اين تقييم الوجان ؟؟؟

[eng.khater]

السلام عليكم
الي كل مالكي رينو لوجان فين التقييم و اداء السيارة رجاء الافادة ؟؟؟؟

[hesham_tawfiq]

اسمحلى انا ارد عليك يا استاذ تيتو
انا احب ابتدى بالمميزات اولا العربيه فى منتهى الراحه والوسع جوه الصالون والكراسى مريحه جدا سواء بالنسبه للركاب ورا او السائق.عزل الصوت فى العربيه رائع جدا بمجرد ماتقفل الشباك مبتحسش بحاجه خالص.الشنطه واسعه جداااااااااااااااااا
العربيه ناعمه جدا فى سواقتها والماتور جيد جدا خصوصا بعد اول 2000 كيلو حسيت انوالعربيه فاقت جدا عكس اول مااشتريتها والبركه فى الاخوه هنا فى المنتدى هما اللى نبهونى لكده.العربيه موفره جدا فى استهلاك البنزين ( بعمل 14 كيلو فى اللتر ) , العفشه كويسه جدا جدا والعربيه عللوها عن الارض معقول جدا. بالنسبه للثبات انا شايفه معقول جدا بس فى الحقيقه انا مبجريش بالعربيه عشان اعرف هى بتعوم ولا لا ( اعلى سرعه وصلتلها 140 على طريق السخنه القطاميه ومحستش ان العربيه عامت منى ).صاج العربيه كويس جدا.
بالنسبه للعيوب
تكييفها مش قوى يعنى لو شغلته على اول سرعه اللى فى الكرسى اللى ورا مبيحسش بيه وبحس انو بيخنق الموتور اوى وسحبها بيقل بسرعه بس بتجمع نفسها تانى مع الوقت.
السى دى بلاير بيهنج على طول ( بس مسش عارف دا عيب عام ولا عندى انا بس ) والابواب تحس انها ناشفه فى الفتح والقفل زائد المقابض انا حاسسهاا ضعيفه شويه.السواق يشوف ابعاد العربيه قدامه حلو اوى انما ميشوفش ابعادالشنطه فى المرايه اللى فالصالون ودى مشكله فى الركنه ولازم تعتمد على مرايات الجنب او السايس مثلا عشان تركن بضهرك . قطع غيار العربيه غاليه شويه بسيطه بس انا اسمع انها معمره وربنا مايحوجنا لقطع غيارها :-)
واخر عيب شكل العربيه مش ممتاز بس انا ميهمنيش الشكل ودى طبعا مسالة اذواق
وفى الاخر اتمنى من كل الاخوه اصحاب العربيه يشركونا معاهم بخبرتهم لان انا من وجهة نظرى المتواضعه جدا والشخصيه العربيه دى فعلا كويسه جدا ومش غاليه على تمنها خالص

[semihuman]

طيب يا دكتور هشام عندي حبه اسأله
1-هل حضرتك سوقت هيونداي فيرنا قبل كده؟
تقدر تقارن بين مستوي نعومه الفيرنا و اللوجان؟

2-موضوع التكيف هل بيفرق في السحب بطريقه كبيره او مزعجه؟
و العربيه بتجمع تاني معناها كانك مش مشغل التكيف و لابردو بتحس ان التكييف بيأثر


3-حسب كلامك هي كانها مابتسحبش بنزين خالص
لان مثلا الفيرنا بتسحب لكل لتر تمشي 10 كيلو دي حاجه تفرح
ياريت تشاركنا برايك بانتظار ردودك

[hesham_tawfiq]

فى الحقيقه انا المره الوحيده اللى سقت فيها فيرنا كانت لمدة ربع ساعه بس فمش هقدر اقارن بين نعومة سحب الموتور بين الاتنين انما اللى انا متاكد منه ان مستوى الراحه فى اللوجان احسن واريح من الفيرنا
بالنسبه لموضوع التكييف هو اول ما بشغله بحس ان العربيه موتورها هبط اداءه بشكل ملحوظ لكن بترجع تجمع تانى سرعتها وسحبها . هو الموضوع مش بالدرجه اللى مسببالى ازعاج خصوصا انى مش عارف دا فى الحدود العاديه ولا لا ( كان معايا 128 فمش عارف التكييف مؤثر لاى درجه على الموتور وان كان كل اللى جرب العربيه قاللى دا طبيعى ) ولكن زى ماقلت الموضوع مش بدرجه الازعاج اللى تخللينى اقلق من العربيه لان فى خلال تلت اربع دقايق بتجمع سرعتها تانى بس هو اكبر ميزتين فى العربيه دى الراحه واستهلاك البنزين المعقول جدا

[semihuman]

اانا لازم اشكرك علي اهتمامك و ردك علي الرد علي اسئلتنا
مشكور جدا
حسب كلامك موضوع استهلاك البنزين ده جميل قوووووي بجد الواحد كل يوم يسمع
ان البنزين غلي و ربنا يستر فموضوع استهلاك البنزين ده مهم جدا

[semihuman]

مستنين مشاركات جديده من ملاك جدد

[eng.khater]

اشكركم علي الافادة و اشكر دكتور هشام علي المعلومات القيمة و ربنا يباركلك في العربية ويكفيك شرها و فعلا استهلاك البنزين دا شي مهم جدا لا ئن ثمن العربية بيدفع مرة واحدة و لكن البنزين دا بتتفعة كل يوم بس انا ليا سوال اخبار الحرارة اية العربية في الجو الحرة دا مؤشر الحرار عامل اية
و منتظرين المزيد من التقييم

[hesham_tawfiq]

فى الاول الف شكر على ذوقكو وربنا يكرمكم جميعا يارب ونفسى فعلا ناس تانيه تشاركنا اراءها لاتى نفسى اتعللم منهم
بالنسبه لمؤشر الحراره عندى هو مبيعرضش ارقام انما بيعرض زى بروجرس بار على الشاشه اللى فالتابلوه بس النسبه دى مبتعلاش ابدا عن نص المؤشر فى جميع الاحوال حتى لو العربيه واقفه فى زحمه وانا مبسمعش ومبشوفش حاجه تدل على مروحه الرادياتير بتشتغل امتى فاعتقد ان دا كويس ولو انى مش متأكد :-) .

[amr123]

ربنا يكرمك يا دكتور هشام و يبارك لحضرتك فيها
انا ناوي قريبا إن شاء الله

ممكن بس نتعبك شوية (انا طبعا عارف انك زهقت من كتر الاسئلة ) و تكلمنا عن بعض الخصائص الي في التابلوه بتاعها زي مثلا اللمبات الي في التابلوه
هل فيها مثلا لمبة تحذير للحزام ...هل فيها منبه للسرعة اكتر من 120 مثلا
حاجة تقول ان فيه باب مفتوح او الشنطة مفتوحة

ومتشكر مقدما و اسف على الازعاج

[hesham_tawfiq]

يا استاذ عمرو انا تحت امر حضرتك والله واكييييييد مزهقتش لانى قبل ماجيب العربيه كنت برضه مزهق شوية ناس هنا فى المنتدى ( كل الماركات ) لحد مارسيت على اللوجان.
بالنسبه للمبات مفيش لمبات تحذير غير للابواب المفتوحه بس وبالقى اللمبات عاديه زى الزيت والايرباج ...يعنى بصراحه مش حافظهم اوى :-)
لو تحب نتقابل فى اكتوبر قوللى فين واوريك العربيه وتجربها لوحبيت
ابعتلى ايميل وانا هرد عليك ان شاء الله

[semihuman]

انا بردو محتار جدا يا دكتور هشام
نفسي في عربيه تكون رخيصه
مثلا الفرنا فيفا(70000) بس مضايق اني حاسسها عربيه ضعيفه قوي من ناحيه المتانه
وكمان مش بنوعمه الفرنا العاديه

طيب بلاش فرنا نقول لوجان(75000)
الي فهمته ان ماتور اللوجان اضعف من الفرنا
بيستهلك بنزين زي الفرنا و التكيف بيأثر عليه غير انه خشن شويا مش ناعم زي الفرنا


نقول نيو اكسنت(80000)\
هي احسن ماتور في هذه الفئه
بس غاليه شويتين و بعدين بيقولو في مشاكل في الباور بتاعها


بصراحه اكتر عربيه قريبه الي قلبي هي اللوجان
لانها مختلفه و وسعه جدا
لو اتاكدت بس انها استهلكها قليل للبنزين و ماتورها الي حد الما ناعم
هتكوني هي اختياري الاكيد

[hesham_tawfiq]

بص انت صح فى كل اللى قلته بس انا لما جيت حسبتها اخترت العربيه العائليه ( مش بتاعة جرى وعفرته وحركات من دى ) و اقتصاديه ودى واضحه جدا فى اللوجان ومريحه ( عامل مشترك فى كل العربيات ماعدا الهيونداى اللى ضيقه جدا ومش مريحه )و كمالياتها اكتر بالنسبه لكل اللى فالسعر دا وتوكيل ممتاز
يعنى انا مش فارقه معايا اوى موضوع نعومة سحب الموتور او عدد الاحصنه او عزمه اوى
انا شايف ان دى فروقات نسبيه بين كل العربيات وفى الاخر انا شايف ان اداء العربيه اتحسن جدا جدا بعد اول الفين كيلو وبالنسبه لموضوع التكييف هو مش بيموت العربيه بس بيخنقها شويه ومره واحد وقفنى عند الشغل بيسالنى عن العربيه لقيته بيقوللى انو معاه كورولا وبرضه تكييفها مش عاجبه.
فهى دى بالظبط الفروقات النسبيه بين العربيات.
وبعدين انت مقولتش ليه فى الموديلات اللى تختار بينها الافيو , الكليو , سبرانزا
ممكن توسع شويه دايرة اختياراتك الا لو انت مش حاببهم

[hesham_tawfiq]

وبعدين انت ليه مش حابب استهلاك البنزين فاللوجان
انا المعدل عندى 7.5 لتر / 100 كيلو
يعنى 14 كيلو / اللتر ودا معدل كويس ومبيتاثرش كتير بالتكييف لما بيشتغل.

[semihuman]

بص انا بكره شكل الكليو قطع غيارها غاليه و ان كانت عربيه محترمه

الافيو عربيه خطيره لناحيه الشكل من جوه ومن بره
بس صحبي عمل بيها حادثه و العربيه بقيت مش عربيه اتعقدت منها

اما الاسبرينزا دي صيني يعني مهما كانت كويسه لو جيت ابيعها هبيعها بتمن 128لانها في الاخر صيني!

وكل دي وجهات نظر

انا الي عجبني قوي في اللوجان بحس انها متينه غير كل العربيات دي
انا لو معايا فلوس كنت جبت النترا و انا مغمض:)

انت بتقول استهلاك اللوجان 14 كيلو للتر هل ده جوه البلد؟
ولا في الطرق السريعه؟ انا عايز اعرف جوا البلد

[amr123]

متشكر جدا يا دكتور هشام ...انت كلك زوق والله
انا محرج من زوقك و عرضك بس حضرتك زي ماتكون حاسس بالي كان نفسه اطلبه منك بس اتحرجت
انا هبعت لحضرتك اميل النهاردة و منتظر ردك

ربناااااااااااااااا يكرممممممممممممممك
شكرا