من ميجان لفلونس .. الوحش يظل وحش !!! ( دليلك للتطور الطبيعي )

[Hegazio]

وحوشي الأعزاء
بعت عزيزتي ميجي منذ عدة أشهر .. و كنت أحس بالضياع
وجدت الدنيا ترميني نحو الالانترا تارة .. و نحو السيراتو تارة أخري

وجدت شياطين توسوس " مش مهم لو مش أمان .. المهم تبيعها بسعر حلووو" !!

لم أستطيع خصوصا أن ميجي في لحظاتها الأخيرة معي قالت لي " فلفلة يا حجازي .. فلفلة "

و قد كـــــــــــــــــــان

وحوشي الاعزاء .. اشتريت الفلونس إمبارح 2011 e3 كسر زيرو بحالة و سعر ممتازين
كنت حاعيط والله من فرحتي مش بس بيها .. فرحتي بإني رجعت للطريق الصح !!!

صحيح ميجي كانت قفزة ثورية في عالم السيارات لما اشتريتها ف 2005 .. لكن الفلونس لا تقل جمال وروعة
ممكن تقل عن الميجان في التالي :
السحبة علي الأول ابطأ شوية ( يهيألي 10 % زيادة )
استهلاك البنزين اعلي شوية اقل ( متوسطي من البيت للشغل كان 7.1 دلوقتي 7.4 )
مافيهاش وجدات رفع للزجاج
الزجاج الخلفي مش لمسه واحدة
درج التابلوه اصغر بكتير
فتح الشنطة الخلفية بدون مساعدين هيدروليك
تحسها محتاجة حد اكبر من تلاتين سنة

تزيد عنها في التالي :
حاسس إني فعلا اترقيت من مشرف لمدير وحدة مبيعات بالعربية دي .. فعلا قيمة و فخامة أعلي
وسع و رحابة مستوي أعلي تماما ( طبعا 270 سم داخلي يعني 10 سم اوسع )
الكبوت أوسع .. صيانة و لعب أكتر ههههه
ثبات أعلي .. يهيألي العربية دي ماتتقلبش
تكييف افضل بكتير
ملتي فنكشن افضل شوية
بلوتوث حكاية
السمارت كي حكايتين
الكلاكس الحمدلله مرعب مش أأأ...( ولا بلاش )
في عجالة إمبارح جبت 190 بس المحور خلص و إضطريت أهدي ( دليل علي ان في السرعات العالية نفس الأداء و سأتخطي ال 200 مرة أخري بإذن الله )
طبعا النقلة الداخلية اللي جوة النقلة التانية تقريبا مش حاسس بيها الحمد لله

أتمنولي كل خير بدعوة حلوة الله يكرمكم و تحياتي

د.تــامر حجــازي

[bukla]

بسم الله الرحمن الرحيم
السلام عليكم و رحمة الله و بركاته
يسعدنى ان اكون اول واحد يباركلك الــــــف الــــــف مبروك و تمنياتى لك بكل خير و سعاده و بكده الرابطه انضم لها وحش جديد قديم فى نفس الوقت
ربنا يديك من خيرها و يكفيك شرها و يحميك من العين أأأأميــــــــن

[Mohd_Adel_Amin]

ما شاء الله تبارك الله , ألف مبروك وربنا يديلك خيرها ويكفيك شرها , واضح ان اللي بيركب الرينو بيفضل ولاؤه ليها , حتى لو كانت مش زي الميجان في الثورة اللي عملتها ..

[mohamed1979]

الف مبروك ياباشا
وربنا يكفيك شرها

سؤال هو فعلا الى بيركب رينو مبيعرفش يركب غيرها ؟

[ahmedbasto]

الف مبروك

[Hegazio]

الله يبارك فيكم يا جماعة
محمد .. الاجابة لأ طبعا .. لكن دايما بتبقي أهم حاجز خوف من إشاعات السوق عن قطع الغيار و إعادة البيع اتكسر فبتبقي اسهل انك تعملها تاني
بتعملها ليه من الأول بقي ؟ لأن ببساطة حل للمعادلة بتاعة ( أمان + متانة + أداء + برستيج .. بأقل سعر ! )

[Ahmed Selim]

ألف مبروك يا حجازى باشا...........ربنا يديك خيرها و يكفيك شرها إن شاء الله.

أهدى بقى على مواضيع التعديل دى.........العربية لسه جديدة ما شاء الله.

[Mzeid]

ألف مبروك لحضرتك
و ربنا يبارك لك فيها بإذنه تعالى

و إن شاء الله تكون وش الخير و تترقى لرئيس قطاع مش مدير :)

[amrelserw]

مبروك يا دكتور

[Ahmed Selim]

سؤال هو فعلا الى بيركب رينو مبيعرفش يركب غيرها ؟

مبيعرفش يركب اقل منها بسهولة......بس لو هتقولى بى أم مثلاً.... أكيد مفيهاش مشكلة.

أنا معايا الميجان و مأجر حالياً كورولا 2012.....ماشى بيها لحد دلوقتى 5500 كيلو.....مش عاوز أقولك غير أن مفيش مقارنة فى بين الأتنين فى كذا حاجة

يعنى على سبيل المثال.....
لما بفرمل بالكورولا فرامل مفاجأة على سرعة 100 مثلاً بلاقى العربية بتحدف يمين و شمال مع بعض
و نفس القصة لو بفرمل فى ملف على سرعات أقل 70 مثلاً.

الميجان مفيهاش الكلام ده خالص.

بالمناسبة الكورولا واخدها ماشية 16 كيلو فقط لا غير.........مش 16 ألف....و ظبطلها هواء الكاوتش و العربية فى الطوالى مش بتحدف يمين ولا شمال......أيه سبب الحدفة مع الفرامل بقى ؟؟؟؟؟

[Hegazio]

مش قادر يا عبمقصوود
إيدي بتاكلني علي فلتر سبور و اكزوست سيستم يفك خنقة الكتالايزر و الحفاظ علي البيئة دي .. بيئة مين ياعم !!

[Hany Saad]

ألف مبروك على هذا الأختيار الموفق.......فعلا هو ده التطور الطبيعى.....

[Ahmed Selim]

مش قادر يا عبمقصوود
إيدي بتاكلني علي فلتر سبور و اكزوست سيستم يفك خنقة الكتالايزر و الحفاظ علي البيئة دي .. بيئة مين ياعم !!

أستهدى بالله كده.......فلتر مين و أكزوست مين يا معلم..........أستمتع بالعربية لحد ما تكمل معاك 100 ألف و بعد كده أعمل اللى أنت عاوزه

[Hegazio]

ماشي .. عشان خاطرك بس
لكن مش حتنازل عن حل في إضافة سماعات بيضاوي بقي .. هه

[Col. Eng. Khaled]

أبو رجلك بلاش "سبويلر"