لسه جايب ميجان جديد (انصحوني)

[Abo_Abdullah]

السلام عليكم ورحمة الله وبركاته

حيا الله الأعضاء الكرام..
أنا بفضل الله لسه شاري عربيه ميجان موديل 2006 (الشكل الجديد) ملحق 2007
العربيه عامله 49700 كيلو وطبعاً رسالة ونور الصيانه شغالين
هي مانيوال أعلى فئه (كامله) - سوداء - السعر كان غالي شوية بس حالتها ممتازه
اشتريتها بــ: 68
العربية ما شاء الله - اللهم بارك

ما هي نصائحكم لأخوكم!!!!

[yalahwy2010]

ألف مبروك على العربية.....وربنا يديك خيرها ويكفيك شرها
النصيحة الاولى انك تحافظ على مواعيد الصيانة كويس جدا
تانى حاجة تغير طقم سيور كامل للعربية
وقبل ما تعمل اى حاجة اسأل رجالة المنتدى هنا.....عشان الصنيعية مفتريين والتوكيل متوحش جدا.....

[kar!m]

ما شاء الله .. ربنا يبارك لك فيها و يحفظهالك.

على فكرة السعر كويس بالنسبة للفئة و عدد الكيلومتر و الموديل.

[zangry]

طب انا معايا 2006 خليجى جايبها من الكويت كاملة اوتوماتيك جنوط ومثبت سرعة ماشية 55 الف وفابريكة مافيش فيها حاجة خالص وكل صيانات فى التوكيل هنا فى الكويت تجيب كام تقريبا لو حبيت انزلها مصر وابعها ؟

[د.محمود صلاح]

الخليجي في الميجان سوقه واقف شوية ..

....

الإلتزام بمواعيد الصيانة كل 5 الاف هو أفضل شيء

[Abo_Abdullah]

جزا الله كل الأحباب خيرا على النصائح ..

بالمناسبة .. متى يجب تغيير الكاويتش بتاع العربية..
العربية راكب فيها الكاوتش الأصلي مقاس 15 على 195 على 65
الإستبن زي ما هو مركبش قبل كده..

طبعا أنا نفسي أركبلها الجنط الأصلي بتار رينو زي اللي في الصورة دي:



السؤال هل هذا الجنط 16 ولا 15 ؟ ومن أين ممكن اشتريه ،، لما يبقى معايا فلوس طبعا عشان أنا الآن على الحديدة

ولا حرمني الله منكم..

[elsherif_2000]

متابع

[Ahmed Selim]

أولاً مبروك على العربية........ربنا يديك خيرها و يكفيك شرها

ثانياً......أعمل الصيانة اللى جاية فى التوكيل و حاول تعرف منهم أخر صيانة العربية علمتها عندهم كانت صيانة كام......لو طلعت منتظمة فى الصيانات يبقى متغيرش طقم سيور و لا حاجة إلا فى مواعيدها ( صيانة ال 60 ألف )

الجنط اللى فى الصورة بيبقى مقاس 16 مش 15
و نصيحة بلاش علشان ضعيف شوية و مع الحفر و النقر فى الشوارع بيبوظ.

[Abo_Abdullah]

جزاك الله خيرا يا أستاذ أحمد على النصائح..

أنا ناوي أغير طقم السيور الصيانه القادمه إحتياطي..

إذن بماذا تنصحني بالنسبة للجنط ولا بلاش أجيب جنط رينو أصلا وأغير الشكل..
أنا بفككر في جنط 16 مبدأيا.. فما هو المقاس الكاوتس المناسب ؟؟؟

[shawkylotfy]

بالاش الجنوط غالية الواحد باكتر من الف جنية وبيبوظ من شوارعنا الاوروبية المواصفات :p

[Ahmed Selim]

نصيحتى بالنسبة للسيور زى ما قولتلك....خصوصاً أن العمر الأفتراضى للسيور أكبر من المعلن فى مصر......بس بنحط فى إعتبارنا أن ظروف القيادة فى مصر أصعب من المعتاد من حيث حرارة الجو فى الصيف و الزحمة.

بالنسبة للجنوط أنصح بإختيار جنوط عادية مش جنوط الميجان مقاس 16 و على ما أذكر المقاس الكامل 16/205/50
بس مش متأكد 100%.........هتلاقى المقاس فى الكتالوج فى أوله.

[chato_eg]

أؤيد نصيحة الزميل أحمد عبد المقصود فى مسألة عدم تغيير الجنوط

الجنط الحديد تجيب له طقم طاسات جديد لو الحالى حالته أو شاكله مش عاجبك...إن شاء الله تغيره مرة كل سنة...جنوط الميجان السبور مش بتستحمل شوارع مصر...
مافيش حد عنده جنط 16 مش معوج و استعدله أكتر من مرة...
اشترى راحة بالك و خلى دركسيون العربية خفيف فى إيدك أحسن من إن شكلها يبقى حلو ( لا أنكر بتاتا إن شكلها حلو أوى كمان ما شاء الله عليها )

صيانة ال 60 ألف كيلو متر بتتكلف فى التوكيل 3000 جنيه و ده شامل تغيير طرمبة المياه و مجموعة الكاتينة ( ترس الديفيزور و السير )

[Abo_Abdullah]

بارك الله فيكم جميعاً على النصائح..

أمس كنت طالع كوبري العزيز بالله (مفصلاته مؤذيه جدا).. العربيه قبل ما أطلعه كانت ناعمه ومفيهاش حاجه..
فجأه بدأت أحس بخشونه في الجانب الأمامي شمال (تحت رجلي الشمال في الدبرياج) وكأن في حاجه في رلمان البليي بتاع العجله !!!

تفتكروا إيه الموضوع.. الموضوع مش تهيوئات.. أنا باحس بالعربيه جدا وبكل حاجه فيها..

أما بالنسبه لنصيححا الأخوين الحبيبين الأستاذ أحمد والأستاذ شاتو سأعمل بها بإذن الله
ولكن عند تغيير الكاوتش بأربعة فرد جديده ، هل من الممكن أن اركب كاوتش أعرض وبماذا تنصحوا أن يكون المقاس إن لم يكن هذا يضر..

ولا حرمني الله منكم..

[chato_eg]

ما أعرفش حد جنطه 15 و مركب كاوتش أعرض من ال 195 ...
إللى أعرفه زى ما عمرو قال بالنسبة للكاوتش ال 16 بوصة إنه بدل ال 205 مركب 215 ....

استنى شاركى لو شاف الموضوع..هو جنطه 15 ...أو أيمن مومو لو كان له فى المقاسات الصغيرة دى..علشان الراجل يعرف من ال 16 لحد ل 18

[Amr_Moh]

الأصلي كان

205/55/16

بس أنا مركب حالياً

215/55/16