معروض عليا ميجان ii اية رأيكم !

[osama.m]

السلام عليكم
اخوكم من قسم الدايو
معروض عليا ميجان 2 حالتها كويسة بس لسة ما كشفتش عليها
انا معرفش اي حاجة عن العربية دي غير السمعة بس .. قريت شوية مواضيع هنا في القسم و بصراحة عجباني اوبشن العربية جدا
بس عايز اعرف رأيكم في العربية و اخد بالي من اية و انا بتفرج عليها
اسعار قطع غيارها كويسة ولا غالية

ياريت بقى لو حد يعمل واجب معايا ويقوللي كل حاجة عن العربية عشان عجباني جدا

[rockeromda]

السلام عليكم
بص انا فيه قرايبي معاهم العربية دي.. هي ممتازة لو هتراعيها ولو حالتها ممتازة انما التكنولوجيا بتاعتها عالية ومش عايزة انها تتهان في ورش ميكانيكية اي كلام
ولازم تبص عليها في التوكيل وتاخد تقرير فني مفصل قبل الشراء لان حاجتها على ما اعتقد مش رخيصة وهي مش بتاعة جري وفرك وكلام ده دي - على حسب معلوماتي - عربية صالون محترمة وسواقة لطيفة
وربنا يوفقك للي فيه الخير
أهم حاجة الكشف عليها في التوكيل علشان لا قدر الله ما تتدبسش

[MohammedAladel]

إكشف فى التوكيل ولو مش هتكشف شوف الحالة العامة من برا الصاج وراشة ولا لا بص ع العتب من تحت وشوف فيه خبطات والسقف نفس الكلام إفتح جميع الأبواب واقفلها شوف هتقفل كويس ولا لا وشوف الجلد بتاع الباب أخباره إيه شوف الأنوار بتاع العربية كلها واطى عالى ورا وقدام وشغل التكييف وشوفه إيه أخباره والعربية واقفة على أقصى سرعة وشغل الكاسيت بتاعها وشوف أخبار السماعات فيها 6 سماعات شغل الموتور شوف صوتها ودوس بنزين جامد وشوف لون العادم اللى طالع سوقها مسافة وعلى سرعات مختلفة وإجرى بيها وشوف سلاسة النقل فى الغيارات وصوت الموتور وإنت سايق وقافل الزجاج عامل إيه وإفتح الكبوت وشوف الموتور نظرة عامة عليه كدا شوف لو فيه تسريب لزيوت أو كدا وإسأل صاحبها عن أدق التفاصيل :) قبل ما تكشف وشغل التكييف وإنت ماشى بالعربية وشوف إيه العربية ماشية كويس ولا لا وفى المطبات شوف برضه لأحسن يكون فيه حاجة فى العفشة مساعد بايظ ولا تعبان مثلا وطبعا حالة الكاوتش اللى فيها كل حاجة من الآخر عشان تقيم العربية وتشوف هتاخدها تصرف عليها قد إيه ولو فيه مشاكل فى المحرك إبعد عنها

[MohammedAladel]

السلام عليكم
بص انا فيه قرايبي معاهم العربية دي.. هي ممتازة لو هتراعيها ولو حالتها ممتازة انما التكنولوجيا بتاعتها عالية ومش عايزة انها تتهان في ورش ميكانيكية اي كلام
ولازم تبص عليها في التوكيل وتاخد تقرير فني مفصل قبل الشراء لان حاجتها على ما اعتقد مش رخيصة وهي مش بتاعة جري وفرك وكلام ده دي - على حسب معلوماتي - عربية صالون محترمة وسواقة لطيفة
وربنا يوفقك للي فيه الخير
أهم حاجة الكشف عليها في التوكيل علشان لا قدر الله ما تتدبسش

قطع غيارها مناسبة وموجودة فى أماكن معينة فعلا هى عربية محتاجة سواقة لطيفة وتجرى بيها عادى بس من غير حرق هتاخد أعلى أداء وثبات ممتاز لكن أنا شايف إن مش هى بس عايزة سواقة لطيفة أى عربية فى فئتها عايزة سواقة لطيفة بل تكاد تكون هى فيها ملامح السيارات الرياضية وعامة أى عربية أوتوماتيك مش بتاع حرق وحرام إنك تهينها بقيادة عنيفة سواء كانت ميجان أو غيرها لكن المانيوال منها أكيد أشد من الأوتو لو واحد بتاع حرق وكدا يعنى والأوتوماتيك معايا زى ما قلت أداؤها مرضى جدا

[osama.m]

الف شكر ليكم يا جماعة
العربية الاوبشن اللي فيها عالي جدا مش عارف لية سعرها واقع كدا و كل لما اسال حد يقوللي هتغلبك

انا غالبا هصرف نظر للأسف عشان احنا بنبهدل العربية معانا فا الميجان مش هتتحمل

الف الف شكر ليكم مرة تانية

[MohammedAladel]

والله إنت محسسنى إنك بتتكلم عن عربية بلاستيك ميجان عربية اعتمادية جدا لكن عامة الفتيس الأوتو مع المحرك ال 1600 مش بتاع حرق لكن لو جبتها مانيوال هيكون عزمها أشد وأعلى من الفتيس الأوتو

[Hegazio]

هههههههه
حلوة بنبهدل العربية و مش حتستحمل ...
صاحبي .. انا العربية قعدت معايا 6 سنين عملت فيهم ربع مليون كيلو .. كنت بسافر بيها شوت واحد من جدة للقاهرة
و باروح بيها شغل في الصعيد و الدلتا و مشيت بيها في دندرة - سمسطا - كوم حمادة ...

و من اقتناعي بيها .. لما بعتها ...( جبت فلوينــــــــــــــــــــــــس )