فيات ريجاتا ولا رينو 9

[ahmedgamalmemo]

السلام عليكم ورحمة الله

شباب كان ليا استفسار بسيط
انا معايا مبلغ 20000 جنيه ودة حد اقصى ليا عشان ادفعه فى عربيه وبعد تفكير كتير لقيت اختيارين قدامى (طبعا على حسب اسعار السوق)
فيات ريجاتا
رينو 9 موديل 1990
فكنت عايز رايكم الافضل فيهم ايه

انا عرفت ان الريجاتا اكثر انتشارا وقطع غيارها رخيصه ومتواجدة بس سمعت ان البارومه بتمشى فيها بسرعه فدى مشكله
ماعنديش اى معلومات عن الرينو 9 (قطع غيار او انتشار او سعر اعادة البيع )

فياريت تفيدونى ياجماعه وتقولولى رايكم ايه

انا بعدت عن 131 عشان الريجاتا هايبقى الموديل اعلى بحوالى 5 سنين او اكتر
وبعدت عن ال 128 عشان مش حاببها بصراحه


جزاكم الله خير ياشباب

[albasha]

طبيعي إنك داخل قسم الرينو لازم الكل يقولك خليك في رينو 9
لكن عن نفسي معلوماتي عنها ضعيفه
علشان كده نصيحه لو داخله دماغك إتعب شويه وروح لأكتر من ميكانيكي رينو وإسأل عليها وإسأل محلات قطع غيار الرينو برضه
علشان تقدر تحكم علي العربيه
لكن الريجاتا معروفه ومعروف توافر قطع الغيار بتاعتها

[ahmedgamalmemo]

صديقى العزيز albasha
شكرا على ردك واهتمامك ياباشا

انا بعت فى قسم الرينو مش فى قسم الفيات بلسبب واحد
مش ان الناس كلها هاتقولى انها احسن بس لانى كنت عايز اعرف من الناس اللى معاها الرينو قطع الغيار متوفرة ولا لا وسهل انى الاقيها ولا لا وسهل انى الاقى ميكانيكى بيفهم فيها ولا لا
طبعا كل الحجات دى ماحدش فى الفيات هايفدنى فيها اوى والكل هايقترح عليا الريجاتا

الرينو والريجاتا الاتنين واحد بالنسبه لى بس الرينو فى حدود المبلغ دة هاتبقى حالة كويسه اوى وكل الكماليات موجودة زائد انها موديل التسعينات فاعلى موديل من الريجاتا
انما الريجاتا على اد قوتها وتوافر قطع غيارها بس سمعت ان مشكلتها مع البارومه انها بتمشى فيها بسرعه وخصوصا ان موديلاتها لحد 89 (سمعت ان موديل 90 دة مختلف عن الباقى وقطع غياره قليلة)
بس فكنت عايز اخد رايى حد من الناس هنا فى قسم الرينو فاهم فى الرينو 9 او عنده العربيه وهايقولى رايه عن تجربه
انا عارف انها مش بياعه وسوقها مش اد كدة بس انا مش ناوى ابيع غير بعد 5 او 6 سنين فعايز حاجه تريحنى
لو اطمنت لقطع الغيار انها موجودة وممكن الاقى ميكانيكيا تفهم فيها يبقى ماعنديش اى مشكله انى افكر فيها عن الريجاتا

وطبعا المفروض انزل واسال على قطع غيارها بس مشكلتى انى مش عارف المفروض اسال فين لانى لسه جديد فى موضوع العربيات دة ودى اول عربيه ليا ان شاء الله
فلو حد يفيدنى يبقى جزاه الله كل خيييييير

وشكرا ياجميل على اهتمامك وردك

[M.Alaa92]

تصحيح يا باشا موديل 90 فى الريجاتا لا يختلف عن القديمة الا فى
1-اكر البيبان الخارجية
2- وش الفانوس الخلفى
3-- التكيف فيها ديجيتال
انما الباقى هو هو الريجاتا التمانينات

[ahmedgamalmemo]

شكرا صديقى العزيز على التوضيح
انا كنت بتكلم على حسب معلوماتى :(

فين باقى الردود ياشباب وفين المعلومات عن الرينو 9
افقد الامل ولا ايه ؟

[albasha]

أنا شايف عنوانك في القاهره في واحد ميكانيكي بتعامل معاه هو محترم جداً إسمه محمد بليله في القوميه ورا مسجد النور المحمدي أوصل لحد عنده وأسأله هو هيفيدك إن شاء الله وأسأل عند أي حد بتاع قطع غيار رينو عليها عندك مرزوق في عمارات العرايس اللي في شارع السودان محترم جداً وهيفيدك كتير وتوكل علي الله وربنا يباركلك في إختيارك إن شاء الله معلهشي الموضوع محتاج شوية تعب

[HeroNine]

انا معايا رينو 9 وزمان كنت راكب ريجاتا كان ليها مشاكل في تابلوه السيارة وبتعوم مع الحمل الزائد اما الرينو 9 غير ذلك جميلة بكل معاني الكلمة ومتقدمة جدا

[ahmedgamalmemo]

شكرا بجد ياشباب على ردكم واهتمامكم

صديقى العزيز HeroNine ياريت اعرف من حضرتك هل قطع غيارها غاليه ولا متوسطه السعر ومعمرة ولا لا
ومشاكل العربيه بصفه عامه معاك ايه
وايه اهم حاجه اهتم بيها لو بصيت على عربيه

شكرا جدااا ليك ياجميل

[M.Alaa92]

ريجاتا كان ليها مشاكل في تابلوه السيارة وبتعوم مع الحمل الزائد

استاذ HeroNine هى بتعوم ازاى بعد اذن حضرتك؟؟؟ انا كانت معايا الريجاتا و لا عمرها عومت منى و بحمل فى الشنطة شنطة سفر كبيرة و 6 اشخاص ( بالسائق) و الحمد لله ولا مرة عومت منى اما مشاكل فهى نوعين ان التابلوة بيتشرخ (معرفش من اية الصراحة) اما من ناحية الكمبيوتر بتاع العربية فده نابع من جهل الصنايعية واللى بيفتو فيها و انا شاهد ع الكلام ده

[fvks]

السلام عليكم

الرينو 9 /الرينو optema هما الاتنين واحد نفس الحجم بس الاختلاف في شكل العربية من برة الرينو 9 الموديلات القديمة انما optema الموديلات الحديثه منها
بص انا مش بعمل اعلان انا شغال في ورشه قطع غيار رينو وكله متوافر
والسعرها مش بيزيد عن 20000 بالتكهيف والكمليات