عملت حادثة كبيرة بالفلونس وارجو المساعدة

[malbarbary]

الحمد لله على كل شئ اولا واخيرا
يوم الوقفة كنت ماشي بسرعة وكنت بفادي واحد فالعربية عومت وخبط في عمود نور من الجنب عند الشنظة طبعا كان كله قافل ايام العيد ولسه عارف اللي فيها من مركز تصليح جنبي بيقول الكرونة اللي بين العجلتين اللي ورى اتقوست ولازم تتغير ده غير من الافضل اني اجبلها نصف خلفي احسن
فكنت عايز رايكو اكمل مع الراجل ده مع العلم انه صنيعي كويس ولا اروح التوكيل
وعايز اعرف اماكن قطع غيأر كويسة للفلونس وحتى اماكن بيع النصف الخلفي لالن بسؤال سريع كده في الحرفيين مكانش فيه حد بيبيع النصف الخلفي
والحمد لله اولا وأخيرا

[أبو صلاح]

هو على القل لازم تحط صورة علشان الناس تقدر تديلك رايها

[shaddadfalcon1]

هو في كرونه في العجلتين اللي ورا ؟

[Ahmed Selim]

قدر الله و ما شاء فعل.....اللهم أجره فى مصيبته

مفيش فى الفليونس كورونا.............هو قصده على القنطرة الخلفية أو ما يسمى بين الصانيعية بالدًنجل أو الدفرنسية

أعتقد صعب تلاقى مستعمل منها فى الحرفيين......و واضح من كلامك أنك مش مأمن على العربية و للأسف لو أتضطريت تلجأ للتوكيل هتمسع فيها رقم عجيب.....ما أعتقدش هتقل عن 12 مثلاً

و هى قطعة حديد بين العحلتين و بيبقى فيها شوية جلب.

لو حكمت أنك تفك القنطرة و تستعدلها عند حداد كويس لحد ما تلاقى واحدة مستعملة.

شوف العقيد خالد أو كريم منير ممكن يساعدوك إن شاء الله.....

[Hema_law]

الحمد لله على كل شئ اولا واخيرا
يوم الوقفة كنت ماشي بسرعة وكنت بفادي واحد فالعربية عومت وخبط في عمود نور من الجنب عند الشنظة طبعا كان كله قافل ايام العيد ولسه عارف اللي فيها من مركز تصليح جنبي بيقول الكرونة اللي بين العجلتين اللي ورى اتقوست ولازم تتغير ده غير من الافضل اني اجبلها نصف خلفي احسن
فكنت عايز رايكو اكمل مع الراجل ده مع العلم انه صنيعي كويس ولا اروح التوكيل
وعايز اعرف اماكن قطع غيأر كويسة للفلونس وحتى اماكن بيع النصف الخلفي لالن بسؤال سريع كده في الحرفيين مكانش فيه حد بيبيع النصف الخلفي
والحمد لله اولا وأخيرا

اهم حاجه انك بالسلامه و الحمدلله واوعى تفكر في الي فات اهم حاجه انك بالسلمه
انا راي بصراحه ويدها التوكيل حتى لو هتدفع زياده لانهم بصراحه بيرجعهلك زي ما يكون ما حصلش فيها حاجه وديه نصحتي بصراحه انا معي كرولا 2007 عمري ما عملتها حاجه بره التوكيل بسم الله ما شاء الله تسوقها تحس انها لسه طالعه من المعرض

[momo10000]

قدر الله و ما شاء فعل.....والف حمدلله علي السلامه ....

في ناس عندها .. بس مينفعش تخش عليهم..... حيدبحوك ! .... انا بعتلك رقمي عالخاص ... كلمني وسهله متقلقس ...

[mah_khourshid]

قدر الله وماشاء فعل .... الحمد لله انك بخير
حضرتك ممكن تروح لمحل ميشيل حليم (رينو هوم) في جسر السويس تسئل علي سعر القطعه الحضرتك عايزها وتقارن بالاسعار العندك او الوصلتلها
ورنا يوفقك في الخير

[Col. Eng. Khaled]

القنطرة الخلفية في الحرفيين تمنها = 6000 جنيه ، و جديدة في التوكيل = 12000 جنيه + 1000 جنيه مصنعية = 13000 جنيه .

لنا زميل هنا كان عنده مشكلة فيها ، بتوفيق من الله أخدته عند العفشجي في الحرفيين بتاعي فكها و ركبها وإستعدلها بمصنعية = 150 جنيه .

على أسوأ الفروض لو الرفرف مش نافع سمكرة إن شاء الله ممكن جدا تلاقي رفرف إستيراد فما تقلقش ، و مش بالضرورة تكون العربية محتاجة نص .

حضرتك بس شرفني بمكالمة و ربنا يقدم الخير ....

إن شاء الرحمن بالتوفيق .

[Col. Eng. Khaled]

نسيت أقول لحضرتك عربيته كانت محتاجة باب خلفي يمين و لقيناه كامل (بدون الفرش الداخلي) = 2600 جنيه تقريبا

[Ghamrawy]

ربنا يهون عليك
و ربنا يجازى الناس المحترمة اللى عرضت المساعدة كل خير و بركة

[Youssef.Awad]

الف سلامة عليك وربنا يعوضك خير

[bukla]

قدر الله ما شاء فعل
الحمد الله انك بخير و ربنا يوفقك ان شاء الله لتصليحها و ترجع زى الاول خليك مع Col. Eng. Khaled و ان شاء الله يساعدك على تخفيض التكلفه قدر الامكان
بالتوفيق ان شاء الله

[malbarbary]

والله انا محرج منكوا
لما الواحد يكون في أزمة ويلاقي اللي يقف جنبه ويساعده ولو بكلمة حلوة الف شكر لهذا المنتدى الرائع
وبالنسبة للعربية الراجل دلوقتي بيحاول يسمكر اللي يقدر عليه وبيقول هتنفع انشاء الله بس بيقول كده كده محتاجه باب خلفي شمال وقالي ده ب2500 وبالنسبة للاقنطرة
هياجلها شويه لحد مايخلص السمكرة
انا باذن الله هكون معاكوا لاخذ المشورة
ومرة تانية الف شكر لكل من قدم المساعدة
والحمدلله على كل شئ

[Hema_law]

والله انا محرج منكوا
لما الواحد يكون في أزمة ويلاقي اللي يقف جنبه ويساعده ولو بكلمة حلوة الف شكر لهذا المنتدى الرائع
وبالنسبة للعربية الراجل دلوقتي بيحاول يسمكر اللي يقدر عليه وبيقول هتنفع إن شاء الله بس بيقول كده كده محتاجه باب خلفي شمال وقالي ده ب2500 وبالنسبة للاقنطرة
هياجلها شويه لحد مايخلص السمكرة
انا باذن الله هكون معاكوا لاخذ المشورة
ومرة تانية الف شكر لكل من قدم المساعدة
والحمدلله على كل شئ

اهم حاجه انك بخير والحمدلله واهم حاجه حمد الله في السراء والضراء عشان ربنا يكرمك واكيد الي حصل ده خير ما تزعلش نفسك وان شاء الله ربنا هيكرمك
تحياتي

[heromiro]

أنا صلحت القنطره بتعتي عند واحد كويس في الحرفين العرفني عليه المهندس خالد الحمد لله طلعي كويسة وظبط الزويا ولما رحت التوكيل بعد كده في صاينه خلتهم يكشفه على العفشه ومعرفش ان عمل فيها شغل