مشكلة فى الميجان

[Mohab.Nabil]

السلام عليكم و رحمة الله و بركاته

عربيتى ميجان 2006 مانيوال عاملة 95 الف كيلو .. الحمد لله محافظ على صيانتها دائما فى التوكيل و العربية الحمد لله ما بتقصرش معايا

المهم من فترة كده نزلت الصبح اجى ادور العربية مش راضية حاجة غريبة .. فيه صوت كأن العربية بتحاول تدور و مؤشر البنزين بيبتدى يرفع عادى بس العربية كأن المارش عمال يحاول يدور العربية و مش راضى و وسط كل ده لمبة البطارية بتفضل منورة

المهم حاولت 5 او 6 مرات العربية دارت عادى و مفيش مشاكل .. قلت ممكن تبقى مشكلة بطارية عشان بقالها فترة كبيرة متغيرتش .. و فعلا غيرت البطارية

المشكلة ان انا امبارح كنت ماشى فى الشارع و وقفت فى اشارة و جيت ادور نفس المشكلة حصلت تانى و كان منظر محرج بصراحة و الكلام دا بعد تغيير البطارية و برضه بعد عدة محاولات دارت و لا كأن فيه حاجة

النهاردة الصبح قبل صلاة الجمعة جيت ادورها نفس المشكلة و مش عارف حاجة مملة اوى بصراحة

لو وصفى للمشكلة مش واضح ممكن احاول اعمل فيديو بس العربية مش على طول بتعمل كده فهحاول مرة لما تعمل الحركة ديه اصورها فيديو

و شكرا

[amr_elbazz]

حضرتك غيرت طرمبة البنزين قبل كدة ؟؟ خصوصا ان العربية ماشية 95000

[schrief]

أعتقد بسبب طرمبة البنزين والفلاتر واللة اعلم وياريت لما تعرف الحل ترد علينا وربنا يبارك لك فى سيارتك

[shawkylotfy]

شوف الفيش والسلوك بتاعة طرمبة البنزين او ممكن الطرمبة نفسها مش كويسة

[Hany Saad]

الزميل الفاضل،

هناك إختبار بسيط يجب إتباعه قبل تغيير البطاريه و هو تشغيل الكشاف العالى و السيارة مبطلة ثم تقوم بتشغيل الكلاكس....لو الصوت مرتفع يبقى البطارية كويسه أما لو صوت الكلاكس ضعيف و مقطع يبقى البطارية محتاجة تغيير....

أنا لا أعتقد إن المشكلة ليها علاقة بطرمبة البنزين لأن المشكلة عند حضرتك خاصة بتدوير العربية...الطرمبة من أعراضها ضعف السحب فى بعض الأوقات أو التقطيع و إنت ماشى أو ما شابه....

فاضل إحتمالين للمشكلة طالما بنتكلم على صعوبة فى التدوير:

-حساس كامة و ده مستبعد لأن من أعراضه العربية تدور و تطفى على طول....

-حساس السرعة و هو ده الإحتمال الأكبر لمشكلة حضرتك و ده من أعراضه عدم القدرة على تدوير العربية فى بعض الأوقات...

عليك و على التوكيل ...هيكشف على الكمبيوتر هيطلع العيب متسجل و تغييره بسيط و أعتقد السعر فى التوكيل فى حدود 600 جنيه....بالتوفيق إن شاء الله و أرجو إنك تطمنا.....

[Mohab.Nabil]

الف شكر على المساعدة السريعة من جميع الاعضاء و ان شاء الله هقوم بتجربة كل الافكار المقترحة و ربنا يكرم و اوصل لحل

و اول ما اوصل للحل ان شاء الله هكتبه فى الموضوع

و شكرا مرة تانية

[abasse]

ا ....

-حساس السرعة و هو ده الإحتمال الأكبر لمشكلة حضرتك و ده من أعراضه عدم القدرة على تدوير العربية فى بعض الأوقات...

عليك و على التوكيل ...هيكشف على الكمبيوتر هيطلع العيب متسجل و تغييره بسيط و أعتقد السعر فى التوكيل فى حدود 600 جنيه....بالتوفيق إن شاء الله و أرجو إنك تطمنا.....

أخر مرة غيرته فى التوكيل كان ب 800

[Mohab.Nabil]

أخر مرة غيرته فى التوكيل كان ب 800

طيب كانت نفس المشكلة مع حضرتك ؟

و لما اتغير المشكلة اتحلت ؟

[sam_zen_elden]

متابع ومنتظر الحل

[scraper2012]

أنا كانت عندي نفس المشكلة بالضبط من ثلاث شهور ,

كنت كل ما اجي أدور الصبح بالذات العربية تدي مارش شغال بس مش بتلقط بتدور غير بعد عشر محاولات

وساعات كنت ونا ماشي بالعربية الاقيها مرة واحدة بطلت مني و أدورها تاني



المهم طلع العيب من الأسلاك " ضفيرة الفيشة" إللي داخلة لسنسور الكرنك "حساس السرعة باللغة العامية"



كانت الأسلاك ملمسة عايزة تتربط كويس مع بعض,

ومن ساعتها العربية بسم الله ما شاء الله بقت تدور من أول مرة

والله الموفق

[abasse]

طيب كانت نفس المشكلة مع حضرتك ؟

و لما اتغير المشكلة اتحلت ؟

نفس الحوار يا باشا على العموم كشف بالجهاز وتعرف كل حاجة وأبقى غيره بره لو حبيت

[Mohab.Nabil]

شكلها كده هى مشكلة حساس السرعة ديه

يا رب تطلع الفيشة بس مهزوزة

و معلش هتقل عليكم لو لقيت الحساس فعلا بايظ ايه احسن مكان ممكن اجيبه منه يكون مضمون و سعره حنين ؟

و الف شكر على المساعدة السريعة و الهايلة ديه

[Mohab.Nabil]

اسف على رفع الموضوع و اسف على التأخر فى الرد بس كنت عايز اتأكد من ان الحل هو فعلا الصحيح

المشكلة كانت فى طرمبة البنزين فعلا و تم تغيير الموتور بموتور بوش المانى و بعد التركيب بحوالى اسبوعين العربية فصلت خالص فرجعت تانى للى كان ركبها فلقى ان فيها حاجة مهزوزة و صلحها و رجعت تشتغل تانى الحمد لله و الحمد لله لحد الان تمام

رديت على الموضوع عسى حد يكون عنده نفس المشكلة و يستفاد منها

و الف شكر على مساعدة الاعضاء السريعة

[abasse]

شكرااااااااااااااا للافادة

[Col. Eng. Khaled]

جازاك الله بكل الخير .