إستفسار هام لعشاق الميجان

[mishmishy]

إلى السادة عشاق الرينو عموما والميجان خصوصا
انا من عشاق الرينو لانها ماركة فعلا زى ابن الاصول كدة ليها اصل وتاريخ وكنت فى يوم من الايام راكب أوبتيما عربية موتور جبار بس كان عيبها انها عربية فقيرة جدا رغم انها كانت 99 بالمقارنة بمثيلاتها يعنى خالية من الكماليات وبيعها مش سهل
المهم انا معايا حاليا لانسر كرستالة 99 جميع الكماليات عادة عاملة 110 الف كيلو فقط لانها كان اول يد ليها سفير لمصر فى السعودية فمش كانت بتتحرك كتير والعربية ما شاء الله تحفه ومريحانى جدا بس بقالها 3 سنوات معايا ومحتاج اجدد دة السبب الوحيد ولانى من عشاق الرينو فكرت فى الميجان 2006 مثلا وهيبقى فرق السعر عن عربيتى مش كبير حوالى 10 الاف تقريبا وانا اعرف انها عربية غنية جدا بالكماليات وتفوق اى ماركة اخرى لدرجة انها تعتبر اعلى تكنولوجيا تقريبا بس بصراحة انا اجهل عنها كل شىء من حيث الصيانة وقطع الغيار ومشاكل السيارة عموما لانى سمعت ان 2006 او 2005 تقريبا كان فيهم مشاكل تصنيع. كل اللى برجوه من اخواننا الاعزاء ملاك ومحبى الميجان الافادة بامانه عن عيوب السيارة وصيانتها وقطع الغيار واى معلومة تفيد فى اتخاذ قرار التغيير بالكرستالة معشوقتى وشكرا جزيلا لكم

[MohammedAladel]

مفيش مشاكل تصنيع فى رينو ميجان والكلام دا غير صحيح

وحضرتك قلت بما فيه الكفاية

هى عربية كصيانة وأعطال شأنها شأن كل العربيات بل أنا شايف إنها أرخص كتير فى قطع غيارها من عربيات تانية كتير أقل منها فى كل حاجة

والفيصل فى قرار شراء سيارة مستعملة أيا كان نوعها حالتها

وأى أستفسار تحت أمر حضرتك

[mishmishy]

شاكر جدا لردك واهتمامك انا فعلا حابب العربية دى خصوصا ان سعرها رائع بالنسبة للموديل والامكانيات وشكلها كمان جميل بس لو ممكن حضرتك تنصحنى بنوع او موديل معين او كماليات معينة تكون فيها ويبقى سعرها فى حدود كام حسب الحالة طبعا اكون شاكر لحضرتك جدا

[MohammedAladel]

الميجان موديل 2005 و 2006 شكل وبداية من أواخر 2006 تقريبا أبتدى الشكل يختلف شوية الأكصدام الأمامى عملوا فيه تعديل بسيط والشبكة الأمامية والفوانيس والأمامية
والفوانيس الخلفية برضه تعديل بسيط والتعديل دا ا ستمر لحد ما نزلت ميجان 3
متهيقلى فى 2008 الأكصدام بقى لونه بنفس لون السيارة وعملوا عليه تعديل بسيط فى الدهان من عند الفوجات من تحت كلها حاجات بسيطة لكن

لكن من وقت ما نزلت ميجان 2 نفس الكماليات هى هى ونفس المحرك فى كل الموديلات نفس الفتيس
ممكن حضرتك تتفضل فى المواضيع المثبتة هتلاقى موضوع شامل عن الميجان

حاجات ع السريع العربية فيه منها فئة عادية دى بتنزل بجنوط حديد وطاسات رينو وفرش قماش 6 إيرباج مكنة رفع زجاج زرار غلق الأبواب والزجاج الخلفى للأطفال حساس نور ومطر شوف وتكييف بكرة أنا هقولك على الفئات الأعلى تفرق إيه عشان مش متذكر كل الكماليات

فيه نفس المواصفات اللى فوق مع جنوط اسبور رينو 16 أو 15 والله أعلم أنا عندى 16

بالإضافة للى ذكرته فيه فئة فيها كراسى فرش جلد أو فرش جلد مع قماش أو فرش جلد بيج كامل والطارة بيج والتابلوه ودا بيبقى جميل جدا وهيحسسك بفخامة أكتر وتكييف تاتش

والفئة التوب بقى بيبقى فيها فتحة سقف بانوراما ودى أعلى حاجة بالإضافة للى قلته فوق

نيجى بقى لمثبت السرعة على ما أعتقد ال 2005 وال 2006 قبل التعديل للإكصدام والشبكة الأمامية مكنش بينزل فيهم مثبت سرعة حتى فى الفئات التوب لاين أو الهاى لاين

لكن ممكن تركبه عادى لأن العربية مجهزة لتركيبه والكمبيوتر
بداية من 2007 أو أواخر 2006 تحديدا العربية أبتدى ينزل فيها مثبت السرعة تجهيز أساسى فى كل الفئات


بالنسبة للإضاءة فى 2005 و2006 لونها أحمر أو برتقالى كدا أواخر 2006 أبتدى بعد تعديل الأكصدام هههههه إضاءة التابلوه أصبحت لونها أبيض بدل من أحمر

وللعلم أنا شفت موديل 2006 بها مثبت سرعة والشكل القديم والإضاءة الحمراء برضه معرفش بقى صاحبها كان مركبه ولا إيه بالظبط


العربية حلوة 65 ألف تجيبلك حالة كويسة 2007 أول فئة أوتو

وهتبقى كسبان :)

البانوراما سعرها يزيد طبعا وعلى حسب برضه العربية حالة العربية لكن متفكرش إنك تجيب ميجان ب 55 ألف عشان هتبقى متهانة والله أعلم مفيش حد هيفرط فى حاجة حالتها حلوة بالسعر دا أبدا ومتسمعش كلام كتير لأن معظمه خطأ

آه صح العربية بينزل منها مانيوال وأوتوماتيك استب ترونيك فى موديل 2005 و 2006 ظهرت نتشة فى الفتيس بس حاجة عادية يعنى مش عيب ولا حاجة وتم عمل سوفت وير وخفت النتشة

أنا لو مكانك تشوفلك حاجة بانوراما 2007 بحالة ممتازة تعملها 75 ألف ومش خسارة فيها ال 100 والله بس دا حال سوقنا
وأنا بقول الأسعار دى كتخمين مش أكتر ممكن تزيد أو تنقص حاجات بسيطة

لكن مثلا لو موديل 2009 أو 2008 حتى العربية سعرها هيبقى أغلى فممكن تستبعدهم طالما إنت هتلعب فى رينج ال 60 ألف طبعا مش عايز أقول لحضرتك هى ميجان مش بتنافس كريستالة هو أنا شايفها أفضل من لانسر بومة وبتنافس لانسر شارك :) طبيعى كل ما الموديل يكون أحدث بتكون العربية أغلى
برغم إن العربين نفسها هى هى متغيرتش حتى فى الميجان 3 تقريبا نفس المحرك ونفس الفتيس

لو ليك فى المانيوال فيه عربية معروضة هنا ب 59 ألف وأنا عن نفسى بحب المانيوال جدا جدا

بس دى تقريبا أول فئة وهى موديل 2006

العربية تعليق تورشن بيم خلفى وثباتها كويس جدا على السرعات العالية وفراملها ممتاز ماشاء الله


وأى استفسار تحت أمر حضرتك

[mishmishy]

والله انت راجل محترم ومش عارف اشكرك ازاى وانا فعلا هدور على حالة ممتازة لان دة اسلوبى حتى لما جيبت الكرستالة جايبها حالة نادرة كانت 83 الف كيلو وماشاء الله زى ما هى وعاملة دلوقت 110 بعد 3 سنوات لان عندى مبدا ان الفلوس مش بتعوض الحالة يعنى مهما تصرف على العربية لايمكن هترجعها لحالتها فالافضل نجيب حالة ممتازة وندفع زيادة شوية مش مهم وانا من كلام حضرتك قررت ابدا من 2007 علشان تكون الاضافات والتعديلات موجودة خصوصا مثبت السرعه يهمنى واكيد الحالة هتبقى افضل وانا زيك من هواه المانيوال بس حضرتك مقولتليش التكييف اخباره ايه خصوصا انى سمعت انه مش قوى واسمحلى استعين برايك وخبرتك لما ابدا اشترى علشان فحص العربية قبل الشراء وشاكر لحضرتك جدا

[MohammedAladel]

أنا مبدئيا مركبتش عربية غير ميجان دى أول عربية أركبها فى حياتى

عشان أحكم على التكييف بالنسبة لعربية تانى لازم يكون ركبت أكتر من عربية

بالنسبة لتقديرى الشخصى التكييف جيد جدا ع الطرق المفتوحة لو مسافر مثلا فى الصيف طبعا فى الحر

فى الزحمة والوقوف كتير فى الصيف التكييف جيد أو مقبول فى عز الحر بيبقى ضعيف وأنت واقف ودا كلام أعضاء كتير كمان

بالليل طبعا تلاجة هههههههه

الناس بتقول تكييف اليابانى قوى سألت عن اللانسر وأجمعت إن تكييفها جيد

يعنى تكييف الميجان مش قوى جدا زى عربيات تانية لكن هو كويس ومش ضعيف زى ماناس كتير بتقول

ودى بتختلف من شخص التانى باحساسه لدرجة البرودة

يعنى أنا أساسا مليش فى التكييف فى الصيف لكن فى الشتاء بحبه :)

لو على التكييف السخن قوى

طبعا الفحص فى التوكيل أفضل شئ وأضمن شئ وبيبقى أغلى من المراكز المعتمدة من 400 إلى 500 على حسب قول الأعضاء هنا شامل كل حاجة بإذن الله تقرير مفصل

وزى ما الأستاذ أحمد قال التقرير دا لو حالة المساعد 60 % ممكن يقولك بايظ وعايز يتغير فمتركزش فى الحاجات الاستهلاكية قوى

ممكن تكشف فى المراكز المعتمدة برضه زى فرنش موتوزر او الميكانيكيون العرب الكشف بيبقى فى حدود 250

مبدئيا أنت هتشوف شكل العربية من برا الأول وتشوف صاحبها عامل صياناتها فى التوكيل والمراكز المعتمدة ولا لأ

طبعا لو مواظب على صيانة التوكيل سعرها هيزيد شوية وهيبقى واثق من نفسه

ولكن اللى ملاحظه إن أغلب الناس مش بتعمل صيانة دورية فى التوكيل عشان غالى فى المصنعيات وأى صنايعى فاهم بيعمل الصيانة بسهولة برا :)

فمش شرط يكون صاحبها عامل كل صيانتها فى التوكيل أو المراكز المعتمدة لأن غالبا اللى بيعمل كدا هو اليد الأول ومعظم الىل هتلاقيه مستعمل هيبقى يد تانى على الأقل

وكله هيبان فى الكشف

[ادهم رضا]

باشا والله الفرنساوى محترم جدا بس مظلوم هنا فى مصر
وانا من لفى الفترة السابقه فى سوق الجمعه (4)مرات كنت بسئال على الميجان من نوع حب الاستطلاع(عشان فلوسى مكملش)وكانت الميجان 2005 هناك من 54000 الى 62 الف.....بس دة اللى اقدر اقوله ....ويابخت اللى هيركب العربيلت دى

[hossam_elwani]

الميجان موديل 2005 و 2006 شكل وبداية من أواخر 2006 تقريبا أبتدى الشكل يختلف شوية الأكصدام الأمامى عملوا فيه تعديل بسيط والشبكة الأمامية والفوانيس والأمامية
والفوانيس الخلفية برضه تعديل بسيط والتعديل دا ا ستمر لحد ما نزلت ميجان 3
متهيقلى فى 2008 الأكصدام بقى لونه بنفس لون السيارة وعملوا عليه تعديل بسيط فى الدهان من عند الفوجات من تحت كلها حاجات بسيطة لكن

لكن من وقت ما نزلت ميجان 2 نفس الكماليات هى هى ونفس المحرك فى كل الموديلات نفس الفتيس
ممكن حضرتك تتفضل فى المواضيع المثبتة هتلاقى موضوع شامل عن الميجان

حاجات ع السريع العربية فيه منها فئة عادية دى بتنزل بجنوط حديد وطاسات رينو وفرش قماش 6 إيرباج مكنة رفع زجاج زرار غلق الأبواب والزجاج الخلفى للأطفال حساس نور ومطر شوف وتكييف بكرة أنا هقولك على الفئات الأعلى تفرق إيه عشان مش متذكر كل الكماليات

فيه نفس المواصفات اللى فوق مع جنوط اسبور رينو 16 أو 15 والله أعلم أنا عندى 16

بالإضافة للى ذكرته فيه فئة فيها كراسى فرش جلد أو فرش جلد مع قماش أو فرش جلد بيج كامل والطارة بيج والتابلوه ودا بيبقى جميل جدا وهيحسسك بفخامة أكتر وتكييف تاتش

والفئة التوب بقى بيبقى فيها فتحة سقف بانوراما ودى أعلى حاجة بالإضافة للى قلته فوق

نيجى بقى لمثبت السرعة على ما أعتقد ال 2005 وال 2006 قبل التعديل للإكصدام والشبكة الأمامية مكنش بينزل فيهم مثبت سرعة حتى فى الفئات التوب لاين أو الهاى لاين

لكن ممكن تركبه عادى لأن العربية مجهزة لتركيبه والكمبيوتر
بداية من 2007 أو أواخر 2006 تحديدا العربية أبتدى ينزل فيها مثبت السرعة تجهيز أساسى فى كل الفئات


بالنسبة للإضاءة فى 2005 و2006 لونها أحمر أو برتقالى كدا أواخر 2006 أبتدى بعد تعديل الأكصدام هههههه إضاءة التابلوه أصبحت لونها أبيض بدل من أحمر

وللعلم أنا شفت موديل 2006 بها مثبت سرعة والشكل القديم والإضاءة الحمراء برضه معرفش بقى صاحبها كان مركبه ولا إيه بالظبط


العربية حلوة 65 ألف تجيبلك حالة كويسة 2007 أول فئة أوتو

وهتبقى كسبان :)

البانوراما سعرها يزيد طبعا وعلى حسب برضه العربية حالة العربية لكن متفكرش إنك تجيب ميجان ب 55 ألف عشان هتبقى متهانة والله أعلم مفيش حد هيفرط فى حاجة حالتها حلوة بالسعر دا أبدا ومتسمعش كلام كتير لأن معظمه خطأ

آه صح العربية بينزل منها مانيوال وأوتوماتيك استب ترونيك فى موديل 2005 و 2006 ظهرت نتشة فى الفتيس بس حاجة عادية يعنى مش عيب ولا حاجة وتم عمل سوفت وير وخفت النتشة

أنا لو مكانك تشوفلك حاجة بانوراما 2007 بحالة ممتازة تعملها 75 ألف ومش خسارة فيها ال 100 والله بس دا حال سوقنا
وأنا بقول الأسعار دى كتخمين مش أكتر ممكن تزيد أو تنقص حاجات بسيطة

لكن مثلا لو موديل 2009 أو 2008 حتى العربية سعرها هيبقى أغلى فممكن تستبعدهم طالما إنت هتلعب فى رينج ال 60 ألف طبعا مش عايز أقول لحضرتك هى ميجان مش بتنافس كريستالة هو أنا شايفها أفضل من لانسر بومة وبتنافس لانسر شارك :) طبيعى كل ما الموديل يكون أحدث بتكون العربية أغلى
برغم إن العربين نفسها هى هى متغيرتش حتى فى الميجان 3 تقريبا نفس المحرك ونفس الفتيس

لو ليك فى المانيوال فيه عربية معروضة هنا ب 59 ألف وأنا عن نفسى بحب المانيوال جدا جدا

بس دى تقريبا أول فئة وهى موديل 2006

العربية تعليق تورشن بيم خلفى وثباتها كويس جدا على السرعات العالية وفراملها ممتاز ماشاء الله


وأى استفسار تحت أمر حضرتك

على فكره موديل 2006 فيه مثبت سرعه ومحدد سرعه فى الهاى لاين من الشركه مش تركيب

تحياتى

[Ahmed Selim]

موديلات 2005 و 2006 فيها مثبت فى أعلى فئة

و من أول 2007 أو 2008 أبتدوا يعملوا حركات نص كم فى بعض الكماليات.............يعنى فيه موديلات فى 2009 مكنوش بينزلو فيها مرايات ضم........و أبتدوا يشيلوا الغطاء البلاستيك اللى فوق الموتور...........يعنى حاجات خفيفة كلها.

عموماً انصحك بالكشف فى التوكيل بعد لما تكون شايف عربية حالتها كويسة و حاسسها نضيفة مش متهانة.........و الأفضل تكون صياناتها فى التوكيل أو المراكز المعتمدة........و الأفضل برضه متجبش حاجة من سوق السيارات.

[MohammedAladel]

على فكره موديل 2006 فيه مثبت سرعه ومحدد سرعه فى الهاى لاين من الشركه مش تركيب

تحياتى

الله أعلم مع الباش مهندس هشام الهاى لاين وكان مفيهاش مثبت سرعة وهو ركبه بنفسه وغير الطارة

[MohammedAladel]

ميجان كان فيها مشاكل فى أوائل موديلات 2005 و 2006
لقصة بأختصار أن فيه كتير من المشاكل دى كانت بسبب قطع غيار مش بتعيش كما متوقع..............زى البطارية و الكويلات......أو حاجة زى نتشة الفتيس.

طبعاً من 2005 أو 2006 لحد دلوقتي مفيش عربية مغيرتش بطارية أو كويلات...........و نتيجة للتغيير ده فالمشاكل قلت..لأن الشركة لما عرفت المشاكل أبتدت تعدل الأجزاء اللى فيها مشاكل و تخليها أكتر إعتمادية.
موضوع نتشة الفتيس أتحل ( أو خف بدرجة كبيرة ) بسوفت وير ببلاش فى التوكيل و مراكز الخدمة...........و هنا تبان أهمية الصيانة فى التوكيل............لو واحد مش متابع صيانة مش هتلاقي المشكلة دى أتحلت عنده.
اللى فوق دا كلام الأستاذ أحمد عبد المقصود
أنا لم أذكر هذه المشاكل باعتبارها مشاكل بسيطة واتغيرت فى الحال زى ما لأستاذ أحمد وصف

لكن أنا قصدى على عيب فى التصنيع بمعنى الكلمة يعنى عيب فى المحرك فى دورة التبريد الفرامل بمعنى أشمل عيب مستمر مع العربية

عشان كدا أنا قلت ميجان خالية من مشاكل التصنيع