الميجان بتبطل

[ahmadg78]

استفسار بعد اذنكم
انا قريت كل الموضوعات المرتبطه بان الميجان بتبطل لكن عندى الاعراض مختلفه شويه
العربيه ميجان 2 2006
العربيه بتبطل لما بكون مهدى ولما اجى ادورها مش بتدور على طول بتعمل صوت مارش لمده من خمس لعشر ثوانى و تبطل مرتين تلاته وبعدين تدور بدون اى مشاكل
العربيه بتكون سخنه مش لسه مدوره
اعراض مصاحبه : ساعات لما بيكون البنزين اقل من ربع التنك العربيه بتنتش
وساعات العربيه و هى فى بدايه الحركه بحس بصوت دوشه زى رجرجه خفيفه فى الموتور من تحت
انا معرفش تاريخ العربيه لانى لسه مشتريها
المشكله التانيه
الار بى ام مش بينزل بسرعه لما بشيل رجلى من على دواسه البنزين و المانوال مش شغال خالص يعنى حتى الشاشه مش بتغير
و برضه الكيك داون العربيه مش بتستجيب بسرعه و الار بى ام مش بيرجع بسرعه
شكرا مقدما لحضراتكم
مع العلم ان اكتر حاجه خلتنى اشترى العربيه دى هى تعاونكم و ارائكم هنا فى المنتدى

[Abo_Lina]

المشكلة الأولى غالبا البوابة محتاجة تنظيف و اعادة برمجة و احتمال بس مش أكيد حساس كرانك
التنظيف و اعادة البرمجة ب ١٥٠ تقريبا
حساس الكرانك ٣٦٠
المشكلة التانية أعتقد محتاجة كشف على الكمبيوتر
و يا رب تكون كشفت عليها في التوكيل قبل شرائها

[gefoo]

المشكله التانيه ممكن تكون من سويتش النقلات بتاع الفتيس وده تغييره سهل

[ahmadg78]

الف شكر على الردود و فعلا ده اللى قلته للميكانيكى اول ما رحت وقال امين
احنا شفنا البوابه لقيناها نضيفه و نضفنا الحساس المشكله اختفت كام ساعه و رجعت تانى يبقى ان شاء الله بكره هاحطها على الكمبيوتر و هاغيره لو كان الحساس
و الفتيس سويتش النقلات ربنا يسهل و ابقى اغيره قريب
انا كشفت على العربيه فى فرينش موتورز قبل ما اشتريها طبعا
الف شكر تانى يا رجاله على الردود انا رحت حاسس انى فاهم وملو هدومى كده وكله بمجهودكو

[Abo_Lina]

ده واجبنا و يارب المشكلة تتحل

[MohammedAladel]

احتمالات والله أعلم
حساس أوكسجين
سويتش نقلات بالنسبة للفتيس

ممكن برضه لو فيه هزة جامدة فى الموتور يعنى حاسس إن العربية شغالة 3 سلندر دا بيبقى كويل أو أكثر بايظين

لو حاسس نتشة مع الغيارات لما تهدى بصورة غير طبيعية دا ممكن يكون قواعد موتور

[moh158]

جديدة حتة البوابة دي علي العموم سويتش النقلات بحوالي ٣٠٠ جنيه استيراد و الرجرجة لو تحس ان معاها نعرة يبقي غالبا كويل و برضه ما تجيبش كويل صيني او تركي خليك في الاصلي او فاليو

[ahmadg78]

و الله يا جماعه انا فرحان جدا بالردود والاهتمام
وان شاء الله قريب اقدر انا كمان ادلى بدلوى فى اعطال العربيه
انا رحت لعادل زوايا قاللى ان مش هنغير على طول خلينا ننضف الحساسات الاول و نعيد برمجه على الكمبيوتر و بعدها لو عملتها تانى نشوف العيب فين ونغيره بس المشكله انه علشان يفك لازم العربيه تبرد جدا لان مكان الحساس فى حته رخمه جدا و استنيت ساعتين لحد ما العربيه بردت و فكينا و برمجنا و خد 50 مصنعيه تنظيف و كشف كمبيوتر وبرمجه
الحمد لله عملتها تانى قريب قبل ما اوصل الدائرى و بطلت تانى رجعتله و غيرنا حساس الكرنك ب 250 و 50 مصنعيه و الحمد لله شغاله كويس جدا امبارح والنهارده الصبح و ان شاء الله على طول
الغريبه ان الحساس اللى فى العربيه نوعه سيمنس و دى كانت حاجه اول مره اشوفها فى اى عربيه
و شكرا مليون مره لحضراتكم على الردود

[wasim magdy]

طيب انا عندى نفس العيب اخلى الميكانيكى يعمل الى انتا عملتو ده ولا ايه