انا مصدوم

[kimo1972]

السلام عليكم ورحمة الله وبركاته الاخوة الميجوية
انا كنت والنية لله اشترى ميجان 2 اول الشهر فقلت انزل اسال على اسعار قطع الغيار
عشان الاشاعات اللى بسمعها
وغعلا نزلت النهاردة فرينش موتورز اللى فى الالف مسكن ووصلونى للباشمهندس محمود المسئول
هناك ولسه بساله عن رايه فى الميجان 2 وكانت الصدمة قلى (متشتريهاش)
اه والله فى وشى كده وانا صايم
قطع غيار غالية /عفشة بتتغير كل شوية / جير بوكس مليان مشاكل والخ الخ.......
المهم كملت على الحرفيين وسالت فى كل محل حاطط علامة رينو ولقيت الكلام متشابه الى حد ما
الاختلاف بس ان فى الحرفيين قطع الغيار ارخص وكذا نوع وبلد منشأ
بس بالنسبة للفنيات الكل اتفق ان الميجان بتاكل فى العفشة غير الحاجات الاستهلاكية
واحد من اصحاب المحلات قلى العربية دى لو جبتها تشيل لها شهريا 500 جنيه عشان اخر السنة تعمل الصيانة اللازمة
واحد تانى قلى متجبش اللى الفرنساوى او المانيوال
ايه رايكم يا اصحاب الميجان انا بحب العربية بس مرعوب وعلى فكرة دى اول عربية لى
ردوا على يا جماعة ومعلش اعذرونى لو طولت عليكم
مستنى الردود يا جماعة
ورمضان كريم

[hossam_elwani]

وانا كمان كنت بحبها جدااااااااااا وانبهرت بيها اول مانزلت فى 2005 لكن اتضح نها عربيه مش عمليه ابدا مهما اعتنيت بيها فيها بس للامانه هيا ركوبه بجد

[AhMeD MeTwAlY]

انا كنت حاسس ان العربيه دي فيها مشاكل كتير

[Land_Cruiser]

اعتقد الفلوانس ممكن تبقى اختيار كويس بدل الميجان

[Kefo_Honda]

اعتقد الفلوانس ممكن تبقى اختيار كويس بدل الميجان

الفلوانس نفس الكلام, برضه أنا والدي كان عاوز يجيبها وكل الناس قالت ليه بلاش

[shaddadfalcon1]

حوار العفشه ده قالي عليه صاحب ليا معاه ميجان

قالي هي عربيه تحفه ومفيش عربيه في فئتها هتديك احساس الركوبه بتاعتها بس مش بتاعة مصر دي عايزه طرق نظيفه وناس بتفهم فيها مش الصناعيه بتوعنا

[yalahwy2010]

الميجان مشكلتها أعطالها الاكترونية.........الحساسات والفيوزات والحاجات دى
لكن موضوع العفشة ....هى مش عيب فيها..........العيب فى الطرق بتاعتنا.......لكن مش للدرجادى انك محتاج تغيرها كل شوية
تانى حاجة الفلوانس فعلا فرق كبير جدا جدا...............تقريبا عالجت جميع المشاكل اللى فى الميجان
واللى اشترى الفلوانس ولسة فى الضمان.........لغاية دلوقتى ما سمعناش ان فى حد اشتكى من العفشة او الحساسات والكلام ده
الفرنساوى ما يفرقش غير فى التقفيل بس............لكن نفس نوعسة قطع الغيار

[Land_Cruiser]

الفلوانس نفس الكلام, برضه أنا والدي كان عاوز يجيبها وكل الناس قالت ليه بلاش

لَا يا فندم اسمح لى اختلف مع حضرتك لأن الفلوانس حاجه تانيه خالص و يمكن المشكله اللى كانت بتواجه الناس كانت طرمبه البنزين و دى كانت بتتغير فى الضمان و ان تكييفها ضعيف شويه زى معظم الاوروبى لكن محدش اشتكى من حساسات او اى مشاكل تانيه من اللى كانت بتظهر فى الميجان و لا عمرى شفتها مرفوعة على ونش مثلا زى ما كان بيحصل فى الميجان. هى الناس عامه لا تقبل على السيارات الفرنساوى فى مصر علشان جرى العرف انها بتبقى معقده فى صيانتها و مش مناسبه للطرق عندنا لكن الفلوانس بتكسر القاعده دى و الدليل انها اصبحت منتشره فى شوارعنا

[MohammedAladel]

كلام مش سليم الميجان عربية كويسة جدا اشترتها مستعملة وعايزة صيانات ولسة معملتهاش وماشية بقالها 5 آلاف كيلو الحمد لله ما أشتكتش الناس بتكبر المواضيع ع الفاضى

[S O P H O S]

الميجان عربية جميلة اوي وبصراحة ركوبة ممتازة
بس يمكن هي متعملتش علشان مصر والناس الي بتفتي فمصر فالتصليح
مجرد راي ..

[ahmad--ezzat]

واحد صحبى معاه ميجان 2006
كان جايبها زيرو
دايما يقولى انه اول كما جبها كان طاير بيها من الفرحه مكنتش اعرف انها هتبهدلنى كده

انا عن نفسى بفضل السيتروين عنها جدا

[waelfarid]

اهو كله عجل فرنساوي
ولولا اختلاف الاذواق لبارت السلع

[McLaren2012]

لَا يا فندم اسمح لى اختلف مع حضرتك لأن الفلوانس حاجه تانيه خالص و يمكن المشكله اللى كانت بتواجه الناس كانت طرمبه البنزين و دى كانت بتتغير فى الضمان و ان تكييفها ضعيف شويه زى معظم الاوروبى لكن محدش اشتكى من حساسات او اى مشاكل تانيه من اللى كانت بتظهر فى الميجان و لا عمرى شفتها مرفوعة على ونش مثلا زى ما كان بيحصل فى الميجان. هى الناس عامه لا تقبل على السيارات الفرنساوى فى مصر علشان جرى العرف انها بتبقى معقده فى صيانتها و مش مناسبه للطرق عندنا لكن الفلوانس بتكسر القاعده دى و الدليل انها اصبحت منتشره فى شوارعنا

لكن هل الكلام ده ينطبق على الميجان 3 الجديدة اللى بيقولوا عليها النسخة الهاتش باك من الفلوينس و لا فيها نفس مشاكل الميجان 2 اللى بتناقشوها دلوقت...يا ريت يا جماعة حد ينصحنى عشان إن شاء الله ناوى أجيبها فلو فيها نفس المشاكل بلاش منها خالص

[scraper2012]

والله أنا ماشوفتش عربية في الجودة و الكفاءة والفخامة و الراحة ديت بالسعر ده خالص ... بجد متعة في السواقة و حتحببك فيها بس تكون حالتها كويسة ....

[ramyragimaher]

بالنسبة للميجان 3 زي الفل وجميلة واحسن واقوي من ال 2 في العفشة بس ال 2 انعم ولا مشاكل في ال3 انا راكب الاتنين عشان كدة بحكم ودي نمرتي للاستفسار01003334647