التقرير الشامل عن الميجان الجديدة زي ما وعدتكم

[akram2025]

أولا أشكر كل الأعضاء الكرام على ردودكم و مباركتكم ليا على الميجان الجديدة وبجد أعضاء المنتدى هنا أكثر من رائعيين.

زي ما وعدتكم اني هجرب عربيتى الميجان 2008 الجديدة وأديكم تقرير كامل عن العربية لعله يكون مرجع و دليل لكل من يريد اقتناءها:

ستكون ايضا درجات التقييم هي:
1 ضعيف جدا
2 ضعيف
3 مقبول
4 جيد
5 جيد جدا
6 ممتاز

أولا سأتحدث عن الشكل الخارجي:

بصراحة السيارة من الخارج هي ملكة جمال السيارات و انا حاسس اني اتجوزت عروسة جديدة وبحب امشي معاها ،،،،، اقصدي بيها في كل مكان عشان الناس تشوفها.
بجد احساس جميل فقط النظر لخطوط الميجان العصرية و بصراحة العربية مغرية جدا من الخارج.

المصابيح : ممتازة
المصابيح الأمامية و الخلفية لامعة بشكل لافت للنظر و ذات اضاءة هايلة و البكيتات في الأكصدام الخلفي و الأمامي تعطي احساس بالقوة و الفخامة.
الغمازات المثلثة في جوانب العربية مثيرة للغاية.

علوا السيارة: جيد جدا
السيارة علوها رائع عن الأرض رغم كل المطبات العملاقة الموجودة في شوارعنا.
نزلت بسيط تحت العربية و بجد منظرها من تحت رائع خصوصا التقفيل و تصفيح اسفل السيارة.

الجنوط : جيد جدا
تعطي احساس بسيارة رياضية جريئة.

صاج السيارة ممكن ياخد درجة جيد من حيث قوته.

قتحة السقف البانوراما: ممتازة
شكل فتحة السقف من الخارج شبابي جدا و في نفس الوقت فخم و يعطي احساس برفاهية السيارة.

ومن حيث التجهيزات الداخليه:

مقود السيارة: جيد جدا

المقود رائع و شكله جذاب و لكن العيب الوحيد تحتاج الي الضغط بقوة على الكلاكس لتشغيله... يمكن الوضوع تعود بس فعلا الكلاكس يحتاج الضغط بقوة و على أطراف المقود ليعمل.

دراع الأشارت و النور: جيد

مع استخدام الأشارات قد يدور جزء تشغيل الكشافات بسسب انه خفيف و يسبب انطفاء الكشافات الأمامية!!! و فكرة تشغيل و ايقاف نور الشبورة ظريفة حيث ان لفه مره واحده لأعلى لتشغيله و مره أخري في نفس الأتجاه لإلغاؤه

دراع المساحات: جيد جدا
لا تعليق

الفتيس ( ناقل الحركة ) : جيد جدا
من حيث الشكل معقول و لكن كان يمكن جعله اكثر فخامة بتغيير الجزء السفلي الدائري المكتوب عليه وضع الفتيس بأخر مستطيل.... و ده رأي شخصي

تسارع السيارة: جيد
السيارة أدائها ليس رياضي كالمازدا و الإلنترا و تسارعها غير قوي و لكنه جيد.

قوة الموتور: جيد
لا تتوقع ان السيارة ستصل لسرعة 200 بسهولة مثل المازدا و الإلنترا و لكن ادائها احسن من الميتسوبيشي.... و لكني وجدت صعوبة في الارتفاع بسرعة السيارة بعد ال 170 !!!!
الصالون: جيد جدا
مساحة الصالون هايله و الفرش الجلد اعطى فخامة و تميز اكثر للسيارة و مش بيعرق بسبب الفتحات الموجودة فية بس بيسخن لما العربية تكون في الشمس وده بسبب لونه الأسود أيضا...
العيب الوحيد ممكن يكون ان الأسفنج بتاع الكراسي كثافته عالية سنة زيادة مما يعطي احساس بقساوة المقعد.... مش عارف ده بسبب الفرش الجلد ولا ده مقصود لإطالة عمر المقاعد!!!

العدادات و التابلوه: جيد جدا
العدادات شيك والأضاءة البيضاء بتاعتهم جميلة و سهولة الوصول لأي معلومة عن طريق الزر الموجود بذراع المساحات و الخامات المستخدمة في التابلوه جيدة و التابلوه نفسه يعطي احساس الجلد و ليس البلاستيك بسبب قابليته للضغط وكأنه أسفنج مضغوط أو جلد ( احساس جميل ) ان التابلوه مش بلاستيك زي بعض السيارات الياباني.

العيب الوحيد في التابلوه هو مكان مثبت و محدد السرعة و زر ظبط اضاءة العدادات و زر ظبط مستوى الكشافات فمكانهم كلهم جميعا اسفل المقود على الشمال وموقعهم خلال القيادة غير مرأي بالمرة و قد يحدث التباس في استخدامهم.... مثال عندما اريد ان اغير مستوى الكشافات اجدني اغير مستوى اضاءة العدادات و ليس مستوى الكشافات!!!

ثبات السيارة: جيد جدا
بجد السيارة ثابته ثابته ثابته.... أول يوم استلمت السيارة من القاهرة سافرت بيها الغردقة حيث مكان عملي و أكيد الكل عارف ملفات العين السخنة شكلها ايه و رغم ذلك لم أضطر الي استخدام الفرامل الي في أوقات محدودة جدا و مفيش اي احساس بالهوا يهز أو يغربل العربية او أي كلام من ده خالص..... ثابته ثابته

الفرامل: ممتازة

من الأخر زي فرامل الطيارة.... الفرامل أكثر من هايله و حسيت بفرق التكنولوجيا العالية في فرامل السيارة في أكثر من موقف.

التحكم في السيارة: ممتاز
العربية سهله جدا في التحكم فيها حتى في السرعات العالية

العفشة: مش هتبان دلوقتي بس هي ناعمة جدا و هايلة في المطبات

ملحوظة : سقف العربية واطي سنة حتى اني منزل الكرسي لتحت على الأخر ،،،، يمكن عشان أنا طويل شوية.

سقف البانوراما: جيد جدا:
من جوا فتحة سقف البانوراما تعطيك شعور بالحيوية و الأنطلاق... بس لحد دلوقتي مش عارف ايه وظيفة الزرار الموجود بوسط البكرة المتحكمة في فتحة السقف و ازاي استخدم الزرار ده!!!! لما بادوس عليه ما بيحصلش أي حاجة!!!

ميزة التحكم في مستوى اضاءة كشافات السيارة هي ميزة هايلة و مش موجوده في أي سيارة.
الشماسات في الجزء الخلفي من السيارة و دمجها في الأبواب فخامة غير عادية.

الملخص:
المميزات:
أحسن سيارة في سعرها و حتى سعر 200 الف جنيه برضه أحسن سيارة مع ان سعرها في حدود ال 150 الف.

كماليات غير عادية
شكل أكثر من رائع
جوده عالية في التقفيل
صالون واسع و جميل
توكيل ذو سمعة أكثر من هايلة
العيوب:
أداء متوسط أو عادي لأداء الموتور ولا تتوقع أداء رياضي أو قوي يضاهي شكل السيارة.
سعر إعادة البيع سئ للغاية بس لو مش بتفكر تغيرها قريب يبقي مش مشكله
سيارة يجب الأهتمام بها و اعطائها أولوية قصوة لجميع احتياجاتها و شغلها كله في التوكيل و في الواقع ده عيب و ميزة. يعني باختصار لازم تحطها في عينيك عشان دي عربية بنت ناس.
يا رب ماكونش نسيت حاجة و مستني ردودكم الحلوة اللي انا عارف انكم ما بتبخلوش بيها على أي عضو.

على فكرة الصورة في التوقيع دي صورة الميجان الجديدة بتاعتي... ايه رأيكوا في اللون

[Mzeid]

1000 1000 مبروك ..
و ربنا يحفظهالك و يعطيك خيرها و يكفي عنك و عنها أي شر و يبارك لك فيها إن شاء الله ..
و حافظ عليها ..
:):)

[ASD peugeot]

مبروك عليك العربيه ربنا يحفظهالك

[sss]

الف مبروك على الميجان
عربية في غاية الروعة ربنا يباركلك فيها

[Ahmed Hassan]

الف مبروك عليك.. ربنا يباركلك فيها. بالنسبه للنقطه دي

العيب الوحيد ممكن يكون ان الأسفنج بتاع الكراسي كثافته عالية سنة زيادة مما يعطي احساس بقساوة المقعد.... مش عارف ده بسبب الفرش الجلد ولا ده مقصود لإطالة عمر المقاعد!!!

ده شيء مقصود لدعم الظهر و الجسم و بيبان تأثيره في حاله القياده لأوقات طويله لأنك هتلاحظ ان اجهاد الظهر و العضلات قليل.

[megane_man]

ألف مبروك التكييف عامل أيه

[akram2025]

ألف مبروك التكييف عامل أيه

التكييف كويس جدا و لحد دلوقتي ما احتجتش اشغله على اقصى سرعة رغم ان الجو في الغردقة اكثر حرارة من القاهرة.

[Ahmed Samy]

و الله العظيم
انا فرحانلك بجد

[mahamedaraby]

الف مبروك على العربيه وربنا يباركلك فيها يارب

[fahd_628]

الف شكر يا باشا تقييم رائع

صحيح وظيفة الزرار الى فى النص دة علشان مثلا لو كنت فاتح السقف و نزلت و قفلت العربية و شغلت وحدات الرفع حتلاقى السقف قفل لما تيجى تخش العربية تانى و عاوز تفتح السقف على نفس الدرجة الى انت كنت فاتحها طبعا البكرة حتكون على نفس المكان بس السقف مش مفتوح تقوم دايس على الزرار حتلاقيها فتحت

[Abo_Lina]

ايه يا عم اكرم الحب ده كله انت وصلت لدرجة عالية قوي من العشق و الهيام بالميجان

انا والله زيك كده بالظبط ببقى بدور على اي مشوار مهم او مش مهم اعمله عشان اركبها
الميجان فعلا A Car to be seen in

زي ما فهد قالك الزرار ده بيرجع فتحة السقف لاخر وضعية تشغيل

لو دورت مفتاح الفوج لايت للخلف الفوج لايت الخلفي هايشتغل..بس لازم يكون الامامي شغال عشان الخلفي يشتغل

اعتقد انك لسه في فترة التليين و لا ينصح بالمشي على سرعات عاليه و الشد و كده..مكتوب في الكتيب على ما اتذكر انه يفضل انك ماتزودش ال RPM عن 3500..بعد كده الموتور هايفتح معاك و هاتلاحظ فرق كبير في الاداء

[ows212]

الف مبرووووووووك ربنا يسلم طريقك

[محمد قاسم]

تقرير ممتاز ممتاااااااااااااااااااااااااااااز
ألف شكر يا باشا

[Ahmed Selim]

ايه يا عم اكرم الحب ده كله انت وصلت لدرجة عالية قوي من العشق و الهيام بالميجان

انا والله زيك كده بالظبط ببقى بدور على اي مشوار مهم او مش مهم اعمله عشان اركبها
الميجان فعلا A Car to be seen in

زي ما فهد قالك الزرار ده بيرجع فتحة السقف لاخر وضعية تشغيل

لو دورت مفتاح الفوج لايت للخلف الفوج لايت الخلفي هايشتغل..بس لازم يكون الامامي شغال عشان الخلفي يشتغل

اعتقد انك لسه في فترة التليين و لا ينصح بالمشي على سرعات عاليه و الشد و كده..مكتوب في الكتيب على ما اتذكر انه يفضل انك ماتزودش ال RPM عن 3500..بعد كده الموتور هايفتح معاك و هاتلاحظ فرق كبير في الاداء

ألف مبروك أولاً وربنا يكفيك شرها

كلام Tyler صحيح لا ينصح بتعلية ال RPM عن 3500 فى اول 1000 أو 2000 كم وبعد كده ممكن تجرب السحب وهتلاقى فى فرق أن شاء الله

و فى كمان ملحوظة عامة فى العربيات : العربية على ما تعودها يعنى لو واحد متعود يمشى براحة والنقلات تيجى براحتها ومش بيحرق شوية غير واحد متعود يحرق شوية على النقلات ( أو يعمل Kick Down )

[bassam nagy]

الف الف مبروك وربنا يباركلك فيها ويديك خيرها ويكفيك شرها