عاجل : انا كشفت علي رينو ميجان وفيها المشاكل دي ........ محتاج رأيكم سريعاً

[t_kha83]

السلام عليكم ورحمة الله وبركاته


أنا كشفت علي عربية رينو ميجان 2007 (مواصفات خليجي) الفئة الثانية (بدون فتحة سقف و مثبت سرعة) - عداد الكيلوميتر 69000 ، فابريكية بالكامل ، عاملة صيانات في التوكيل وخصوصا صيانة الـ60 ألف ، كشفت عليها النهاردة في الميكانيكون العرب و لاقيت فيها المشاكل دي:

1- علبة دريسكسيون ( ممكن امشي بيها كمان 20 ألف كيلو متر وسعرها بالمصناعية 3650 جنية)
2- بطاحة مساعد شمال (مقطوعة تماماً وسعرها 1150 بالمصنعية)
3-قاعدة فتيس (سعرها 315 جنية)
4-مساعد امامي شمال بعد الفك(770 جنية)
5- ترشيح زيت في البداية من المساعدين الخلفيين (لم يسعر عشان لسه في البداية)
6-كوتشة كوبلين خارجي يمين(510 جنية بالمصنعية)
7-كوبلين يمين بعد الفك (لو الوكتشة لم تصلح في ايقاف التلييك - سعر الكوبلن بالمصنعية 2950)
8- عدد 2 جنط خلفي يجب استعدالها (لم يسعر)
9- بلية عجل امامي شمال (750 جنية بالمصنيعة)

- بالنسبة للدهان ، العربية فابريكية مافيشها اي رش

تقريبا اجمالي الاصلاحات 10000 جنية لو هاتتعمل كل مرة واحدة

انا مش عارف احكم علي العربية هل هي حالتها كدة كويسه والحاجات دي بسيطة ، مع ان قطع غيار الميجان طلعت غالية جدا فوق ما كنت متخيل .......... محتاج رأيكم عشان لازم اخد قرار سريعاً ، انا وصلت لمبلغ 67 ألف .... هل دا كتير عليها بالمشاكل اللي فيها ، وهل هافضل ادفع المبالغ الكبيرة دي في المستقبل ........ انا فعلاً محتار

[shawkylotfy]

كتير جدااا عليها العربية تسوا 60 او 58 لو سليمة وعلى العموم ممكن تجيب الحاجات دية استيراد

[t_kha83]

كتير جدااا عليها العربية تسوا 60 او 58 لو سليمة وعلى العموم ممكن تجيب الحاجات دية استيراد

شكراً علي ردك ......... يعني كمان السعر عالي عليها اصلاً ...... الحقيقة انا بقالي كتير بدور ....... ومالقتش السعر اللي هو 60 ألف بالنسبة لموديل 2007 الفئة الثانية ......... يمكن انا مابعرفش ادور كويس ....... انا بدور من علي النت وبروح اشوف العربيات

هي الميزة في العربية دي انا مواصفات خليجي والراجل مهمتم بيها جداً وعملها صيانتها ........ لكني فؤجئت باسعار قطع الغيار والمصنعية ..... وحسيت كمان ان فيها مشاكل كتير ....... هو المهندس اللي هناك قالي دي مشاكل في العفشة لكن العربية كويسه جداً ........

انا مش عارف ......... انا محتار جداً

[Hany Saad]

السلام عليكم ورحمة الله وبركاته


أنا كشفت علي عربية رينو ميجان 2007 (مواصفات خليجي) الفئة الثانية (بدون فتحة سقف و مثبت سرعة) - عداد الكيلوميتر 69000 ، فابريكية بالكامل ، عاملة صيانات في التوكيل وخصوصا صيانة الـ60 ألف ، كشفت عليها النهاردة في الميكانيكون العرب و لاقيت فيها المشاكل دي:

1- علبة دريسكسيون ( ممكن امشي بيها كمان 20 ألف كيلو متر وسعرها بالمصناعية 3650 جنية)
2- بطاحة مساعد شمال (مقطوعة تماماً وسعرها 1150 بالمصنعية)
3-قاعدة فتيس (سعرها 315 جنية)
4-مساعد امامي شمال بعد الفك(770 جنية)
5- ترشيح زيت في البداية من المساعدين الخلفيين (لم يسعر عشان لسه في البداية)
6-كوتشة كوبلين خارجي يمين(510 جنية بالمصنعية)
7-كوبلين يمين بعد الفك (لو الوكتشة لم تصلح في ايقاف التلييك - سعر الكوبلن بالمصنعية 2950)
8- عدد 2 جنط خلفي يجب استعدالها (لم يسعر)
9- بلية عجل امامي شمال (750 جنية بالمصنيعة)

- بالنسبة للدهان ، العربية فابريكية مافيشها اي رش

تقريبا اجمالي الاصلاحات 10000 جنية لو هاتتعمل كل مرة واحدة

انا مش عارف احكم علي العربية هل هي حالتها كدة كويسه والحاجات دي بسيطة ، مع ان قطع غيار الميجان طلعت غالية جدا فوق ما كنت متخيل .......... محتاج رأيكم عشان لازم اخد قرار سريعاً ، انا وصلت لمبلغ 67 ألف .... هل دا كتير عليها بالمشاكل اللي فيها ، وهل هافضل ادفع المبالغ الكبيرة دي في المستقبل ........ انا فعلاً محتار

نصيحة ....بلاش منها!!

[t_kha83]

نصيحة ....بلاش منها!!

طيب ممكن اعرف ايه الاسباب ........ هل لان مشاكلها كتير ، والا لان سعرها غالي ..... والا ممكن تفتح بقها في المستقبل ، والا ايه بالظبط؟ شكراً جداً علي ردك واهتمامك

[Hany Saad]

طيب ممكن اعرف ايه الاسباب ........ هل لان مشاكلها كتير ، والا لان سعرها غالي ..... والا ممكن تفتح بقها في المستقبل ، والا ايه بالظبط؟ شكراً جداً علي ردك واهتمامك

من كمية الأعطال اللى فى الكشف المبدئي ده....(طبعا ما خفى كان أعظم) تقدر تستنج حاجتين

- العربية دى متهانة فى السواقة لأن كل مشاكل العفشة ظهره فيها مرة واحدة و على كيلومتر ميعتبرش عالى.....
- العربية دى مبيتصرفش عليها فى الصيانة خالص ... إزاى يعمل صيانة ٦٠ ألف و ميصلحش كل المشاكل دى أو على الأقل جزء منها.....للأسف حضرتك لو إشتريت العربية دى هتقضى وقتك و تصرف فلوسك على تصليح ما أفسده المالك القديم اللى فى الغالب بيخلص من العربية و مشاكلها

المشاكل دى متراكمة و المالك مكنش بيصرف أو بيعالج أول بأول
على حسب معلوماتى....علبة الدركسيون فى التوكيل ب ١١ ألف جنيه!!!!

إزاى المالك القديم كان بيسوق بكل المشاكل الرهيبة دى......تقريبا العفشة كلها رايحة....طبعا أكيد العفشة هتكون ضيعت الكاوتشً معاها و هتكون عملت مشاكل كبيرة مش هتظهر دلوقتى.......حالة العربية المستعملة تعرفها أكتر من حالة مالكها القديم....لو ركيب و بيصرف على العربية يبقى تشترى و أنت مطمن لكن لو مش ركيب زى الحالة دى و مبيصرفش على العربية يبقى نصحتى ليك:

إنفد بجلدك من العربية دى!!

[drmagieed]

إمال الراجل لو ا بيعملش الصيانات كان هيبقي فيها أية ... واضح إنة مش مهتم بالعربية ... وكمان أسعار قطع الغيار والمصنعيات دي مبالغ فيها قوي يعني بطاحة مساعد ب 1150 جنية والمساعد نفسه 770 جنية ... بلاش منها ودور علي حاجة فايقة وبدل ما تدفع ال 10000 جنية صيانة زود وهات عربية فايقة ووفر مجهودك واللف علي قطع الغيار والتعامل مع التوكيل أو الصنايعية ومشاكلة وقرفة ... وبالتوفيق في الإختيار السليم إن شاء الله

[momo10000]

خدها ب 62 .... دا. الاخر

[Rsarabia]

خدها ب 60 62 زى ما ايمن مومو باشا قالك و ظبط العفشة برة مش هتزيد عن الفين و هتبقى عروسة و سيبك من قطع غيار التوكيل الا فى الحاجات المستهلكة زى البوجيهات و الفلاتر

[abdo_2812]

خدها ب 62 .... دا. الاخر

+111111111

بس بشرط الموتور يكون سليم ومافيهوش الهوا

لكن العفشة مش إشكال احنا شوارعنا زبالة أصلا

[t_kha83]

شكراً جداً علي اهتمامكم وردكم ........... لسه بتفاوض مع صاحبها دعواتكم ....... و انا متأكد ان الميكانيكون العرب مغلي جداً ........... بس اللي عايز اتأكد منه هل الحاجات اللي فوق ممكن تتظبط بـ 2000 فعلاً ....... اصل المبلغ اللي قالوا التوكيل من غير علبة الدركسيون تقريباً 7000 جنية ............ فهل الفرق رهيب كدا مابين بره والتوكيل .........انا عارف ان الناس بتصلح الميجان في صقر قريش ......... لكن معرفش حاجه ومرحتش هناك قبل كدا ........ ياريت لو حد يفيدني اروح لمين ومين كويس هناك ........ اشكركم مرة أخري ,,,,,,,,, وادعولي ان لو فيها خير ربنا ييسرهالي ولو فيها شر ربنا يبعدها عني

[hugan]

اسعار قطع غيار اخر استهبال

[t_kha83]

جوا التوكيل قصدك والا عامة :)

[hany63]

ياباشا اسف في اللفظ صاحب العربيه و لا بلاش
يعني كل اللي كان يعمله زيت و فلتر و مش عايز يطلع مليم و على فكره سواقته زباله و الاهمال في قطع الغيار هيخلي العربيه مش ممكن ترجع زي الاول حتى لو صرفت

[shaddadfalcon1]

كل ده وماشيه 69 لالف كيلو بس؟

وبعدين ايه الكوبلن ابو 3000 جنيه ده؟