض بالشد لأنهم ماسكين فى بعض بالضغط.
دى صورة الكابل بعد ما أتفك من المقبض.
دى صورة الكابل بعد ما أتفك من المقبض.
بعد كده مقبض الزجاج الكهرباء هتلاقى نفس الطبة تفكها و تحتها مسمار نجمة تانى مقاس 15 تفكه
و بعد كده من طرف المقبض اللى ناحية الشارع تدخل مفك عادة فى المناطق اللى معلم عليها باللون الأحمر من تحت المقبض و تشد لفوق بالراحة و بعد كده تسحبه لناحية الشارع علشان الناحية التانية فيها سن بلاستيك ماسك المقبض تحت فرش الباب.
بعد لما يطلع معاك هتلاقيه ماسك فى فيشة......أمال يعنى الأزاز هيطلع و ينزل إزاى 
؟؟؟؟؟
؟؟؟؟؟هتفك الفيشة عن طريق ودنين على جنبها.....و تشد هتطلع معاك و هيبقى المنظر كده
بعد كده هيبقى عندك فرش الباب هو اللى باقى......و ده زى ما أتفقنا جزئين.....جزء جلد أو قماش و التانى بلاستيك.
هتمسك الجزء الجلد أو القماش من عند الستارة من فوق و تشد عليك بقوة بس بالراحة فى نفس الوقت 
......و هو طبعاً ماسك بكلبسات.
......و هو طبعاً ماسك بكلبسات.هيطلع معاك بصعوبة شوية خصوصاً لو متفكش قبل كده.....بعد لما تطلعه من عند الستارة هتبتدى تمشى مع الداير بتاعه و تفك الكلبسات واحدة و احدة لحد لما يتفكوا كلهم و هتلاقيه طلع معاك عادى.
الأسهم الحمراء هى فيها أماكن المسامير اللى المفروض تتفك
السهمين اللى على اليمين مساميرهم نجمة مقاس 15 و 25 على ما أذكر......اللى من تحت الباب ده صامولة مقاس 10 ......برضه هتفكها
بعد لما تفك المسمارين و الصامولة هتشد الفرش لفوق شوية الأول و بعد كده تشد عليك......هيطلع الفرش معاك.
خللى بالك أن فيه أجزاء بلاستيك و فيشة السماعات هيكونو لسه ماسكين فى الفرش......بس الفرش هيبقى فى وضع يسمحلك أنك توصل لفيشة السماعات و تفكها بالشد برضه.....و بعد كده هتفك السماعة المربوطة بمسمارين صليبة و تركب الجديدة.
للتركيب هتتبع نفس الخطوات تانى من الأخر للأول.
بس خللى بالك أن تجرب كل حاجة قبل إكمال التركيب.
يعنى لما تركب السماعة و قبل ما تبتدى تقفل الفرش شغل السماعة و جربها.
بعد لما تركب فيشة مقبض الزجاج الكهرباء و قبل ما تقفل المقبض نفسه..... جرب الزجاج.....و هكذا.
نصائح أخرى
1- يفضل أنك تفك السماعات الأول و تجيب على نفس مقاسها بالظبط.....فى القطر و فى العمق بتاعها.
2- السماعات الأصلية بتتربط بمسمارين بس.....و عادة السماعات الجديدة فيها مكان لأربع مسامير.....ممكن تضطر تقص مكان مسمارين علشان تعرف تركب السماعات الجديدة فى مكانها.
3- فيشة الزجاج الكهرباء ممكن تركب عكس ما كانت متركبة و فى الحالة دى الزجاج الكهرباء مش هيشتغل.....فكها و أعكس التركيب.
Comment