لو سمحتو ممكن اى معلومات عن رينو رينبو ؟

[magomago]

انا عايز اى معلومات عن الرينو رينبو لانى معجب بشكل السياره دى اوى و بفكر اشتريها
و شكرا

[hazem_khidr]

عربيه ظهرت مصر سنه 1997 و تقفيل تركي و قطع غيارها غاليه من الاخر الاكسيل احسن منها ميه مره

[Abdallah]

من وجهة نظرى عربية محترمة جدا وشيك جدا ولكن ملهاش سوق فى مصر, حاجتها غالية شوية ولكنها موجودة, فى منها تقفيل تركى وفى منها فرنساوى , انا لو معايا 40 الف اشترى اكسيل او سويفت على الاقل هضمن صيانتهم.

[hazem_khidr]

فى منها تقفيل تركى وفى منها فرنساوى

ما اعتقدش ان نزل منها فرنساوي خالص يا عبد الله.و بالنسبه لقطع الغيار مره واحد صاحبي كان زرار النتظار بتاعها بايظ دور عليه في المحله و المنصوره طبعا مش لاقيه نزل مصر عند واحد في شبرا اشتراه ب 400 جنيه ّ!!!!!!!!!!!

[magomago]

شكرا ليكو على ردودكم
بس كده الدنيا ضلمت خالص
:roll: :roll: :roll:
بس ياريت لو حد عنده السياره دى يكلمنا عنها افضل
و شكرا

[hanno]

انا معايا العربية دى من 8 شهور وهى بأى حال من الأحوال لا تقارن بالأكسيل العربية مريحة جدا وسحبها ممتاز وانا من ساعت ما جبتها معملتش اى مشكله وكل حاجتها موجوده ولسه شارى زر الأنتظار من يومين بس ب70 جنيه (علشان الأخ اللى بيقول انه لاقاه ب400 جنيه) واسطوانة الدبرياج ب 165 جنية هى الحجات الغالية اللى فيها الأكسسورات زى الفوانيس البكتات المريا والعربية بقالها معايا 8 شهور وزى الفل وان شاء الله لما اجيب زيرو مش هبيعها هخليها برضه وبعدين ايه اللى يجيب الكورى للفرنساوى وشكرا

[hazem_khidr]

انا معايا العربية دى من 8 شهور وهى بأى حال من الأحوال لا تقارن بالأكسيل العربية مريحة جدا وسحبها ممتاز وانا من ساعت ما جبتها معملتش اى مشكله وكل حاجتها موجوده ولسه شارى زر الأنتظار من يومين بس ب70 جنيه (علشان الأخ اللى بيقول انه لاقاه ب400 جنيه)

الاخ اللي بيقول انه لاقاه ب 400 جنيه دا اسمه حازم خضر مش نكره و يا ريت نلتزم باسلوب حوار ارقي من كده و كمانالاخ دا مش هو اللي لاقاه يا ريت قبل ما ترد تقرأ الكلام بتركيز شويه و دا وااحد صاحبي هو اللي قالي و مش من مصلحتي يعني اني اقول كلام كدب او ما حصلش .في واحد بيطلب نصيحه و انا برد عليه يا ريت لو عاوز تنصحه ما تحاولش تجرح في حد تاني.

وبعدين ايه اللى يجيب الكورى للفرنساوى وشكرا

و بعدين مين قال لحضرتك انها فرنساوي ؟؟؟ دي عربيه تركي و كانت بتصنع في فرنسا من التمانينات و كان اسمها رينو 22 علي ما اعتقد و لما فرنسا استغنت عنها بدات تصنعها في تركيا و غيرت شويه في شكلها و نزلتها باسم جديد اللي هو الرينبو و موتورها كامه سفليه مش علويه زي كل العربيات الحديثه اللي موديلاتها فوق التمانينات عموما....يعني تقنيه قديمه و الاكسيل احلي منها ميت مره .

[hussein]

انا بسمع دايما عنها سمع خير وانها عربيه ممتازه وحماله اسيه وكان واحد صاحبى مهندس ميكانيكا كان شغال فى توكيل رينو(بس سابو من فتره) بيشكر فيها جدا

[hanno]

يا حازم باشا انا مقصدش التجريح او الأهانة بس السعر استفزنى لأنى لسه شارى الزرار ده بالذات اول امبارح بالسعر اللى بقولك عليه
تانى حاجة العربية تقفيل تركى و الميجان برضه تركى انا عارف ده كويس بس بأى حال من الأحوال احسن من المصرى
وعلى فكرة هى رينو 19 مش 22 وشكلها متغيرش ولافية تعديلات ممكن تبحث فى النت على رينو 19 هتلاقيها هى بالظبط التوكيل هنا فى مصر هو اللى سماها رينبو زى الفيرنا كده هى اساسا اكسنت واسمها فى مصر فرنا

[hanno]

موتورها كامه سفليه مش علويه زي كل العربيات الحديثه اللي موديلاتها فوق التمانينات عموما....يعني تقنيه قديمه و الاكسيل احلي منها ميت مره .

انا لا اعتقد

[hanno]

وبعدين يا (أخ) حازم كلمه (أخ) دى مش عيب مهو كلنا اخوات وبعدين انت اخدتها عليك ليه انا بقولها على صاحبك اللى معرفش اسمه وبالنسبة لى نكرة فعلا فأنا اسلوبى كويس فى الحوار وياريت انت اللى تراجع نفسك برضه قبل ما تكتب الرد
وفى الأخر يا سيدى مش عايزك تزعل برضه وكفاية لحد كده وخلينا نتكلم غى العربيات :lol:

[hazem_khidr]

يا حازم باشا انا مقصدش التجريح او الأهانة بس السعر استفزنى لأنى لسه شارى الزرار ده بالذات اول امبارح بالسعر اللى بقولك عليه
تانى حاجة العربية تقفيل تركى و الميجان برضه تركى انا عارف ده كويس بس بأى حال من الأحوال احسن من المصرى
وعلى فكرة هى رينو 19 مش 22 وشكلها متغيرش ولافية تعديلات ممكن تبحث فى النت على رينو 19 هتلاقيها هى بالظبط التوكيل هنا فى مصر هو اللى سماها رينبو زى الفيرنا كده هى اساسا اكسنت واسمها فى مصر فرنا

مفيش مشاكل يا باشا بس انا قولت اللي سمعته من صاحبي و دا كان عايش معايا في الامارات ولما نزل مصر راح يشتريه من محل في شبرا و هو اللي قالي ب 400 جنيه حتي انا استغربت و قولتله ما كنت تروح تجيب تابلوه استعمال خارج علي بعضه مكنش حيتكلف 1000 جنيه :) !!!!!!!
و هيا ممكن تكون رينو 19 فعلا انا كنت كاتب متهيالي علشان مش فاكر الرقم بتاعها كويس.

اقتباس:

موتورها كامه سفليه مش علويه زي كل العربيات الحديثه اللي موديلاتها فوق التمانينات عموما....يعني تقنيه قديمه و الاكسيل احلي منها ميت مره .


انا لا اعتقد

انا كنت بصلح تكييف بتاعي انهارده و لقيت عربيه اختها واقفه معايا و بصيت علي موتورها لقيته فعلا الكامه بتاعه سفليه و مفيس سير كاتينه و سالت صاحبها قالي الكاتينه بتاعها جنزير

[hazem_khidr]

وبعدين يا (أخ) حازم كلمه (أخ) دى مش عيب مهو كلنا اخوات وبعدين انت اخدتها عليك ليه انا بقولها على صاحبك اللى معرفش اسمه وبالنسبة لى نكرة فعلا فأنا اسلوبى كويس فى الحوار وياريت انت اللى تراجع نفسك برضه قبل ما تكتب الرد
وفى الأخر يا سيدى مش عايزك تزعل برضه وكفاية لحد كده وخلينا نتكلم غى العربيات

يا سيدي ولا يهمك مفيش مشاكل انا لقيتك بتوجه الكلام ليا و انا ما اتكلمتش معاك باسلوب متدني متهيالي علشان ترد عليا كده.
و عموما حصل خير :)

[hanno]

هى فعلا جنزير مش سير كتينة وانا عايز اقولك يا حازم انا ليا 3 اصحابى اشتروها و انا لما شفتها معاهم وركبتها اقتنعت بيها جدا و رحت اشتريتها على طول وبقيت انا الرابع بتاعهم وعلى فكرة العربية منتشره هنا فى القاهرة وانا بصلح عند ميكانيكى كان شغال فى توكيل رينو من سنه 85 لحد من 3سنين فاتو ومش عايز اقولك بيتكلم عن العربيه دى ازاى ..العربية دى مش واخده حقها خالص فى مصرو لو كانت قطع الغيار عالية سنة ومش كتير فقطع غيارها بتعيش مده طويلة

[hazem_khidr]

..العربية دى مش واخده حقها خالص فى مصرو

اهو دا اللي بتكلم عليه يا هانو انها مش منتشره و لو حد جابها من بره القاهره حيدوخ علي قطع غيارها يعني جوان وش سلندر او مقص او بيضه في الدركسيون الحاجات البسيطه دي اللي ممكن تعطل العربيه يا اما يلجأ انه يوفق ليها حاجت.
انا لما باجي اشتري عربيه بدور علي سهوله الحصول علي قطع غيار دي اول حاجه علشان ما تعطلنيش . فهمت قصدي؟؟ انا مش بقول انها عربيه وحشه لكن بالنسبه لقطع غيارها و ندرتها خصوصلا لو حد ساكن بره القاهره حتكون صعبه.

هى فعلا جنزير مش سير كتينة

و دا كده معناه انها كامه سفليه مش كامه علويه