الميجان بتلّت مني وتشتغل 3 سليندر

[scraper2012]

أولاً أحب أقول الميجان عربية جميلة وبحبها قوي بس الحلو ما يكملش و الكمال لله وحده,


المشكلة إن العربية بتلّت - يعني بتشتغل 3 سلندر بس وواحد مش شغال كويس


والحكاية دي بتبان قوي ونا واقف مثلاً في إشارة لمدة دقيقة و المحرك شغال فألاقي العربية بترج و لمبة الموتور الصفرة "Toxic Fumes" علتابلوه نورت و بتومض و كتب "Check gear Box" و بعديها كتب "Check injection" ومن لحظتها العربية بتتهز جامد وما بتسحبش خالص و الشكمان بيتهز و ريحة بنزين واضحة فيه و الهوا خارج منه زي النبضات



عشان العربية تمشي تاني كويس لازم أطفي الموتور و أشغلها تاني تشتغل كويس - لكن لو سبتها ممورة شويه "Idle" اللمبة الصفرة تومض و تتهز العربية و تشتغل 3 سليندر


الغريب إن العيب ده ما يظهرش طول منا ماشي بالعربية على أي سرعة


أنا كشفت كومبيوتر عليها طلع إن ما بيحصلش حرق كويس للسليندر رقم 2 , الرسالة كالاتي على جهاز الفحص "Misfire cylinder 2"


العيب مش من الكويلات حيث إني بدلت مكان الكويلات ببعضها مكان رقم السليندر 2 , - تاني عالجهاز و طلعت نفس الرسالة سيلندر 2 ما بيحرقش البنزين كويس -

و كشفت على كل كويل و قالولي إن كل الكويلات شغاله كويس جداً و المشكلة مش منها -



بنفك وبنسحب كل كويل واحد واحد من الموتور و العربية شغالة لحد ما نلاقي العربية حتبطل ده معناه إن المشكلة مش في السليندر ده

والعربية دايرة و لما بسحب الكويل رقم 2 شويه بسمعه يطرقع جامد " يعني شغال" بس سحبه من البوجيه ما بيفرقش في الموتور حاجة


فغيرت البوجيهات كلها بالأصلي بتاع العربية و المشكلة هي هياها

غيرت فلتر البنزين و الهوا - و نضفت جسم البوابة من جوه - زيت الموتور لسه جديد

و حطيت منظف الرشاشات اللي بيتحط في تانك البنزين و ما فيش فايدة



* اللي عرفته إن ممكن يكون سبب اللي بيحصل ده من سنسور الأكسجين - حساس الشكمان يكون عايز يتغير - حيث إن وظيفته هي تحكم نسبة دخول الهواء مع خليط البنزين

أستبعد الإحتمال ده لأن المشكلة من سليندر رقم 2 بس مش على باقي السليندرات

* تاني حاجة قاللولي إن ممكن يكون الرشاش بتاع رقم 2 مسدود - بس سألت و عرفت إن رشاش الميجان عمره ما حصل و بينسد

* الإحتمال المرجح إنه ممكن يكون الصبابات "Valves" مش شغالة كويس و ده عايزله تغيير صبابات كلها و مكلفة ,

يا ريت اللي عنده معلومة مفيدة تساعد يقولها و يرد جزاه الله كل خير,

أخوكم " دكتور الأسنان المحترف د.خالد "

[ugaritian]

و الله يا دكتور هم الصبابات و علشان يتعملو لازم تفك وش السلندر، واضح انك عملت كل التشخيصات الأخرى و لم يبقى الا الصبابات و اكبر دليل هو ريحة البنزين.

بانتظار آراء الخبراء

[ugaritian]

العربية ماشية كام?

[shawkylotfy]

انا شايف انك من اسكندرية روح لاحمد موسى وان شاء اللة يزبطك

[farahat]

كل موتور بيكون فيه مجموعة من النظم ولزم تحدد مشكلتك فين عشان تركز في حلها متعدش تتعب وتجرب في كل حاجة ، أنظمة أي موتور ببساطة وإختصار بدون تعقيد كالآتي :
1- نظام حقن وقود (رشاشات وطرمبة بنزين وخراطيم )
2- نظام سحب هوا (فلتر هوا و بوابة أنابيب سحب ومنفول وصبابات و كامات )
3- نظام إشعال للخليط دة ( بوجيهات وكويلات وأسلاك توصيل الشرارة )
4- نظام عادم لسحب الخليط بعد ما يتحرق ( صبابات و فرن وكتاليست بحساسات أكسيجين وشكمان )
ومع كل دول كمبيوتر بيشغل كل دول بتناسق مع بعض .



أي cylinder misfire معناه حريق مش مزبوط ودة معناه إن نظام الإشعال مش مظبوط في ال-cylinder دة ، ونظام الإشعال في أي نظام حقن عبارة عن :
1- بوجيه
2- بوبينة الإشعال (الكويل )
3- أسلاك التوصيل بتاعت الشرارة (في الحالة دي السلك ما بين الكويل والكنترول )
4- كنترول الموتور نفسه


ما ينفعش يكون أي حاجة غير دول ، حضرتك غيرت بوجيهات يبقى نستبعدها ، وجربت تبدل الكويل يبقى نستبعده ، جرب تتأكد من أسلاك توصيل الكويل نفسه (محتاجة أجهزة معينة )، وفي الاخر لازم تتأكد إن الكنترول مش بيخرف (برضه محتاج أجهزة مقارنة شكل الشرارة بين الكويلات الأربعة ).


جرب كمان تقارن شكل البوجيهات إلي غيرتها بعض الإستخدام دة ، هل فيه فرق بين شكل رقم 2 والباقيين ؟ وإيه شكل الفرق دة ؟

[mouraddesk]

ممكن يكون الرشاش اتسد

عزيزى دكتور خالد مين اللى قال لحضرتك ان الرشاش بتاع الميجان مش بيتسد انا بعد ما جبت العربية اللى هى نفس عربيتك بشهرين عملت نفس الموضوع و جربت كل اللى انت عملته و فى الاخر طلع الرشاش مسدود و الميكانيكى كان مستغرب جدا و قال لى دى قرف و دى من الحالات اللى قابلها و تتعد على صوابع اليد الواحدة جرب تغير الرشاش ده و انت وقف عنده و شوف النتيجة ايه و انشاء الله تكون زى ما حصل معايا و تظبط و لو انت تعرف الدقى كويس فى مركز خدمة محترم جدا اسمة اوتو سكان خلف مركز القومى للبحوث و صاحبة اسمة المهندس فادى راجل فاهم و بيشتغل على اساس علمى و كمبيوتر هتزورة مره واحده و المشكلة هتتحل و هتشوف بنفسك بس المشكلة ان عنده على طول زحمة و بيقفل بدرى و لو عنده ضغط ما بيقبلش شغل و يا ريت تطمنى عملت ايه
و طبعا لازم ترجع للكبار الجنرال او مومو او عبد المقصود

[farahat]

عزيزى دكتور خالد مين اللى قال لحضرتك ان الرشاش بتاع الميجان مش بيتسد انا بعد ما جبت العربية اللى هى نفس عربيتك بشهرين عملت نفس الموضوع و جربت كل اللى انت عملته و فى الاخر طلع الرشاش مسدود و الميكانيكى كان مستغرب جدا و قال لى دى قرف و دى من الحالات اللى قابلها و تتعد على صوابع اليد الواحدة جرب تغير الرشاش ده و انت وقف عنده و شوف النتيجة ايه

هل كان مسجل نفس العيب بتاع cylinder misfire ؟
و هل كان فيه مع الكلام دة ريحة بنزين ؟!! لو مسدود أعتقد هيكون مفيش بنزين أصلاً يتحرق وبالتالي مش هتشم ريحة ، لو عيب رشاشات في حالة دكتور خالد هيكون انها بترمي بنزين زيادة (بتتفتف بنزين يعني بالبلدي ) ودة بيخلي البجيه يتبل بنزين وعشان كدة مش بيعمل إشتعال ، عشان كدة سألت شكل البوجيهات إيه بعد الحريق والإستعمال

[Hany Saad]

أنا مقتنع بتشخيص المهندس فرحات من ناحية سلك الكويل أو تنقيط البنزين من البكات (الرشاش) لكن بحاول أربط الكلام ده بظهور الموضوع ده على الidle فقط .....

[farahat]

أنا مقتنع بتشخيص المهندس فرحات من ناحية سلك الكويل أو تنقيط البنزين من البكات (الرشاش) لكن بحاول أربط الكلام ده بظهور الموضوع ده على الidle فقط .....

دة سبب ادعى إن المشاكل دي تحصل في السلانسيه ( ال-Idle )، لأن في الواقت دة بيكون فتح الرشاش أقل من العادي عشان مفيش حمل على الموتور ، وبالتالي سهل إنه بدل ما يرش البنزين بضغط ينقط نقاط بنزين سائل عشان الفتحة المتاحة صعيرة وهو مكتوم .
وفي نفس الوقت الوقت إلي بتحصل فيه الشرارة صغير ، لكن متباعد (عشان دورات المحرك أقل ) ، وبالتالي ممكن الشرارة توصل ضعيفة للكويل وميلحقش يشتغل (نتيجة عيب السلك أو عيب الكويل نفسه أو ضعف البوجيه )

[M_samir]

تعرف الدقى كويس فى مركز خدمة محترم جدا اسمة اوتو سكان خلف مركز القومى للبحوث و صاحبة اسمة المهندس فادى راجل فاهم و بيشتغل على اساس علمى و كمبيوتر هتزورة مره واحده و المشكلة هتتحل و هتشوف بنفسك بس المشكلة ان عنده على طول زحمة و بيقفل بدرى و لو عنده ضغط ما بيقبلش شغل و يا ريت تطمنى عملت ايه
و طبعا لازم ترجع للكبار الجنرال او مومو او عبد المقصود

لو سمحت ياباشا ممكن تليفون وعنوان مركز اتوسكان بالظبط وهو مركز كهراء وميكانيكا

[mouraddesk]

مركز خدمة اوتو سكان

لو سمحت ياباشا ممكن تليفون وعنوان مركز اتوسكان بالظبط وهو مركز كهراء وميكانيكا

من عينى يا باش اجيب لك رقم التليفون و لو انت من الدقى هتعرف الماكن بسهولة هو قبل مكتب امن الدولة - جابر بن حيان مشهر قوى هناك و تروح له بدرى و تقابل المهندس فادى بنفسه علشان تفهم منه و تسيب العيال هى اللى تشتغل بعد توجيهاته هو بيشتغل كهرباء و الميكانيكا اللى ما تبهدلش المركز ده حسب كلامه و على فكره هو كمان وكيل لزيت كاسترول

[mouraddesk]

تعليق او سدد الرشاش

هل كان مسجل نفس العيب بتاع cylinder misfire ؟
و هل كان فيه مع الكلام دة ريحة بنزين ؟!! لو مسدود أعتقد هيكون مفيش بنزين أصلاً يتحرق وبالتالي مش هتشم ريحة ، لو عيب رشاشات في حالة دكتور خالد هيكون انها بترمي بنزين زيادة (بتتفتف بنزين يعني بالبلدي ) ودة بيخلي البجيه يتبل بنزين وعشان كدة مش بيعمل إشتعال ، عشان كدة سألت شكل البوجيهات إيه بعد الحريق والإستعمال

كلامك كله صح ياباشمهندس كان عندى ريحه بنزين فعلا و كنت اول مره اركب الميجان و كنت قلقان جدا و مش عارف اعمل ايه و لسه عندى الرشاش موجود و ده اللى انا فهمته من الميكانيكى ساعتها و لما رحت مركز اوتو سكان المهندس فادى قال لى على كل الكلام بتاعك ده و قال كمان بلاش اضافه مركبات تنظيف دوره البنزين لانها بتخلى الرشاشات بعد فتره ترييل يعنى تنقط و العربية تأكل بنزين لان الرشاش بيجى مضبوط ينزل حوالى 24 جرام او مللى مش متذكر بالضبط فى الدقيقة مع الاضافات ينزل حوالى 28 جرام فى الدقيقة فى 4 رشاشات فى عدد الكيلو متر و احسبها انت بقى اه و على فكره العربية كتبت لى Check injection & Check gerbox

[M_samir]

[QUOTE=mouraddesk;3873790170]من عينى يا باش اجيب لك رقم التليفون و لو انت من الدقى هتعرف الماكن بسهولة هو قبل مكتب امن الدولة - جابر بن حيان مشهر قوى هناك و تروح له بدرى و تقابل المهندس فادى بنفسه علشان تفهم منه و تسيب العيال هى اللى تشتغل بعد توجيهاته هو بيشتغل كهرباء و الميكانيكا اللى ما تبهدلش المركز ده حسب كلامه و على فكره هو كمان وكيل لزيت كاسترول[/QUOTE

ياريت ياباشا بس ما تنسانيش بعد اذنك انا شغلى فى المهندسين اصلا

[osamasindbad1]

ياريت عنوان مركز اوتو سكان بالظبط فين من مركز منصور ممكن توصف المكان من شارع التحرير لو تسمح. شكرا

[mouraddesk]

وصف مكان اوتو سكان

ياريت عنوان مركز اوتو سكان بالظبط فين من مركز منصور ممكن توصف المكان من شارع التحرير لو تسمح. شكرا

بص يا سيدى انت جاى فى شارع التحرير من ناحية شارع السودان كأنك رايح على ميدان الدقى طبعا بتقابل جراج مقار و بعد كده شارع المرور و بعد كده مع اخر سور المركز القومى للبحوث تدخل يمين و تمشى لاخر الشارع و هو كده كده بتلاقى الشارع بيدخل شمال اول ما تدخل شمال تلاقى اوتو سكان فى وشك على طول