السادة أصحاب الفلوانس أرجو المساعدة

[dr_ghonem]

السلام عليكم ورحمه الله وبركاته
دى اول مشاركة ليا فى المنتدى وطبعا انا احترم كل حائزى الرينو بفئاتها وخصوصا الفلوانس
انا معايا فلوانس اتوماتك او فئه e2 وكنت محتاج منكم المساعده جدا وبسرعة كمان
العربية صعبة جدا فى الركن وخصوصا انى كنت راكب قبلها جين 2 وكانت فيها سنسور باركنج وبالتالى مش بركن الفلوانس تقريبا الا لما تحك منى من ورا وبالتالى كلمت التوكيل وسألت عن سعر السنسور قالولى اسعار خرافيه فى فرع المقطم فسألتهم طيب ممكن اجيب اللى هى المرايه 7 فى 1 اللى بتشتغل بلوتوث مع الموبايل وتتوصل عليها كاميرا للرؤيه الخلفيه وبتشغل dvd المهم فى كل ده الكاميرا والبلوتوث
كان ردهم برضه لأ مانقدرش نركبلك اى سنسور او اى حاجه جايبها من بره التوكيل
سألت فى سبير كار قولت اهو مكان كبير ومعروف قالولى نخاف نركبلك الكاميرا فى الاكصدام الخلفى دى لازم ترجع للتوكيل احنا نخاف نبوظهالك والتوكيل يقولى لا مش هركب حاجه بره التوكيل
أرجوكم حد ينصحنى اعمل ايه محتاج البلوتوث والكاميرا جدا جدا
وشكرا مقدما وأرجو ماكنش طولت عليكم
سلام عليكم

[Ahmed Selim]

أنا جربت نفس الحوار زمان فى الميجان...........بس قبل ما يطلع حوار الكاميرا الخلفية.......كان ساعتها أحدث حاجة الباركنج سنسورز.

المهم أنا جبتها من برة مصر و روحت التوكيل قالولى نفس الكلام............سألت فى الميكانيكيون العرب قالولى بنركب عادى..........روحتلهم و كان يوم زحمة.........قعدت مستنى ساعة و العربية مدخلتش لسه.........سالت واحد هناك قالى يا باشا الموضوع بسيط.........روح لأى حد معروف بتاع أكسسوارات عربيات هيركبلك السنسورز فى نص ساعة.......و قد كان.

رحت لمحل أدريان خلف بنزينة موبيل العروبة و نص ساعة كان الموضوع خلصان.

حاول تشوف أدريان و السجان و العجيل حسب أقرب واحد ليك عنده نفس المرايا اللى أنت عاوزها و توكل على الله.

بس حاول تخليه يركبلك الكاميرا فى مكان مش باين علشان محدش يسرقها أو يكسرها.

و برضه ممكن تدور على النت على كاميرا معمولة مخصوص للفليونس بحيث أنها تكون متصممة تركب فى مكان مش واضح............زى 3 صورة فى الرابط ده

Blind spot detection| Zigwheels.com

[hany63]

فيه كاميرات بتركب بدل لمبه من لمبتين النمره الخلفيه تجنبا لخرم الاكصطدام وشكلها كأنها نازله كده من الفابريكه و انا مركبها في عربيتي و بجد تحفه شكلا و موضوعا

[MARTINDALE]

هو السعر اللي اتقال من التوكيل كام ؟؟

[SoFiMaN]

همممممممم.. انا جبت باركنج سنسور spy و وايرلس كمان و ده لأنه افضل حاجة موجودة عن تجربة + التوكيل نفسه ,, و رحت التوكيل رشوه بلون العربية زي ما طلبت منهم و ركبهولي بحوالي 300 جنيه. انا بصراحة معرفش هو ينفع اصلا ولا لأ لأن اللي عاملي الموضوع ده كله المدير. بس هو مجابليش اي سيرة عن انها اصلا متنفعش!

و نصيحة مني, انسى الكاميرا لأنها ملهاش اي لازمة عن تجربة في عربيتي التانية بعتمد على السنسور و مش ببص للكاميرا اساسا, الا جايز لو جبت الكاميرا كينوود لأن رؤيتها حاجة رووووعة بس سعرها حوالي 1000 جنيه

[dr_ghonem]

هو السعر اللي اتقال من التوكيل كام ؟؟

3200 جنيه غير الضريبة ومصاريف التركيب

[dr_ghonem]

همممممممم.. انا جبت باركنج سنسور spy و وايرلس كمان و ده لأنه افضل حاجة موجودة عن تجربة + التوكيل نفسه ,, و رحت التوكيل رشوه بلون العربية زي ما طلبت منهم و ركبهولي بحوالي 300 جنيه. انا بصراحة معرفش هو ينفع اصلا ولا لأ لأن اللي عاملي الموضوع ده كله المدير. بس هو مجابليش اي سيرة عن انها اصلا متنفعش!

و نصيحة مني, انسى الكاميرا لأنها ملهاش اي لازمة عن تجربة في عربيتي التانية بعتمد على السنسور و مش ببص للكاميرا اساسا, الا جايز لو جبت الكاميرا كينوود لأن رؤيتها حاجة رووووعة بس سعرها حوالي 1000 جنيه

باشا بعد إنك هو يعنى ايه سنسور spy و وايؤلس ازاى ؟؟ ياريت توضحلى اكتر
وبما انك بتقول انه افضل حاجه قولى بقى انت جايبه منين وبكام ومواصفاته ايه بالظبط؟
شكرا

[dr_ghonem]

أنا جربت نفس الحوار زمان فى الميجان...........بس قبل ما يطلع حوار الكاميرا الخلفية.......كان ساعتها أحدث حاجة الباركنج سنسورز.

المهم أنا جبتها من برة مصر و روحت التوكيل قالولى نفس الكلام............سألت فى الميكانيكيون العرب قالولى بنركب عادى..........روحتلهم و كان يوم زحمة.........قعدت مستنى ساعة و العربية مدخلتش لسه.........سالت واحد هناك قالى يا باشا الموضوع بسيط.........روح لأى حد معروف بتاع أكسسوارات عربيات هيركبلك السنسورز فى نص ساعة.......و قد كان.

رحت لمحل أدريان خلف بنزينة موبيل العروبة و نص ساعة كان الموضوع خلصان.

حاول تشوف أدريان و السجان و العجيل حسب أقرب واحد ليك عنده نفس المرايا اللى أنت عاوزها و توكل على الله.

بس حاول تخليه يركبلك الكاميرا فى مكان مش باين علشان محدش يسرقها أو يكسرها.

و برضه ممكن تدور على النت على كاميرا معمولة مخصوص للفليونس بحيث أنها تكون متصممة تركب فى مكان مش واضح............زى 3 صورة فى الرابط ده

blind spot detection| zigwheels.com

باشا الف شكر لاهتمامك وردك السريع وبجد بشكرك كمان عالافاده وعاللينك لانك فكرتنى بالمراكز المعتمدة زى الميكانيكيون وكمان محمد زكى وكمان ادريان انا هحاول اسال فعلا هناك واطمن الاول هيركبها ازاى وفين بالظبط لأحسن يبهدلى الاكصدام
عالعموم متشكر مرة تانية

[MARTINDALE]

3200 جنيه غير الضريبة ومصاريف التركيب

بص انا هقولك حسبه بسيطه كده ومش عارف هل هتبقى مضبوطه ولا لأ وياريت الاخوه يفيدونا .

الفئه الثانيه اوتوماتيك سعرها 142 اللي بعديها بـ 150 وتفرق عنها في الباركينج سينسور وفتحه السقف .

لو قلنا ان العربيه بتزيد بمتوسط 3500-4000 بسبب فتحه السقف يبقى الـ 4000 الباقيين دول تمن الباركينج سينسور ......

يعني لو افترضنا ان اللي هيركبه التوكيل هيكون مطابق لسينسور الفابريكه وبنفس المواصفات وبنفس نظافه التركيب مع الضمان الحقيقي يبقى والله اعلم السعر طبيعي .

[dr_ghonem]

همممممممم.. انا جبت باركنج سنسور spy و وايرلس كمان و ده لأنه افضل حاجة موجودة عن تجربة + التوكيل نفسه ,, و رحت التوكيل رشوه بلون العربية زي ما طلبت منهم و ركبهولي بحوالي 300 جنيه. انا بصراحة معرفش هو ينفع اصلا ولا لأ لأن اللي عاملي الموضوع ده كله المدير. بس هو مجابليش اي سيرة عن انها اصلا متنفعش!

و نصيحة مني, انسى الكاميرا لأنها ملهاش اي لازمة عن تجربة في عربيتي التانية بعتمد على السنسور و مش ببص للكاميرا اساسا, الا جايز لو جبت الكاميرا كينوود لأن رؤيتها حاجة رووووعة بس سعرها حوالي 1000 جنيه

باشا بعد اذنك انا روحت لادريان اللى فى مدينه نصر وقالى فيه نوعين كاميرا واحده تركب فى الاكصدام ويخرملها والتانى لطش تركب جنب مفتاح الشنطه يعنى جنب فانوس اللوحه المعدنيه المهم انه جرب يركب فى الاكصدام الخلفى بس قاللى وراه حديد ومش هيتخرم والتانيه بقى قاللى لازم برضه اخرم جنب الفانوس الصغير بتاع اللوحه عشان اعدى منه سلك الكاميرا
ايه رأيك بقى ؟؟ هى دى spy ؟ وهل فيه مشكلة فى الخرم فى الجزء الفيبر اللى من ورا فى الشنطه ده اللى فيه فانوس اللوحه؟؟ ارجو الافاده
وشكرا ليكم جميعا

[dr_ghonem]

فيه كاميرات بتركب بدل لمبه من لمبتين النمره الخلفيه تجنبا لخرم الاكصطدام وشكلها كأنها نازله كده من الفابريكه و انا مركبها في عربيتي و بجد تحفه شكلا و موضوعا

باشا بعد اذنك انا روحت لادريان اللى فى مدينه نصر وقالى فيه نوعين كاميرا واحده تركب فى الاكصدام ويخرملها والتانى لطش تركب جنب مفتاح الشنطه يعنى جنب فانوس اللوحه المعدنيه المهم انه جرب يركب فى الاكصدام الخلفى بس قاللى وراه حديد ومش هيتخرم والتانيه بقى قاللى لازم برضه اخرم جنب الفانوس الصغير بتاع اللوحه عشان اعدى منه سلك الكاميرا
ايه رأيك بقى ؟؟ وهل فيه مشكلة فى الخرم فى الجزء الفيبر اللى من ورا فى الشنطه ده اللى فيه فانوس اللوحه؟؟ ارجو الافاده
وشكرا ليكم جميعا

[hany63]

ايه رأيك بقى ؟؟ وهل فيه مشكلة فى الخرم فى الجزء الفيبر اللى من ورا فى الشنطه ده اللى فيه فانوس اللوحه؟؟ ارجو الافاده
وشكرا ليكم جميعا

بص حضرتك انا مركبها في السيفيك فوق النمره بدون ما نخرم
فمش قادر اتخيل الوضع عند حضرتك بس متهيألي طالما هتخرم في الفبر و الكاميرا هتدارى ما فيش مشكله و الخيار لحضرتك

[dr_ghonem]

بص حضرتك انا مركبها في السيفيك فوق النمره بدون ما نخرم
فمش قادر اتخيل الوضع عند حضرتك بس متهيألي طالما هتخرم في الفبر و الكاميرا هتدارى ما فيش مشكله و الخيار لحضرتك

والله حضرتك ولا انا برضه متخيلها ولذلك نفسى حد يكون جربها ويطمنى الاول بدل ما اعملها واندم وطبعا الف على اهتمام حضرتك وردك