ميجان هاتش باك

[nourelkholy]

يا جماعه ايه رايكم فى الرنو الميجان الهاتش باك و هل اعطلها زى الميجان السيدان ؟ علشان انا عاوزه اشتريها

[M.Moustafa]

عربية ممتازة وحلوة جدا بناتي وموضوع الاعطال سيدان او غيره حضرتك شوفي في المنتدى هنا هتلاقينا كلنا اللي معانا الميجان اعطالنا عادية ومعظم الاعطال كانت في موديل 2005 واتعدلت في 2006 واتحلت نهائي في 2007 وما فوق فتوكلي على الله وما تقلقيش

[Ramy_Tantawi]

السلام عليكم.
رأيي الهاتش باك ممتازه شبابيه واذا ترضي متطلبات حضرتك مش محتاجه سيدان توكلي على الله .

بالنسبه لجزئية الاعطال فالسيدان والهاتش باك واحد الفرق بس ان تقفيل السيدان في تركيا والهاتش باك في فرنسا لكن المكونات جميعها فرنسي حتى فلتر التكيف للكابينه مقبض الباب حاجات صغيره جداً ومع ذلك فرنسي مش تركي التركي تجميع وتقفيل فقط مع اضافة كاوتش واعتقد فرش للصالون.

توكلي على الله وزي ما اخونا الكريم استاذ مصطفى قال اقري شويه عن اعطال الميجان من الاعضاء والمواضيع دي واي استفسار ان شاء الله كلنا حاضرين وربنا يكرم حضرتك وييسر الأمور ان شاء الله.

[momo10000]

انا معايا الهاتش باك من 2006 والحمد لله مفيهاش اي مشاكل وهي الافضل علي الاطلاق في فئة الهاتش باك ولاتتفوق عليها الا الاودي ال A3

واحنا كلنا هنا في المنتدي اسرة واحدة ولو احتجتي اي حاجة كلنا معاكي.


_____________________
برجاء تحرى الدقة في كتابة لفظ الجلالة
و شكرا

الإشراف...

[nourelkholy]

مرسى اوى يا جماعه على اهتمامكم ، الفكره انه معروض عليا واحده 2005 استعمال نضيف عامله 17 الف كم و معروضه على 73000 الف اتوماتيك . طبعا السعر غريب اوى ؟ و فعلا لو حالتها كويسه اشتريها رغم انها 2005

[M.Moustafa]

اعتقد ان الافضل لو عجباكي العربية وشايفه ان حالتها كويسة روحي اكشفي عليها في التوكيل كشف كامل وده للاطمئنان

[Ramy_Tantawi]

هو السعر غريب والكيلو اغرب ممكن 170 الف مش 17 ولا هو فعلاً 17 ..........الحاجه التانيه طبعاً طالما مستعمل الخطوه الأولى لو حضرتك استقريتي عليها زياره للتوكيل لعمل الكشف الكامل على العربيه ويطلع تقرير بالحاله بتاعة العربيه ويفضل سؤال مالك العربيه عملت صيانات دوريه في التوكيل ولا لأ والتوكيل ان شاء الله هايطلع هيستوري كامل عن العربيه لو اتعمل عندهم الصيانات + هايطلع تقرير مفصل عن العربيه وعن حالتها وان شاء الله خير.

[momo10000]

هو السعر غريب جدا ، ياريت تخلي حد يفهم في الرينو كويس يشوفها وانا تحت امرك لاني الحمد لله فاهم كل صغيرة وكبيرة في الهاتش باك والحاجات اللي لازم تتاخد في الاعتبار قبل الشراء

[Ahmed Selim]

السعر كويس فعلاً بس متنسيش تكشفى عليها فى التوكيل أحتياطى

عشان تروحى التوكيل لازم تحجزى معاد من ال Call Center على 16202

ربنا يوفقك

[Sharky]

يا جماعه ايه رايكم فى الرنو الميجان الهاتش باك و هل اعطلها زى الميجان السيدان ؟ علشان انا عاوزه اشتريها

حضرتك الميجان السيدان زى الهاتشباك الإتنين لا يوجد بهما أعطال
دى كلها إشاعات و ممكن تتأكدى من موضوع أعطال الميجان من ملاكها فقط

[fahd_628]

الميجان مفيهاش اعطال خالص !!!!

توكلى على الله لو السعر دة فعلا و العربية عاملة 17 الف كم و الحالة بعد الكشف عند التوكيل ممتازة يبقى توكلى على الله

[NaderNabil]

ممكن تشوفي الكاوتشات حالتهم ايه...ممسوحين جامد و متبهدلين و لا تاريخهم حديث 2006 و 2007 مثلا...

و برده حالة الصالون و الجلد و التابلوه و الذي منه متهانة أو فيها أثار استخدام جامد ولا لأ..

عشان 17000 تعتبر العربية لسه مامشيتش فالحاجات دي بتبقي لسه بحالتها...و ممكن جدا يكون العداد ملعوب فيه....عشان كده بقول يستحسن تكشفي علي الحاجات ديه و خصوصا الكاوتش

[mohamed ibiza]

العربية لو موديل 2005 يبقي سعرها مش غريب ولا حاجة هي موديل 2005 سعر اعادة بيعها واقع و وحش جداااااااااااااااااااااااا و 17 الف كيلو اتأكده من الحاجات اللي قال عليها نادر لو مبهدلة بالذات الكاوتش لو متغير او مبهدل يبقي اكتر من 17 الف كيلو و لو العربية عاملة صيانة دورية في التوكيل هتبقي مضمونة لان ملفها موجود انما لو برا التوكيل اكشفي كويس جدا عشان محدش يضحك عليكي و ربنا يوفقك

[Megane]

السلام عليكم.

بالنسبه لجزئية الاعطال فالسيدان والهاتش باك واحد الفرق بس ان تقفيل السيدان في تركيا والهاتش باك في فرنسا لكن المكونات جميعها فرنسي حتى فلتر التكيف للكابينه مقبض الباب حاجات صغيره جداً ومع ذلك فرنسي مش تركي التركي تجميع وتقفيل فقط مع اضافة كاوتش واعتقد فرش للصالون.

السلام عليكم
كلام مضبوط ماعدا الكاوتش لان الكاوتش عندى ميشلان صنع فى أسبانيا.

[Ramy_Tantawi]

السلام عليكم
كلام مضبوط ماعدا الكاوتش لان الكاوتش عندى ميشلان صنع فى أسبانيا.

عموما الكاوتش ممكن يختلف من دفعه لدفعه من رينو نفسها زي اي شركه وده راجع هي متعاقده مع مين الفتره دي بس عموماً انا في تجاربي للأمانه كان كل الكاوتش تركي الصناعه .
كليو 2002 جوديير تركي
ميجان 2006 جوديير تركي
ميجان 2007 بريدجستون تركي

لكن فعلاً شفت عربيات اوقات في المعرض نفسه بيكون الكاوتش بتاعها ميشلان او نوع آخر تصديقاً لكلام حضرتك.