صور عمل فرش جلد للميجان عند جينز كار

[fahd_628]

السلام عليكم

من ساعة ما جبنا العربية ( ميجان 2 استيت ) و كنا عاوزين نعمل الفرش جلد علشان القماش كلنا عارفين بيتوسخ بسرعة و كمان ملمسة مش حلو زى ملمس الجلد طبعا

فا بعد التدوير على حد يعمل شغل نضيف لقيت جينز كار و شوفت الصور و كان الشغل زى الفل

المهم سافرت مخصوص للقاهرة طبعا بعد ما حجزت مع المهندس احمد مشعل ميعاد و تم الأتفاق على الخامات ( اخترت اعلى خامة جلد اسود + خياطة دابل نبيتى علشان تمشى مع العربية لأنها اكستريم فا فيها حاجات حمراء فى حتة كدة من التابلوة ) و كنت عاوز طبعا اساسى فرش الأبواب و طبعا ابواب الميجان مش سهلة و بتحتاج شغل جامد و فية الدرج فى الأبواب الأمامية فا الشغل مش بسيط و كمان انا كنت عاوز اغير تقسيمة الكرسى عندى لأن الكرسى مفيهوش غير خط واحد فى الظهر و خط واحد فى القاعدة فا طبعا شكلة كان حيبقى مش حلو و اتكلمت مع المهندس احمد و تم الأتفاق على شكل الكرسى و المهندس احمد وعدنى بمفاجئة فى الفرش و طلعت مفاجأة جميلة جدا و طبعا اخدت منة مجهود اضافى بس فى النهاية الشغل طلع تحفة

الهم انا طولت عليكم اسيبكم مع الصور

اولا فرش الأبواب

و دة الباب الخلفى

بصو دقة الخياطة

و دية علشان اوريكو التقفيل مفيش حاجة مفارقة و كلة زى الأصلى و طبعا مفيش حاجة اتخربشت ولا حاجة الحمد لله

و نيجى بقى للكراسى و المفاجأة ان المهندس احمد عملى الخياطة بتاعت التقسيمة دابل + انو مشدش الجلد على الأخر علشان يدى شوية تمويج كدة زى الجلد الفابريكة

الكرمشة مش جامدة كدة على الحقيقة دية مش عارف طالعة لية كدة فى الصورة :)

الكراسى الخلفية حكاية بجد و الصور مش مبينة حلاوة الشغل الحاجة على الطبيعة احلى 100 مرة

مساند الرأس معمولة زى الفل و مفيش اى كرمشة ولا اى حاجة

و دة المخدع الى فى النص

فى النهاية احب اشكر المهندس احمد مشعل و شركة جينز كار على الشغل الجميل دة و اتمنى لهم التقدم الدائم

[ecybrarian]

الف مبروك الشغل الجامد دا..بصراحة زي الفاقريقة بالظبط..

[megamoudy]

ألف ألف مبروووووووووووووك

[momo10000]

ما شاء الله .... والله محترم .... ربنا يباركلك ....

المهم : بكاااااااااااااااااااااااااام يا معلم ؟؟؟؟؟

[clenceman]

ما شاء الله تحفة
ربنا يباركلك فيها
عرفنا بكاااام وخدت وقت اد ايه

[boamengo]

ما شاء الله شغل جميل وشكله تحفـة عليها

ربنا يباركلك فيهـا

بالتوفيق

[د.محمود صلاح]

ممتاز .. دقة عالية جدا

[Bishoy.Girgis]

الف الف مبروك فعلا شغل فوق الرائع و معمول بالميلى

[Evo]

بالنسبة للايرباجز اللي في الكراسي والايزوفيكس اللي في الكنبة الخلفية عملتوا فيهم إيه؟

[yalahwy2010]

الشغل عالى أوى أوى أوى
ألف مبروك
نفسى آخد الخطوة دى بقى
بس المهم بكااااااااااااااااااااااام؟

[Ahmed Selim]

بسم الله ما شاء الله...........شغل ممتاز جداً

ألف مبروك يا باشا.

[madoo_600]

بكام الفرش يا معلم

[fahd_628]

شكرا جزيلا يا جماعة

بالنسبة للتكلفة فا هية حسب الخامات و الخياطة و القصة و فرش ابواب ولا لأ

ممكن زيارة سريعة للشركة تعمل مقايسة بسيطة علشان مقولكش سعر و يطلع غلط

او ممكن تسأل فى الموضوع الخاص بتاعهم او تكلمهم

[MASERATI]

السلام عليكم و رحمةالله و بركاته

ألف مبروووووووووووووووووووك عالفرش الروعة ده و عقبال ماتجيب فرش الlexus ls460 و يكون من عند جينز كار برضه .

[hekal2]

الكل بيسألك عملت الشغل دة بكام ...يعنى شغلك انت وعربيتك انت .....انت خايف تقول على السعر لية ..بنسأل على سعر الشغل دة بالجودة دى والخامة دى ؟ فيد اصدقائك فى المنتدى مش تبخل بالمعلومة .....هو حد هيروح يحاسب الاستاذ مشعل ويقولة انت عاملة مرة بكذا ............