بفكر اجيب رينو كليو

[old4art]

السلام عليكم ورحمه الله وبركاته
ازيكم يا محبي الرينو
معروض عليه رينو كليو اللون فضي / زجاج كهرباء /موديل 2004 / 1200 cc / ماشيه 97000 كم
فبريكه بره وجوه السياره مع واحد ضامنه والسياره حالتها محترمه وبتتصين في التوكيل
عاوز فيها 45000 جنيه نهائي
ايه رايكم يا وحوش الرينو هل السعرمناسب ليها ? وهل تنصحوني بيها ? وهل قطع غيارها سعرها معقول ولا غالي مقارنه بالكوري زي دايو لانوس وهيونداي اكسنت .?

[albasha]

الكليو عامةً عربيه ممتازه بالنسبه للفئه بتاعتها
نصيحتي ليك طالما ضامنها إركبها وإمشي بيها وشوف إنطباعك عنها أيه ممكن تعجبك وممكن لأ
لإن كل واحد فينا بيبقي ليه إحتياجات معينه في العربيه في واحد يهمه إستهلاك البنزين واحد يهمه الجري وهكذا..........

[old4art]

السلام عليكم ورحمة الله وبركاته
كل سنه وانت طيب ياباشا
وشكرا علي الاجابه
بس المشكله اني بدفع الي حيلتي في العربيه
ومعنديش استعداد اتدبس في عربيه متعبه ومحتاجه صرف كتير
واتمني من الله يرزقني بعربيه مريحه في كل حاجه ان شاء الله
وعلي العموم انا رايح اجربها بكره الصبح ان شاء الله

[old4art]

السلام عليكم ورحمة الله وبركاته
انا جربت العربيه وجميله ما شاء الله
بس في شوية حاجات مديقاني منها
اول حاجه موضوع التكييف حاسس انه ضعيف
ثاني حاجه موضوع الكاسيت القديم ابو شريط هل ينفع اركب واحد جديد واظبطه
مع دراع التحكم في الطاره واظبطه مع الشاشه الي فوق ولا لا
ثالث حاجه موضوع اني مش عارف فيها حاجه زي اصلحها فين واجيب قطع غيرها فين
المهم بقا مش عارف سعرها كده كويس ولا ايه انا وصلت معاه للاخر ب 44000 جنيه
ايه رايك ?

[benmatar]

السلام عليكم
ربنا يوفقك وتركب عربية كليو نمرة واحد، بصراحة كل الكليو ممتاز سواء 1200 أو 1400
من 3 شهور اشترى زميل في العمل رينو كليو 1400-2008 48000كم جميع الكماليات مانيوال فابريقة كلها بالكامل بتمن 49500ج.م ومجرد عمل صيانات الزيوت والفلاتر بس واشترى 2 كاوتش أمامي والحمد لله تمام معاه
وصديق آخر بيبيع اليومين دول كليو 1200 كحلي فابريقة بالكامل 2003 وعاوز 37000ج.م
بكدة اعتقد إنه عند حضرتك خلفية معقولة شوية عن الاسعار، المهم الحالة طبعا بس اعتقد إن السعر ممكن تتفاوض فيه شوية

[old4art]

السلام عليكم ورحمة الله وبركاته
تسلم ايدك ياباشا
بس عندي سؤال لو عاوز اظبط العربيه اروح مركز خدمه ولا اتعامل مع مكانيكي
وكهرائي بره ولو اروح احد مين وفين وبعدين انا سمعت عن شركه اسمها
الهندسيه او الهندسه بتبيع قطع غيار تعرف اي معلومات عنها

[benmatar]

والله يا فندم أعرف إن في أول المعادي عند صقر قريش من الأوتوستراد أكثر من ورشة متخصصة رينو ومحلات قطع غيار جديد واستيراد ورحت مرة مع صديقي، وعندهم كمبيوتر كمان
وأسمع عن حد كويس في الهرم
أما اللي اتعاملت معاه كتير جدا وأعرفه هو ابراهيم في القومية العربية- امبابة من منزل الدائري متخصص رينو، وجربته في كليو 2001 كانت معايا زمان، وأصدقاء جربوه وبيتعاملو معاه في ميجان ورينو14 وكليو 2003 و2008. شاطر وكويس وأسعاره طبعا معقولة جدا زي أي ورشة وفي المنطقة محل اسمه الطيب بتاع قطع غيار، وفي شارع وادي النيل والسودان في المهندسين محلات قطع غيار وفي العجوزة قطع غيار التوكيل بتتباع، وجنب ابراهيم كهربائي بيشتغل في التوكيل.
وممكن حد من أبطال رينو يدلك على حد كمان

[old4art]

السلام عليكم ورحمة الله وبركاته
متشكرين جدا ياباشا جزاك الله خيرا
بس ممكن طلب رخم اروح ازاي القوميه انت قلت من علي الدائري اتجاه ايه الهرم ولا مدينه نصر وكمان
اروح لابراهيم ازاي ولو له رقم تليفون وشاكرين للرد

[benmatar]

السلام عليكم ورحمة الله وبركاته
متشكرين جدا ياباشا جزاك الله خيرا
بس ممكن طلب رخم اروح ازاي القوميه انت قلت من علي الدائري اتجاه ايه الهرم ولا مدينه نصر وكمان
اروح لابراهيم ازاي ولو له رقم تليفون وشاكرين للرد

شوف يا سيدي أولا رقم ابراهيم 01116097881 كلمه وقوله من طرف الشيخ شريف
ثانيا حضرتك لو خارج من ميدان لبنان مثلا ورايح على الدائري هتطلع أول يمين (اتجاه القومية والوراق والمؤسسة) ونزلة القومية أول نزلة (رسمية) طبعا انت عارف الدائري بقى فيه نزلات رسمي وغير رسمي. المكان معروف وسهل وهو مش بعيد أبدا من الدائري، وبرضه افتكرت إن في المنيل واحد اسمه عبد العزيز جاري معاه ميجان وشكر فيه قبل كده. ربنا يوفقك

[old4art]

السلام عليكم ورحمة الله وبركاته
متشكرين يا فندم علي المعلومات انت كده بتخليني اطمع كمان
وروح مديك العربيه تصلحها وابقي اخدها منك بعد كده : )