التكييف في الميجان

[wfewfe]

السلام عليكم
التكييف عندي كان بيشتغل نص ساعه كويس ويقلب ساخن جدا لدرجه لا تطاق فكنت بقفله. رحت لواحد بتاع تكيفات قالي الفريون ناقص وعاوزين نشحن، قلتله اشحن الحقيقه معدتش بيقلب ساخن تاني بس لسه برضه مش تكييف متميز، شغال عادي. الراجل اقترح على نقفل الوصله بتاعة السخن في التكييف بحيث يشتغل بارد فقط وده هيخلي كفاءة التكييف ممتازه. فإيه رأيكم ؟ هل أخليه يقفل السخن زي ما بيقول؟ وهل فيه ضرر على العربيه؟ ولو تعرفوا حد متخصص أروحله قريب من مدينة نصر يبقى جزاكم الله خيرا. في انتظار كريم ردكم.
وائل

[Ramy_Tantawi]

يا استاذ وائل حضرتك بتتكلم عن ميجان 1 ولا 2.

ولو ميجان 2 هل المكيف عند حضرتك عادي ولا اوتوماتيك وتاتش ؟

[momo10000]

لا يصح الا الصحيح

روح للمقطم واسئل علي احمد عاشور هو فاهم جدا جدا في تكييف الميجان

[farahat]

شكلها كدة ميجان I ، عشان ميجان Ii التكيف السخن بتاعها مش بوصلة مياه سخنة لأ ده سخان حراري يعني بالكهربا (معلومة من كتالوجات العربية ) ؟؟

[kimo]

لو العربية التدفئة فيها بواسطة خراطيم المياة الساخنة ممكن متلغيش الوصلة ولا حاجة لان ممكن تحتاجها فى الشتاء وفى الحالة دى الافضل تفك حاجة اسمها solenoid valve وتنظفة كويس لانة ممكن ميكونش قافل كويس

[fahd_628]

فعلا هية ميجان 1 ولا 2

و لو 2 تكييف ديجيتال ولا اوتوماتيك ؟

[wfewfe]

ميجان Ii 2005

السلام عليكم
شكرا لاهتمامكم وآسف لتأخر الرد لأني كنت مسافر بورسعيد.
العربيه ميجان 2 موديل 2005 والتكييف تاتش أوتوماتيك. على فكره العربيه عملت معايا نفس الموقف ده تاني، بس لاحظت حاجه، لما شغلت لفتره حرارة العربيه ارتفعت قوي لدرجة حسيت بالحراره جايه من المحرك عند رجلي، بصيت على العداد لقيته عند آخر 3 شرط (عند أو علامه في الثلاثه) عادة بييجي لغاية ما قبل النصف ويثبت على ذلك. فتقريبا لما العريبه بتسخن قوي كده التكييف مبيقدرش يعمل حاجه وبيجيب ساخن هو كمان. فصلت التكييف خمس دقائق رجع عداد حرارة المحرك لوضعه الطبيعي قبل المنتصف، شغلت التكييف بعدها اشتغل كويس!!
واضح ان التكييف مينفعش يشتغل اكتر من نص ساعه ويسخن ولازم افصله عشان حراره العربيه وبعدين اشغله تاني. بس اكيد كده مش طبيعي.
بصيت على الميه، لقيت قربه مياه التبريد مليانه على آخرها. فمش عارف ايه الحل؟

[Sharky]

إللى بيحصل عندك دا غير طبيعى
لازم تروح التوكيل و هو حيحللك المشكلة

[megane_man]

شوف مروحة التبريد متهيالي العيب منها لأنها بتبقي سرعتين السرعة الثانية بتشتفل مع التكييف علشان العربية متسخنش

[Ahmed Selim]

شوف مروحة التبريد متهيالي العيب منها لأنها بتبقي سرعتين السرعة الثانية بتشتفل مع التكييف علشان العربية متسخنش

+111111

كلام صحيح 100%

روح التوكيل و متخليش حد من بره يلعب فى العربية

[Ramy_Tantawi]

السلام عليكم.
زي ما استاذ volvo_man واحمد باشا قالوا بالظبط انا اعتقد فعلاً المشكله في السرعه التانيه للمروحه وعموماً للتجربه قبل ماتروح للتوكيل مش اكتر حضرتك افتح الكبوت وركز مع صوت المروحه شويه اول ما تشغل التكيف هتلاقي المروحه صوتها علي ده اذا كان المروحه شغاله اصلاً لو المروحه كانت مش شغاله هتلاقيها اشتغلت سيب التكيف شغال 3 دقائق وانت واقف جنب الكبوت وركز مع الصوت لو المروحه صوتها ماعليش يبقى المشكله في السرعه التانيه وان شاء الله تطلع مشكله بسيطه فيوز او حاجه كده ان شاء الله ماتكونش حاجه كبيره.

الرغي ده بس للتأكد من العيب مش اكتر وزيارة التوكيل او مركز خدمه معتمد واجب لعلاج المشكله ان شاء الله بلاش حد يلعب فيها غير دول وان شاء الله خير.

[fahd_628]

ياريت تبقى تقولنا الأخبار

[wfewfe]

شكرا ليكم يا جماعه

شكرا لاهتمامكم وان شاء الله هروح التوكيل قريب وابقى اقولكم الاخبار.

طلب أخير، محدش يعرف مركز خدمه معتمد بيشتغل مساءا لأن شغلي يوميا لغاية الساعه 6 بدل ما استئذن من الشغل واروح. عموما لو مفيش هبقى استأذن في يوم وأروح.
والسلام عليكم
وائل

[Ahmed Selim]

عندك السبت أجازة ؟

ممكن تروح الميكانيكيون العرب بيفتحوا من 9 الى 5 مساءً
فى طريق السندباد

[wfewfe]

لا

حتى السبت مش أجازه.