نتشة الفتيس فى الفلوانس

[midobond]

يا رجالة الموضوع ده ايه مصداقيته ؟؟
و فى موضوع كمان عن ان العربية فيها عيوب زى عوامة البنزين و جلد المساحات و جلد الدركسيون بيبوظ و بيتقشر
و ياريت نبذة عن موضوع قطع الغيار و اسعارها و هل موجودة برا التوكيل ولا لا
انا بقارن بينها و بين اللانسر الشارك الهاى لاين و محتار جدااااااااااااااا

[MARTINDALE]

النتشه موجوده بس انا حاسس ان الموضوع واخد اكبر من حجمه لانها مش بتظهر مع السواقه الطبيعيه وبتظهر بوضوح بالضبط لو انت واقف وقمت دايس البنزين لنص الدواسه او اكتر هتلاقي العربيه جعرت وتحس فيه نطه صغيره حصلت ..... واعتقد ان ده مش حاجه توصل لدرجه العيب خصوصا انها مش بتأثر على الاداء.
العوامه .... تم حلها في 2012 وحتى لو حصلت التوكيل متكفل بيها .
جلد المساحه ........ ما اظنش ان حاجه زي دي تعيب عربيه خصوصا ان الكاوتش في كل العربيات برا الضمان .
جلد الدريكسون .... سمعتها من شخص واحد فقط والتوكيل تعهد بالتغيير .

[midobond]

انا متشكر جدا لسرعة ردك
بس انا احكيلك حكاية الفتيس دى انا كانت معايا نوبيرا اوتو و ف اخر ايامها الغالية كانت بتعمل معايا الحركة دى على فترات احس بنطة او بالبلدى العربية بتعمل امريكانى صغير كده بصراحة الموضوع ده كان مضايقنى جدا ده غير لمبة الزيت اللى كانت بتنور بدون اى اسباب الحاجات دى ممكن متفرقش بالنسبة لبعض الناس بس بالنسبالى انا تزعلنى جدا
و المقارنة انى منحاز للشارك جدا و شايف موتورها احسن و انها يتستحمل اكتر من الفلوانس بس ابويا الحاج عاجباه الفلوانس اكتر بس خايف من اسعار صيانتها و قطع غيارها
بصراحة العربيتين حلوين جدا جدا جدا شارك شكل افضل فلوانس كماليات اكتر بس اللى هيفصل بينهم بقى موضوع مين يستحمل و يعمر معايا اكتر

[midobond]

طيب بالنسبة لاسعار قطع الغيار المقارنة فى صالح الفلوانس ولا الشارك؟؟؟

[MARTINDALE]

بص انا كنت في نفس حيرتك دي من 3 شهور
كنت محتار بين الشارك والفلوينس والالنترا ...
عمي كان معاه النترا 2012 وباعها وبصراحه التجربه كانت سيئه + توكيل من اسواء التوكيلات في مصر .
الشارك استبعدتها لان مافيش حد قال عليها كلام مشجع بالاضافه الا ان سعر قطع الغيار رهيبه ((انا كان معايا لانسر 2003 وقطع الغيار بجيبها الاصلي )) .... ولما جيت قارنت قطع الغيار بالفلونس لقيت تقريبا مافيش فرق وده اللي شجعني اروح ناحيه الفلونس لاني بصراحه لقيت فيها كماليات ومميزات وتحس فيها بنكهه الاوروبي (( عوامل امان عاليه + رفاهيه)) ويكفي اقولك ان اول فئه فيها بتنزل abs +ebd يعني الناس دي مش بتهزر واكتر حاجه شدتني ناحيتها سمعه توكيلها وطريقه معاملته .
طبعا الظروف والعوامل ممكن تختلف بيني وبينك ..... يعني انا ان شاء الله مش حاطط اعاده بيع قبل 5 سنوات وده عامل بيفرق جامد جدا لان سعر اعاده البيع هيكون في صالح اللانسر اكيد .... لكن كنت حاطط قدامي عربيه بركوبه مريحه ومحترم مع توكيل محترم لان بصراحه راحه بالي ووقتي اهم عندي من شعبيه وانتشار واعاده بيع

[MARTINDALE]

خد بالك من حاجه النتشه دي مش زي ما انت بتحكي والناس حاسه بيها من 2010 ومايش حد اشتكي من الفتيس لحد الان , يعني مش نفس مشكله الفولكس . انا بس بوصفلك النتشه عامله ازاي واكيد الناس كلمت التوكيل وهو عارف هل ده عيب او طبيعي , والنتشه دي مش بتظهر ناهئيا لو سواقتك هاديه وبتطلع براحتك وكما بتختلف هل العربيه كانت واقفه تماما ولا فيها سنه حركه . وكما لو فيه حد راكب جنبك مش هيحس بيها انت بس هتحس بنتره تحت رجلك على دواسه البنزين .