ميجان ولا بيجو

[وائل مختار]

عاوز اشترى عربيه جديده يا جماعه ومحتار بين اتنين ميجان 2008 كامله ولا بيجو 307 استيشن موديل 2007 ياريت رأى الاعضاء الخبراء فى الموضوع ده

[تامر.محمد]

لما جيت اشتري عملت نفس المقارنة و جبت الميجان

اللي اعرفه ان العربيتين ميكانيكيا قريبين من بعض جدا , الموتور سمعت انه اسرع في البيجو
في المقابل توكيل رينو افضل و انتشار الميجان اكتر بكتير اوي من البيجو

[وائل مختار]

والله انا عن نفسى ميال للميجان اكتر انا لسه بايع عربيتى ميجان 2 موديل 2006 وكنت ناوى اشترى ميجان موديل 2008 لانى بصراحه لسه مشبعتش من العربيه دى لكن اخوى بيحاول يقنعنى بالبيجو لانها اوسع وصالونها احسن بس انا حاسس ان الميجان صاجها اقوى من البيجو جدا ... البيجو مش عجبنى الاكصدام بتاعها من قدام خالص على عكس الميجان ماشاء الله عليها

[dedo_ryo]

بص يا استاذ وائل .. انا كان معايا 307 sw العربيه دي ممكن انها تكرهك ف يالعربيات كلها ليه
1- الجير بوكس بتاعها ممكن بكل سهوله يروح منك و تلاقي نفسك مضطر تجيب واحد تاني بحوالي 7000 جنيه و العيب ده بيجو اعترفت بيه و قالت ان السبب انه كان بيتصنع بره بيجو لغايه 2008
2- الدينامو بتاعها اسرع دينامو في العالم بيبوظ انا صلحته مره و بعدها بشهر اتغير و السبب ان العازل الحراري بتاعه لما بيتفك بيتكسر و الصنايعيه مش بتركبه تاني و هو جنب فرن الماتور فبيحمص الملف
3- العربيه بالرغم من كبرها الا انها واااااطيه لما كنت بركب فيها مع العيله كانت بتسلم على كل مطب علما باننا خمس افراد بس
4- الفتي بتاع الصنايعيه فيها كتتتتتتتتتير لدرجه اني اشتريت الكابل بتاع البيجو علشان ابقى رايح للصنايعي و عارف ايه اللي في العربيه و اقوله يعمله علشان ممكن يشتغلوك و يقعد يغير وانت تدفع و العيب هو هو
5- ان مفيش اكصدام قدام انت لو لاقدر الله خبط قدام الشبكه هي اللي بتتكسر لان مفيش عليها اكصدام فنصيحه بلاش 307
و اي استفسار انا في الخدمه

[وائل مختار]

شكرا على النصيحه وبارك الله فيك انا بعت الميجان 2006 بتاعتى لكن ما زلت مشدود انى اركب ميجان تانى وانا ميال ليها عن البيجو ربنا يكرم بعربيه تكون موديل 2008 وتكون حالتها كويسه

[ecybrarian]

dedo جاب من الآخر

[shawkylotfy]

شوف بقى فى قسم الميجان كلة هيقولك ميجان طبعا وفى قسم البيجو هتلاقيهم يقوللك بيجو طبعا ولو دخلت شمال فى قسم الكورى كلة هيقولك ولا دى ولا دى الكورى مفيش زية ولا دخلت يمين فى قسم اليابانى كلة هيقولك هى التيوتاااا والصنى وبس و لو طلولت شوية كدة لقدام ودخلت قسم الامريكى كلة هيقولك ياراجل بيجو ورينو اية بس دية العربيات دية مش موجودة فى امريكا اصلا انت تخليك فى الشيفى وبس ولو عايز رايى بصراحة هنا فى مصر الشوارع بدغدغ اى عربية ولا تقولى كورى ولا يابانى ولا فرنسى هيا كلها بلد شورعها زبالة

[dedo_ryo]

على فكره يا استاذ شوقي انا مش منحاز للميجان انا بس حبيت اعرفه ايه عيوب البيجو عن الرينو بالرغم من عشقي لبيجو و هي اكتر عربيه ركبتها بس بدأت تنحدر يعني شوف حضرتك كده ال 504 و 505 و 405 كانوا عربيات العمر و انا ندمت على بيعي ال 405 وندمت برضه على شرائي ال307
انا كمان نسيت عيب كلفني 800 جنيه وهو الموبينه بتاعتها هي مش على اربع كويلات هي على موبينه ولما بتودع بتتغير كلها
و الحمد لله على كل شئ

[وائل مختار]

شكرا على الردود يا جماعه على الرود افادكم الله بس بعيد عن اى تحيز انا لسه بفاضل فى الشراء بين النوعين لكن انا شايف الميجان افضل

[shawkylotfy]

هو بغض النظر عن تعليقى الاول هو طبعا الميجان افضل الميجان مشكلتها تمكن فى الاتى :
1. عفشة مش بتستحمل الطرق الزبالة
2. علبة فيوزات وضفيرة مش بتستحمل الحمل العالى و الحرارة
3. كباس التكييف ضعيف

وشكرا

[MohammedAladel]

صاج الميجان ضعيف للعلم بس مفيش عربية فيكى يا مصر مش بتتخبط

[Ahmed Selim]

هو بغض النظر عن تعليقى الاول هو طبعا الميجان افضل الميجان مشكلتها تمكن فى الاتى :
1. عفشة مش بتستحمل الطرق الزبالة
2. علبة فيوزات وضفيرة مش بتستحمل الحمل العالى و الحرارة
3. كباس التكييف ضعيف

وشكرا

بصراحة يا أستاذ شوقي أنا مش عارف أيه الموضوع معاك....

أنا كان معايا 2005 فى مصر و معايا هنا 2007 و مفيش مشاكل من دي خالص......على الأقل 1 و 2......لأن 3 أتناقشنا فيها قبل كده لو حضرتك فاكر.

هناخد حاجة حاجة......الأول العفشة

.....بص على الصورة دي




الخط الأخضر هو اللى بمشي فيه يومياً و أنا راجع البيت
و الخط الأحمر و أنا خارج من البيت

المسافة حوالي 400 متر إجمالي........بقطعها يومياً على الأقل مرة واحدة......ده بفرض أنى مش خارج بعد ما أرجع من الشغل........المسافة كلها زى ما هو واضح طريق غير مرصوف و مش عاوز أقولك عامل إزاي........طبيعة الأرض أقرب للحجرية منها للرملية.

فى البلد اللى أنا فيها دي..........ده العادي..........زي ما هو واضح برضه من وجود عمارات على جانبي الخط الأحمر.......و برضه دى صورة أوسع للمنطقة توضح اللى أنا بقوله.




أى حاجة غير الشوارع الأسفلت بيبقى فيه بينهم أماكن غير مرصوفة العربيات بتعدى منها أو بتركن فيها..........البلد كلها كده.

يعنى تقدر تقول أنى على الأقل بمشي فى اليوم كيلو فى مناطق مش متسفلتة على الإطلاق و الأرض حجرية مش رملية...........و مع ذلك مفيش مشاكل بتحصل فى عفشة العربية.

و بالنسبة للعربية اللى فى مصر.......كانت ماشية 112 الف كيلو مغيرتش فى العفشة غير بلي البطاحات و بارات الدركسيون بس على ما أذكر.

بالنسبة للضفيرة...........الحرارة بتوصل هنا فى الصيف ل 45 درجة مش عاوز أقول أعلى..........و مش بيحصل مشاكل فى الضفيرة ولا علبة الفيوزات.



برضة فى مصر محصلش معايا مشاكل فى الضفيرة و لا علبة الفيوزات.

معظم الوحوش القدامى أمثال شاركي و العقيد خالد و هاني شاتو و أيمن مومو ( وما أدراك من هو أيمن و عامل أيه فى عربيته ) و غيرهم كتير بس الذاكرة مش ساعفاني........على ما أذكر محدش اشتكي من العفشة أو الضفيرة و علبة الفيوزات.

معظم الناس اللى بتشتكي بيكونوا شاريين العربية مستعملة.........ده اللى أنا لاحظته......طيب أيه الفرق ؟

الفرق أن العربية المستعملة أنت مش عارف أيه اللى كان بيحصل فيها.....يعنى وارد أن يكون صاحب العربية عمل حاجة عند كهربائي مش فاهم فيها قوي و عمل حمل فى حتة معينة فى الضفيرة و باظت مع المالك الجديد......الإحتمالات كتير.

بس صدقني الحاجات اللى أنت كاتبها مش عيوب شائعة......العيوب اللى كانت شائعة معروفة و منها حساس السلونيد و ترس الديفازر على سبيل المثال......و كانت فى الموديلات الأولى.

[تامر.محمد]

انا برده قبل ما اشتري ميجان كنت بافكر في 407 , شكلها و فخامتها عجبوني اكتر من الميجان , بس لما بدأت ادرس الموضوع , و انا بابص على المستعمل المعروض لقيت 7 عربيات بالعدد على كونتاكت , فصرفت نظر

[hayoub26]

أنا بحثت كتير في المنتدى عن الميجان و لاقيت ردود محترمة كتير منكم.
أنا عايز أشتري واحدة خلال ايام لأني خلاص بعت الكليو بتاعتي. بس ميكانيكي مشهور في صقر قريش كنت بتعامل معاه قالي ابعد عنها و لو مصمم يبقى هات 2007 فيما فوق.
سألته ليه؟ قالي مشاكلها أقل و مش كل شوية تغير حاجة (يعني قاصده يقول ِreliable). , قولتله زي ايه يعني ؟ قالي حاجات كتير و مارضاش يقولي تفاصيل أكتر من كده...و قالي كمان أو هات الهاتش باك. الراجل محترم بس أنا مستغرب الكلام شوية. عايز رأيكم ضروروي و جزاكم الله كل خير
أه.. و هل صحيح ان الفئة الأولى اوتماتك أحسن علشان الجنوط السبور اللي في الفئات الأعلى بتهلك العفشة ؟(أنا الصراحة مش مصدق لأنهم مش هبل زي )

[MohammedAladel]

رديت عليك فى موضوعك :)