صوت تزييق فى العربيه

[medori]

السلام عليكم يا وحوش الميجان

انا العربيه كان بقالها فتره عملالى مزيكا حسب الله و انا ماشى، إشى تزييق على طقطقه على مش عارف إيه، خدتها الاثنين اللى فات و قلت ازوغ من الشغل ساعتين (اصل انا شغال فى المعادى) اروح فيهم لعادل اللى فى صقر قريش يغيرلى التيل و يبصلى على العفشه، طبعا على ما جيه دورى كانوا عدوا الساعتين اياهم، المهم بصوا على العفشه و رصلى الحاجات اللى عايزه تتغير بدون اى تمهيد و بدون اى رافه بقلبى الصغير :) بطاحات يمين و شمال و بارات و جلب و مساسير مساعدين و تحشيه مساعدين :( حسبنا الحسبه لقيناها 1100 بالمصنعيه، قولت ما بديهاش، توكل على الله يا عم، طبعا على ما غير كل ده و ظبت زوايا كانت بقت الساعه 5:30 و مديرينى ال2 قلبوا عليا الدنيا :) قولت يالله كلوا فدا العربيه

المزيكا اللى كانت مسليانى و انا ماشى راحت من الاثنين بس رجعت العربيه تزيق تانى يوم الخميس، هو صوت التزييق ده بيبقى واضح اوى الصبح بالذات و انا طالع بالعربيه و مش بسمعه خالص وانا بجرى، رجعت لعادل تانى يوم السبت قالى التزييق ده بيبقى نتيجه رمل دخل فى العفشه، اغسلها بجاز فى اى بنزينه و التزييق هيرجع تانى لما يخشلها رمل تانى برضه !!!! انا مش عارف كلامه ده صح ولا غلط عشان فعلا انا كل يوم بمشى بتاع 200 م رايح - جاى فى شوارع فيها رمل و بعت معايا حد جرب العربيه فى المطبات اللى فى صقر بس الصوت مكانش واضح اوى فقالى العربيه بدل مش بتخبط مع المطبات او بتقطق يبقى العفشه سليمه؟!!! النهارده الصبح برده لقيت التزييق واضح جدا و عالى برده و انا طالع بس مفيش الطقطقه زى قبل كده!!

السؤال بقه (بعد الحكايه الطويله ده) الكلام اللى هو قالوا بخصوص التزييق و الطقطقه ده صح ولا غلط؟ و فى حاجه تانيه ممكن تتطلع صوت التزييق ده (مع العلم ان شداده الفتيس عايزه تتغير، بس بقالها فتره كده) فاشمعنا التزييق راح الكام يوم دول و بعدين رجع تانى دلوقتى؟

[gym1974]

السلام عليكم ورحمه الله بص حضرتك انا كان عندى صوت التزيق ده فى عربيتى كليو 2003 التزيق ده بيجى من جلب المقصات علشان بتكون نشفت اوشققت حاجة زى كده وبما ان الجلب ده ماتنفعشى تتغير لوحدها لازم تغير جوز المقصات وبالفعل غيرتهم عند فرنش موتورز وراح التزيق والحمد لله

[medori]

ياه، اخيرا حد رد عليا :)

ما هو مغير الجلب بس من غير ما يغير المقصات!!!

ممكن انا اكون كدا مش فاهم كويس! هو فيه جلب مقصات و جلب تانيه و لا هما بس جلب المقصات بس اللى موجودين؟

[Ahmed Selim]

هو التزييق جاى منين ؟؟؟؟

من جوة العربية ولا من العفشة ؟

لو من جوة العربية يبقى تابلوه أو كونسول.

[abasse]

ياه، اخيرا حد رد عليا :)

ما هو مغير الجلب بس من غير ما يغير المقصات!!!

ممكن انا اكون كدا مش فاهم كويس! هو فيه جلب مقصات و جلب تانيه و لا هما بس جلب المقصات بس اللى موجودين؟

التزييق ده عندى انا كمان بحس بيه فى الركن وخصوصا أما راجع من مشوار فى الأول قولت يمكن العلبه عشان عندى بتودع لكن واحد صاحبى قالى غالبا من البطاحات المهم ساعات بيجى كل يوم وايام مسمعش ولا صوت قوات أسبها لما تقرفنى أبقى أروح أشوفها

[medori]

هو التزييق جاى منين ؟؟؟؟

من جوة العربية ولا من العفشة ؟

لو من جوة العربية يبقى تابلوه أو كونسول.

لا يا احمد الصوت جى من بره من ناحيه العجل

[medori]

التزييق ده عندى انا كمان بحس بيه فى الركن وخصوصا أما راجع من مشوار فى الأول قولت يمكن العلبه عشان عندى بتودع لكن واحد صاحبى قالى غالبا من البطاحات المهم ساعات بيجى كل يوم وايام مسمعش ولا صوت قوات أسبها لما تقرفنى أبقى أروح أشوفها

برضه البطاحتين متغيريين مع الحاجات اللى اتغيرت و كمان اللى اعرفه ان البطاحات بتعمل صوت طقطقه مش تزييق، مش كده و لا ايه يا شباب؟

[Ahmed Selim]

لا يا احمد الصوت جى من بره من ناحيه العجل

طيب الصوت ده بيبان و أنت فاتح الأزاز بس و ماشى جنب رصيف أو عربية تانية راكنة ؟

عامل زى صوت صوصوة كده ؟؟

[medori]

طيب الصوت ده بيبان و أنت فاتح الأزاز بس و ماشى جنب رصيف أو عربية تانية راكنة ؟

عامل زى صوت صوصوة كده ؟؟

مخدتش بالى من الموضوع ده الحقيقه، هو بيبقى واضح اوى الصبح بدرى مش عارف عشان بتبقى الدنيا هاديه و لا عشان اى عيب فى العربيه بيبان فى الطلعه! و ببقى فاتح الشباك و مش بسمعه خالص و انا ماشى على الدائرى بسرعه مش عارف برضه عشان بيبقى مش موجود و لا عشان صوت العربيه بيبقى عالى!
بس هو ايه العلاقه بين العربيات اللى راكنه او الشباك المفتوح و صوت التزييق؟ و هو قريب من صوت الصوصوه فعلا

[Ahmed Selim]

بص يا زعيم............كان فيه صوت بيطلع معايا فترة كبيرة كده و كان مجنني فى الأول

لما تكون ماشي جنب رصيف أو عربية راكنة الصوت بيرد ناحيتك و بتسمعه أعلى من الطبيعي شوية.

هو الصوت ده كان بيطلع عندي من العجلة الخلفية يمين..........و بسمعه و أنا فاتح الأزاز بس و ماشي بالراحة........لو زودت السرعة يبتدي يختفي.

رحت التوكيل فى صيانات و قولتلهم عليه و كل مرة بيعملوه و يقعد فترة مختفي و بعد كده يبتدي يظهر تاني.

لحد لما سألت ده أيه سببه..........و اللى أتقالى مش فاكره بالظبط بصراحة لأن الموضوع بقاله أكتر من 5 سنين

بس هو شحم بتاع حاجة معينة فى العجلة الخلفية بيبتدي ينشف و بيطلع الصوت ده..........مفيش منه أى قلق.

و على فكرة أنا متأكدش 100% أنه جاى من العجلة الخلفية إلا لما هما قالولي.....لأنه مش واضح بالظبط جاي منين.

[Abo_Lina]

تصدق أنا عندي صوت الصوصوة ده من يجي ٣ سنين ،، و كنت فاكر انه جاي من الباب الوراني يمين !

[medori]

رجعت لعادل تانى النهارده و بعد تاكيد على العفشه و مرواح للعفشجى و تجريب العربيه و كل حاجه، احتمال يكون صوت التزييق ده جاى من علبه الشكمان، و كنت لسه عامل صيانه ال65,000 فى التوكيل الاسبوع اللى فات و كان الريبورت كاتبين فيه ان علبه البيئه عليزه تتغير، سالت فى التوكيل لقيت علبه البيئه ب10,500 جم و special order كمان؟!!!

هو ممكن فعلا علبه البيئه تعمل صوت التزييق دة؟ و ياريت يا جماعه حد يقولى علبه البيئه الاستيراد بكام و حد يكون ثقه يغيرهالى!!

[MohammedAladel]

ليه كدا سعرها مبالغ فيه قوى

[Ahmed Selim]

علبة البيئة فى أى عربية غالية بغباء علشان بيبقى فيها فلاتر من جوة كربون..........غير أى علبة شكمان من الباقيين فى العربية.

معلش طلب من صاحب الموضوع..........التزييق ممكن يكون له 1000 سبب و سبب.....


يا ريت تسجلنا الصوت و ترفعه هنا و نسمعه جايز نقدر نساعدك............لكن نساعد فى حاجة مشوفنهاش و مسمعنهاش هيبقى صعب بزيادة......خصوصاً أنك بتتكلم فى صوت مش فى مشكلة ميكانيكة.

[medori]

حاولت اسجل الصوت يا احمد والله بس دايما صوت الموتور بيبقى هو اللى باين فى الريكورد. هو انا هجرب اغير علبه البيئه و خلاص عشان كده كده التوكيل كان كاتب انها عايزه تتغير و يعنى عربيه من 6 سنين مفروض تغيرها، مش كده؟

متعرفش حد اعملها عنده و ميغليش عليا قوى؟