حبيتهـا ، وعشقتها .. بس خايف منها !!

[simo4ever]

السلام عليكم ورحمه الله تعالى وبركاته


وحـوش الميجــان .. يارب تكـونوا بخير دايماً إن شاء الله .. زى مأنا كاتب في رأس الموضوع .. أنـا حبيت وعشقت الميجان بسبب الاعضاء الكرام اللى هنا وكلامهم عليها وتقريباً انا الفترة اللى فاتت دى كلها - حوالى سنتين - قريت كل المواضيع الخاصة بيها في المنتدى .. و كنت بجيب معلومات عنها ع النت .. وكمان كنت كتبت موضوع هنا في القسم وكانت اول مرة اكتب فيها موضوع وكان اسمه " مالكى الاسطورة ميجان " على ما أظن يعنى ... المهم ... انا مههوس بالعربيات وفعلا الميجان دى جننتنـى بجد !! .. وكنت بحلم في يوم من الأيام أن اقدر اقنع أبويا واخليه يجيبها .. بس كنت عارف انى مش هقدر ولكـن بالدصفة البحتـه ، لقيت ابويا من كام يوم بيقولى ، عاوزين نجيب عربية !!!
استغربت اوى .. قولت يمكن بيقول نكتة ولا حاجه ، قولتله تانى كدة يا حاج ، قولت ايه معلش ؟ قالى يابنى عاوزين نجيب عربية على اللى معانا دى -- احنا عندنا فيات 131 ايطالى 1600 سى سى موديل 79 -- ،، فروح شوفلنا على البتاع اللى بتقعد عليه دة -- الكمبيوتر يعنى :d --
عربية تكون كويسة .. انا الكلمة دخلت ودانى ، عملتلى أزبهلال :d انا ما صدقت ساعتها .. روحت فاتح الكمبيوتر .. ودخلت وريته شوية عربيات مستعملة كدة .. واقتنع بكام واحده كدة ، و وريته الميجان ، واقنعته بيها الحمد لله .. المشكلة بقا انى لما كنت بقرأ في المنتدى هنا ، كنت بلاقى كمية اعطال للميجان .. حاجات غريبة يعنى .. كل يومين تلاته كدة واحد يقول حاجه حصلتله في الكهربا ، ايشى الكارت معلق ،، والرسايل اللى بتطلع للناس ،، واللى يجى يدور العربية متدورش معاه !! و غيره وغيره .. بس مسمعتش حد اشتكى مثلا من الميجان الهاتش باك ،، اللى احنا اصلا عاوزين نجيبها .. فهل علشان دى فرنساوى والتانية تركى ، ولا علشان محدش جايبها كتير ،، ولا دة ملوش علاقة ... فهو دة بس اللى مخوفنى .. وكمان انا ساكن في زهراء المعادى - مدينة بيتشو امريكان ... فا معنديش مشكلة في الصيانة وكدة .. صقر قريش جمبى بـ 10 دقايق يعنى .. و حاولت اجمع اسعار قطع الغيار والحمد لله هنقدر عليها ، بس الخوف من الأعطال الكتيرة دى ... انا عارف ان في ناس هتقولى انت لو حافظت عليها مش هيحصلها حاجه .. بس اكيد الناس اللى بتشتكى دى مكانتش بتفترى ع العربية .. دى حاجه بتظهرلهم فجأة كدة !! يعنى انا بقول بالسعر دة ممكن نجيب صنى ولا تيدا ولا لانسر بطة وفى عربيات كتير في الرينج دة ... واريح دماغى من الأعطال والمصاريف الكتير وكدة ... فسؤالى بقى .. هل برضو الهاتش باك فيها نفس الكلام بتاع الأعطال وكدة ؟ وهل الفتيس بتاعها فيه نفس العضة او الصوت اللى في موديلات 2005 السيدان .. ؟

واسف على الاطالة ، وجعت دماغكوا معلش :d
أرجو الرد بأمانة يا جماعه ، علشان بجد والله هتجنن واجيبها ..

تحيــاتى للجميع ..

[simo4ever]

مـا شـاء الله ،، كومنـتات كتير أوى :d

إيه يا وحــوش !! دة أنا كدة أتصدمت فيكم :d

طب اللى عارف أى حاجه يقول ،، أنـا خلاص مقبـل على الشــراء ، ومحتاج مساعدة فعلاً !!

[m7mdwagih]

بص يا ريس انا بعت عربيتي علشان اجيب ميجان و فضلت خايف برضة بعدين قلت هجيب و خلاص و في اسواء الظروف هابيعها لو قرفتني المهم جبتها من شهر كدا و مبسوط بيها الحمد لله و ربنا يكرمك بللي فية الخير ان شاء الله

[MohammedAladel]

العربية لو حالتها حلوة هتحبها بجد أنا فرحان جدا بيها بصراحة وحاسس إنها أعلى من أى عربية فى فئتها

وكمان لما بتعامل معاها فى حاجة بايظة أفكها وأركبها وأشوف دقة التصنيع وكدا بيزيد إعجابى بيها

فلو حالتها حلوة وأنا متأكد إن سعرها هيبقى رخيص عليها لأنها عربية بجد محترمة كفاية شكلها

دوس فيها بقلب جامد وياريت تقرأ المواضيع اللى هنا فى القسم عنها ودور وخد راحتك عشان تطمن أكتر

قطع الغيار متوفرة فى أماكن معينة وأسعارها كويسة برضه

[figoo2001010]

بقالى سبع شهور لحد دلوقتى زى الفل :-)

[MohammedAladel]

وبعدين متنساش يا باشا إن دا منتدى عليه مالكين كتير لميجان فطبيعى إنك تلاقى أعطال هى مش عربية برضه وحاجة بتتحرك وليها أعطال

أدخل أى قسم هتلاقى لأى عربية أعطال

بالنسبة للرسايل بتبقى حاجات بسيطة مثلا كويل بايظ شريط إيرباج مقطوع حساس أوكسجين كدا يعنى

ولكن توتال هى عربية اعتمادية جدا

[Ahmed Selim]

بص يا برنس...............أولاً أنت أسلوبك فى الكتابة بسم الله ما شاء الله :)

ثانياً..........الميجان سابقة الكتير من العربيات فى كذا حاجة...............منها أنها بتطلع رسايل الأعطال على الشاشة و دى حاجة كويسة مش وحشة..............بتعرف بيها مشكلة العربية أيه.

ثانياً الميجان السيدان و الهاتش زى بعض...............مفيش فرق.

طبيعي أنك تلاقى أعطال فى الميجان لكذا سبب
1- معظم اللى عندهم مشاكل كتير فى العربية لسه شارينها قريب و غالباً هتلاقي العربية مش مكشوف عليها صح فى مكان ثقة.............أو فيه شغل أتعمل على الشاري.
2- العربية من 2005 يعنى بقالها 7 سنين شغالة......طبيعي برضه.
3- فيه ناس بطبيعتها مش بتهتم بصيانة العربية...........و طبيعي يحصل مشاكل.

هى فى المجمل عربية كويسة.......بس محتاجة عناية و محتاجة حالة كويسة و كشف كويس.

دور على موضوع كنت كاتبه أنا زمان تقريباً أسمه " كيف تشتري ميجان 2 مستعملة"
هتلاقي فيه شوية حاجات تاخد بالك منها............أهمهم على الإطلاق في رأيي أنك تسأل صاحب العربية أنت بتعمل صيانة فين...........لو قالك توكيل المقطم يبقى تفحصها فى توكيل العبور و العكس صحيح............و لو قالك مش بعمل صيانة فى التوكيل قدامك حل من أتنين الأول أنك بعد معاينتك أنت للعربية تطلب تروح تكشف فى التوكيل و لو أعترض يبقى بلاش من العربية دى.
التاني أنك تبعد عن العربية خصوصاً لو موديل عالي 2008 فيما فوق...........لأنه غالباً هتلاقيه مش بيعمل صيانة فى التوكيل و بيعملها برة أسترخاص و متضمنش ممكن يكون فيها أيه.

و أى أستفسارات إن شاء الله هتلاقى الوحوش موجودين.............بس بلاش أستعجال :)

و متنساش الإستخارة.

[تامر.محمد]

انا مش عايز اصدمك , بس غالبا الوالد هايسأل اي صنايعي , ميكانيكي , كهربائي , سواق , تاجر , او اي حد مش مالكها و هايخوفه منها

[MohammedAladel]

انا مش عايز اصدمك , بس غالبا الوالد هايسأل اي صنايعي , ميكانيكي , كهربائي , سواق , تاجر , او اي حد مش مالكها و هايخوفه منها

+ بعض ملاكها وخصوصا اللى جابها مستعملة استرخاص لتمنها :)

[MohammedAladel]

وهو غالبا اللى بيقول مشكلة مش بيقول سيدان ولا هاتش باك
بالنسبة لنقطة التركى والفرنسى دى أنا مركبتش التجميع الفرنسى بس حاسس إن التجميع الفرنسى هيبقى أنضف فى حاجات

زى صناعة الفوانيس مثلا وزى القطع الفبر اللى جوا العربية زى الحتت اللى بتمسك الستاير وهيبقى أنضف فى الفرش كخامة والتابلوه كخامة برضه والسقف أيضا وهى كدا والله جميلة وأحسن من غيرها كتير لكن أنا بقول ممكن يكون التجميع الفرنسى خامات أفضل بفارق قليل والله أعلم

أنا بقول انى متهيقلى يعنى ولكن مش متأكد

الحاجات اللى مصنوعة تركى فى العربية اللى لاحظتها حتى الآن ضفاير وسلوك الكهرباء و الفوانيس الجنوط الاسبور
المرايات مثلا صناعة هولندى
الكاسيت صناعة فرنسى ولمحرك والشاسيه والله أعلم
الكونترولات صناعة بوش الألمانية
وهتلاقى الأضاءة ونظام الإيرباج وكذا حاجة كدا فى العربية عاملاهم شركة فاليو
ونظام التشغيل والإيموبليزر والرشاشات عاملاهم شركة سيمنس

ممكن تكون مثلا البطارية اللى بتنزل فى الفرنسى نوع أفضل من اللى بتنزل فى التركى وجايز يكون بيركبولها بطارية هنا فى مصر والله أعلم

[simo4ever]

بص يا ريس انا بعت عربيتي علشان اجيب ميجان و فضلت خايف برضة بعدين قلت هجيب و خلاص و في اسواء الظروف هابيعها لو قرفتني المهم جبتها من شهر كدا و مبسوط بيها الحمد لله و ربنا يكرمك بللي فية الخير ان شاء الله

الحمد لله ،، ربنـا يبشرك يا استاذ محمد ،، ويكرمك ويباركلك فيها إن شاء الله
شكراً على المشاركة يا فندم ،، تحيـاتى ..،.

العربية لو حالتها حلوة هتحبها بجد أنا فرحان جدا بيها بصراحة وحاسس إنها أعلى من أى عربية فى فئتها

وكمان لما بتعامل معاها فى حاجة بايظة أفكها وأركبها وأشوف دقة التصنيع وكدا بيزيد إعجابى بيها

فلو حالتها حلوة وأنا متأكد إن سعرها هيبقى رخيص عليها لأنها عربية بجد محترمة كفاية شكلها

دوس فيها بقلب جامد وياريت تقرأ المواضيع اللى هنا فى القسم عنها ودور وخد راحتك عشان تطمن أكتر

قطع الغيار متوفرة فى أماكن معينة وأسعارها كويسة برضه

ربنـا يباركلك فيها ويكفيك شرهـا ،، أنا عارف أنى هيطلع عينـى لحد ما ألاقى حالة نضيفة - أكمنها هاتش باك كمان - فصعب شويتين ،، بس إن شاء الله خير .. وأنا على فكرة تقريباً قرأت بنسبـة 95 % من المواضيع اللى موجودة هنا عنها .. تقريباً كان أكتر قسم بخش أقرأ فيه مواضيع عامـة وعن الميجـان خاصـة .. علشان كدة أنـا هتجنن عليها :d
وشكراً يا فندم لمتابعتك .. و جزالك الله خير .. تحــياتى .،.

بقالى سبع شهور لحد دلوقتى زى الفل :-)

طب كويس الحمد لله ،، ربنا يديلك خيرها ويكفيك شرها إن شاء الله ...
أنـا عاوز الناس تدينـى ثقة كدة :d
لحسن خلاص أنا على أخرى من حوار الأعطال بتاعتها دى ..
وشكراً على متابعتك يا فندم .. وتحيـاتى .،.

وبعدين متنساش يا باشا إن دا منتدى عليه مالكين كتير لميجان فطبيعى إنك تلاقى أعطال هى مش عربية برضه وحاجة بتتحرك وليها أعطال

أدخل أى قسم هتلاقى لأى عربية أعطال

بالنسبة للرسايل بتبقى حاجات بسيطة مثلا كويل بايظ شريط إيرباج مقطوع حساس أوكسجين كدا يعنى

ولكن توتال هى عربية اعتمادية جدا

مأهو أنـا اللى مخوفنـى يا فندمـ ، إن مثلا الأعطال دى تتسبب في عطل العربية ، يعنى متدورش ومعرفش أمشى بيها وأنا في سفر أو أى مكان مفيهوش ميكانيكيـة ليها او كهربائيـة ... دة بس كل قلقـى .. لكن أن عارف انها عربية كويسة جداً جداً ، ولا غبار عليها من ناحية كل حاجه...

بص يا برنس...............أولاً أنت أسلوبك فى الكتابة بسم الله ما شاء الله :)

ثانياً..........الميجان سابقة الكتير من العربيات فى كذا حاجة...............منها أنها بتطلع رسايل الأعطال على الشاشة و دى حاجة كويسة مش وحشة..............بتعرف بيها مشكلة العربية أيه.

ثانياً الميجان السيدان و الهاتش زى بعض...............مفيش فرق.

طبيعي أنك تلاقى أعطال فى الميجان لكذا سبب
1- معظم اللى عندهم مشاكل كتير فى العربية لسه شارينها قريب و غالباً هتلاقي العربية مش مكشوف عليها صح فى مكان ثقة.............أو فيه شغل أتعمل على الشاري.
2- العربية من 2005 يعنى بقالها 7 سنين شغالة......طبيعي برضه.
3- فيه ناس بطبيعتها مش بتهتم بصيانة العربية...........و طبيعي يحصل مشاكل.

هى فى المجمل عربية كويسة.......بس محتاجة عناية و محتاجة حالة كويسة و كشف كويس.

دور على موضوع كنت كاتبه أنا زمان تقريباً أسمه " كيف تشتري ميجان 2 مستعملة"
هتلاقي فيه شوية حاجات تاخد بالك منها............أهمهم على الإطلاق في رأيي أنك تسأل صاحب العربية أنت بتعمل صيانة فين...........لو قالك توكيل المقطم يبقى تفحصها فى توكيل العبور و العكس صحيح............و لو قالك مش بعمل صيانة فى التوكيل قدامك حل من أتنين الأول أنك بعد معاينتك أنت للعربية تطلب تروح تكشف فى التوكيل و لو أعترض يبقى بلاش من العربية دى.
التاني أنك تبعد عن العربية خصوصاً لو موديل عالي 2008 فيما فوق...........لأنه غالباً هتلاقيه مش بيعمل صيانة فى التوكيل و بيعملها برة أسترخاص و متضمنش ممكن يكون فيها أيه.

و أى أستفسارات إن شاء الله هتلاقى الوحوش موجودين.............بس بلاش أستعجال :)

و متنساش الإستخارة.

ربنـا يخليك يا فندم ، وشكراً على ذوقك :))
أنـا بس اللى مخوفنـى زى ما قولت لحضرتك موضوع الرسايل دة ، مش عارف ممكن يخلى العربية توقف و متدورش وكدة ، وادوخ بيها ،، لكن انا عارف ان العربية كويسة من حيث كل حاجه لو قارنها بنفس الفئة بتاعتها ... وإن شاء الله ربنا يكرمنى بحاجه كويسة ،، واوجع دماغكوا بقا :d
متشكر جداً لردك ومتابعتك ،، وعلى نصايحك الجميلة ،، و تحيـاتى .،.

انا مش عايز اصدمك , بس غالبا الوالد هايسأل اي صنايعي , ميكانيكي , كهربائي , سواق , تاجر , او اي حد مش مالكها و هايخوفه منها

هو أوريدى قبل ماهو يسأل أنا كنت سئلت في الموضوع دة :d الميكانيكـى والكهربائى اللى أنا بروحلهم دايماً ،، الـ 2 بنفس الكلام برضو ، اول ما اجيبلهم سيرة الرينو عموماً " اوعى يا باشا ، قطع غيارها غالية ، و صاجها ورق ، وعربيات أى كلام !! " ،، عموماً انا مش بحب أخود برأى أى حد ، غير لما يكون مالك ليها ، علشان أعرف أخود قرار ..
وشكراً على ردك يا فندم .. تحيـاتى

+ بعض ملاكها وخصوصا اللى جابها مستعملة استرخاص لتمنها :)

كلام حضرتك مظبوط جداً ... طيب سؤال معلش ، الهاتش باك موديل 2005-2006 .. وطبعاً نضيفة ومتاحفظ عليها ،، تعملها في حدود كام ؟

[MohammedAladel]

الأسعار مقدرش أفيدك قوى الهاتش باك أقل من السيدان بشكل ملحوظ جدا هتلاقى سعرها يزيد شوية عن السيدان

أدخل على كونتاكت كارز شوف الأسعار كدا خد فكرة مش أكتر وأدخل على مواقع السيارات المستعملة وشوف برضه

وبعدين بتختلف لو كانت مانيوال أو أوتوماتيك الفئة بتعتها عادية بفرش قماش أو هاى لاين بفرش جلد وتكييف تاتش أو هاى لاين بفرش جلد وتكييف تاتش وفتحة سقف بانوراما بس هى لو حالتها حلوة هاى لاين بانوراما
حاجة وستين ممكن تدخل فى سبعين كمان لو بانوراما وحالة نضيفة ويمكن تزيد أو تقل والله أعلى وأعلم

نصيحة لو بتحب المانيوال خليك فيه بس هتلاقيه قليل برضه أكتشفت أن المانيوال فى أى عربية أحسن من الأوتو دا بالنسبة لى يعنى :)