رحلة 1200 كيلو بميجان .... ومفاجأة من ميجى بعد ستر ربنا أكيد

[figoo2001010]

الزمان: 8-7-2012
المكان: القاهرة - مرسى مطروح - قبل ليبيا بساعتين
السيارة: ميجان 2009
عداد: 53 الف
السرعة: 120 - 160 على حسب الطريق والاضاءة
الحمولة: أنا وزوجتى و أبنى مؤمن والشنط

السلام عليكم,
اول سفر بميجان حتى مطلعتطش بيها اسكندرية وطبعا مستنى أختبر ميجان على الطريق و أعتماديتها .... مضحكش عليكوا كنت لسة خايف منها من كتر كلام الناس عليها مع انى مبسوط بيها جداً.... ولو بفكر أغير مش عارف اركب اية اقل من ضعف الثمن.. حقيقة

المهم المقطع اللى جاى ممكن يجبلى الكلام وممكن شتيمة كمان بس انا أستاهل و محدش بيتعلم ببلاش ...
.... منذ أقل من شهر بدات ملاحظة نقص بالمياة وكنت بزودها كل كام يوم وبمشى عادى جداً.... وبعدين طلعت على التوكيل قالك الردياتير مخروم ..... وعايز يتغير ,,,, كام ياعم,,,,قالك 2000 طبعا من غير مصنعية واعتقد ضرائب .... قولتلوا ماما ..... لانى قبل كدة فى الاوبل حصل معايا نفس الموقف وجبت أنبوبة لحمت بيها بنفسى ب 20 ج وبعتها بعدها بسنتيين و كانت زى الفل ومفيش مشاكل .... المهم قاللى احنا مش بنصلح بنغير بس ... وبعديها نسيت انزل أصلحه او اغيره .... وبعدين قررنا نسافر مطروح والوقت كان ضيق مع كسل الامانة تتقال ..... وقلت العربية ماشية زى الفل أبقى أزود فى الرست مية وشكرا.....

المهم طلعنا حوالى الساعة 3 - 4 وقفنا فى الرست ومبصتش على المياة برضة.... كملنا على طريق العلميين حيث السكون والقلق خصوصا ان واحد صاحبى اتثبت هناك وخدوا العربية :).... قولت هريح فى مرينا ولما وصلت الفروب بدأ يحل قولت هريح فى أول أستراحة عشان امشى فى النور اطول وقت ممكن مع الحرق على العربية وبعدين الدنيا ليلت والطريق لسة 280 ك على مطروح ومش عارف اقف مفيش اى مكان ولا بتاع كوتش اركن عندة الوقت بدا يتاخر والقلق زاد عندى وبقيت احرق على العربية عشان اوصل مطروح المهم وصلنا الحمد لله.... و أول مجيت أبص على المياة ملقيتش مية فى الاربة.......طبعاً اى حد مكانى دماغوا تودى وتجيب .... هى المياة فضيت من من الكيلو كام ... لانى كنت بحط مياة كتير والاربة مش بتتملى وبعد ما تتملى ب 10 دقيق الاربة تفضى ..... بقيت فى حالة رعب .... وقولت هى العربية اصلا كانت ماشية أزاى و الغريب يا رجالة أنى مشلتش عينى من على الحرارة طول الطريق ومزداتش خالص عن المعتاد .... طبعا انا كنت فى هالع انا مش معايا فيرنا هوديها لاى حد هيقلبها توك توك وتمشى ... دى ميجان

المهم طلعت على واحد بتاع ردياتير واتحيل علية يفك الاكصدام بتاع العربية قالى مليش فية روح لميكانيكى يفك وهتلى الردياتير ... دورت على واحد ميكانيكى فكهالى وخد 80 طبعا كتير جدا فى بلد فقيرة جدا .... بس موسم بقى بالنسبة لهم..... ولقينا 3 خروم ادهم لبتاع لحام يلحمهم بقى يلحم مسورة و يبوظ اللى بعدها لما قفشنا مع بعض لانى شايف انوا بيبوظ المهم قالى دة مبقاش نافع أبعت الاسكندرية هات واحد .... طبعا مبقتش عارف اقولة اية .... المهم وديتها لبتاع الردياتير لحمهولى بالانبوبة اللى ب 20 ج برضة :) .... وبعدين سالت الميكانيكى هو ازاى العربية مش بتسخن قالى الاتوماتيك الفتيس بيبرد مع الموتور مقتنعتش بكلاموة لان العربية مزدتش ربع شرطة فى الحرارة .... ربنا سترها و ضاع يومين من الخمس ايام فى العربية ورجعت بيها وكانت زى الفل على 130 ك\س وريحت فى واحة عمر وفطرت هناك عشان العربية تاخد راحتها...


الكنكولوجن من الرحلة :)

مطروح بلد جامدة جدااااااااااااا بس عائلية قووووى و رومانسية مش شبابية لانها بلد على قدها وفقيرة و قوتها فى شواطئها الخلابة وجوها

والقاهرة عبارة عن شكمان ميكروباص ترامكوا

ميجان عربية ثابتة على الطريق جدا مريحة ناعمة اداء ممتاز بس مش رياضية خالص وانا كا رب أسرة مبقتش عايز اكتر من كدة

مطروح مشوار سهل بس ريح مرتيين فى الطريق مش هتحس بية خاصة مع ميجان

محدش يستعبط ويطنش ويسافر 1200 ك بالعربية من غير متكون مفهاش مشاكل


حد يشرحلى اية اللى حصل مع ميجان بعد ستر ربنا !!!!!!!!!!

اه نسيت الردياتير فى صقر قريش 900 ج :)

[yalahwy2010]

حمد الله على السلامة
وان شاء الله تروح وتييجى بالميجى أكتر من مرة بالسلامة
نصيحتى بقى فى الميجان قبل السفر لمسافات طويلة
فيوزات احتياطى
(بالذات الفيوز العمومى.....وتبقى عارف تغيره ازاى)
مفتاح الكارت الإحتياطى يكون معاك
الكشف طبعا على المية والعربية ماتكونش بتشتكى من كويلات أو حساسات
وبكدة تقدر تسافر بيها أى مكان وانت مطمئن
بالنسبة للمية.......انا كانت حصلتلى قبل كدة فى الميجان بتاعتى.......وبعد العديد من التشخيصات الخاطئة....طلع السبب ان فى بوابة بتفتح وقفل على حسب درجة حرارة المية.....الترموستات بتاعت العربية كانت بايظة.....فا إضطريت أفصلها خالص.....بس بقت بتقعد مدة عشان تسخن
الفيوز العمومى بقى.....علق لوحده ......لقيت العربية بتفصل باور وكهربا ....ولو بطلتها ماتدورش تانى......طلع الفيوز العمومى بيفصل ........غيرته ب 50 جنيه عند ناصر الكهربائى اللى فى صقر قريش
الميجان عربية محترمة جدا..........وعمرك ما تلاقى ركوبة زيها بالسعر بتاعها.......تستاهل انك تستحمل أى مشكلة تحصل منها......بس عايزة عناية ومعاملة حسنة......
أنا سافرت بيها شرم مرتين....واسكندرية أكتر من 4 مرات......ومن الزقازيق للقاهرة بتاع 50 مرة..........وعمرها ما عملتها معايا وقصرت معايا
وربنا يسترها علينا جميعا

[lanos2004]

حبيبى مطروح بروحها الصبح اخلص شغلى فى مكدونالدز وارجع بيتنا فى القاهرة فى نفس اليوم
اصلا مطروح قريبه جدااااااااااااااااااااا
لو نتكلم فى مشوار اسوان ماشى
معلش ان لوجى اتدلعت عليك وعملتها معاك

[ecybrarian]

دا انا لو عارف إن في مسمار في العربية مش مظبوط مابروحش بها الشغل، مش سفر...حمدا لله على سلامتك..هو فعلا تبريد الفتيس جزء من دورة التبريد عموما في العربية..وربما لأن الطريق معاك مفتوح العربية ماسخنتش

[ashouhdy]

مطروح قريبة اذاى يعنى ! دة انا فى اسكندرية وبقول مشوار

خد بالك السواقة لوحدك غير وانت معاك اسرة

دى حاجة ودى حاجة تاااااااااااااااااااانية خاااااااالص !

[drmagieed]

طبعا انا كنت فى هالع انا مش معايا فيرنا هوديها لاى حد هيقلبها توك توك وتمشى ... دى ميجان ...
حتي لو كانت بي إم أو مرسيدس ... يجب مراعاة شعور مالكي العربيات التانية خصوصا إن الفرق في السعر مش كبير قوي ... وأؤؤكد لك إن الفيرنا تروح المشوار دة وترجع في نفس اليوم من غير أي مشاكل

[lanos2004]

مطروح قريبة اذاى يعنى ! دة انا فى اسكندرية وبقول مشوار

خد بالك السواقة لوحدك غير وانت معاك اسرة

دى حاجة ودى حاجة تاااااااااااااااااااانية خاااااااالص !

بيكون معايا واحد على الاقل ولو فيه اسرة اخرى 120--انما يبقه معايا اسرتى وامشى 160 وكمان لوجان والله حرام-لوحدى بقفل العداد معايا حد معرفوش اخرى 160
بس انا بحس ان مشوار مطروح دة قريب جدا وبقول مصر صغيرة كدة ليه-المفروض ناخد حته من لبيبا جدعنه منهم على خته من السودان جدعنه برضه ونكبر مصر-

[lanos2004]

طبعا انا كنت فى هالع انا مش معايا فيرنا هوديها لاى حد هيقلبها توك توك وتمشى ... دى ميجان ...
حتي لو كانت بي إم أو مرسيدس ... يجب مراعاة شعور مالكي العربيات التانية خصوصا إن الفرق في السعر مش كبير قوي ... وأؤؤكد لك إن الفيرنا تروح المشوار دة وترجع في نفس اليوم من غير أي مشاكل

الفيرنا توصل جنوب افريقيا بدون مشاكل -مش مطروح
مثلا الحمد لله ونشكرة--بالانوس بمشى بسرعه من 120 الى 220 لمدة ثلاث ساعات ونص متصله وعادى جدا

[ashouhdy]

هو يمكن الراجل يقصد ان الميجان مش فى سهولة صيانة الفيرنا اللى اى حد بيفهم فيها

[ashouhdy]

بيكون معايا واحد على الاقل ولو فيه اسرة اخرى 120--انما يبقه معايا اسرتى وامشى 160 وكمان لوجان والله حرام-لوحدى بقفل العداد معايا حد معرفوش اخرى 160
بس انا بحس ان مشوار مطروح دة قريب جدا وبقول مصر صغيرة كدة ليه-المفروض ناخد حته من لبيبا جدعنه منهم على خته من السودان جدعنه برضه ونكبر مصر-

طب حلو اوى 120 على طريق طولة تقريبا 500 كيلو شوية ! ياراجل يامفترى

[lanos2004]

طب حلو اوى 120 على طريق طولة تقريبا 500 كيلو شوية ! ياراجل يامفترى

هههههههههههههه
معلش انا السواقه عندى درجات وكل سواق بيطلع فى وقته-

[iaibrahim]

بالصدفه سافرت مرسى مطروح الاسبوع الماضى بالميجان 2 اول مره والحقيقه كانت متعه والسفر بها جميل ومريح ومعى شنط والجماعه (4افراد) والسرعه 120-140 (رايح جاى)لانى راجل عجوز وبخاف من الرادار وفعلا لقيناه قبل مدخل مطروح ومعرفش عدينا ازاى !!! لانه كان موقف عربيات كتيره بس عملت مقلب ان الزجاج الامامى يمين حلف ميت يمين ما يطلع (مشكله قديمه) وبقيت اغطيها طول الوقت لان البلد امان حتى رجعت مصر ورحت صقر قريش وغيرت الماتور ب150 جنيه وكل سنه وانتم طيبين

[drmagieed]

والله أنا عارف إنه ما يقصدش ... أنا بس لفت إنتباهه وإنتباه الأعضاء كلهم إن دة منتدي مشترك لجميع العربيات ... والله لو كان كاتب علي الميجان كدة كنت هأقول نفس الكلام ... فأرجو من صاحب الموضوع ألا يفهمني غلط ... وشكرا

[figoo2001010]

والله أنا عارف إنه ما يقصدش ... أنا بس لفت إنتباهه وإنتباه الأعضاء كلهم إن دة منتدي مشترك لجميع العربيات ... والله لو كان كاتب علي الميجان كدة كنت هأقول نفس الكلام ... فأرجو من صاحب الموضوع ألا يفهمني غلط ... وشكرا

يا فندم انا أقصد أن الفيرنا أى حد هيشتغل فيها وهلاقى قطع غيار عند طوب الارض ودية ميزة كبيرة جداً مش عيب. و الفيرنا مش مستنينى عشان اشكر فيها ومميزتها حتى لو امكانيتها قليلة

[figoo2001010]

حبيبى مطروح بروحها الصبح اخلص شغلى فى مكدونالدز وارجع بيتنا فى القاهرة فى نفس اليوم
اصلا مطروح قريبه جدااااااااااااااااااااا
لو نتكلم فى مشوار اسوان ماشى
معلش ان لوجى اتدلعت عليك وعملتها معاك

يعم انت راجل فاست فوود .... وبعدين احنا بنسخن عشان نطلع جنوب أفرقيا مع بعض

دا انا لو عارف إن في مسمار في العربية مش مظبوط مابروحش بها الشغل، مش سفر...حمدا لله على سلامتك..هو فعلا تبريد الفتيس جزء من دورة التبريد عموما في العربية..وربما لأن الطريق معاك مفتوح العربية ماسخنتش

طبعا معاك حق وربنا عدها على خير بس مش مقتنع برضة انها متزدش خالص حتى فى وسط البلد (مطروح) تقصد التبريد دة يلغى دة

بالصدفه سافرت مرسى مطروح الاسبوع الماضى بالميجان 2 اول مره والحقيقه كانت متعه والسفر بها جميل ومريح ومعى شنط والجماعه (4افراد) والسرعه 120-140 (رايح جاى)لانى راجل عجوز وبخاف من الرادار وفعلا لقيناه قبل مدخل مطروح ومعرفش عدينا ازاى !!! لانه كان موقف عربيات كتيره بس عملت مقلب ان الزجاج الامامى يمين حلف ميت يمين ما يطلع (مشكله قديمه) وبقيت اغطيها طول الوقت لان البلد امان حتى رجعت مصر ورحت صقر قريش وغيرت الماتور ب150 جنيه وكل سنه وانتم طيبين

حمد لله على سلامتك وربنا يبركلك فيها