انطباعات اوليه بعد تجربه اللوجان ..

[aLashin]

السلام عليكم .. في الاول انا عايز اعتذر يا شباب علي التأخير .. بس عندي زنقه شغل اليومين دول ..

الموضوع ده انا عامله عشان اكتب لكم انطباعاتي اول باول علي تجربتي مع الرينو اللوجان ..

أنا بس ليا ملحوظه قبل ما ابتدي .. انا في انطباعاتي ديه بقارن بعربيات زي الفيرنا و اللانوس و الافيو .. و ده لعده اسباب .. اولا ان العربيات ديه تعتبر في نفس فئه اللوجان .. و ثانيا لان هيا ديه العربيات اللي انا كنت بتفرج عليها و جربتها و بقارن بينها ..

نبتدي علي بركه الله ..

اول انطباع لي مع اللوجان يوم ما جربت العربيه يوم ما استلمتها .. العربيه فعلا واسعه من جوه .. مقارنه بالفيرنا و اللانوس و الافيو .. اللوجان هيا الوحيده فيهم اللي ركبتها من غير ما أرجع الكرسي للاخر .. – اخوكم طويل و مليان شويه :$ - .. و غير كده في مكان واسع و مريح لرجلي عند الدواسات – يعني في اللانوس مثلا حتي بعد ما رجعت الكرسي للاخر برضه رجلي اليمين كانت مزنوقه في الحته اللي هيا امتداد التابلوه ( اللي فيها الكاسيت و التكييف و حامل الأكواب ) و زي الافيو كمان - المشكله ديه مكانتش موجوده في الفيرنا .

الكنبه الخلفيه تشل 3 مستريحين اوي .. يعني مش هيكونوا مزنوقين او تعابنين و في مكان كويس للارجل ..

بالنسبه لي .. شكل التابلوه لذيذ .. ما حسيتش انه قديم او وحش زي ما بعض الشباب قال هنا .. بالعكس التابلوه و خصوصا باليل مع النور البرتقالي اللي طالع منه شكله حلو اوي - بس هنقول ان ديه في الاخر مسأله اذواق ..

تقفيل العربيه من بره حلو اوي .. مفيش بالنسبالي اي مشاكل ظاهره .. بس حسيت ان المرايه ناشفه اوي و حركتها مش سهله – لما بحاول اقفل المرايه اللي ناحيه الشارع بليل –

من جوه هو حلو برضه .. بس ده بالمقارنه مع اللانوس و الفيرنا و نوعا ما الافيو .. عموما هوا واضح فرق التقفيل عن العربيات اللي بتتقفل في مصر .. يعني في اهتمام بالتفاصيل الصغيره ..

التكييف شغلته مره واحده بس – عرفت انه غلط في التليين – بس هوا عموما كان حلو و قوي .. ده بالنسبه للكرسيين الاماميين .. مش عارف بالنسبه للكنبه الخلفيه كان عامل ازاي .. عموما هبقي ارجع للنقطه ديه لما اخلص التليين ..

العربيه فيها راديو سي دي .. و ديه بصراحه حاجه بسطتني جدا .. – كنت عامل حسابي لما اجيب اللانوس اني اجيب سي دي بلاير علي طول :D - و كمان زرار التحكم في المرايات الكهرباء حلو جدا و سهل الاستخدام ..

مكان ازرار الشبابيك الكهرباء بصراحه غريب شويه .. الشباكين الامامين في التابلوه .. تحت الكاسيت .. و الشباكين الخلفيين ورا فرامل اليد .. في الاول حسيت ان الاماكن ديه مش عمليه و مش محطوطه في مكان صح .. بس بعد التعود عليه مبقتش مشكله كبيره .. و ان كان برضه مكانهم غريب :) - متنسوش ان انا بقارن باللانوس و الفيرنا .. -

حامل الأكواب لذيذ جدا و الطفايه ممكن تتشال و تتحط ..

شنطه العربيه تعتبر بجد احد اكبر مميزات العربيه ديه .. بحر .. ممكن تشيل اتنين ركاب غير الخمسه اللي جوه العربيه :) . طبعا ممتازه في السفر و الرحلات ..

و ديه اول مجموعه من ملاحظاتي .. و انتظروا بالباقي تباعا ..

[MoToRiZeR]

مشكلة اماكن الازرار بتاعة الازاز دي برده في الكليو علي فكرة
خلف فرامل اليد ! نفسي اعرف مين اللي اقترح المكان ده و مين وافقله و مين نفذه في شركة رينو !

بس عموما هتتعود عليه .. و الف مبروك العربية
إن شاء الله تتبسط بيها أكتر كمان :)

[Amr_Moh]

ham makanhom 7`alf faramel el yad 3asha el rakeb odam aw wara ye2dar esta3melhom??

[tamtam]

شكرا على تقييمك و ربنا يباركلك فيها.
بس انا عندى سؤال، ايه اخبار استهلاك البنزين؟ اصلى سمعت انها المفروض تكون اقتصادية، فياريت تقوللنا معدل استهلاكها قد ايه.

[hesham_tawfiq]

انطباعات اولليه عن اللوجان

فعلا مكان مفاتيح المرايات الخلفيه مكانه سيء جدا خصوصا للى عنده عفاريت صغيره زيي

[د.محمود صلاح]

مشكلة اماكن الازرار بتاعة الازاز دي برده في الكليو علي فكرة
خلف فرامل اليد ! نفسي اعرف مين اللي اقترح المكان ده و مين وافقله و مين نفذه في شركة رينو !

يمكن عشا نالركاب اللى ورا يمدوا اديهم وينزلوا او يرفعوا القزاز !!!

[Ramy_Tantawi]

ماشاء الله تقييم ممتاز وماشاء الله الحمد لله حاسس حضرتك مرتاح ليها ودي حاجه مبهجه ربنا يبارك لحضرتك فيها وفي انتظار المزيد ان شاء الله من حضرتك .

بالنسبه لمكان الزراير حتى لو في اعتراض على مكانه الحالي بس انا في رأي أنسب مكان لئنه بالحركه دي وفر على نفسه كونسول زراير قدام واتنين في البابين الخلفيين وبالتالي مكانه نظرياً انا شايفه ذكي وعملي لكن على الجانب العملي طبعاً اللي جرب أكثر حكماً مني .

[Qamar]

الف مبروك و الفرنساوي بصراحة سمعة و قوة. ربنا يباركلك فيها و يحفظها
و يا ريت استهلاك البنزين و التوكيل اخبارهم ايه؟

[Ahmed Selim]

ربنا يباركلك فيها يا باشا

وبالنسبة لموضوع المرايا اللى بتحس أنها ناشفة وأنت بتقفلها دى حاجة عادية وبتخف مع الوقت من واقع علمى بعدد من العربيات الأخرى اللى كان فيهم نفس الموضوع

[Sharky]

واضح إن إنطباعك الأول عليها إنك راضى عنها
ربنا يبارك لك فيها إن شاء الله

[hazem_khidr]

ربنا يباركلك فيها و شكرا لمجهودك:)

[amr123]

مبروووووووك عليك ...
وشكرا لمجهوداتك
بس لو ممكن نتعبك شويتين و تكملنا التقيم من حيث

استهلاك النزين تقريبا قد ايه
نظام التعليق و العفشة مريحة ولا ناشفة
ثبات العربية لما بتجري بيها ايه .. حاسس انها ثابتة على الارض ولا خفيفة (عشان العربية عالية شووية )
و حضرتك سايق حاسس انك ملم بابعاد العربية يعني مثلا بتشوف حدود الكبوت ؟

وربنا يابركلك فيها يا ااااااااارب
و عقبالي لما احصل حضرتك قريب .. ادعلي

[BooDElGn]

شكرا يا باشا على التعليق و فى انتظار الباقى و جزاك الله الف خير

[aLashin]

ماشاء الله تقييم ممتاز وماشاء الله الحمد لله حاسس حضرتك مرتاح ليها ودي حاجه مبهجه ربنا يبارك لحضرتك فيها وفي انتظار المزيد ان شاء الله من حضرتك .

بالنسبه لمكان الزراير حتى لو في اعتراض على مكانه الحالي بس انا في رأي أنسب مكان لئنه بالحركه دي وفر على نفسه كونسول زراير قدام واتنين في البابين الخلفيين وبالتالي مكانه نظرياً انا شايفه ذكي وعملي لكن على الجانب العملي طبعاً اللي جرب أكثر حكماً مني .

هوا انا استغربت مكان الزراير في الاول بس فعلا بعد التعود مبقتش مشكله كبيره ..

انا اصلا اول اسبوع كنت كل ما احاول افتح الشباك ادور في الباب الاول و بعدين افتكر :) ..

[aLashin]

انطباعاتي عن القياده ..

اولا .. صوت الموتور هادي جدا .. او نقدر نقول ان العزل جوه العربيه حلو اوي .. يعني مبسمعش صوت لموتور عموما .. بس من بره مش قادر لسه احدد ان كان هادي او طبيعي .. محتاج اقارن بعربيه تانيه .. عموما هجرب و اقولكم ..

العربيه ما شاء الله مريحه جدا في القياده .. الدواسات التلاته – البنزبن و الفرامل و الدبرياج – مريحين جدا .. و حساسين اوي .. يعني مش محتاج تدوس جامد عشان تبتدي تحس بالتأثير – او زي ما شوفتها في المنتدي هنا مش محتاج تقطع مشاويير طويله –

الفتيس ممكن نقول عليه ناشف شويه .. بس مش لدرجه مزعجه .. و يمكن عشان لسه جديد .. بس عموما عمليه النقل بين السرعات عاديه – بالنسبالي التحكم احسن مثلا من الفيرنا –

اللوجان عربيه عاليه اوي .. اعلي طبعا من الاخوات الحلوين اللانوس و الفيرنا و الافيو .. محسيتش باي مشكله مع المطبات و ده بصراحه شيء هايل في ظل حاله شوارعنا العظيمه .. و بعدين فعلا و انت واقف جنب باقي العربيات بتحس انك اعلي شويه ..

برغم موضوع العلو ده .. العربيه متزنه جدا .. انا قطعت بيها مشوار في الويك اند اللي فات حوالي 90 رايح و زيهم راجع .. صحيح اني عشان لتليين برضه مكنتش بمشي علي سرعات عاليه و بحاول بقدر الامكان مقرصش علي العربيه .. بس انا حسيت علي الطريق السريع بانها متزنه .. انا صحيح معدش ال 100 بس في المجمل اتزانها مقارنه بالفيرنا مثلا عند نفس السرعه يعتبر هايل .. عموما هانت .. لما اخلص التليين هرجع تاني للنقطه ديه ..

فاصل و نرجع نكمل .. :)